พระไตรปิฎกเล่มที่ ๓๒ ภาษาบาลี อักษรไทย
พระสุตตันตปิฎกเล่มที่ ๒๔ สุตฺต. ขุ. อปทานํ (๑)

                                           ปญฺจโม อุปาลิวคฺโค
                                        ปฐมํ อุปาลิตฺเถราปทานํ (๔๑)
     [๔๓]   |๔๓.๑| ขีณาสวสหสฺเสหิ          ปริวุโต โลกนายโก
                    วิเวกมนุยุตฺโต โส              คจฺฉเต ปฏิสลฺลิตุํ ฯ
        |๔๓.๒| อชิเนน นิวตฺโถหํ               ติทณฺฑปริจารโณ
                    ภิกฺขุสงฺฆปริพฺยุฬฺหํ           อทฺทสํ โลกนายกํ ฯ
        |๔๓.๓| เอกํสํ อชินํ กตฺวา              สีเส กตฺวาน อญฺชลึ
                    สมฺพุทฺธํ อภิวาเทตฺวา        สนฺถวึ โลกนายกํ ฯ
        |๔๓.๔| ยถาณฺฑชา จ สํเสทา         โอปปาตี ชลมฺพุชา
                    กากาทิปกฺขิโน สพฺเพ        อนฺตลิกฺเข สทา จรา ๑- ฯ
        |๔๓.๕| เย เกจิ ปาณภูตตฺถิ            สญฺญิโน วา อสญฺญิโน
                    สพฺเพ เต ตว ญาณมฺหิ      อนฺโต โหนฺติ สโมคธา ฯ
        |๔๓.๖| คนฺธา จ ปพฺพเตยฺยา เย     หิมวนฺเต นคุตฺตเม
                    สพฺเพ เต ตว สีลมฺหิ          กลาโยปิ น ยุชฺชเร ฯ
        |๔๓.๗| โมหนฺธการปกฺขนฺโน ๒-     อยํ โลโก สเทวโก
                    ตว ญาณมฺหิ โชตนฺเต        อนฺธการา วิธํสิตา ฯ
        |๔๓.๘|  ยถา อตฺถงฺคเต สุริเย         โหนฺติ สตฺตา ตโมคตา
                    เอวํ พุทฺเธ อนุปฺปนฺเน        โหติ โลโก ตโมคโต ฯ
        |๔๓.๙| ยโถทยนฺโต อาทิจฺโจ          วิโนเทติ ตมํ สทา
                    ตเถว ตฺวํ พุทฺธเสฏฺฐ          วิทฺธํเสสิ ตมํ สทา ฯ
@เชิงอรรถ: ๑ ยุ. อนฺตลิกฺเข ปเทสคา ฯ ๒ ม. โมหนฺธการปกฺขนฺโท ฯ ยุ. ... ปกฺขนฺโต ฯ
        |๔๓.๑๐| ปธานํ ปหิตตฺโตสิ           พุทฺโธ โลเก สเทวเก
                      ตว กมฺมาภิรทฺเธน          โตเสสิ ชนตํ พหุํ ฯ
        |๔๓.๑๑| ตํ สุตฺวา ๑- อนุโมทิตฺวา   ปทุมุตฺตโร มหามุนิ
                      นเภ อพฺภุคฺคมิ ธีโร         หํสราชาว อมฺพเร ฯ
        |๔๓.๑๒| อพฺภุคฺคนฺตฺวาน สมฺพุทฺโธ   มเหสิ ปทุมุตฺตโร
                      อนฺตลิกฺเข ฐิโต สตฺถา      อิมา คาถา อภาสถ ฯ
        |๔๓.๑๓|  เยนิทํ ถวิตํ ญาณํ           อุปเมหิ สมายุตํ
                      ตมหํ กิตฺตยิสฺสามิ           สุณาถ มม ภาสโต ฯ
        |๔๓.๑๔| อฏฺฐารสญฺจ ขตฺตุํ โส       เทวราชา ภวิสฺสติ
                      ปฐพฺยา รชฺชํ ติสตํ           วสุธํ อาวสิสฺสติ ฯ
        |๔๓.๑๕| ปญฺจวีสติกฺขตฺตุญฺจ         จกฺกวตฺติ ภวิสฺสติ
                      ปเทสรชฺชํ วิปุลํ                  คณนาโต อสงฺขยํ ฯ
        |๔๓.๑๖| กปฺปสตสหสฺสมฺหิ           โอกฺกากกุลสมฺภโว
                      โคตโม นาม นาเมน        สตฺถา โลเก ภวิสฺสติ ฯ
        |๔๓.๑๗| ตุสิตาหิ จวิตฺวาน            สุกฺกมูเลน โจทิโต
                      หีโนว ชาติยา สนฺโต        อุปาลิ นาม เหสฺสติ ฯ
        |๔๓.๑๘| โส จ ปจฺฉา ปพฺพชิตฺวา    วิราชิตฺวาน ปาปกํ
                      สพฺพาสเว ปริญฺญาย        นิพฺพายิสฺสตฺยนาสโว ฯ
        |๔๓.๑๙| ตุฏฺโฐ จ โคตโม พุทฺโธ     สกฺยปุตฺโต มหายโส
                      วินยาธิคตํ ตสฺส              เอตทคฺเค ฐเปสฺสติ ฯ
@เชิงอรรถ: ๑ ม. ยุ. สพฺพํ ฯ
        |๔๓.๒๐| สทฺธายหํ ปพฺพชิโต         กตกิจฺโจ อนาสโว
                      สพฺพาสเว ปริญฺญาย       วิหรามิ อนาสโว ฯ
        |๔๓.๒๑| ภควา จานุกมฺปี มํ           วินเยหํ วิสารโท
                      สกกมฺมาภิรทฺโธ จ           วิหรามิ อนาสโว ฯ
        |๔๓.๒๒| สํวุโต ปาฏิโมกฺขมฺหิ        อินฺทฺริเยสุ จ ปญฺจสุ
                      ธาเรมิ วินยํ สพฺพํ            เกวลํ รตนากรํ ฯ
        |๔๓.๒๓|  มมญฺจ คุณมญฺญาย      สตฺถา โลเก อนุตฺตโร
                      ภิกฺขุสงฺเฆ นิสีทิตฺวา         เอตทคฺเค ฐเปสิ มํ ฯ
        |๔๓.๒๔| ปฏิสมฺภิทา จตสฺโส         วิโมกฺขาปิจ อฏฺฐิเม
                      ฉฬภิญฺญา สจฺฉิกตา        กตํ พุทฺธสฺส สาสนนฺติ ฯ
         อิตฺถํ สุทํ อายสฺมา อุปาลิ เถโร อิมา คาถาโย
อภาสิตฺถาติ ฯ
                                   อุปาลิตฺเถรสฺส อปทานํ สมตฺตํ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๒ หน้าที่ ๑๓๑-๑๓๓.
https://84000.org/tipitaka/read/pali_item.php?book=32&item=43&items=1
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=32&item=43&items=1&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=32&item=43&items=1
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=32&item=43&items=1
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=32&i=43
             สารบัญพระไตรปิฎกเล่มที่ ๓๒
https://84000.org/tipitaka/read/?index_32
https://84000.org/tipitaka/english/?index_32