พระไตรปิฎกเล่มที่ ๑๕ ภาษาบาลี อักษรไทย
พระสุตตันตปิฎกเล่มที่ ๗ สุตฺต. สํ. สคาถวคฺโค

     [๓๙๒]   อิทมโวจ ฯเปฯ
          ธญฺญํ ธนํ รชตํ ชาตรูปํ         ปริคฺคหํ วาปิ ยทตฺถิ กิญฺจิ
          ทาสา กมฺมกรา เปสฺสา          เย จสฺส อนุชีวิโน
@เชิงอรรถ: ๑ โป. ม. ยุ. วสฺสสตานิ พหูนิ น ทิสฺสนฺติ ฯ  ๒ สี อิธ ฯ  ๓ ยุ. มหาโรรุเว
@นิรเย ฯ
          สพฺพนฺนาทาย คนฺตพฺพํ         สพฺพํ นิกฺขีปคามินํ
          ยญฺจ กโรติ กาเยน                วาจาย อุท เจตสา
          ตํ หิ ตสฺส สกํ โหติ                ตญฺจ อาทาย คจฺฉติ
          ตญฺจสฺส อนุคํ โหติ               ฉายาว อนุปายินี
          ตสฺมา กเรยฺย กลฺยาณํ            นิจยํ สมฺปรายิกํ
          ปุญฺญานิ ปรโลกสฺมึ             ปติฏฺฐา โหนฺติ ปาณินนฺติ ฯ
                                  ทุติโย วคฺโค ฯ
                                    ตสฺสุทฺทานํ
          ชฏิลา ปญฺจราชาโน             โทณปากกุเรน จ
          สงฺคาเมน เทฺว วุตฺตานิ          ธีตรา ๑- เทฺว อปฺปมาเทน จ
          อปุตฺตเกน เทฺว วุตฺตา           วคฺโค เตน ปวุจฺจตีติ ฯ
                                       -------
@เชิงอรรถ: ๑ ม. มลฺลิกา ฯ
                                ตติยวคฺโค ตติโย
                                           -----
                                ปฐมํ ปุคฺคลสุตฺตํ
     [๓๙๓]   สาวตฺถิยํ  ...  อถ โข ราชา ปเสนทิโกสโล เยน ภควา
เตนุปสงฺกมิ   อุปสงฺกมิตฺวา   ภควนฺตํ  อภิวาเทตฺวา  เอกมนฺตํ  นิสีทิ  ฯ
เอกมนฺตํ   นิสินฺนํ   โข   ราชานํ   ปเสนทิโกสลํ   ภควา   เอตทโวจ
จตฺตาโรเม   มหาราช   ปุคฺคลา   สนฺโต  สํวิชฺชมานา  โลกสฺมึ  กตเม
จตฺตาโร   ตโม   ตมปรายโน   ตโม  โชติปรายโน  โชติ  ตมปรายโน
โชติ โชติปรายโน ฯ
     [๓๙๔]   กถญฺจ  มหาราช  ปุคฺคโล  ตโม  ตมปรายโน  โหติ  ฯ
อิธ   มหาราช   เอกจฺโจ   ปุคฺคโล   นีเจ   กุเล  ปจฺฉาชาโต  โหติ
จณฺฑาลกุเล   วา   เวณกุเล   วา  เนสาทกุเล  วา  รถการกุเล  วา
ปุกฺกุสกุเล    วา    ทฬิทฺเท   อปฺปนฺนปานโภชเน   กสิรวุตฺติเก   ยตฺถ
กสิเรน   ฆาสจฺฉาโท   ลพฺภติ  ฯ  โส  จ  โหติ  ทุพฺพณฺโณ  ทุทฺทสฺสิโก
โอโกฏิมโก   พหฺวาพาโธ  กาโณ  วา  กุณี  วา  ขญฺโช  วา  ปกฺขหโต
วา    น    ลาภี   อนฺนสฺส   วตฺถสฺส   ยานสฺส   มาลาคนฺธวิเลปนสฺส
เสยฺยาวสถปทีเปยฺยสฺส  ฯ  โส  กาเยน  ทุจฺจริตํ  จรติ  วาจาย ทุจฺจริตํ
