romanATTHA book 55 Page 489.

[203-233] Napurejātamūlake hetuyā sattāti heṭṭhā "āruppe kusalaṃ ekaṃ khandhaṃ paṭiccā"tiādinā nayena napurejāte ^1- dassitāneva. Sabbasattakesupi eseva nayo. Nakammamūlake hetuyā tiṇītiādīsu cetanāva paccayuppannā, tasmā kusalaṃ akusalaṃ abyākatañca paṭicca uppattiṃ sandhāya tīṇīti vuttaṃ. Iminā nayena "ekaṃ dve tīṇi pañca satta navā"ti āgataṭṭhānesu gaṇanā veditabbā. "cattāri cha aṭṭhā"ti imā pana tisso gaṇanā natthevāti. Paccayapaccanīyānulomavaṇṇanā niṭṭhitā. Niṭṭhitā ca paṭiccavārassa atthavaṇṇanā. ------------- 2. Sahajātavāravaṇṇanā [234-242] Sahajātavāre kusalaṃ dhammaṃ sahajātoti kusalaṃ dhammaṃ paṭicca tena sahajāto hutvāti attho. Sesamettha paṭiccavāre vuttanayeneva veditabbaṃ. Avasāne panassa "paṭiccatthaṃ ^2- nāma sahajātatthaṃ, sahajātatthaṃ nāma paṭiccatthan"ti idaṃ ubhinnampi etesaṃ vārānaṃ atthato ninnānākaraṇabhāvadassanatthaṃ vuttaṃ. Atthato hi ete dvepi ninnānākaraṇā. Evaṃ santepi aññamaññassa atthaniyamanatthaṃ vuttā. "cakkhuñca paṭicca rūpe cā"tiādīsu hi asahajātampi paṭicca uppajjatīti vuccati. Sahajātampi ca upādārūpaṃ bhūtarūpassa paccayo na hoti. Iti paṭiccavārena sahajātapaccayabhāvaṃ, sahajātavārena ca paṭiccāti vuttassa sahajātabhāvaṃ niyametuṃ ubhopete vuttā. Apica tathā bujjhanakānaṃ ajjhāsayavasena desanāvilāsena niruttipaṭisambhidāppabhedajānanavasena cāpi ete ubhopi vuttāti. Sahajātavāravaṇṇanā niṭṭhitā. -------------- @Footnote: ¹ cha.Ma. purejāte ² Sī.,Ma. paṭiccaṭṭhaṃ, cha. paṭiccattaṃ. evamuparipi

The Pali Atthakatha in Roman Character Volume 55 Page 489. http://84000.org/tipitaka/read/attha_page.php?book=55&page=489&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=55&A=11041&pagebreak=1 http://84000.org/tipitaka/atthapali/rm_line.php?B=55&A=11041&pagebreak=1#p489