ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๒ ภาษาบาลี อักษรไทย พระสุตตันตปิฎกเล่มที่ ๔ สุตฺต. ม. มูลปณฺณาสกํ
                                จูฬเวทลฺลสุตฺตํ
     [๕๐๕]   เอวมฺเม   สุตํ   เอกํ  สมยํ  ภควา  ราชคเห  วิหรติ
เวฬุวเน   กลนฺทกนิวาเป   ฯ   อถ   โข   วิสาโข   อุปาสโก  เยน
ธมฺมทินฺนา    ภิกฺขุนี    เตนุปสงฺกมิ   อุปสงฺกมิตฺวา   ธมฺมทินฺนํ   ภิกฺขุนึ
อภิวาเทตฺวา เอกมนฺตํ นิสีทิ ฯ
     [๕๐๖]   เอกมนฺตํ   นิสินฺโน   โข  วิสาโข  อุปาสโก  ธมฺมทินฺนํ
ภิกฺขุนึ    เอตทโวจ   สกฺกาโย   สกฺกาโยติ   อยฺเย   วุจฺจติ   กตโม
นุ   โข   อยฺเย   สกฺกาโย   วุตฺโต   ภควตาติ  ฯ  ปญฺจ  โข  อิเม
อาวุโส   วิสาข   อุปาทานกฺขนฺธา  สกฺกาโย  วุตฺโต  ภควตา  เสยฺยถีทํ
รูปูปาทานกฺขนฺโธ        เวทนูปาทานกฺขนฺโธ        สญฺญูปาทานกฺขนฺโธ
สงฺขารูปาทานกฺขนฺโธ    วิญฺญาณูปาทานกฺขนฺโธ    อิเม    โข   อาวุโส
วิสาข ปญฺจุปาทานกฺขนฺธา สกฺกาโย วุตฺโต ภควตาติ ฯ
     {๕๐๖.๑}   สาธยฺเยติ  โข  วิสาโข อุปาสโก ธมฺมทินฺนาย ภิกฺขุนิยา
ภาสิตํ   อภินนฺทิตฺวา   อนุโมทิตฺวา   ธมฺมทินฺนํ   ภิกฺขุนึ   อุตฺตรึ   ปญฺหํ
อปุจฺฉิ   สกฺกายสมุทโย  สกฺกายสมุทโยติ  อยฺเย  วุจฺจติ  กตโม  นุ  โข
อยฺเย  สกฺกายสมุทโย  วุตฺโต  ภควตาติ  ฯ  ยายํ  อาวุโส วิสาข ตณฺหา
โปโนพฺภวิกา      นนฺทิราคสหคตา      ตตฺรตตฺราภินนฺทินี     เสยฺยถีทํ
กามตณฺหา    ภวตณฺหา    วิภวตณฺหา    อยํ    โข   อาวุโส   วิสาข
สกฺกายสมุทโย วุตฺโต ภควตาติ ฯ
     {๕๐๖.๒}   สกฺกายนิโรโธ    สกฺกายนิโรโธติ   อยฺเย   วุจฺจติ
กตโม    นุ    โข   อยฺเย   สกฺกายนิโรโธ   วุตฺโต   ภควตาติ   ฯ
โย  โข  อาวุโส  วิสาข  ตสฺสาเยว  ตณฺหาย  อเสสวิราคนิโรโธ จาโค
ปฏินิสฺสคฺโค   มุตฺติ  อนาลโย  อยํ  โข  อาวุโส  วิสาข  สกฺกายนิโรโธ
วุตฺโต   ภควตาติ   ฯ   สกฺกายนิโรธคามินี  ปฏิปทา  สกฺกายวิโรธคามินี
ปฏิปทาติ   อยฺเย   วุจฺจติ   กตมา  นุ  โข  อยฺเย  สกฺกายนิโรธคามินี
ปฏิปทา วุตฺตา ภควตาติ ฯ
     {๕๐๖.๓}   อยเมว  โข  อาวุโส  วิสาข  อริโย อฏฺฐงฺคิโก มคฺโค
สกฺกายนิโรธคามินี   ปฏิปทา   วุตฺตา   ภควตา   เสยฺยถีทํ   สมฺมาทิฏฺฐิ
