พระไตรปิฎกเล่มที่ ๓๑ ภาษาบาลี อักษรไทย
พระสุตตันตปิฎกเล่มที่ ๒๓ สุตฺต. ขุ. ปฏิสมฺภิทามคฺโค

     [๒๖๘]   กถํ    อตฺถปฏิสมฺภิเท   ญาณํ   ธมฺมปฏิสมฺภิเท   ญาณํ
นิรุตฺติปฏิสมฺภิเท    ญาณํ    ปฏิภาณปฏิสมฺภิเท    ญาณํ    ฯ    อตฺเถสุ
ญาณํ    อตฺถปฏิสมฺภิทา    ธมฺเมสุ    ญาณํ    ธมฺมปฏิสมฺภิทา   นิรุตฺตีสุ
ญาณํ     นิรุตฺติปฏิสมฺภิทา     ปฏิภาเณสุ     ญาณํ    ปฏิภาณปฏิสมฺภิทา
อตฺถนานตฺเต     ปญฺญา     อตฺถปฏิสมฺภิเท     ญาณํ     ธมฺมนานตฺเต
ปญฺญา      ธมฺมปฏิสมฺภิเท      ญาณํ      นิรุตฺตินานตฺเต      ปญฺญา
นิรุตฺติปฏิสมฺภิเท    ญาณํ    ปฏิภาณนานตฺเต   ปญฺญา   ปฏิภาณปฏิสมฺภิเท
ญาณํ       อตฺถววตฺถาเน      ปญฺญา      อตฺถปฏิสมฺภิเท      ญาณํ
ธมฺมววตฺถาเน     ปญฺญา    ธมฺมปฏิสมฺภิเท    ญาณํ    นิรุตฺติววตฺถาเน
ปญฺญา      นิรุตฺติปฏิสมฺภิเท     ญาณํ     ปฏิภาณววตฺถาเน     ปญฺญา
ปฏิภาณปฏิสมฺภิเท    ญาณํ    อตฺถสลฺลกฺขเณ    ปญฺญา    อตฺถปฏิสมฺภิเท
ญาณํ       ธมฺมสลฺลกฺขเณ      ปญฺญา      ธมฺมปฏิสมฺภิเท      ญาณํ
นิรุตฺติสลฺลกฺขเณ    ปญฺญา    นิรุตฺติปฏิสมฺภิเท   ญาณํ   ปฏิภาณสลฺลกฺขเณ
ปญฺญา      ปฏิภาณปฏิสมฺภิเท      ญาณํ     อตฺถอุปลกฺขเณ     ปญฺญา
อตฺถปฏิสมฺภิเท     ญาณํ     ธมฺมอุปลกฺขเณ    ปญฺญา    ธมฺมปฏิสมฺภิเท
ญาณํ      นิรุตฺติอุปลกฺขเณ      ปญฺญา      นิรุตฺติปฏิสมฺภิเท     ญาณํ
ปฏิภาณอุปลกฺขเณ        ปญฺญา        ปฏิภาณปฏิสมฺภิเท        ญาณํ
อตฺถปฺปเภเท     ปญฺญา     อตฺถปฏิสมฺภิเท     ญาณํ     ธมฺมปฺปเภเท
ปญฺญา   ธมฺมปฏิสมฺภิเท   ญาณํ   นิรุตฺติปฺปเภเท  ปญฺญา  นิรุตฺติปฏิสมฺภิเท
ญาณํ      ปฏิภาณปฺปเภเท      ปญฺญา     ปฏิภาณปฏิสมฺภิเท     ญาณํ
อตฺถปฺปภาวเน     ปญฺญา     อตฺถปฏิสมฺภิเท    ญาณํ    ธมฺมปฺปภาวเน
ปญฺญา      ธมฺมปฏิสมฺภิเท      ญาณํ      นิรุตฺติปฺปภาวเน     ปญฺญา
นิรุตฺติปฏิสมฺภิเท         ญาณํ        ปฏิภาณปฺปภาวเน        ปญฺญา
ปฏิภาณปฏิสมฺภิเท    ญาณํ   อตฺถโชตเน   ๑-   ปญฺญา   อตฺถปฏิสมฺภิเท
ญาณํ    ธมฺมโชตเน    ปญฺญา    ธมฺมปฏิสมฺภิเท   ญาณํ   นิรุตฺติโชตเน
ปญฺญา      นิรุตฺติปฏิสมฺภิเท      ญาณํ      ปฏิภาณโชตเน     ปญฺญา
ปฏิภาณปฏิสมฺภิเท     ญาณํ    อตฺถวิโรจเน    ปญฺญา    อตฺถปฏิสมฺภิเท
ญาณํ    ธมฺมวิโรจเน   ปญฺญา   ธมฺมปฏิสมฺภิเท   ญาณํ   นิรุตฺติวิโรจเน
