พระไตรปิฎกเล่มที่ ๑๙ ภาษาบาลี อักษรไทย
พระสุตตันตปิฎกเล่มที่ ๑๑ สุตฺต. สํ. มหาวารวคฺโค

     [๑๑๖๑]   อิเมสํ  จ  ปน  ภิกฺขเว  จตุนฺนํ  อิทฺธิปาทานํ ภาวิตตฺตา
พหุลีกตตฺตา   โมคฺคลฺลาโน  ภิกฺขุ  อาสวานํ  ขยา  อนาสวํ  เจโตวิมุตฺตึ
ปญฺญาวิมุตฺตึ   ทิฏฺเฐว   ธมฺเม   สยํ   อภิญฺญา   สจฺฉิกตฺวา  อุปสมฺปชฺช
วิหรตีติ ฯ (เอวํ จ อภิญฺญาโย วิตฺถาเรตพฺพา) ฯ
     [๑๑๖๒]   เอวมฺเม  สุตํ  เอกํ  สมยํ  อายสฺมา อานนฺโท โกสมฺพิยํ
วิหรติ   โฆสิตาราเม   ฯ  อถ  โข  อุณฺณาโภ  พฺราหฺมโณ  เยนายสฺมา
อานนฺโท   เตนุปสงฺกมิ   อุปสงฺกมิตฺวา   อายสฺมตา   อานนฺเทน   สทฺธึ
สมฺโมทิ   สมฺโมทนียํ   กถํ  สาราณียํ  วีติสาเรตฺวา  เอกมนฺตํ  นิสีทิ  ฯ
เอกมนฺตํ   นิสินฺโน   โข   อุณฺณาโภ   พฺราหฺมโณ   อายสฺมนฺตํ  อานนฺทํ
เอตทโวจ
     [๑๑๖๓]   กิมตฺถิยํ  นุ  โข  โภ  อานนฺท สมเณ โคตเม พฺรหฺมจริยํ
วุสฺสตีติ    ฯ    ฉนฺทปฺปหานตฺถํ   โข   พฺราหฺมณ   ภควติ   พฺรหฺมจริยํ
วุสฺสตีติ ฯ
     [๑๑๖๔]   อตฺถิ   ปน   โภ   อานนฺท   มคฺโค   อตฺถิ  ปฏิปทา
เอตสฺส   ฉนฺทสฺส   ปหานายาติ   ฯ   อตฺถิ   โข   พฺราหฺมณ   มคฺโค
อตฺถิ ปฏิปทา เอตสฺส ฉนฺทสฺส ปหานายาติ ฯ
     [๑๑๖๕]   กตโม   ปน   โภ   อานนฺท  มคฺโค  กตมา  ปฏิปทา
เอตสฺส   ฉนฺทสฺส   ปหานายาติ   ฯ  อิธ  พฺราหฺมณ  ภิกฺขุ  ฉนฺทสมาธิ-
ปธานสงฺขารสมนฺนาคตํ   อิทฺธิปาทํ   ภาเวติ  ฯ  วิริยสมาธิ  จิตฺตสมาธิ
วีมํสาสมาธิปธานสงฺขารสมนฺนาคตํ   อิทฺธิปาทํ   ภาเวติ   ฯ   อยํ   โข
พฺราหฺมณ มคฺโค อยํ ปฏิปทา เอตสฺส ฉนฺทสฺส ปหานายาติ ฯ
     [๑๑๖๖]   เอวํ  สนฺเต  โภ  ๑-  อานนฺท สนฺตกํ โหติ โน อสนฺตกํ
ฉนฺเทเนว  ๒-  ฉนฺทํ ปชหิสฺสตีติ เนตํ ฐานํ วิชฺชตีติ ๓- ฯ เตนหิ พฺราหฺมณ
ตญฺเญเวตฺถ ปฏิปุจฺฉิสฺสามิ ยถา เต ขเมยฺย ตถา ตํ พฺยากเรยฺยาสิ ฯ
@เชิงอรรถ: ๑ ยุ. โข ฯ ๒ ยุ. ฉนฺเทน จ ฯ ๓ ม. อิติสทฺโท นตฺถิ ฯ
     [๑๑๖๗]   ตํ   กึ  มญฺญสิ  พฺราหฺมณ  อโหสิ  เต  ปุพฺเพ  ฉนฺโท
อารามํ  คมิสฺสามีติ  ฯ  ตสฺส  เต  อารามํ  คตสฺส  โย  ตชฺโช  ฉนฺโท