สมฺมาสงฺกปฺโป      สมฺมาวาจา      สมฺมากมฺมนฺโต      สมฺมาอาชีโว
สมฺมาวายาโม สมฺมาสติ สมฺมาสมาธีติ ฯ
     {๕๐๖.๔}   ตญฺเญว  นุ  โข อยฺเย อุปาทานํ เต ปญฺจุปาทานกฺขนฺธา
อุทาหุ     อญฺญตฺร    ปญฺจหุปาทานกฺขนฺเธหิ    อุปาทานนฺติ    ฯ    น
โข   อาวุโส  วิสาข  ตญฺเญวุปาทานํ  เต  ปญฺจุปาทานกฺขนฺธา  นปิ  ๑-
อญฺญตฺร   ปญฺจหุปาทานกฺขนฺเธหิ   อุปาทานํ   โย   โข  อาวุโส  วิสาข
ปญฺจสุ อุปาทานกฺขนฺเธสุ ฉนฺทราโค ตํ ตตฺถ อุปาทานนฺติ ฯ
     [๕๐๗]   กถํ  ปนยฺเย  สกฺกายทิฏฺฐิ  โหตีติ  ฯ  อิธาวุโส  วิสาข
อสฺสุตวา    ปุถุชฺชโน    อริยานํ    อทสฺสาวี   อริยธมฺมสฺส   อโกวิโท
อริยธมฺเม   อวินีโต   สปฺปุริสานํ   อทสฺสาวี   สปฺปุริสธมฺมสฺส  อโกวิโท
สปฺปุริสธมฺเม    อวินีโต    รูปํ   อตฺตโต   สมนุปสฺสติ   รูปวนฺตํ   วา
อตฺตานํ  อตฺตนิ  วา  รูปํ  รูปสฺมึ  วา  อตฺตานํ  เวทนํ  ... สญฺญํ ...
สงฺขาเร    ...   วิญฺญาณํ   อตฺตโต   สมนุปสฺสติ   วิญฺญาณวนฺตํ   วา
อตฺตานํ    อตฺตนิ   วา   วิญฺญาณํ   วิญฺญาณสฺมึ   วา   อตฺตานํ   เอวํ
@เชิงอรรถ:  ม. นาปิ ฯ
โข  อาวุโส  วิสาข  สกฺกายทิฏฺฐิ  โหตีติ  ฯ  กถํ  ปนยฺเย  สกฺกายทิฏฺฐิ
น   โหตีติ  ฯ  อิธาวุโส  วิสาข  สุตวา  อริยสาวโก  อริยานํ  ทสฺสาวี
อริยธมฺมสฺส    โกวิโท    อริยธมฺเม    สุวินีโต   สปฺปุริสานํ   ทสฺสาวี
สปฺปุริสธมฺมสฺส   โกวิโท   สปฺปุริสธมฺเม   สุวินีโต   น   รูปํ   อตฺตโต
สมนุปสฺสติ   น  รูปวนฺตํ  วา  อตฺตานํ  น  อตฺตนิ  วา  รูปํ  น  รูปสฺมึ
วา  อตฺตานํ  น  เวทนํ  ...  น  สญฺญํ  ...  น  สงฺขาเร  ...  น
วิญฺญาณํ   อตฺตโต   สมนุปสฺสติ   น   วิญฺญาณวนฺตํ   วา   อตฺตานํ   น
อตฺตนิ   วา   วิญฺญาณํ   น   วิญฺญาณสฺมึ   วา   อตฺตานํ   เอวํ   โข
อาวุโส วิสาข สกฺกายทิฏฺฐิ น โหตีติ ฯ
     [๕๐๘]   กตโม  ปนยฺเย  อริโย  อฏฺฐงฺคิโก  มคฺโคติ  ฯ  อยเมว
โข   อาวุโส   วิสาข  อริโย  อฏฺฐงฺคิโก  มคฺโค  เสยฺยถีทํ  สมฺมาทิฏฺฐิ
สมฺมาสงฺกปฺโป      สมฺมาวาจา      สมฺมากมฺมนฺโต      สมฺมาอาชีโว
สมฺมาวายาโม   สมฺมาสติ  สมฺมาสมาธีติ  ฯ  อริโย  ปนยฺเย  อฏฺฐงฺคิโก