จรติ   มนสา   ทุจฺจริตํ   จรติ   ฯ   โส   กาเยน  ทุจฺจริตํ  จริตฺวา
วาจาย   ทุจฺจริตํ   จริตฺวา   มนสา  ทุจฺจริตํ  จริตฺวา  กายสฺส  เภทา
ปรมฺมรณา   อปายํ   ทุคฺคตึ   วินิปาตํ   นิรยํ  อุปปชฺชติ  ฯ  เสยฺยถาปิ
มหาราช   ปุริโส   อนฺธการา   วา   อนฺธการํ   คจฺเฉยฺย  ตมา  วา
ตมํ    คจฺเฉยฺย    โลหิตมลา   วา   โลหิตมลํ   คจฺเฉยฺย   ตถูปมาหํ
มหาราช   อิมํ   ปุคฺคลํ   วทามิ   ฯ   เอวํ   โข  มหาราช  ปุคฺคโล
ตโม ตมปรายโน โหติ ฯ
     [๓๙๕]   กถญฺจ  มหาราช  ปุคฺคโล  ตโม  โชติปรายโน  โหติ  ฯ
อิธ   มหาราช   เอกจฺโจ   ปุคฺคโล   นีเจ   กุเล  ปจฺฉาชาโต  โหติ
จณฺฑาลกุเล   วา   เวณกุเล   วา  เนสาทกุเล  วา  รถการกุเล  วา
ปุกฺกุสกุเล    วา    ทฬิทฺเท   อปฺปนฺนปานโภชเน   กสิรวุตฺติเก   ยตฺถ
กสิเรน  ฆาสจฺฉาโท  ลพฺภติ  ฯ  โส  จ [๑]- โหติ ทุพฺพณฺโณ ทุทฺทสฺสิโก
โอโกฏิมโก   พหฺวาพาโธ  กาโณ  วา  กุณี  วา  ขญฺโช  วา  ปกฺขหโต
วา   น  ลาภี  อนฺนสฺส  ปานสฺส  วตฺถสฺส  ยานสฺส  มาลาคนฺธวิเลปนสฺส
เสยฺยาวสถปทีเปยฺยสฺส    ฯ   โส   กาเยน   สุจริตํ   จรติ   วาจาย
สุจริตํ   จรติ   มนสา  สุจริตํ  จรติ  ฯ  โส  กาเยน  สุจริตํ  จริตฺวา
วาจาย   สุจริตํ   จริตฺวา   มนสา   สุจริตํ   จริตฺวา  กายสฺส  เภทา
ปรมฺมรณา สุคตึ สคฺคํ โลกํ อุปปชฺชติ ฯ
     {๓๙๕.๑}   เสยฺยถาปิ   มหาราช  ปุริโส  ปฐวิยา  วา  ปลฺลงฺกํ
อาโรเหยฺย   ปลฺลงฺกา   วา   อสฺสปิฏฺฐึ  อาโรเหยฺย  อสฺสปิฏฺฐิยา  วา
หตฺถิกฺขนฺธํ    อาโรเหยฺย    หตฺถิกฺขนฺธา   วา   ปาสาทํ   อาโรเหยฺย
ตถูปมาหํ   มหาราช   อิมํ   ปุคฺคลํ   วทามิ   ฯ  เอวํ  โข  มหาราช
ปุคฺคโล ตโม โชติปรายโน โหติ ฯ
     [๓๙๖]   กถญฺจ  มหาราช  ปุคฺคโล  โชติ  ตมปรายโน  โหติ  ฯ
@เชิงอรรถ: ๑ เอตฺถนฺตเร โขสทฺโท ทิสฺสติ ฯ
อิธ   มหาราช   เอกจฺโจ   ปุคฺคโล   อุจฺเจ  กุเล  ปจฺฉาชาโต  โหติ
ขตฺติยมหาสาลกุเล        วา        พฺราหฺมณมหาสาลกุเล       วา
คหปติมหาสาลกุเล      วา      อฑฺเฒ      มหทฺธเน     มหาโภเค
ปหูตชาตรูปรชเต        ปหูตวิตฺตูปกรเณ       ปหูตธนธญฺเญ       ฯ
โส     จ     โหติ    อภิรูโป    ทสฺสนีโย    ปาสาทิโก    ปรมาย
วณฺณโปกฺขรตาย      สมนฺนาคโต      ลาภี      อนฺนสฺส     ปานสฺส
วตฺถสฺส    ยานสฺส    มาลาคนฺธวิเลปนสฺส   เสยฺยาวสถปทีเปยฺยสฺส   ฯ
โส    กาเยน    ทุจฺจริตํ   จรติ   วาจาย   ทุจฺจริตํ   จรติ   มนสา
