อรรถกถาเล่มที่ ๕๑ หน้าที่ ๓๒๒.

[๒๒] สุผุลฺโล สาลราชาว วิชฺชูว คคเน ยถา มชฺฌนฺหิเกว สูริโย เอวํ โส อุปโสภถ. [๒๓] ตสฺสาปิ อตุลเตชสฺส สมกํ อาสิ ชีวิตํ วสฺสสตสหสฺสานิ โลเก อฏฺฐาสิ จกฺขุมา. [๒๔] โอภาสํ ทสฺสยิตฺวาน วิมลํ กตฺวาน สาสนํ จวิ จนฺโทว คคเน นิพฺพุโต โส สสาวโก"ติ. ตตฺถ พิมฺพิชาโลติ รตฺตกุรวกรุกฺโข. ทสสหสฺสิมฺหิ ธาตุยาติ ทสสหสฺสิยา โลกธาตุยา. วิชฺชูวาติ วิชฺชุลตา วิย. อุปโสภถาติ ยถา คคเน วิชฺชุ จ มชฺฌนฺหิเก สูริโย จ อุปโสภติ, เอวํ โส ภควา อุปโสภิตฺถาติ อตฺโถ. สมกนฺติ สพฺเพหิ นรสตฺเตหิ สมเมว ตสฺส อายุ อโหสีติ อตฺโถ. จวีติ จุโต. จนฺโทวาติ คคนโต จนฺทิมา วิย จวีติ อตฺโถ. ธมฺมทสฺสี กิร ภควา สาลวตีนคเร เกสาราเม ปรินิพฺพายิ. เสสเมตฺถ คาถาสุ ปากฏเมวาติ. ธมฺมทสฺสีพุทฺธวํสวณฺณนา นิฏฺฐิตา. นิฏฺฐิโต ปณฺณรสโม พุทฺธวํโส. ------------------ ๑๘. สิทฺธตฺถพุทฺธวํสวณฺณนา ธมฺมทสฺสิมฺหิ ภควติ ปรินิพฺพุเต อนฺตรหิเต จสฺส สาสเน ตสฺมึ กปฺเป อตีเต กปฺปสหสฺเส จ สตฺตสุ กปฺปสเตสุ จ ฉสุ กปฺเปสุ จ อติกฺกนฺเตสุ อิโต จตุนวุติกปฺปมตฺถเก เอกสฺมึ กปฺเป เอโกว โลกตฺถจโร อธิคตปรมตฺโถ สิทฺธตฺโถ นาม สตฺถา โลเก ปาตุรโหสิ. เตน วุตฺตํ:-

เนื้อความอรรถกถาฉบับภาษาบาลี อักษรไทย เล่มที่ ๕๑ หน้าที่ ๓๒๒. http://84000.org/tipitaka/read/attha_page.php?book=51&page=322&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=51&A=7143&modeTY=2&pagebreak=1 http://84000.org/tipitaka/atthapali/th_line.php?B=51&A=7143&modeTY=2&pagebreak=1#p322