มคฺโค   สงฺขโต   อุทาหุ   อสงฺขโตติ  ฯ  อริโย  โข  อาวุโส  วิสาข
อฏฺฐงฺคิโก   มคฺโค  สงฺขโตติ  ฯ  อริเยน  นุ  โข  อยฺเย  อฏฺฐงฺคิเกน
มคฺเคน  ตโย  ขนฺธา  สงฺคหิตา  อุทาหุ  ตีหิ  ขนฺเธหิ  อริโย อฏฺฐงฺคิโก
มคฺโค   สงฺคหิโตติ   ฯ  น  โข  อาวุโส  วิสาข  อริเยน  อฏฺฐงฺคิเกน
มคฺเคน   ตโย   ขนฺธา   สงฺคหิตา   ตีหิ   จ   โข   อาวุโส  วิสาข
ขนฺเธหิ   อริโย   อฏฺฐงฺคิโก   มคฺโค   สงฺคหิโต  ยา  จาวุโส  วิสาข
สมฺมาวาจา   โย   จ   สมฺมากมฺมนฺโต   โย   จ  สมฺมาอาชีโว  อิเม
ธมฺมา   สีลกฺขนฺเธน   สงฺคหิตา   โย   จ   สมฺมาวายาโม   ยา   จ
สมฺมาสติ    โย    จ    สมฺมาสมาธิ   อิเม   ธมฺมา   สมาธิกฺขนฺเธน
สงฺคหิตา   ยา   จ   สมฺมาทิฏฺฐิ  โย  จ  สมฺมาสงฺกปฺโป  อิเม  ธมฺมา
ปญฺญากฺขนฺเธน    สงฺคหิตาติ    ฯ   กตโม   ปนยฺเย   สมาธิ   กตเม
ธมฺมา    สมาธินิมิตฺตา    กตเม    ธมฺมา    สมาธิปริกฺขารา   กตมา
สมาธิภาวนาติ  ฯ  ยา  โข  อาวุโส  วิสาข  จิตฺตสฺเสกคฺคตา อยํ สมาธิ
จตฺตาโร     สติปฏฺฐานา    สมาธินิมิตฺตา    จตฺตาโร    สมฺมปฺปธานา
สมาธิปริกฺขารา    ยา    เตสญฺเญว    ธมฺมานํ   อาเสวนา   ภาวนา
พหุลีกมฺมํ อยํ ตตฺถ สมาธิภาวนาติ ฯ
     [๕๐๙]   กตี   ปนยฺเย  สงฺขาราติ  ฯ  ตโยเม  อาวุโส  วิสาข
สงฺขารา    กายสงฺขาโร    วจีสงฺขาโร   จิตฺตสงฺขาโรติ   ฯ   กตโม
ปนยฺเย   กายสงฺขาโร  กตโม  วจีสงฺขาโร  กตโม   จิตฺตสงฺขาโรติ  ฯ
อสฺสาสปสฺสาสา   โข   อาวุโส   วิสาข   กายสงฺขาโร   วิตกฺกวิจารา
วจีสงฺขาโร   สญฺญา   จ   เวทนา   จ   จิตฺตสงฺขาโรติ   ฯ   กสฺมา
ปนยฺเย     อสฺสาสปสฺสาสา    กายสงฺขาโร    กสฺมา    วิตกฺกวิจารา
วจีสงฺขาโร   กสฺมา   สญฺญา   จ   เวทนา   จ   จิตฺตสงฺขาโรติ   ฯ
อสฺสาสปสฺสาสา    โข    อาวุโส   วิสาข   กายิกา   เอเต   ธมฺมา
กายปฏิพทฺธา    ตสฺมา   อสฺสาสปสฺสาสา   กายสงฺขาโร   ปุพฺเพ   โข
อาวุโส    วิสาข   วิตกฺเกตฺวา   วิจาเรตฺวา   วาจํ   ภินฺทติ   ตสฺมา
วิตกฺกวิจารา   วจีสงฺขาโร   สญฺญา   จ  เวทนา  จ  เจตสิกา  เอเต
ธมฺมา จิตฺตปฏิพทฺธา ตสฺมา สญฺญา จ เวทนา จ จิตฺตสงฺขาโรติ ฯ
     [๕๑๐]   กถํ  ๑-  ปนยฺเย  สญฺญาเวทยิตนิโรธสมาปตฺติ  โหตีติ  ฯ