ปญฺญา      นิรุตฺติปฏิสมฺภิเท      ญาณํ     ปฏิภาณวิโรจเน     ปญฺญา
ปฏิภาณปฏิสมฺภิเท         ญาณํ         อตฺถปฺปกาสเน        ปญฺญา
อตฺถปฏิสมฺภิเท     ญาณํ     ธมฺมปฺปกาสเน    ปญฺญา    ธมฺมปฏิสมฺภิเท
ญาณํ      นิรุตฺติปฺปกาสเน      ปญฺญา      นิรุตฺติปฏิสมฺภิเท     ญาณํ
ปฏิภาณปฺปกาสเน      ปญฺญา      ปฏิภาณปฏิสมฺภิเท      ญาณํ     ตํ
ญาตฏฺเฐน   ญาณํ   ปชานนฏฺเฐน   ปญฺญา  เตน  วุจฺจติ  อตฺถปฏิสมฺภิเท
ญาณํ       ธมฺมปฏิสมฺภิเท      ญาณํ      นิรุตฺติปฏิสมฺภิเท      ญาณํ
ปฏิภาณปฏิสมฺภิเท ญาณํ ฯ
@เชิงอรรถ: ๑ สี. อตฺถชานเน ฯ
     [๒๖๙]   กตมํ   ตถาคตสฺส   อินฺทฺริยานํ  ปโรปริยตฺเต  ญาณํ  ฯ
อิธ   ตถาคโต   สตฺเต   ปสฺสติ  อปฺปรชกฺเข  มหารชกฺเข  ติกฺขินฺทฺริเย
มุทินฺทฺริเย     สฺวากาเร     ทฺวากาเร    สุวิญฺญาปเย    ทุวิญฺญาปเย
อปฺเปกจฺเจ           ปรโลกวชฺชภยทสฺสาวิโน           อปฺเปกจฺเจ
นปรโลกวชฺชภยทสฺสาวิโน ฯ
     [๒๗๐]   อปฺปรชกฺเข  มหารชกฺเขติ  สทฺโธ  ปุคฺคโล  อปฺปรชกฺโข
อสฺสทฺโธ   ปุคฺคโล   มหารชกฺโข   อารทฺธวิริโย   ปุคฺคโล  อปฺปรชกฺโข
กุสีโต    ปุคฺคโล    มหารชกฺโข   อุปฏฺฐิตสฺสติ   ปุคฺคโล   อปฺปรชกฺโข
มุฏฺฐสฺสติ    ปุคฺคโล    มหารชกฺโข   สมาหิโต   ปุคฺคโล   อปฺปรชกฺโข
อสมาหิโต    ปุคฺคโล    มหารชกฺโข   ปญฺญวา   ปุคฺคโล   อปฺปรชกฺโข
ทุปฺปญฺโญ ปุคฺคโล มหารชกฺโข ฯ
     [๒๗๑]   ติกฺขินฺทฺริเย   มุทินฺทฺริเยติ  สทฺโธ  ปุคฺคโล  ติกฺขินฺทฺริโย
อสฺสทฺโธ      ปุคฺคโล      มุทินฺทฺริโย      อารทฺธวิริโย     ปุคฺคโล
ติกฺขินฺทฺริโย    กุสีโต    ปุคฺคโล    มุทินฺทฺริโย   อุปฏฺฐิตสฺสติ   ปุคฺคโล
ติกฺขินฺทฺริโย    มุฏฺฐสฺสติ    ปุคฺคโล    มุทินฺทฺริโย   สมาหิโต   ปุคฺคโล
ติกฺขินฺทฺริโย    อสมาหิโต    ปุคฺคโล    มุทินฺทฺริโย   ปญฺญวา   ปุคฺคโล
ติกฺขินฺทฺริโย ทุปฺปญฺโญ ปุคฺคโล มุทินฺทฺริโย ฯ
     [๒๗๒]   สฺวากาเร   ทฺวากาเรติ   สทฺโธ   ปุคฺคโล  สฺวากาโร
อสฺสทฺโธ    ปุคฺคโล   ทฺวากาโร   อารทฺธวิริโย   ปุคฺคโล   สฺวากาโร
กุสีโต    ปุคฺคโล    ทฺวากาโร    อุปฏฺฐิตสฺสติ    ปุคฺคโล   สฺวากาโร
มุฏฺฐสฺสติ    ปุคฺคโล    ทฺวากาโร    สมาหิโต    ปุคฺคโล   สฺวากาโร
อสมาหิโต    ปุคฺคโล    ทฺวากาโร    ปญฺญวา    ปุคฺคโล   สฺวากาโร
ทุปฺปญฺโญ ปุคฺคโล ทฺวากาโร ฯ
