อรรถกถาเล่มที่ ๕๕ หน้าที่ ๒๗๒.

๙. ธมฺมตณฺหาอพฺยากตาติกถาวณฺณนา [๖๗๖-๖๘๐] อิทานิ ธมฺมตณฺหา อพฺยากตาติกถา นาม โหติ. ตตฺถ รูปตณฺหา ฯเปฯ ธมฺมตณฺหาติ อิมาสุ ฉสุ ตณฺหาสุ ยสฺมา สพฺพปจฺฉิมา ตณฺหา ธมฺมตณฺหาติ วุตฺตา, ตสฺมา สา อพฺยากตาติ เยสํ ลทฺธิ เสยฺยถาปิ ปุพฺพเสลิยานํ, เต สนฺธาย ปุจฺฉา สกวาทิสฺส, ปฏิญฺญา อิตรสฺส. เสสปญฺหานํ ปาลิยา อตฺโถ นิยฺยาติ. กามตณฺหาติอาทีหิ ตีหิ โกฏฺฐาเสหิ ฉปิ ตณฺหา สงฺขิปิตฺวา ทสฺสิตา, รูปาทีสุปิ ^๑- ฉสุ อารมฺมเณสุ กามสฺสาทวเสน ปวตฺตา ตณฺหา กามตณฺหา, "ภวิสฺสติ อตฺตา จ โลโก จา"ติ สสฺสตทิฏฺฐิสหคตา ตณฺหา ภวตณฺหา, "น ภวิสฺสตี"ติ อุจฺเฉททิฏฺฐิสหคตา ตณฺหา วิภวตณฺหาติ. นนุ สา ธมฺมตณฺหาติ ปทํ ตณฺหาย ธมฺมารมฺมณมารพฺภ ปวตฺตึ ทีเปติ, น อพฺยากตภาวํ, ตสฺมา อสาธกนฺติ. ธมฺมตณฺหาอพฺยากตาติกถาวณฺณนา นิฏฺฐิตา. ------------- ๑๐. ธมฺมตณฺหานทุกฺขสมุทโยติกถาวณฺณนา [๖๘๑-๖๘๕] อิทานิ ธมฺมตณฺหา น ทุกฺขสมุทโยติกถา นาม โหติ. ตตฺราปิ ยสฺมา สา ธมฺมตณฺหาติ วุตฺตา, ตสฺมา น ทุกฺขสมุทโยติ เยสํ ลทฺธิ เสยฺยถาปิ ปุพฺพเสลิยานํเยว, เต สนฺธาย ปุจฺฉา สกวาทิสฺส, ปฏิญฺญา อิตรสฺส. เสสํ ปุริมกถาสทิสเมวาติ. ธมฺมตณฺหานทุกฺขสมุทโยติกถาวณฺณนา นิฏฺฐิตา. เตรสโม วคฺโค สมตฺโต. ----------- @เชิงอรรถ: ^๑ ฉ.ม. รูปาทีสุ หิ

เนื้อความอรรถกถาฉบับภาษาบาลี อักษรไทย เล่มที่ ๕๕ หน้าที่ ๒๗๒. http://84000.org/tipitaka/read/attha_page.php?book=55&page=272&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=55&A=6126&modeTY=2&pagebreak=1 http://84000.org/tipitaka/atthapali/th_line.php?B=55&A=6126&modeTY=2&pagebreak=1#p272