น   โข   อาวุโส   วิสาข  สญฺญาเวทยิตนิโรธํ  สมาปชฺชนฺตสฺส  ภิกฺขุโน
เอวํ    โหติ    อหํ   สญฺญาเวทยิตนิโรธํ   สมาปชฺชิสฺสนฺติ   วา   อหํ
สญฺญาเวทยิตนิโรธํ    สมาปชฺชามีติ    วา    อหํ    สญฺญาเวทยิตนิโรธํ
สมาปนฺโนติ   วา   อถ   ขฺวสฺส   ปุพฺเพว   ตถา  จิตฺตํ  ภาวิตํ  โหติ
ยนฺตํ    ตถตฺตาย   อุปเนตีติ   ฯ   สญฺญาเวทยิตนิโรธํ   สมาปชฺชนฺตสฺส
ปนยฺเย    ภิกฺขุโน    กตเม    ธมฺมา   ปฐมํ   นิรุชฺฌนฺติ   ยทิ   วา
กายสงฺขาโร ยทิ วา วจีสงฺขาโร ยทิ วา จิตฺตสงฺขาโรติ ฯ
     {๕๑๐.๑}   สญฺญาเวทยิตนิโรธํ   สมาปชฺชนฺตสฺส   โข   อาวุโส
วิสาข   ภิกฺขุโน  ปฐมํ  นิรุชฺฌติ  วจีสงฺขาโร  ตโต  กายสงฺขาโร  ตโต
จิตฺตสงฺขาโรติ    ฯ    กถํ    ปนยฺเย    สญฺญาเวทยิตนิโรธสมาปตฺติยา
วุฏฺฐานํ  โหตีติ  ฯ  น  โข  อาวุโส วิสาข สญฺญาเวทยิตนิโรธสมาปตฺติยา
วุฏฺฐหนฺตสฺส   ภิกฺขุโน   เอวํ   โหติ  อหํ  สญฺญาเวทยิตนิโรธสมาปตฺติยา
วุฏฺฐหิสฺสนฺติ   วา   อหํ   สญฺญาเวทยิตนิโรธสมาปตฺติยา  วุฏฺฐหามีติ  วา
อหํ    สญฺญาเวทยิตนิโรธสมาปตฺติยา    วุฏฺฐิโตติ    วา   อถ   ขฺวสฺส
ปุพฺเพว   ตถา   จิตฺตํ   ภาวิตํ   โหติ   ยนฺตํ  ตถตฺตาย  อุปเนตีติ  ฯ
สญฺญาเวทยิตนิโรธสมาปตฺติยา   วุฏฺฐหนฺตสฺส   ปนยฺเย   ภิกฺขุโน   กตเม
ธมฺมา  ปฐมํ  อุปฺปชฺชนฺติ  ยทิ  วา  กายสงฺขาโร  ยทิ  วา  วจีสงฺขาโร
@เชิงอรรถ:  ยุ. กถญฺจ ปนยฺเยติ ทิสฺสติ ฯ
ยทิ     วา     จิตฺตสงฺขาโรติ     ฯ    สญฺญาเวทยิตนิโรธสมาปตฺติยา
วุฏฺฐหนฺตสฺส  โข  อาวุโส  วิสาข  ภิกฺขุโน  ปฐมํ  อุปฺปชฺชติ จิตฺตสงฺขาโร
ตโต  กายสงฺขาโร  ตโต  วจีสงฺขาโรติ  ฯ สญฺญาเวทยิตนิโรธสมาปตฺติยา
วุฏฺฐิตํ  ปนยฺเย  ภิกฺขุํ  กตี ผสฺสา ผุสนฺตีติ ฯ สญฺญาเวทยิตนิโรธสมาปตฺติยา
วุฏฺฐิตํ  โข  อาวุโส  วิสาข  ภิกฺขุํ  ตโย  ผสฺสา  ผุสนฺติ  สุญฺญโต ผสฺโส
อนิมิตฺโต   ผสฺโส  อปฺปณิหิโต  ผสฺโสติ  ฯ  สญฺญาเวทยิตนิโรธสมาปตฺติยา
วุฏฺฐิตสฺส  ปนยฺเย  ภิกฺขุโน  กึนินฺนํ  จิตฺตํ  โหติ  กึโปณํ  กึปพฺภารนฺติ  ฯ
สญฺญาเวทยิตนิโรธสมาปตฺติยา   วุฏฺฐิตสฺส   โข  อาวุโส  วิสาข  ภิกฺขุโน
วิเวกนินฺนํ จิตฺตํ โหติ วิเวกโปณํ วิเวกปพฺภารนฺติ ฯ
