อรรถกถาเล่มที่ ๕๐ ภาษาบาลี อักษรไทย
อป.อ.๒ (วิสุทฺธ.๒)
หน้าที่ ๑๔๐.

                  ๙๕. ๓. อฑฺฒเจลกตฺเถราปทานวณฺณนา
     ติสฺสสฺสาหํ ภควโตติอาทิกํ อายสฺมโต อฑฺฒเจลกตฺเถรสฺส อปทานํ.
อยมฺปิ เถโร ปุริมพุทฺเธสุ กตาธิกาโร ตตฺถ ตตฺถ ภเว วิวฏฺฏูปนิสฺสยานิ
ปุญฺญานิ อุปจินนฺโต ติสฺสสฺส ภควโต กาเล เอเกน อกุสเลน กมฺเมน
ทุคฺคตกุลเคเห นิพฺพตฺโต วุทฺธิมนฺวาย สทฺธมฺมเทสนํ สุตฺวา ปสนฺนมานโส
จีวรตฺถาย อฑฺฒภาคํ เอกํ ทุสฺสมทาสิ. โส เตเนว ปีติโสมนสฺเสน กาลํ
กตฺวา สคฺเค นิพฺพตฺโต ฉกามาวจรสมฺปตฺติมนุภวิตฺวา ตโต จุโต มนุสฺเสสุ
มนุสฺสสมฺปตฺตีนํ อคฺคภูตํ จกฺกวตฺติสมฺปตฺตึ อนุภวิตฺวา อิมสฺมึ พุทฺธุปฺปาเท
เอกสฺมึ อฑฺฒกุเล นิพฺพตฺโต วุทฺธิปฺปตฺโต สตฺถุ ธมฺมเทสนํ สุตฺวา
ปสนฺนมานโส ปพฺพชิตฺวา นจิรสฺเสว อรหา อโหสิ.
     [๑๔] โส อปรภาเค อตฺตโน ปุพฺพกมฺมํ สริตฺวา โสมนสฺสชาโต
ปุพฺพจริตาปทานํ ปกาเสนฺโต ติสฺสสฺสาหํ ภควโตติอาทิมาห. ตํ สพฺพํ
อุตฺตานตฺถเมวาติ.
                  อฑฺฒเจลกตฺเถราปทานวณฺณนา นิฏฺฐิตา.
                          -------------
                   ๙๖. ๔. สูจิทายกตฺเถราปทานวณฺณนา
     กมฺมาโรหํ ปุเร อาสินฺติอาทิกํ อายสฺมโต สูจิทายกตฺเถรสฺส อปทานํ.
อยมฺปิ ปุริมพุทฺเธสุ กตาธิกาโร อนฺตรนฺตรา กุสลพีชานิ ปูเรนฺโต วิปสฺสิสฺส
ภควโต กาเล อนฺตรนฺตรา กเตน เอเกน กมฺมจฺฉิทฺเทน กมฺมารกุเล
นิพฺพตฺโต วุทฺธิมนฺวาย สกสิปฺเปสุ นิปฺผตฺตึ ปตฺโต สตฺถุ ธมฺมเทสนํ สุตฺวา
ปสนฺนมานโส จีวรสิพฺพนตฺถาย สูจิทานํ อทาสิ,  เตน ปุญฺเญน ทิพฺพสมฺปตฺตึ
อนุภวิตฺวา อปรภาเค มนุสฺเสสุ อุปฺปนฺโน จกฺกวตฺตาทโย สมฺปตฺติโย จ


เนื้อความอรรถกถาฉบับภาษาบาลี อักษรไทย เล่มที่ ๕๐ หน้าที่ ๑๔๐.
http://84000.org/tipitaka/read/attha_page.php?book=50&page=140&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=50&A=3026&modeTY=2&pagebreak=1
http://84000.org/tipitaka/atthapali/th_line.php?B=50&A=3026&modeTY=2&pagebreak=1#p140