ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับภาษาไทย   บาลีอักษรไทย   บาลีอักษรโรมัน 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒ ภาษาบาลี อักษรไทย พระวินัยปิฎกเล่มที่ ๒ วินย. มหาวิภงฺโค (๒)
     [๑๘๒]   เตน  สมเยน  พุทฺโธ  ภควา  สาวตฺถิยํ  วิหรติ เชตวเน
อนาถปิณฺฑิกสฺสาราเม    ฯ    เตน   โข   ปน   สมเยน   ฉพฺพคฺคิยา
ภิกฺขู   เปสเลหิ  ภิกฺขูหิ  สทฺธึ  ภณฺฑนฺตา  ๑-  เปสเล  ภิกฺขู  โอมสนฺติ
ชาติยาปิ    นาเมนปิ   โคตฺเตนปิ   กมฺเมนปิ   สิปฺเปนปิ   อาพาเธนปิ
ลิงฺเคนปิ    กิเลเสนปิ    อาปตฺติยาปิ   หีเนนปิ   อกฺโกเสน   ขุํเสนฺติ
วมฺเภนฺติ   ฯ   เย   เต   ภิกฺขู   อปฺปิจฺฉา   ฯเปฯ  เต  อุชฺฌายนฺติ
ขียนฺติ   วิปาเจนฺติ   กถํ  หิ  นาม  ฉพฺพคฺคิยา  ภิกฺขู  เปสเลหิ  ภิกฺขูหิ
สทฺธึ   ภณฺฑนฺตา   เปสเล   ภิกฺขู   โอมสิสฺสนฺติ   ชาติยาปิ   นาเมนปิ
โคตฺเตนปิ   กมฺเมนปิ   สิปฺเปนปิ   อาพาเธนปิ   ลิงฺเคนปิ   กิเลเสนปิ
อาปตฺติยาปิ หีเนนปิ อกฺโกเสน ขุํเสสฺสนฺติ วมฺเภสฺสนฺตีติ ฯ
     {๑๘๒.๑}   อถโข  เต  ภิกฺขู  ภควโต เอตมตฺถํ อาโรเจสุํ ฯ สจฺจํ
กิร   ตุเมฺห  ภิกฺขเว  เปสเลหิ  ภิกฺขูหิ  สทฺธึ  ภณฺฑนฺตา  เปสเล  ภิกฺขู
โอมสถ    ชาติยาปิ    นาเมนปิ    โคตฺเตนปิ    กมฺเมนปิ   สิปฺเปนปิ
อาพาเธนปิ   ลิงฺเคนปิ   กิเลเสนปิ   อาปตฺติยาปิ   หีเนนปิ  อกฺโกเสน
ขุํเสถ  วมฺเภถาติ  ฯ  สจฺจํ  ภควาติ  ฯ วิครหิ พุทฺโธ ภควา กถํ หิ นาม
ตุเมฺห    โมฆปุริสา    เปสเลหิ   ภิกฺขูหิ   สทฺธึ   ภณฺฑนฺตา   เปสเล
ภิกฺขู   โอมสิสฺสถ   ชาติยาปิ   ฯเปฯ   หีเนนปิ   อกฺโกเสน  ขุํเสสฺสถ
@เชิงอรรถ:  ยุ. ภณฺเฑนฺตา ฯ เอวมุปริปิ ฯ
วมฺเภสฺสถ   เนตํ   โมฆปุริสา   อปฺปสนฺนานํ   วา  ปสาทาย  ปสนฺนานํ
วา   ภิยฺโยภาวาย   ฯเปฯ   วิครหิตฺวา   ธมฺมึ   กถํ   กตฺวา   ภิกฺขู
อามนฺเตสิ ฯ
     [๑๘๓]   ภูตปุพฺพํ  ภิกฺขเว  ตกฺกสิลายํ  ๑-  อญฺญตรสฺส พฺราหฺมณสฺส
นนฺทิวิสาโล  นาม  พลิพทฺโท  ๒-  อโหสิ  ฯ  อถโข ภิกฺขเว นนฺทิวิสาโล
พลิพทฺโท   ตํ   พฺราหฺมณํ   เอตทโวจ   คจฺฉ  ตฺวํ  พฺราหฺมณ  เสฏฺฐินา
สทฺธึ    สหสฺเสน   อพฺภุทํ   ๓-   กโรหิ   มยฺหํ   พลิพทฺโท   สกฏสตํ
อติพทฺธํ   ปวฏฺเฏสฺสตีติ   ฯ  อถโข  ภิกฺขเว  โส  พฺราหฺมโณ  เสฏฺฐินา
