อรรถกถาเล่มที่ ๕๐ ภาษาบาลี อักษรไทย
อป.อ.๒ (วิสุทฺธ.๒)
หน้าที่ ๒๔๑.

กิจฺจํ มหปฺผลทานโต ปรมการํ อุตฺตมกิจฺจํ อโห วิมฺหยนฺติ อตฺโถ. ยถา
ติณโทสาทิวิรหิเตสุ เขตฺเตสุ วปฺปิตํ สาลิพีชํ มหปฺผลํ เทติ, เอวเมว
ราคโทสาทิโทสรหิเต ปริสุทฺธกายวจีสมาจาเร สํฆเขตฺเต โคสีสอตฺถรณกมฺมํ มยา
กตํ, อิทํ มหปฺผลํ เทตีติ วุตฺตํ โหติ. น อญฺญํ กลมคฺฆตีติ อญฺญํ พาหิรสาสเน
กตํ กมฺมํ สํเฆ กตสฺส การสฺส ปูชาสกฺการสฺส กลํ โสฬสึ กลํ โกฏฺฐาสํ น
อคฺฆตีติ สมฺพนฺโธ.
              ฉฏฺฐสตฺตมฏฺฐมนวมทสมาปทานานิ อุตฺตานาเนวาติ.
                       ตึสติมวคฺควณฺณนา นิฏฺฐิตา.
                            ---------
                     ๓๑. ปทุมเกสริยวคฺควณฺณนา ๑-
                 ๓๐๓. ๑. ปทุมเกสริยตฺเถราปทานวณฺณนา
     [๑-๒] เอกตึสติเม วคฺเค ปฐมาปทาเน อิสิสํเฆ อหํ ปุพฺเพติ อหํ
ปุพฺเพ โพธิสมฺภารปูรณกาเล อิสิสํเฆ ปจฺเจกพุทฺธอิสิสมูเห เตสํ สมีเป
หิมวนฺตปพฺพเต มาตงฺคหตฺถิกุเล วารโณ จณฺฑหตฺถี อโหสินฺติ สมฺพนฺโธ.
มนุสฺสาทโย วาเรตีติ วารโณ, อถ วา วาจาย รวติ โกญฺจนาทํ นทตีติ
วารโณ. มเหสีนํ ปสาเทนาติ ปจฺเจกพุทฺธมเหสีนํ ปสาเทน. ปจฺเจกชินเสฏฺเฐสุ,
ธุตราเคสุ ตาทิสูติ โลกธมฺเมหิ นิจฺจเลสุ ปจฺเจกพุทฺเธสุ ปทฺมเกสรํ ปทุมเรณุํ
โอกิรึ  อวสิญฺจินฺติ สมฺพนฺโธ.
     ทุติยตติยาปทานานิ อุตฺตานานิ.
@เชิงอรรถ: ๑ ฉ.ม. ปทุมเกสรวคฺควณฺณนา.


เนื้อความอรรถกถาฉบับภาษาบาลี อักษรไทย เล่มที่ ๕๐ หน้าที่ ๒๔๑.
http://84000.org/tipitaka/read/attha_page.php?book=50&page=241&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=50&A=5145&modeTY=2&pagebreak=1
http://84000.org/tipitaka/atthapali/th_line.php?B=50&A=5145&modeTY=2&pagebreak=1#p241