ทุจฺจริตํ   จรติ   ฯ   โส  กาเยน  ทุจฺจริตํ  จริตฺวา  วาจาย  ทุจฺจริตํ
จริตฺวา    มนสา    ทุจฺจริตํ   จริตฺวา   กายสฺส   เภทา   ปรมฺมรณา
อปายํ ทุคฺคตึ วินิปาตํ นิรยํ อุปปชฺชติ ฯ
     {๓๙๖.๑}   เสยฺยถาปิ  มหาราช  ปุริโส  ปาสาทา  วา หตฺถิกฺขนฺธํ
โอโรเหยฺย   หตฺถิกฺขนฺธา   วา   อสฺสปิฏฺฐึ   โอโรเหยฺย   อสฺสปิฏฺฐิยา
วา   ปลฺลงฺกํ   โอโรเหยฺย  ปลฺลงฺกา  วา  ปฐวึ  โอโรเหยฺย  ปฐวิยา
วา  อนฺธการํ  ปวิเสยฺย  ๑-  ตถูปมาหํ  มหาราช  อิมํ  ปุคฺคลํ วทามิ ฯ
เอวํ โข มหาราช ปุคฺคโล โชติ ตมปรายโน โหติ ฯ
     [๓๙๗]   กถญฺจ  มหาราช  ปุคฺคโล  โชติ  โชติปรายโน  โหติ  ฯ
อิธ   มหาราช   เอกจฺโจ   ปุคฺคโล   อุจฺเจ  กุเล  ปจฺฉาชาโต  โหติ
ขตฺติยมหาสาลกุเล   วา   พฺราหฺมณมหาสาลกุเล  วา  คหปติมหาสาลกุเล
วา   อฑฺเฒ   มหทฺธเน   มหาโภเค  ปหูตชาตรูปรชเต  ปหูตวิตฺตูปกรเณ
@เชิงอรรถ: ๑ สี. ยุ. โอโรเหยฺย ฯ
ปหูตธนธญฺเญ   ฯ   โส   จ   โหติ   อภิรูโป   ทสฺสนีโย   ปาสาทิโก
ปรมาย    วณฺณโปกฺขรตาย    สมนฺนาคโต    ลาภี   อนฺนสฺส   ปานสฺส
วตฺถสฺส   ยานสฺส   มาลาคนฺธวิเลปนสฺส  เสยฺยาวสถปทีเปยฺยสฺส  ฯ  โส
กาเยน  สุจริตํ  จรติ  วาจาย  สุจริตํ  จรติ  มนสา  สุจริตํ จรติ ฯ โส
กาเยน  สุจริตํ  จริตฺวา  วาจาย  สุจริตํ  จริตฺวา  มนสา สุจริตํ จริตฺวา
กายสฺส เภทา ปรมฺมรณา สุคตึ สคฺคํ โลกํ อุปปชฺชติ ฯ
     {๓๙๗.๑}   เสยฺยถาปิ  มหาราช  ปุริโส  ปลฺลงฺกา  วา  ปลฺลงฺกํ
สงฺกเมยฺย   อสฺสปิฏฺฐิยา   วา   อสฺสปิฏฺฐึ  สงฺกเมยฺย  หตฺถิกฺขนฺธา  วา
หตฺถิกฺขนฺธํ   สงฺกเมยฺย   ปาสาทา   วา  ปาสาทํ  สงฺกเมยฺย  ตถูปมาหํ
มหาราช   อิมํ  ปุคฺคลํ  วทามิ  ฯ  เอวํ  โข  มหาราช  ปุคฺคโล  โชติ
โชติปรายโน  โหติ  ฯ  อิเม  โข  มหาราช  จตฺตาโร  ปุคฺคลา  สนฺโต
สํวิชฺชมานา โลกสฺมินฺติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๕ หน้าที่ ๑๓๔-๑๓๙.
https://84000.org/tipitaka/read/pali_item.php?book=15&item=392&items=6
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=15&item=392&items=6&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=15&item=392&items=6
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=15&item=392&items=6
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=15&i=392
             สารบัญพระไตรปิฎกเล่มที่ ๑๕
https://84000.org/tipitaka/read/?index_15
https://84000.org/tipitaka/english/?index_15