romanATTHA book 55 Page 200.

Paṭikkhepo sakavādissa. Na hevanti vacanamattaṃ gahetvā laddhipatiṭṭhāpanaṃ paravādissa. Evaṃ patiṭṭhitā pana laddhi appatiṭṭhitāva hotīti. Saṃvarakathāvaṇṇanā niṭṭhitā. ----------- 11. Asaññakathāvaṇṇanā [381] Idāni asaññakathā nāma hoti. Tattha yesaṃ "saṅkhārapaccayā viññāṇan"ti vacanato vinā viññāṇena paṭisandhi nāma natthi. "saññuppādā ca pana te devā tamhā kāyā pavattantī"ti ^1- vacanato asaññasattānampi cutipaṭisandhikkhaṇe saññā atthīti laddhi seyyathāpi etarahi andhakānaṃ, te sandhāya pucchā sakavādissa, paṭiññā itarassa. Tato naṃ sakavādī "kinte taṃ ṭhānaṃ saññābhavo"tiādīhi codetuṃ saññābhavo saññāgatītiādimāha. Taṃ sabbaṃ tato parañca pālinayeneva veditabbanti. Asaññakathāvaṇṇanā niṭṭhitā. ---------- 12. Nevasaññānāsaññāyatanakathāvaṇṇanā [384] Idāni nevasaññānāsaññāyatanakathā nāma hoti. Tattha yesaṃ "nevasaññānāsaññāyatanan"ti vacanato na vattabbaṃ "tasmiṃ bhave saññā atthī"ti laddhi seyyathāpi etarahi andhakānaṃ, te sandhāya pucchā sakavādissa, paṭiññā itarassa. Sesamettha sabbaṃ pālinayeneva veditabbanti. Nevasaññānāsaññāyatanakathāvaṇṇanā niṭṭhitā. Tatiyo vaggo samatto. ----------- @Footnote: ¹ cha.Ma. cavantīti

The Pali Atthakatha in Roman Character Volume 55 Page 200. http://84000.org/tipitaka/read/attha_page.php?book=55&page=200&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=55&A=4487&pagebreak=1 http://84000.org/tipitaka/atthapali/rm_line.php?B=55&A=4487&pagebreak=1#p200