     [๕๑๑]   กตี  ปนยฺเย  เวทนาติ  ฯ  ติสฺโส  โข  อิมา  อาวุโส
วิสาข  เวทนา  สุขา  เวทนา  ทุกฺขา  เวทนา  อทุกฺขมสุขา เวทนาติ ฯ
กตมา   ปนยฺเย   สุขา   เวทนา   กตมา   ทุกฺขา   เวทนา   กตมา
อทุกฺขมสุขา   เวทนาติ   ฯ   ยํ   โข   อาวุโส   วิสาข  กายิกํ  วา
เจตสิกํ   วา   สุขํ   สาตํ   เวทยิตํ   อยํ   สุขา   เวทนา  ยํ  โข
อาวุโส   วิสาข   กายิกํ   วา   เจตสิกํ   วา  ทุกฺขํ  อสาตํ  เวทยิตํ
อยํ   ทุกฺขา   เวทนา   ยํ  โข  อาวุโส  วิสาข  กายิกํ  วา  เจตสิกํ
วา   เนว   สาตํ    นาสาตํ  เวทยิตํ  อยํ  อทุกฺขมสุขา  เวทนาติ  ฯ
สุขา   ปนยฺเย   เวทนา   กึสุขา   กึทุกฺขาติ   ฯ  สุขา  โข  อาวุโส
วิสาข   เวทนา   ฐิติสุขา   วิปริณามทุกฺขา   ทุกฺขา  เวทนา  ฐิติทุกฺขา
วิปริณามสุขา   อทุกฺขมสุขา   เวทนา   สญฺญาณสุขา   อญฺญาณทุกฺขาติ  ฯ
สุขาย    ปนยฺเย    เวทนาย    กึ    อนุสโย    อนุเสติ    ทุกฺขาย
เวทนาย   กึ   อนุสโย   อนุเสติ  อทุกฺขมสุขาย  เวทนาย  กึ  อนุสโย
อนุเสตีติ   ฯ   สุขาย   โข   อาวุโส   วิสาข  เวทนาย  ราคานุสโย
อนุเสติ    ทุกฺขาย    เวทนาย   ปฏิฆานุสโย   อนุเสติ   อทุกฺขมสุขาย
เวทนาย   อวิชฺชานุสโย  อนุเสตีติ  ฯ  สพฺพาย  นุ  โข  อยฺเย  สุขาย
เวทนาย    ราคานุสโย    อนุเสติ    สพฺพาย    ทุกฺขาย    เวทนาย
ปฏิฆานุสโย   อนุเสติ   สพฺพาย   อทุกฺขมสุขาย  เวทนาย  อวิชฺชานุสโย
อนุเสตีติ ฯ
     {๕๑๑.๑}   น   โข  อาวุโส  วิสาข  สพฺพาย  สุขาย  เวทนาย
ราคานุสโย   อนุเสติ   น   สพฺพาย   ทุกฺขาย   เวทนาย  ปฏิฆานุสโย
อนุเสติ    น     สพฺพาย    อทุกฺขมสุขาย    เวทนาย   อวิชฺชานุสโย
อนุเสตีติ   ฯ   สุขาย   ปนยฺเย   เวทนาย   กึ   ปหาตพฺพํ   ทุกฺขาย
เวทนาย   กึ   ปหาตพฺพํ   อทุกฺขมสุขาย  เวทนาย  กึ  ปหาตพฺพนฺติ  ฯ
สุขาย    โข   อาวุโส   วิสาข   เวทนาย   ราคานุสโย   ปหาตพฺโพ
ทุกฺขาย   เวทนาย   ปฏิฆานุสโย   ปหาตพฺโพ   อทุกฺขมสุขาย  เวทนาย
อวิชฺชานุสโย   ปหาตพฺโพติ   ฯ   สพฺพาย   นุ   โข   อยฺเย   สุขาย
เวทนาย    ราคานุสโย    ปหาตพฺโพ    สพฺพาย   ทุกฺขาย   เวทนาย