     [๒๗๓]   สุวิญฺญาปเย     ทุวิญฺญาปเยติ     สทฺโธ    ปุคฺคโล
สุวิญฺญาปโย     อสฺสทฺโธ     ปุคฺคโล     ทุวิญฺญาปโย    อารทฺธวิริโย
ปุคฺคโล    สุวิญฺญาปโย    กุสีโต   ปุคฺคโล   ทุวิญฺญาปโย   อุปฏฺฐิตสฺสติ
ปุคฺคโล      สุวิญฺญาปโย      มุฏฺฐสฺสติ      ปุคฺคโล     ทุวิญฺญาปโย
สมาหิโต    ปุคฺคโล   สุวิญฺญาปโย   อสมาหิโต   ปุคฺคโล   ทุวิญฺญาปโย
ปญฺญวา ปุคฺคโล สุวิญฺญาปโย ทุปฺปญฺโญ ปุคฺคโล ทุวิญฺญาปโย ฯ
     [๒๗๔]   อปฺเปกจฺเจ    ปรโลกวชฺชภยทสฺสาวิโน    อปฺเปกจฺเจ
นปรโลกวชฺชภยทสฺสาวิโนติ    สทฺโธ    ปุคฺคโล    ปรโลกวชฺชภยทสฺสาวี
อสฺสทฺโธ    ปุคฺคโล    นปรโลกวชฺชภยทสฺสาวี   อารทฺธวิริโย   ปุคฺคโล
ปรโลกวชฺชภยทสฺสาวี     กุสีโต     ปุคฺคโล     นปรโลกวชฺชภยทสฺสาวี
อุปฏฺฐิตสฺสติ    ปุคฺคโล    ปรโลกวชฺชภยทสฺสาวี    มุฏฺฐสฺสติ    ปุคฺคโล
นปรโลกวชฺชภยทสฺสาวี     สมาหิโต    ปุคฺคโล    ปรโลกวชฺชภยทสฺสาวี
อสมาหิโต     ปุคฺคโล    นปรโลกวชฺชภยทสฺสาวี    ปญฺญวา    ปุคฺคโล
ปรโลกวชฺชภยทสฺสาวี ทุปฺปญฺโญ ปุคฺคโล นปรโลกวชฺชภยทสฺสาวี ฯ
     [๒๗๕]   โลโกติ  ขนฺธโลโก ธาตุโลโก อายตนโลโก วิปตฺติภวโลโก
วิปตฺติสมฺภวโลโก          สมฺปตฺติภวโลโก         สมฺปตฺติสมฺภวโลโก
เอโก    โลโก    สพฺเพ    สตฺตา    อาหารฏฺฐิติกา   เทฺว   โลกา
นามญฺจ   รูปญฺจ   ตโย   โลกา   ติสฺโส   เวทนา   จตฺตาโร  โลกา
จตฺตาโร   อาหารา   ปญฺจ   โลกา   ปญฺจุปาทานกฺขนฺธา   ฉ   โลกา
ฉ    อชฺฌตฺติกานิ   อายตนานิ   สตฺต   โลกา   สตฺต   วิญฺญาณฏฺฐิติโย
อฏฺฐ  โลกา  อฏฺฐ  โลกธมฺมา  นว  โลกา  นว  สตฺตาวาสา ทส โลกา
ทสายตนานิ    ทฺวาทส    โลกา   ทฺวาทสายตนานิ   อฏฺฐารส   โลกา
อฏฺฐารส ธาตุโย ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๑ หน้าที่ ๑๗๕-๑๗๙.
https://84000.org/tipitaka/read/pali_item.php?book=31&item=268&items=8
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=31&item=268&items=8&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=31&item=268&items=8
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=31&item=268&items=8
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=31&i=268
             สารบัญพระไตรปิฎกเล่มที่ ๓๑
https://84000.org/tipitaka/read/?index_31
https://84000.org/tipitaka/english/?index_31