อรรถกถาเล่มที่ ๕๐ ภาษาบาลี อักษรไทย
อป.อ.๒ (วิสุทฺธ.๒)
หน้าที่ ๑๙๐.

               ๑๔๘. ๖. อนุเลปทายกตฺเถราปทานวณฺณนา ๑-
     อโนมทสฺสีมุนิโน ๒- ติอาทิกํ อายสฺมโต อนุเลปทายกตฺเถรสฺส อปทานํ.
อยมฺปิ ปุริมพุทฺเธสุ กตาธิกาโร ตตฺถ ตตฺถ ภเว วิวฏฺฏูปนิสฺสยานิ ปุญฺญานิ
อุปจินนฺโต อโนมทสฺสิสฺส ภควโต กาเล กุลเคเห นิพฺพตฺโต มหทฺธโน
มหาโภโค ตสฺส ภควโต โพธิรุกฺขสฺส เวทิกาวลยํ กาเรตฺวา สุธากมฺมญฺจ
กาเรตฺวา วาลุกสนฺถรณํ ททฺทฬฺหมานํ รชตวิมานมิว กาเรสิ. โส เตน ปุญฺญน
สุขปฺปตฺโต อุปฺปนฺนุปฺปนฺนภเว รชตวิมานรชตเคหรชตปาสาเทสุ สุขมนุภวิตฺวา
อิมสฺมึ พุทฺธุปฺปาเท กุลเคเห นิพฺพตฺโต วิญฺญุตํ ปตฺวา สตฺถริ ปสนฺโน
ปพฺพชิตฺวา วิปสฺสนํ อนุยุตฺโต นจิรสฺเสว อรหา อโหสิ.
     [๒๖] โส อปรภาเค "กึ นุ โข กุสลํ กตฺวา มยา อยํ วิเสโส
อธิคโต"ติ ปุพฺเพนิวาสานุสฺสติญาเณน ปฏิปาฏิยา อนุสฺสริตฺวา ปุพฺเพ กตกุสลํ
ชานิตฺวา โสมนสฺสชาโต ปุพฺพจริตาปทานํ ปกาเสนฺโต อโนมทสฺสีมุนิโนติ-
อาทิมาห. ตตฺถ อโนมํ อลามกํ ทสฺสนํ ทสฺสนียํ สรีรํ ยสฺส โส อโนมทสฺสี,
ทฺวตฺตึสมหาปุริสลกฺขณอสีตานุพฺยญฺชนพฺยามปฺปภาสมุชฺชลวิราชิตสรีรตฺตา สุนฺทร-
ทสฺสโนติ อตฺโถ. สุธาย ปิณฺฑํ ทตฺวานาติ โพธิฆเร เวทิกาวลยํ กาเรตฺวา
สกเล โพธิฆเร สุธาเลปนํ กตฺวาติ อตฺโถ. ปาณิกมฺมํ อกาสหนฺติ สารกฏฺเฐน
ผลกปาณิโย กตฺวา ตาหิ ปาณีหิ มฏฺฐกมฺมํ อกาสินฺติ อตฺโถ. เสสํ
สุวิญฺเญยฺยเมวาติ.
                 อนุเลปทายกตฺเถราปทานวณฺณนา นิฏฺฐิตา.
                        ----------------
@เชิงอรรถ: ๑ ปาฬิ. อนุโลมทายก....  ๒ ปาฬิ. อโนมทสฺสิสฺส มุนิโน.


เนื้อความอรรถกถาฉบับภาษาบาลี อักษรไทย เล่มที่ ๕๐ หน้าที่ ๑๙๐.
http://84000.org/tipitaka/read/attha_page.php?book=50&page=190&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=50&A=4114&modeTY=2&pagebreak=1
http://84000.org/tipitaka/atthapali/th_line.php?B=50&A=4114&modeTY=2&pagebreak=1#p190