อรรถกถาเล่มที่ ๕๐ ภาษาบาลี อักษรไทย
อป.อ.๒ (วิสุทฺธ.๒)
หน้าที่ ๒๑๖.

                 ๑๗๔. ๒. นิสฺเสณิทายกตฺเถราปทานวณฺณนา
     โกณฺฑญฺญสฺส ภควโตติอาทิกํ อายสฺมโต นิสฺเสณิทายกตฺเถรสฺส อปทานํ.
อยมฺปิ ปุริมชินวเรสุ กตาธิกาโร อเนกาสุ ชาตีสุ วิวฏฺฏูปนิสฺสยานิ ปุญฺญานิ
อุปจินนฺโต โกณฺฑญฺญสฺส ภควโต กาเล วฑฺฒกิกุเล นิพฺพตฺโต สทฺโธ ปสนฺโน
ภควโต ธมฺมเทสนํ สุตฺวา ปสนฺนมานโส ภควโต วสนปาสาทสฺสาโรหนตฺถาย
สารกฏฺฐมยํ นิสฺเสณึ กตฺวา อุสฺสาเปตฺวา ฐเปสิ. ภควา ตสฺส ปสาทสํวฑฺฒนตฺถาย
ปสฺสนฺตสฺเสว อุปริปาสาทํ อารุหิ. โส อตีว ปสนฺโน เตเนว ปีติโสมนสฺเสน
กาลํ กตฺวา เทวโลเก นิพฺพตฺโต ตตฺถ ทิพฺพสมฺปตฺตึ อนุภวิตฺวา มนุสฺเสสุ
ชายมาโน นิสฺเสณิทานนิสฺสนฺเทน อุจฺจกุเล นิพฺพตฺโต มนุสฺสสุขํ อนุภวิตฺวา
อิมสฺมึ พุทฺธุปฺปาเท เอกสฺมึ กุเล นิพฺพตฺโต สตฺถุ ธมฺมเทสนํ สุตฺวา สทฺธาชาโต
ปพฺพชิตฺวา นจิรสฺเสว อรหา อโหสิ.
     [๙] โส อตฺตโน ปุพฺพกมฺมํ สริตฺวา โสมนสฺสชาโต ปุพฺพจริตาปทานํ
ปกาเสนฺโต โกณฺฑญฺญสฺส ภควโตติอาทิมาห. ตตฺถ โกณฺฑญฺญสฺสาติ กุจฺฉิโต
หุตฺวา เฑติ ปวตฺตตีติ โกณฺโฑ, ลามกสตฺโต, โกณฺฑโต อญฺโญติ โกณฺฑญฺโญ,
อลามโก อุตฺตมปุริโสติ อตฺโถ. อถ วา พฺราหฺมณโคตฺเตสุ โกณฺฑญฺญโคตฺเต
อุปฺปนฺนตฺตา ๑- "โกณฺฑญฺโญ"ติ โคตฺตวเสน ตสฺส นามํ, ตสฺส โกณฺฑญฺญสฺส.
เสสํ ปากฏเมวาติ.
                 นิสฺเสณิทายกตฺเถราปทานวณฺณนา นิฏฺฐิตา.
                          ------------
@เชิงอรรถ: ๑ สี. อุปฺปนฺโน.


เนื้อความอรรถกถาฉบับภาษาบาลี อักษรไทย เล่มที่ ๕๐ หน้าที่ ๒๑๖.
http://84000.org/tipitaka/read/attha_page.php?book=50&page=216&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=50&A=4649&modeTY=2&pagebreak=1
http://84000.org/tipitaka/atthapali/th_line.php?B=50&A=4649&modeTY=2&pagebreak=1#p216