สทฺธึ   สหสฺเสน   อพฺภุทํ   อกาสิ   มยฺหํ   พลิพทฺโท  สกฏสตํ  อติพทฺธํ
ปวฏฺเฏสฺสตีติ    ฯ    อถโข    ภิกฺขเว    โส   พฺราหฺมโณ   สกฏสตํ
อติพนฺธิตฺวา   นนฺทิวิสาลํ   พลิพทฺทํ   ยุญฺชิตฺวา   เอตทโวจ   อญฺฉ  ๔-
กูฏ วหสฺสุ กูฏาติ ฯ
     {๑๘๓.๑}   อถโข  ภิกฺขเว นนฺทิวิสาโล พลิพทฺโท ตตฺเถว อฏฺฐาสิ ฯ
อถโข  ภิกฺขเว  โส  พฺราหฺมโณ  สหสฺเสน  ปราชิโต  ปชฺฌายิ  ฯ อถโข
ภิกฺขเว   นนฺทิวิสาโล   พลิพทฺโท   ตํ  พฺราหฺมณํ  เอตทโวจ  กิสฺส  ตฺวํ
พฺราหฺมณ   ปชฺฌายสีติ   ฯ   ตถา   หิ   ปนาหํ   โภ  ตยา  สหสฺเสน
ปราชิโตติ  ฯ  กิสฺส  ปน  มํ  ตฺวํ  พฺราหฺมณ  อกูฏํ  กูฏวาเทน  ปาเปสิ
คจฺฉ   ตฺวํ   พฺราหฺมณ  เสฏฺฐินา  สทฺธึ  ทฺวีหิ  สหสฺเสหิ  อพฺภุทํ  กโรหิ
มยฺหํ    พลิพทฺโท    สกฏสตํ   อติพทฺธํ   ปวฏฺเฏสฺสตีติ   มา   จ   มํ
อกูฏํ   กูฏวาเทน   ปาเปสีติ   ฯ   อถโข   ภิกฺขเว   โส  พฺราหฺมโณ
@เชิงอรรถ:  ม. ตกฺกสีลายํ ฯ   ม. พลีพทฺโท ฯ สี. พลิวทฺโท ฯ เอวมุปริปิ ฯ
@ ม. อพฺภุตํ ฯ เอวมุปริปิ ฯ   ม. คจฺฉ ฯ
เสฏฺฐินา   สทฺธึ   ทฺวีหิ   สหสฺเสหิ   อพฺภุทํ   อกาสิ   มยฺหํ  พลิพทฺโท
สกฏสตํ   อติพทฺธํ   ปวฏฺเฏสฺสตีติ   ฯ  อถโข  ภิกฺขเว  โส  พฺราหฺมโณ
สกฏสตํ    อติพนฺธิตฺวา    นนฺทิวิสาลํ   พลิพทฺทํ   ยุญฺชิตฺวา   เอตทโวจ
อญฺฉ    ภทฺร   วหสฺสุ   ภทฺราติ   ฯ   อถโข   ภิกฺขเว   นนฺทิวิสาโล
พลิพทฺโท สกฏสตํ อติพทฺธํ ปวฏฺเฏสิ ฯ
     [๑๘๔]   มนาปเมว ภาเสยฺย     นามนาปํ กุทาจนํ
          มนาปํ ภาสมานสฺส      ครุภารํ อุทพฺพหิ
          ธนญฺจ นํ อลพฺเภสิ ๑-   เตน จตฺตมโน อหูติ ฯ
     [๑๘๕]   ตทาปิ   เม  ภิกฺขเว  อมนาปา  ขุํสนา  วมฺภนา  กิมงฺคํ
ปเนตรหิ    มนาปา    ภวิสฺสติ    ขุํสนา    วมฺภนา   เนตํ   ภิกฺขเว
อปฺปสนฺนานํ   วา   ปสาทาย   ฯเปฯ   เอวญฺจ   ปน   ภิกฺขเว   อิมํ
สิกฺขาปทํ อุทฺทิเสยฺยาถ
     {๑๘๕.๑}   โอมสวาเท ปาจิตฺติยนฺติ ฯ
     [๑๘๖]   โอมสวาโท   นาม  ทสหิ  อากาเรหิ  โอมสติ  ชาติยาปิ
นาเมนปิ    โคตฺเตนปิ   กมฺเมนปิ   สิปฺเปนปิ   อาพาเธนปิ   ลิงฺเคนปิ
กิเลเสนปิ อาปตฺติยาปิ อกฺโกเสนปิ ฯ
     [๑๘๗]   ชาติ   นาม   เทฺว  ชาติโย  หีนา  จ  ชาติ  อุกฺกฏฺฐา
