ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๓ ภาษาบาลี อักษรไทย พระสุตตันตปิฎกเล่มที่ ๕ สุตฺต. ม. มชฺฌิมปณฺณาสกํ
                        จงฺกีสุตฺตํ
     [๖๔๖]   เอวมฺเม  สุตํ  เอกํ สมยํ ภควา โกสเลสุ จาริกญฺจรมาโน
มหตา   ภิกฺขุสงฺเฆน   สทฺธึ   เยน   โอปาสาทํ   ๑-  นาม  โกสลานํ
พฺราหฺมณคาโม    ตทวสริ    ฯ    ตตฺร    สุทํ   ภควา   โอปาสาเท
วิหรติ   อุตฺตเรน   โอปาสาทํ  เทววเน  สาลวเน  ฯ  เตน  โข  ปน
สมเยน    จงฺกี    พฺราหฺมโณ    โอปาสาทํ    อชฺฌาวสติ    สตฺตุสฺสทํ
สติณกฏฺโฐทกํ    สธญฺญํ    ราชโภคฺคํ    รญฺญา   ปเสนทินา   โกสเลน
ทินฺนํ ราชทายํ พฺรหฺมเทยฺยํ ฯ
     [๖๔๗]   อสฺโสสุํ   โข   โอปาสาทกา   ๒-   พฺราหฺมณคหปติกา
สมโณ   ขลุ   โภ   โคตโม  สกฺยปุตฺโต  สกฺยกุลา  ปพฺพชิโต  โกสเลสุ
จาริกญฺจรมาโน   มหตา   ภิกฺขุสงฺเฆน   สทฺธึ   โอปาสาทํ   อนุปฺปตฺโต
โอปาสาเท   วิหรติ   อุตฺตเรน   โอปาสาทํ   เทววเน   สาลวเน  ตํ
โข    ปน   ภวนฺตํ   โคตมํ   เอวํกลฺยาโณ   กิตฺติสทฺโท    อพฺภุคฺคโต
อิติปิ   โส   ภควา   อรหํ   สมฺมาสมฺพุทฺโธ  วิชฺชาจรณสมฺปนฺโน  สุคโต
โลกวิทู    อนุตฺตโร    ปุริสทมฺมสารถิ   สตฺถา   เทวมนุสฺสานํ   พุทฺโธ
ภควา   โส   อิมํ   โลกํ  สเทวกํ  สมารกํ  สพฺรหฺมกํ  สสฺสมณพฺราหฺมณึ
ปชํ   สเทวมนุสฺสํ   สยํ   อภิญฺญา   สจฺฉิกตฺวา   ปเวเทติ   โส  ธมฺมํ
เทเสติ       อาทิกลฺยาณํ       มชฺเฌกลฺยาณํ       ปริโยสานกลฺยาณํ
@เชิงอรรถ:  ยุ. โอปสาทนฺติ ทิสฺสติ ฯ     ยุ. โอปสาทกาติ ทิสฺสติ ฯ
สาตฺถํ    สพฺยญฺชนํ    เกวลปริปุณฺณํ    ปริสุทฺธํ   พฺรหฺมจริยํ   ปกาเสติ
สาธุ  โข  ปน  ตถารูปานํ  อรหตํ  ทสฺสนํ โหตีติ ฯ อถ โข โอปาสาทกา
พฺราหฺมณคหปติกา    โอปาสาทา    นิกฺขมิตฺวา    สงฺฆา    สงฺฆีคณีภูตา
อุตฺตเรน  มุขา  ๑-  คจฺฉนฺติ  เยน  เทววนํ  สาลวนํ  ฯ  เตน โข ปน
สมเยน จงฺกี พฺราหฺมโณ อุปริ ปาสาเท ทิวา เสยฺยํ อุปคโต โหติ ฯ
     [๖๔๘]   อทฺทสา    โข    จงฺกี    พฺราหฺมโณ   โอปาสาทเก
พฺราหฺมณคหปติเก    โอปาสาทา    นิกฺขมิตฺวา    สงฺเฆ    สงฺฆีคณีภูเต
อุตฺตเรน  มุเข  คจฺฉนฺเต  เยน  เทววนํ สาลวนํ ทิสฺวาน ขตฺตํ อามนฺเตสิ
กินฺนุ   โข   โภ   ขตฺเต  โอปาสาทกา  พฺราหฺมณคหปติกา  โอปาสาทา
