อรรถกถาเล่มที่ ๕๕ หน้าที่ ๕๖๘.

๔. ติกทุกปฏฺฐานวณฺณนา ติกทุกปฏฺฐาเนปิ กุสลํ เหตุํ ธมฺมํ ปฏิจฺจ กุสโล เหตุ ธมฺโม อุปฺปชฺชติ เหตุปจฺจยาติ ปญฺหามตฺตุทฺธารวเสเนว เทสนา กตา. ตตฺถ ยถา เหฏฺฐา เหตุทุเกน สทฺธึ กุสลปทํ โยเชตฺวา สพฺพปจฺจยวเสน สพฺพวาเรสุ สงฺเขปโต เทสนา กตา, เอวมิธ กุสลตฺติเกน สทฺธึ เหตุปทํ โยเชตฺวา สพฺพปจฺจยวเสน สพฺพวาเรสุ สงฺเขปโต เทสนา กตา. ยถา จ เหตุปทํ, เอวํ นเหตุปทมฺปิ กุสลตฺติเกน สทฺธึ โยเชตฺวา กุสลตฺติกเหตุทุกํ นิฏฺฐาปิตํ. ตโต ปรํ สุขาย เวทนาย สมฺปยุตฺตํ เหตุํ ธมฺมนฺติอาทินา นเยน เวทนาตฺติกเหตุทุกาทีนิ เอกวีสติ ติกทุกานิ ทสฺสิตานิ. เอวํ พาวีสติยา ติเกหิ สทฺธึ เหตุทุกํ โยเชตฺวา ปุน เตหิเยว สทฺธึ สเหตุกทุกาทโย สรณทุกปริโยสานา ลพฺภมานวเสน สพฺพทุกา โยชิตา. อิธาปิ ยํ ยํ ปทํ โยชนํ น คจฺฉติ, ตํ ตเทว ^๑- ปาลิยํเยว ปฏิกฺขิตฺตํ. เอวํ ทุกสตํ คเหตฺวา ทฺวาวีสติยา ติเกสุ ปกฺขิปิตฺวา ติกทุกปฏฺฐานํ นาม เทสิตํ. ตตฺราปิ เยน เยน นเยน ปาลิ สงฺขิตฺตา, โส โส นโย วิตฺถารโต เวทิตพฺโพติ. ติกทุกปฏฺฐานวณฺณนา นิฏฺฐิตา. ---------- ๕. ติกติกปฏฺฐานวณฺณนา ติกติกปฏฺฐาเนปิ กุสลํ สุขาย เวทนาย สมฺปยุตฺตํ ธมฺมํ ปฏิจฺจ กุสโล สุขาย เวทนาย สมฺปยุตฺโต ธมฺโม อุปฺปชฺชติ เหตุปจฺจยาติ ปญฺหุทฺธารวเสเนว สงฺเขปโต เทสนา กตา. เอตฺถ จ กุสลตฺติกํ เวทนาตฺติกาทีหิ, เวทนาตฺติกาทโย จ กุสลตฺติเกนาติ เอวํ ติเกสุเยว ติกา ปกฺขิตฺตา. เยน เยน จ ปเทน สทฺธึ ยํ ยํ ปทํ โยชนํ น คจฺฉติ, ตํ ตํ หาเปตฺวา ลพฺภมานวเสเนว สพฺพปจฺจเยสุ วารา จ คณนนยา จ ทสฺสิตา, ตสฺมา เต สาธุกํ ปาลึ อุปปริกฺขิตฺวา เวทิตพฺพา. @เชิงอรรถ: ^๑ ฉ.ม. ตํ ตํ

เนื้อความอรรถกถาฉบับภาษาบาลี อักษรไทย เล่มที่ ๕๕ หน้าที่ ๕๖๘. http://84000.org/tipitaka/read/attha_page.php?book=55&page=568&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=55&A=12833&modeTY=2&pagebreak=1 http://84000.org/tipitaka/atthapali/th_line.php?B=55&A=12833&modeTY=2&pagebreak=1#p568