ปฏิฆานุสโย   ปหาตพฺโพ  สพฺพาย  อทุกฺขมสุขาย  เวทนาย  อวิชฺชานุสโย
ปหาตพฺโพติ   ฯ   น   โข  อาวุโส  วิสาข  สพฺพาย  สุขาย  เวทนาย
ราคานุสโย   ปหาตพฺโพ   น   สพฺพาย  ทุกฺขาย  เวทนาย  ปฏิฆานุสโย
ปหาตพฺโพ    น    สพฺพาย    อทุกฺขมสุขาย   เวทนาย   อวิชฺชานุสโย
ปหาตพฺโพ    อิธาวุโส    วิสาข   ภิกฺขุ   วิวิจฺเจว   กาเมหิ   วิวิจฺจ
อกุสเลหิ   ธมฺเมหิ   สวิตกฺกํ   สวิจารํ   วิเวกชํ   ปีติสุขํ  ปฐมํ  ฌานํ
อุปสมฺปชฺช    วิหรติ    ราคนฺเตน    ปชหติ   น   ตตฺถ   ราคานุสโย
อนุเสติ    อิธาวุโส    วิสาข    ภิกฺขุ    อิติ   ปฏิสญฺจิกฺขติ   กุทาสฺสุ
นามหํ   ตทายตนํ   อุปสมฺปชฺช   วิหริสฺสามิ   ยทริยา  เอตรหิ  อายตนํ
อุปสมฺปชฺช   วิหรนฺตีติ   อิติ   อนุตฺตเรสุ  วิโมกฺเขสุ  ปิหํ  อุปฏฺฐาปยโต
อุปฺปชฺชติ   ปิหปจฺจยา   ๑-   โทมนสฺสํ   ปฏิฆนฺเตน   ปชหติ  น  ตตฺถ
ปฏิฆานุสโย   อนุเสติ   อิธาวุโส   วิสาข   ภิกฺขุ   สุขสฺส  จ  ปหานา
ทุกฺขสฺส    จ    ปหานา    ปุพฺเพว   โสมนสฺสโทมนสฺสานํ   อฏฺฐงฺคมา
อทุกฺขมสุขํ    อุเปกฺขาสติปาริสุทฺธึ   จตุตฺถํ   ฌานํ   อุปสมฺปชฺช   วิหรติ
อวิชฺชนฺเตน ปชหติ น ตตฺถ อวิชฺชานุสโย อนุเสตีติ ฯ
     [๕๑๒]   สุขาย  ปนยฺเย  เวทนาย  กึ  ปฏิภาโคติ  ฯ  สุขาย โข
อาวุโส   วิสาข   เวทนาย   ราโค   ปฏิภาโคติ  ฯ  ทุกฺขาย  ปนยฺเย
เวทนาย   กึ   ปฏิภาโคติ  ฯ  ทุกฺขาย  โข  อาวุโส  วิสาข  เวทนาย
ปฏิโฆ    ปฏิภาโคติ    ฯ    อทุกฺขมสุขาย    ปนยฺเย   เวทนาย   กึ
ปฏิภาโคติ   ฯ   อทุกฺขมสุขาย  โข  อาวุโส  วิสาข  เวทนาย  อวิชฺชา
ปฏิภาโคติ   ฯ   อวิชฺชาย   ปนยฺเย  กึ  ปฏิภาโคติ  ฯ  อวิชฺชาย  โข
อาวุโส  วิสาข  วิชฺชา  ปฏิภาโคติ  ฯ  วิชฺชาย  ปนยฺเย กึ ปฏิภาโคติ ฯ
วิชฺชาย   โข   อาวุโส   วิสาข   วิมุตฺติ   ปฏิภาโคติ   ฯ   วิมุตฺติยา
@เชิงอรรถ:  ม. ปิหาปจฺจยา ฯ
ปนยฺเย  กึ  ปฏิภาโคติ  ฯ  วิมุตฺติยา  โข  วิสาข  นิพฺพานํ ปฏิภาโคติ ฯ
นิพฺพานสฺส   ปนยฺเย   กึ   ปฏิภาโคติ   ฯ  อจฺจสราวุโส  วิสาข  ปญฺหํ
นาสกฺขิ   ปญฺหานํ   ปริยนฺตํ   คเหตุํ   นิพฺพาโนคธํ  หิ  อาวุโส  วิสาข
พฺรหฺมจริยํ   นิพฺพานปรายนํ   นิพฺพานปริโยสานํ   อากงฺขมาโน  เจ  ตฺวํ
