อรรถกถาเล่มที่ ๕๕ หน้าที่ ๑๓๗.

๒. โอกาสสจฺฉิกฏฺฐ ๑. อนุโลมปจฺจนีกวณฺณนา [๑๑] เอวํ สุทฺธิกสจฺฉิกฏฺฐํ วิตฺถาเรตฺวา อิทานิ ตเมว อปเรหิ โอกาสาทีหิ นเยหิ วิตฺถาเรตุํ ปุน ปุคฺคโล อุปลพฺภตีติอาทิ อารทฺธํ. ตตฺถ ปุจฺฉา สกวาทิสฺส, ปฏิญฺญา ปรวาทิสฺส. ปุน สพฺพตฺถาติ สรีรํ สนฺธาย อนุโยโค สกวาทิสฺส, รูปสฺมึ อตฺตานํ สมนุปสฺสนาโทสญฺจ อญฺญํ ชีวํ อญฺญํ สรีรนฺติ อาปชฺชนโทสญฺจ ทิสฺวา ปฏิกฺเขโป ปรวาทิสฺส. เสสเมตฺถ อนุโลมปจฺจนีกปญฺจเก เหฏฺฐา วุตฺตนเยเนว เวทิตพฺพํ. ปาโฐ ปน สงฺขิตฺโต. ตตฺถ ยสฺมา สรีรํ สนฺธาย "สพฺพตฺถ นุปลพฺภตี"ติ วุตฺเต สรีรโต พหิ อุปลพฺภตี"ติ อาปชฺชติ, ตสฺมา ปจฺจนีเก ปฏิกฺเขโป สกวาทิสฺส, ปฐมํ อนุชานิตฺวา ปจฺฉา อวชานาตีติ ฉลวาทวเสน ^๑- ปฏิกมฺมํ ปรวาทิสฺส. เสสํ ปากฏเมว. ๓. กาลสจฺฉิกฏฺฐ ๑. อนุโลมปจฺจนีกวณฺณนา [๑๒] ทุติยนเย สพฺพทาติ ปุริมปจฺฉิมชาติกาลญฺจ ธรมานปรินิพฺพุตกาลญฺจ สนฺธาย อนุโยโค สกวาทิสฺส, เสฺวว ขตฺติโย โส พฺราหฺมโณติอาทีนํ อาปตฺติโทสญฺจ ธรมานปรินิพฺพุตานํ วิเสสาภาวโทสญฺจ ทิสฺวา ปฏิกฺเขโป ปรวาทิสฺส. เสสํ ปฐมนเย วุตฺตสทิสเมว. ๔. อวยวสจฺฉิกฏฐ ๑. อนุโลมปจฺจนีกวณฺณนา [๑๓] ตติยนเย สพฺเพสูติ ขนฺธายตนาทีนิ สนฺธาย อนุโยโค สกวาทิสฺส, รูปสฺมึ อตฺตา, จกฺขุสฺมึ อตฺตาติอาทิโทสภเยน ปฏิกฺเขโป ปรวาทิสฺส. เสสํ ตาทิสเมวาติ. @เชิงอรรถ: ^๑ ฉ.ม. ฉลวาทสฺส วเสน

เนื้อความอรรถกถาฉบับภาษาบาลี อักษรไทย เล่มที่ ๕๕ หน้าที่ ๑๓๗. http://84000.org/tipitaka/read/attha_page.php?book=55&page=137&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=55&A=3057&modeTY=2&pagebreak=1 http://84000.org/tipitaka/atthapali/th_line.php?B=55&A=3057&modeTY=2&pagebreak=1#p137