อรรถกถาเล่มที่ ๕๐ ภาษาบาลี อักษรไทย
อป.อ.๒ (วิสุทฺธ.๒)
หน้าที่ ๒๔๓.

                      ๓๒. อารกฺขทายกวคฺควณฺณนา
            พาตฺตึสติมวคฺเค ปฐมทุติยตติยาปทานานิ สุวิญฺเญยฺยาเนว.
                  ๓๑๖. ๔. สตฺตปทุมิยตฺเถราปทานวณฺณนา
     [๑๖] จตุตฺถาปทาเน ชลชคฺเคหิ โอกิรินฺติ ชลเชหิ อุตฺตเมหิ
อุปฺปลปทุมาทีหิ ปุปฺเผหิ โอกิรึ ปูเชสินฺติ อตฺโถ.
     ปญฺจมาปทานํ อุตฺตานเมว.
                 ๗๑๘. ๖. อาสนสนฺถวิกตฺเถราปทานวณฺณนา
     [๒๖-๒๗] ฉฏฺฐาปทาเน เจติยํ อุตฺตมํ นาม, สิขิโน โลกพนฺธุโนติ
สกลโลกตฺตยสฺส พนฺธุโน ญาตกสฺส สิขิสฺส ภควโต อุตฺตมํ เจติยํ. อิรีเณ
ชนสญฺจรวิรหิเต วเน มนุสฺสานํ โกลาหลวิรหิเต มหาอรญฺเญ อโหสีติ
สมฺพนฺโธ. อนฺธาหิณฺฑามหํ ตทาติ ตสฺมึ กาเล วเน มคฺคมูฬฺหภาเวน อนฺโธ,
น จกฺขุนา อนฺโธ, อหํ อาหิณฺฑามิ มคฺคํ ปริเยสามีติ อตฺโถ. ปวนา
นิกฺขมนฺเตนาติ มหาวนโต นิกฺขมนฺเตน มยา สีหาสนํ อุตฺตมาสนํ, สีหสฺส วา
ภควโต อาสนํ ทิฏฺฐนฺติ อตฺโถ. เอกํสํ อญฺชลึ กตฺวาติ เอกํสํ อุตฺตราสงฺคํ
กตฺวา สิรสิ อญฺชลึ ฐเปตฺวาติ อตฺโถ. สนฺถวึ โลกนายกนฺติ สกลโลกตฺตยนยํ
ตํ นิพฺพานํ ปาเปนฺตํ โถมิตํ ถุตึ อกาสินฺติ อตฺโถ.
                  ๓๑๙. ๗. สทฺทสญฺญกตฺเถราปทานวณฺณนา
     [๓๔] สตฺตมาปทาเน สุทสฺสโน มหาวีโรติ สุนฺทรทสฺสโน ทฺวตฺตึส-
มหาปุริสลกฺขณสมฺปนฺนสรีรตฺตา มโนหรทสฺสโน มหาวีริโย สิทฺธตฺโถ ภควาติ
สมฺพนฺโธ. วสติ ฆรมุตฺตเมติ อุตฺตเม วิหาเร วสตีติ อตฺโถ.
                 อฏฺฐมนวมทสมาปทานานิ อุตฺตานาเนวาติ.
                     พาตฺตึสติมวคฺควณฺณนา นิฏฺฐิตา.
                           ----------


เนื้อความอรรถกถาฉบับภาษาบาลี อักษรไทย เล่มที่ ๕๐ หน้าที่ ๒๔๓.
http://84000.org/tipitaka/read/attha_page.php?book=50&page=243&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=50&A=5187&modeTY=2&pagebreak=1
http://84000.org/tipitaka/atthapali/th_line.php?B=50&A=5187&modeTY=2&pagebreak=1#p243