อาวุโส   วิสาข   ภควนฺตํ   อุปสงฺกมิตฺวา  เอตมตฺถํ  ปุจฺเฉยฺยาสิ  ยถา
จ เต ภควา พฺยากโรติ ตถา นํ ธาเรยฺยาสีติ ฯ
     [๕๑๓]   อถ   โข   วิสาโข   อุปาสโก  ธมฺมทินฺนาย  ภิกฺขุนิยา
ภาสิตํ     อภินนฺทิตฺวา     อนุโมทิตฺวา     อุฏฺฐายาสนา     ธมฺมทินฺนํ
ภิกฺขุนึ   อภิวาเทตฺวา   ปทกฺขิณํ   กตฺวา   เยน   ภควา   เตนุปสงฺกมิ
อุปสงฺกมิตฺวา   ภควนฺตํ   อภิวาเทตฺวา   เอกมนฺตํ   นิสีทิ  ฯ  เอกมนฺตํ
นิสินฺโน  โข  วิสาโข  อุปาสโก  ยาวตโก  อโหสิ  ธมฺมทินฺนาย ภิกฺขุนิยา
สทฺธึ  กถาสลฺลาโป  ตํ  สพฺพํ  ภควโต  อาโรเจสิ  ฯ เอวํ วุตฺเต ภควา
วิสาขํ    อุปาสกํ   เอตทโวจ   ปณฺฑิตา   วิสาข   ธมฺมทินฺนา   ภิกฺขุนี
มหาปญฺญา    วิสาข    ธมฺมทินฺนา    ภิกฺขุนี    มญฺเจปิ   ตฺวํ   วิสาข
เอตมตฺถํ  ปฏิปุจฺเฉยฺยาสิ  ๑-  อหมฺปิ  ตํ  เอวเมว  พฺยากเรยฺยํ ยถา ตํ
ธมฺมทินฺนาย ภิกฺขุนิยา พฺยากตํ เอโสเวตสฺส อตฺโถ เอวเมตํ ธาเรหีติ ฯ
     อิทมโวจ    ภควา    อตฺตมโน    วิสาโข   อุปาสโก   ภควโต
ภาสิตํ อภินนฺทีติ ฯ
                      จูฬเวทลฺลสุตฺตํ นิฏฺฐิตํ จตุตฺถํ ฯ
                                   ---------
@เชิงอรรถ:  ม. ปุจฺเฉยฺยาสิ ฯ



             เนื้อความพระไตรปิฎกฉบับภาษาบาลีอักษรไทย เล่มที่ ๑๒ หน้าที่ ๕๔๗-๕๕๕. http://84000.org/tipitaka/read/pali_item_s.php?book=12&item=505&items=9&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/read/pali_item_s.php?book=12&item=505&items=9&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=12&item=505&items=9&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=12&item=505&items=9&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=12&i=505              The Pali Atthakatha in Thai :- http://84000.org/tipitaka/atthapali/read_th.php?B=8&A=6750              The Pali Atthakatha in Roman :- http://84000.org/tipitaka/atthapali/read_rm.php?B=8&A=6750              สารบัญพระไตรปิฎกเล่มที่ ๑๒ http://84000.org/tipitaka/read/?index_12

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :