ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๕๕ ภาษาบาลี อักษรไทย ปญฺจ.อ. (ปรมตฺถที.)

หน้าที่ ๔๘๙.

    [๒๐๓-๒๓๓] นปุเรชาตมูลเก เหตุยา สตฺตาติ เหฏฺฐา "อารุปฺเป กุสลํ
เอกํ ขนฺธํ ปฏิจฺจา"ติอาทินา นเยน นปุเรชาเต ๑- ทสฺสิตาเนว. สพฺพสตฺตเกสุปิ
เอเสว นโย. นกมฺมมูลเก เหตุยา ติณีติอาทีสุ เจตนาว ปจฺจยุปฺปนฺนา,
ตสฺมา กุสลํ อกุสลํ อพฺยากตญฺจ ปฏิจฺจ อุปฺปตฺตึ สนฺธาย ตีณีติ วุตฺตํ. อิมินา
นเยน "เอกํ เทฺว ตีณิ ปญฺจ สตฺต นวา"ติ อาคตฏฺฐาเนสุ คณนา เวทิตพฺพา.
"จตฺตาริ ฉ อฏฺฐา"ติ อิมา ปน ติสฺโส คณนา นตฺเถวาติ.
                   ปจฺจยปจฺจนียานุโลมวณฺณนา นิฏฺฐิตา.
                   นิฏฺฐิตา จ ปฏิจฺจวารสฺส อตฺถวณฺณนา.
                          -------------
                        ๒. สหชาตวารวณฺณนา
    [๒๓๔-๒๔๒] สหชาตวาเร กุสลํ ธมฺมํ สหชาโตติ กุสลํ ธมฺมํ ปฏิจฺจ
เตน สหชาโต หุตฺวาติ อตฺโถ. เสสเมตฺถ ปฏิจฺจวาเร วุตฺตนเยเนว เวทิตพฺพํ.
อวสาเน ปนสฺส "ปฏิจฺจตฺถํ ๒- นาม สหชาตตฺถํ, สหชาตตฺถํ นาม ปฏิจฺจตฺถนฺ"ติ
อิทํ อุภินฺนมฺปิ เอเตสํ วารานํ อตฺถโต นินฺนานากรณภาวทสฺสนตฺถํ วุตฺตํ.
อตฺถโต หิ เอเต เทฺวปิ นินฺนานากรณา. เอวํ สนฺเตปิ อญฺญมญฺญสฺส
อตฺถนิยมนตฺถํ วุตฺตา. "จกฺขุญฺจ ปฏิจฺจ รูเป จา"ติอาทีสุ หิ อสหชาตมฺปิ
ปฏิจฺจ อุปฺปชฺชตีติ วุจฺจติ. สหชาตมฺปิ จ อุปาทารูปํ ภูตรูปสฺส ปจฺจโย น
โหติ. อิติ ปฏิจฺจวาเรน สหชาตปจฺจยภาวํ, สหชาตวาเรน จ ปฏิจฺจาติ วุตฺตสฺส
สหชาตภาวํ นิยเมตุํ อุโภเปเต วุตฺตา. อปิจ ตถา พุชฺฌนกานํ อชฺฌาสยวเสน
เทสนาวิลาเสน นิรุตฺติปฏิสมฺภิทาปฺปเภทชานนวเสน จาปิ เอเต อุโภปิ วุตฺตาติ.
                      สหชาตวารวณฺณนา นิฏฺฐิตา.
                         --------------
@เชิงอรรถ:  ฉ.ม. ปุเรชาเต     สี.,ม. ปฏิจฺจฏฺฐํ, ฉ. ปฏิจฺจตฺตํ. เอวมุปริปิ



เนื้อความอรรถกถาฉบับภาษาบาลี อักษรไทย เล่มที่ ๕๕ หน้าที่ ๔๘๙. http://84000.org/tipitaka/read/attha_page.php?book=55&page=489&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=55&A=11041&modeTY=2&pagebreak=1 http://84000.org/tipitaka/atthapali/th_line.php?B=55&A=11041&modeTY=2&pagebreak=1#p489


จบการแสดงผล หน้าที่ ๔๘๙.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]