พระไตรปิฎกเล่มที่ ๓๗ ภาษาบาลี อักษรไทย
พระอภิธรรมปิฎกเล่มที่ ๔ อภิ. กถาวตฺถุ

                               วิปาโก วิปากธมฺมธมฺโมติกถา
     [๑๑๘๗]   วิปาโก  วิปากธมฺมธมฺโมติ  ฯ  อามนฺตา ฯ ตสฺส วิปาโก
วิปากธมฺมธมฺโมติ   ฯ   น   เหวํ   วตฺตพฺเพ   ฯเปฯ   ตสฺส  วิปาโก
วิปากธมฺมธมฺโมติ   ฯ   อามนฺตา   ฯ   ตสฺส   ตสฺเสว  นตฺถิ  ทุกฺขสฺส
อนฺตกิริยา    นตฺถิ    วฏฺฏูปจฺเฉโท   นตฺถิ   อนุปาทาปรินิพฺพานนฺติ   ฯ
น เหวํ วตฺตพฺเพ ฯเปฯ
     [๑๑๘๘]   วิปาโก  วิปากธมฺมธมฺโมติ  ฯ  อามนฺตา  ฯ  วิปาโกติ
วา  วิปากธมฺมธมฺโมติ  วา  วิปากธมฺมธมฺโมติ  วา  วิปาโกติ  วา เอเส
เส เอกฏฺเฐ สเม สมภาเค ตชฺชาเตติ ฯ น เหวํ วตฺตพฺเพ ฯเปฯ
     [๑๑๘๙]   วิปาโก  วิปากธมฺมธมฺโมติ  ฯ  อามนฺตา  ฯ  วิปาโก จ
วิปากธมฺมธมฺโม    จ    วิปากธมฺมธมฺโม   จ   วิปาโก   จ   สหคตา
สหชาตา   สํสฏฺฐา   สมฺปยุตฺตา   เอกุปฺปาทา  เอกนิโรธา  เอกวตฺถุกา
เอการมฺมณาติ ฯ น เหวํ วตฺตพฺเพ ฯเปฯ
     [๑๑๙๐]   วิปาโก   วิปากธมฺมธมฺโมติ  ฯ  อามนฺตา  ฯ  ตญฺเญว
อกุสลํ  โส  อกุสลสฺส  วิปาโก  ตญฺเญว  กุสลํ  โส  กุสลสฺส วิปาโกติ ฯ
น เหวํ วตฺตพฺเพ ฯเปฯ
     [๑๑๙๑]   วิปาโก   วิปากธมฺมธมฺโมติ  ฯ  อามนฺตา  ฯ  เยเนว
จิตฺเตน  ปาณํ  หนติ  เตเนว  จิตฺเตน  นิรเย  ปจฺจติ  เยเนว  จิตฺเตน
ทานํ เทติ เตเนว จิตฺเตน สคฺเค โมทตีติ ฯ น เหวํ วตฺตพฺเพ ฯเปฯ
     [๑๑๙๒]   น  วตฺตพฺพํ  วิปาโก  วิปากธมฺมธมฺโมติ  ฯ  อามนฺตา ฯ
นนุ    วิปากา    จตฺตาโร   ขนฺธา   อรูปิโน   อญฺญมญฺญปจฺจยาติ   ฯ
อามนฺตา  ฯ  หญฺจิ  วิปากา  จตฺตาโร  ขนฺธา  อรูปิโน  อญฺญมญฺญปจฺจยา
เตน วต เร วตฺตพฺเพ วิปาโก วิปากธมฺมธมฺโมติ ฯ
                            วิปาโก วิปากธมฺมธมฺโมติกถา ฯ
                                      สตฺตโม วคฺโค ฯ
                                       ตสฺส อุทฺทานํ ฯ
                    สงฺคโห สมฺปโยโค เจตสิโก ธมฺโม เจตสิกํ ทานํ
                    ปริโภคมยํ ปุญฺญํ วฑฺฒติ อิโตทินฺเนน ตตฺถ
                    ยาเปนฺติ ปฐวี กมฺมวิปาโก ชรามรณํ วิปาโก
                    นตฺถิ อริยธมฺมวิปาโก วิปาโก วิปากธมฺมธมฺโมติ ฯ
                                             ------

             เนื้อความพระไตรปิฎกฉบับภาษาบาลีอักษรไทย เล่มที่ ๓๗ หน้าที่ ๓๘๗-๓๘๘.
https://84000.org/tipitaka/read/pali_item.php?book=37&item=1187&items=6
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=37&item=1187&items=6&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=37&item=1187&items=6
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=37&item=1187&items=6
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=37&i=1187
             สารบัญพระไตรปิฎกเล่มที่ ๓๗
https://84000.org/tipitaka/read/?index_37
https://84000.org/tipitaka/english/?index_37