โส  ปฏิปฺปสฺสทฺโธติ  ฯ  เอวํ  โภ  ฯ  อโหสิ  เต  ปุพฺเพ วิริยํ อารามํ
คมิสฺสามีติ   ฯ   ตสฺส   เต   อารามํ   คตสฺส   ยํ   ตชฺชํ  วิริยํ  ตํ
ปฏิปฺปสฺสทฺธนฺติ   ฯ   เอวํ  โภ  ฯ  อโหสิ  เต  ปุพฺเพ  จิตฺตํ  อารามํ
คมิสฺสามีติ   ฯ   ตสฺส   เต   อารามํ   คตสฺส   ยํ   ตชฺชํ  จิตฺตํ  ตํ
ปฏิปฺปสฺสทฺธนฺติ   ฯ  เอวํ  โภ  ฯ  อโหสิ  เต  ปุพฺเพ  วีมํสา  อารามํ
คมิสฺสามีติ   ฯ   ตสฺส   เต  อารามํ  คตสฺส  ยา  ตชฺชา  วีมํสา  สา
ปฏิปฺปสฺสทฺธาติ ฯ เอวํ โภ ฯ
     [๑๑๖๘]   เอวเมว  โข  พฺราหฺมณ  โย  โส  ภิกฺขุ อรหํ ขีณาสโว
วุสิตวา     กตกรณีโย     โอหิตภาโร    อนุปฺปตฺตสทตฺโถ    ปริกฺขีณ-
ภวสญฺโญชโน    สมฺมทญฺญาวิมุตฺโต    ตสฺส    โย    ปุพฺเพ    ฉนฺโท
อโหสิ   อรหตฺตปฺปตฺติยา   อรหตฺเต   ๑-   ปตฺเต  โย  ตชฺโช  ฉนฺโท
โส   ปฏิปฺปสฺสทฺโธ  ยํ  ปุพฺเพ  วิริยํ  อโหสิ  อรหตฺตปฺปตฺติยา  อรหตฺเต
ปตฺเต   ยํ   ตชฺชํ   วิริยํ   ตํ   ปฏิปฺปสฺสทฺธํ  ยํ  ปุพฺเพ  จิตฺตํ  อโหสิ
อรหตฺตปฺปตฺติยา   อรหตฺเต   ปตฺเต   ยํ   ตชฺชํ  จิตฺตํ  ตํ  ปฏิปฺปสฺสทฺธํ
ยา    ปุพฺเพ    วีมํสา   อโหสิ   อรหตฺตปฺปตฺติยา   อรหตฺเต   ปตฺเต
ยา ตชฺชา วีมํสา สา ปฏิปฺปสฺสทฺธา ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๙ หน้าที่ ๓๔๘-๓๕๐.
https://84000.org/tipitaka/read/pali_item.php?book=19&item=1161&items=8&mode=bracket
             อ่านโดยใช้เนื้อความเป็นเกณฑ์แบ่งข้อ :-
https://84000.org/tipitaka/read/pali_item.php?book=19&item=1161&items=8
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=19&item=1161&items=8&mode=bracket
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=19&item=1161&items=8&mode=bracket
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=19&i=1161
             สารบัญพระไตรปิฎกเล่มที่ ๑๙
https://84000.org/tipitaka/read/?index_19
https://84000.org/tipitaka/english/?index_19