จ   ชาติ   ฯ   หีนา  นาม  ชาติ  จณฺฑาลชาติ  เวณชาติ  เนสาทชาติ
รถการชาติ   ปุกฺกุสชาติ  เอสา  หีนา  นาม  ชาติ  ฯ  อุกฺกฏฺฐา  นาม
ชาติ ขตฺติยชาติ พฺราหฺมณชาติ เอสา อุกฺกฏฺฐา นาม ชาติ ฯ
     [๑๘๘]   นามํ   นาม   เทฺว   นามานิ  หีนญฺจ  นามํ  อุกฺกฏฺฐญฺจ
@เชิงอรรถ:  ม. อลาเภสิ ฯ
นามํ   ฯ   หีนํ   นาม   นามํ   อวกณฺณกํ  ชวกณฺณกํ  ธนิฏฺฐกํ  สวิฏฺฐกํ
กุลวฑฺฒกํ   เตสุ   เตสุ   วา   ปน   ชนปเทสุ   โอญฺญาตํ   อวญฺญาตํ
หีฬิตํ   ปริภูตํ  อจิตีกตํ  ๑-  เอตํ  หีนํ  นาม  นามํ  ฯ  อุกฺกฏฺฐํ  นาม
นามํ   พุทฺธปฏิสํยุตฺตํ   ธมฺมปฏิสํยุตฺตํ   สงฺฆปฏิสํยุตฺตํ   เตสุ   เตสุ  วา
ปน    ชนปเทสุ    อโนญฺญาตํ   อนวญฺญาตํ   อหีฬิตํ   อปริภูตํ   จิตีกตํ
เอตํ อุกฺกฏฺฐํ นาม นามํ ฯ
     [๑๘๙]   โคตฺตํ  นาม  เทฺว  โคตฺตานิ  หีนญฺจ  โคตฺตํ  อุกฺกฏฺฐญฺจ
โคตฺตํ  ฯ  หีนํ  นาม  ภารทฺวาชโคตฺตํ  เตสุ  เตสุ  วา  ปน  ชนปเทสุ
โอญฺญาตํ    อวญฺญาตํ    หีฬิตํ   ปริภูตํ   อจิตีกตํ   เอตํ   หีนํ   นาม
โคตฺตํ   ฯ   อุกฺกฏฺฐํ   นาม   โคตฺตํ   โคตมโคตฺตํ   โมคฺคลฺลานโคตฺตํ
กจฺจายนโคตฺตํ   วาเสฏฺฐโคตฺตํ   ๒-   เตสุ  เตสุ  วา  ปน  ชนปเทสุ
อโนญฺญาตํ    อนวญฺญาตํ    อหีฬิตํ   อปริภูตํ   จิตีกตํ   เอตํ   อุกฺกฏฺฐํ
นาม โคตฺตํ ฯ
     [๑๙๐]   กมฺมํ   นาม   เทฺว   กมฺมานิ  หีนญฺจ  กมฺมํ  อุกฺกฏฺฐญฺจ
กมฺมํ    ฯ   หีนํ   นาม   กมฺมํ   โกฏฺฐกกมฺมํ   ปุปฺผฉฑฺฑกกมฺมํ   เตสุ
เตสุ    วา    ปน   ชนปเทสุ   โอญฺญาตํ   อวญฺญาตํ   หีฬิตํ   ปริภูตํ
อจิตีกตํ  เอตํ  หีนํ  นาม  กมฺมํ  ฯ  อุกฺกฏฺฐํ  นาม  กมฺมํ  กสิ  วณิชฺชา
โครกฺขา   เตสุ   เตสุ   วา   ปน   ชนปเทสุ  อโนญฺญาตํ  อนวญฺญาตํ
อหีฬิตํ อปริภูตํ จิตีกตํ เอตํ อุกฺกฏฺฐํ นาม กมฺมํ ฯ
     [๑๙๑]   สิปฺปํ   นาม   เทฺว   สิปฺปานิ  หีนญฺจ  สิปฺปํ  อุกฺกฏฺฐญฺจ
@เชิงอรรถ:  ม. อจิตฺตีกตํ ฯ เอวมุปริปิ ฯ   ม. กจฺจานโคตฺตํ วาสิฏฺฐโคตฺตํ ฯ เอวมุปริปิ ฯ
สิปฺปํ   ฯ   หีนํ   นาม  สิปฺปํ  นฬการสิปฺปํ  กุมฺภการสิปฺปํ  เปสการสิปฺปํ
จมฺมการสิปฺปํ   นหาปิตสิปฺปํ   เตสุ  เตสุ  วา  ปน  ชนปเทสุ  โอญฺญาตํ
อวญฺญาตํ   หีฬิตํ   ปริภูตํ  อจิตีกตํ  เอตํ  หีนํ  นาม  สิปฺปํ  ฯ  อุกฺกฏฺฐํ
