ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับภาษาไทย   บาลีอักษรไทย   บาลีอักษรโรมัน 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๒ ภาษาบาลี อักษรไทย พระสุตตันตปิฎกเล่มที่ ๒๔ สุตฺต. ขุ. อปทานํ (๑)
                              ตติยํ ภทฺทิยกาฬิโคธายปุตฺตตฺเถราปทานํ (๔๓)
     [๔๕]   |๔๕.๕๔| ปทุมุตฺตรสมฺพุทฺธํ        เมตฺตจิตฺตํ มหามุนึ
                     อุเปติ ชนตา สพฺพา           สพฺพโลกคฺคนายกํ ฯ
        |๔๕.๕๕| สตฺตุกญฺจ ปวากญฺจ ๑-    อามิสมฺปานโภชนํ
                     ททนฺติ สตฺถุโน สพฺเพ        ปุญฺญกฺเขตฺเต อนุตฺตเร ฯ
        |๔๕.๕๖|  อหมฺปิ ทานํ ทสฺสามิ       เทวเทวสฺส ตาทิโน
                      พุทฺธเสฏฺฐํ นิมนฺเตตฺวา     สงฺฆมฺปิ จ อนุตฺตรํ ฯ
        |๔๕.๕๗| อุยฺโยชิตา มยา เจเต         นิมนฺเตสุํ ตถาคตํ
                      เกวลํ ภิกฺขุสงฺฆญฺจ          ปุญฺญกฺเขตฺตํ อนุตฺตรํ ฯ
        |๔๕.๕๘| สตสหสฺสปลฺลงฺกํ             โสวณฺณํ โคนกตฺถตํ
                     ตุลิกาปฏลิกาย                โขมกปฺปาสิเกหิ จ ฯ
                     มหารหํ ปญฺญาปยึ           อาสนํ พุทฺธยุตฺตกํ
         |๔๕.๕๙| ปทุมุตฺตโร โลกวิทู          เทวเทโว นราสโภ ฯ
                      ภิกฺขุสงฺฆปริพฺยุโฬฺห         มม ทฺวารํ อุปาคมิ
         |๔๕.๖๐| ปจฺจุคฺคนฺตฺวาน สมฺพุทฺธํ  โลกนาถํ ยสสฺสินํ ฯ
                      ปสนฺนจิตฺโต สุมโน           อตินามยิ สฆรํ ๒-
         |๔๕.๖๑| ภิกฺขูนํ สตสหสฺสํ             พุทฺธญฺจ โลกนายกํ ฯ
                      ปสนฺนจิตฺโต สุมโน          ปรมนฺเนน ตปฺปยึ
        |๔๕.๖๒| ปทุมุตฺตโร โลกวิทู           อาหุตีนํ ปฏิคฺคโห ฯ
@เชิงอรรถ:  ม. ยุ. พทฺธกญฺจ ฯ  ม. อภินามยึ สงฺฆรํ ฯ ยุ. ... สฆารํ ฯ
                     ภิกฺขุสงฺเฆ นิสีทิตฺวา          อิมา คาถา อภาสถ
      |๔๕.๖๓| เยนิทํ อาสนํ ทินฺนํ             โสวณฺณํ โคนกตฺถตํ ฯ
                     ตมหํ กิตฺตยิสฺสามิ            สุณาถ มม ภาสโต
      |๔๕.๖๔| จตุสตฺตติกฺขตฺตุํ โส             เทวรชฺชํ กริสฺสติ ฯ
                      อนุโภสฺสติ สมฺปตฺตึ         อจฺฉราหิ ปุรกฺขโต
       |๔๕.๖๕| ปเทสรชฺชํ สหสฺสํ              วสุธํ อาวสิสฺสติ ฯ
                      เอกปญฺญาสกฺขตฺตุญฺจ     จกฺกวตฺติ ภวิสฺสติ
       |๔๕.๖๖| สพฺพาสุ ภวโยนีสุ             อุจฺจากุลี ภวิสฺสติ ฯ
                      โส จ ปจฺฉา ปพฺพชิตฺวา     สุกฺกมูเลน โจทิโต
                      ภทฺทิโย นาม นาเมน        เหสฺสติ สตฺถุ สาวโก ฯ
       |๔๕.๖๗| วิเวกมนุยุตฺโตมฺหิ              ปนฺตเสนนิวาสหํ
                      ผลํ วาธิคตํ ๑- สพฺพํ         จิตฺตเกฺลโสมฺหิ อชฺชหํ ฯ
        |๔๕.๖๘| มม สพฺพํ อภิญฺญาย        สพฺพญฺญู โลกนายโก
                      ภิกฺขุสงฺเฆ นิสีทิตฺวา         เอตทคฺเค ฐเปสิ มํ ฯ
        |๔๕.๖๙| ปฏิสมฺภิทา จตสฺโส          วิโมกฺขาปิจ อฏฺฐิเม
                      ฉฬภิญฺญา สจฺฉิกตา        กตํ พุทฺธสฺส สาสนนฺติ ฯ
         อิตฺถํ สุทํ อายสฺมา ภทฺทิโย กาฬิโคธายปุตฺโต เถโร อิมา
คาถาโย อภาสิตฺถาติ ฯ
                         ภทฺทิยสฺส กาฬิโคธายปุตฺตตฺเถรสฺส อปทานํ สมตฺตํ ฯ
@เชิงอรรถ:  ม. จาธิคตํ ฯ ยุ. ผลญฺจ วิคตํ สพฺพํ วตฺตเกฺลโสมฺหิ อชฺชหํ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๓๒ หน้าที่ ๑๓๗-๑๓๘. https://84000.org/tipitaka/read/pali_item.php?book=32&item=45&items=1              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- https://84000.org/tipitaka/read/pali_item.php?book=32&item=45&items=1&mode=bracket              อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=32&item=45&items=1              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=32&item=45&items=1              ศึกษาอรรถกถานี้ได้ที่ :- https://84000.org/tipitaka/attha/attha.php?b=32&i=45              สารบัญพระไตรปิฎกเล่มที่ ๓๒ https://84000.org/tipitaka/read/?index_32 https://84000.org/tipitaka/english/?index_32

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]