อรรถกถาเล่มที่ ๕๐ ภาษาบาลี อักษรไทย
อป.อ.๒ (วิสุทฺธ.๒)
หน้าที่ ๓๒๘.

    [๑๖๖] คุณาคุณวิทูติ คุณญฺจ อคุณญฺจ คุณาคุณํ, วณฺณาวณฺณํ,
กุสลากุสลํ วา ตํ ชานาตีติ คุณาคุณวิทู. กตญฺญูติ อญฺเญหิ กตคุณํ ชานาตีติ
กตญฺญู, เอกทิวสมฺปิ ภตฺตทานาทินา กตูปการสฺส รชฺชมฺปิ ทาตุํ สมตฺถตฺตา
กตญฺญู. กตเวทีติ กตํ วินฺทติ อนุภวติ สมฺปฏิจฺฉตีติ กตเวที. ติตฺเถ โยเชติ
ปาณิเนติ สพฺพสตฺเต นิพฺพานปเวสนุปาเย กุสลปเถ มคฺเค ธมฺมเทสนาย
โยเชติ สมฺปโยเชติ ปติฏฺฐาเปตีติ อตฺโถ. เสสํ อุตฺตานตฺถเมว. คมนวณฺณน-
คาถานมตฺโถ เถรคาถายํ วุตฺโตเยวาติ.
                   กาฬุทายิตฺเถราปทานวณฺณนา นิฏฺฐิตา.
                         --------------
                  ๕๔๙/๑๓๗. ๗. อภยตฺเถราปทานวณฺณนา
     สตฺตมาปทาเน ปทุมุตฺตโร นาม ชิโนติอาทิกํ อายสฺมโต อภยตฺเถรสฺส
อปทานํ. อยมฺปิ ปุริมชินวเรสุ กตาธิกาโร ตตฺถ ตตฺถ ภเว วิวฏฺฏูปนิสฺสยานิ
ปุญฺญานิ อุปจินนฺโต ปทุมุตฺตรสฺส ภควโต กาเล หํสวตีนคเร พฺราหฺมณกุเล
นิพฺพตฺโต. โส วุทฺธิมนฺวาย เวทงฺคปารโค สกปรสมยกุสโล เอกทิวสํ สตฺถุ
ธมฺมเทสนํ สุตฺวา ปสนฺนมานโส ภควนฺตํ คาถาหิ โถเมสิ. โส ตตฺถ ยาวตายุกํ
ฐตฺวา ปุญฺญานิ กตฺวา ตโต จุโต เทวโลเก นิพฺพตฺโต อปราปรํ สุคตีสุเยว
สํสรนฺโต อิมสฺมึ พุทฺธุปฺปาเท ราชคเห พิมฺพิสารรญฺโญ ปุตฺโต หุตฺวา นิพฺพตฺติ,
อภโยเตฺววสฺส นามํ กรึสุ. โส วยปฺปตฺโต นิคณฺเฐหิ สทฺธึ วิสฺสาสิโก หุตฺวา
จรนฺโต เอกทิวสํ นิคณฺเฐน นาฏปุตฺเตน สตฺถุ วาทาโรปนตฺถาย เปสิโต
นิปุณปญฺหํ ปุจฺฉิตฺวา นิปุณพฺยากรณํ สุตฺวา ปสนฺโน สตฺถุ สนฺติเก
ปพฺพชิตฺวา กมฺมฏฺฐานานุรูปํ ญาณํ เปเสตฺวา นจิรสฺเสว อรหตฺตํ ปาปุณิ.


เนื้อความอรรถกถาฉบับภาษาบาลี อักษรไทย เล่มที่ ๕๐ หน้าที่ ๓๒๘.
http://84000.org/tipitaka/read/attha_page.php?book=50&page=328&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=50&A=7047&modeTY=2&pagebreak=1
http://84000.org/tipitaka/atthapali/th_line.php?B=50&A=7047&modeTY=2&pagebreak=1#p328