นาม  สิปฺปํ  มุทฺธา  ๑-  คณนา  เลขา  เตสุ  เตสุ  วา  ปน ชนปเทสุ
อโนญฺญาตํ    อนวญฺญาตํ    อหีฬิตํ   อปริภูตํ   จิตีกตํ   เอตํ   อุกฺกฏฺฐํ
นาม สิปฺปํ ฯ
     [๑๙๒]   สพฺเพปิ  อาพาธา  หีนา  นาม  อปิจ  มธุเมโห  อาพาโธ
อุกฺกฏฺโฐ ฯ
     [๑๙๓]   ลิงฺคํ   นาม   เทฺว   ลิงฺคานิ  หีนญฺจ  ลิงฺคํ  อุกฺกฏฺฐญฺจ
ลิงฺคํ   ฯ   หีนํ   นาม   ลิงฺคํ   อติทีฆํ   อติรสฺสํ  อติกณฺหํ  อจฺโจทาตํ
เอตํ   หีนํ   นาม   ลิงฺคํ  ฯ  อุกฺกฏฺฐํ  นาม  ลิงฺคํ  นาติทีฆํ  นาติรสฺสํ
นาติกณฺหํ นาจฺโจทาตํ เอตํ อุกฺกฏฺฐํ นาม ลิงฺคํ ฯ
     [๑๙๔]   สพฺเพปิ กิเลสา หีนา ฯ
     [๑๙๕]   สพฺพาปิ   อาปตฺติโย   หีนา  อปิจ  โสตาปตฺติ  สมาปตฺติ
อุกฺกฏฺฐา ฯ
     [๑๙๖]   อกฺโกโส   นาม   เทฺว   อกฺโกสา  หีโน  จ  อกฺโกโส
อุกฺกฏฺโฐ    จ    อกฺโกโส   ฯ   หีโน   นาม   อกฺโกโส   โอฏฺโฐสิ
เมณฺโฑสิ      โคโณสิ     คทฺรโภสิ     ติรจฺฉานคโตสิ     เนรยิโกสิ
นตฺถิ   ตุยฺหํ   สุคติ   ทุคฺคติเยว   ตุยฺหํ   ปาฏิกงฺขาติ   ยกาเรน  วา
ภกาเรน   วา   กาฏโกฏจิกาย  วา  เอโส  หีโน  นาม  อกฺโกโส  ฯ
@เชิงอรรถ:  ม. มุทฺทา ฯ เอวมุปริปิ ฯ
อุกฺกฏฺโฐ   นาม   อกฺโกโส   ปณฺฑิโตสิ  พฺยตฺโตสิ  เมธาวีสิ  พหุสฺสุโตสิ
ธมฺมกถิโกสิ   นตฺถิ   ตุยฺหํ  ทุคฺคติ  สุคติเยว  ตุยฺหํ  ปาฏิกงฺขาติ  เอโส
อุกฺกฏฺโฐ นาม อกฺโกโส ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๒ หน้าที่ ๑๖๒-๑๖๗. https://84000.org/tipitaka/read/pali_item.php?book=2&item=182&items=15&mode=bracket              อ่านโดยใช้เนื้อความเป็นเกณฑ์แบ่งข้อ :- https://84000.org/tipitaka/read/pali_item.php?book=2&item=182&items=15              อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=2&item=182&items=15&mode=bracket              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=2&item=182&items=15&mode=bracket              ศึกษาอรรถกถานี้ได้ที่ :- https://84000.org/tipitaka/attha/attha.php?b=2&i=182              สารบัญพระไตรปิฎกเล่มที่ ๒ https://84000.org/tipitaka/read/?index_2 https://84000.org/tipitaka/english/?index_2

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]