นิกฺขมิตฺวา   สงฺฆา   สงฺฆีคณีภูตา   อุตฺตเรน  มุขา  ๒-  คจฺฉนฺติ  เยน
เทววนํ   สาลวนนฺติ   ฯ  อตฺถิ  โภ  จงฺกิ  สมโณ  โคตโม  สกฺยปุตฺโต
สกฺยกุลา      ปพฺพชิโต      โกสเลสุ     จาริกญฺจรมาโน     มหตา
ภิกฺขุสงฺเฆน    สทฺธึ    โอปาสาทํ    อนุปฺปตฺโต   โอปาสาเท   วิหรติ
อุตฺตเรน   โอปาสาทํ   เทววเน   สาลวเน   ตํ   โข   ปน   ภวนฺตํ
โคตมํ    เอวํกลฺยาโณ   กิตฺติสทฺโท   อพฺภุคฺคโต   อิติปิ   โส   ภควา
อรหํ   สมฺมาสมฺพุทฺโธ   วิชฺชาจรณสมฺปนฺโน   สุคโต   โลกวิทู  อนุตฺตโร
ปุริสทมฺมสารถิ    สตฺถา    เทวมนุสฺสานํ    พุทฺโธ   ภควาติ   ตเมเต
ภวนฺตํ   โคตมํ   ทสฺสนาย  อุปสงฺกมนฺตีติ  ฯ  เตนหิ  โภ  ขตฺเต  เยน
โอปาสาทกา    พฺราหฺมณคหปติกา    เตนุปสงฺกมิ    ๓-   อุปสงฺกมิตฺวา
@เชิงอรรถ: ๑-๒ ยุ. มุเข ฯ    ยุ. เตนุปสงฺกม ฯ
โอปาสาเท  ๑-  พฺราหฺมณคหปติเก  เอวํ  วเทหิ  จงฺกี  โภ  พฺราหฺมโณ
เอวมาห   อาคเมนฺตุ   กิร   ภวนฺโต  จงฺกีปิ  พฺราหฺมโณ  สมณํ  โคตมํ
ทสฺสนาย  อุปสงฺกมตีติ  ฯ  เอวํ  โภติ โข โส ขตฺตา จงฺกิสฺส พฺราหฺมณสฺส
ปฏิสฺสุตฺวา    เยน    โอปาสาทกา    พฺราหฺมณคหปติกา    เตนุปสงฺกมิ
อุปสงฺกมิตฺวา    โอปาสาทเก    พฺราหฺมณคหปติเก    เอตทโวจ   จงฺกี
โภ   พฺราหฺมโณ  เอวมาห  อาคเมนฺตุ  กิร  ภวนฺโต  จงฺกีปิ  พฺราหฺมโณ
สมณํ โคตมํ ทสฺสนาย อุปสงฺกมิสฺสตีติ ฯ
     [๖๔๙]   เตน  โข  ปน  สมเยน  นานาเวรชฺชกานํ  พฺราหฺมณานํ
ปญฺจมตฺตานิ    พฺราหฺมณสตานิ    โอปาสาเท    ปฏิวสนฺติ    เกนจิเทว
กรณีเยน   ฯ   อสฺโสสุํ   โข   เต  พฺราหฺมณา  จงฺกี  กิร  พฺราหฺมโณ
สมณํ   โคตมํ   ทสฺสนาย  อุปสงฺกมิสฺสตีติ  ฯ  อถ  ๒-  เต  พฺราหฺมณา
เยน   จงฺกี   พฺราหฺมโณ   เตนุปสงฺกมึสุ  อุปสงฺกมิตฺวา  จงฺกึ  พฺราหฺมณํ
เอตทโวจุํ  สจฺจํ  กิร  ภวํ  จงฺกี  สมณํ โคตมํ ทสฺสนาย อุปสงฺกมิสฺสตีติ ฯ
เอวํ โข ๓- โภ โหติ อหํปิ สมณํ โคตมํ ทสฺสนาย อุปสงฺกมิสฺสามีติ ฯ
     {๖๔๙.๑}   มา  ภวํ  จงฺกี สมณํ โคตมํ ทสฺสนาย อุปสงฺกมิ น อรหติ
ภวํ  จงฺกี  สมณํ  โคตมํ  ทสฺสนาย อุปสงฺกมิตุํ สมโณ เตฺวว โคตโม อรหติ
ภวนฺตํ  จงฺกึ  ทสฺสนาย  อุปสงฺกมิตุํ  ภวญฺหิ  จงฺกี  อุภโตสุชาโต  มาติโต
จ   ปิติโต   จ   สํสุทฺธคหณิโก   ยาว  สตฺตมา  ปิตามหยุคา  อกฺขิตฺโต
@เชิงอรรถ:  ยุ. โอปสาทเก ฯ    ยุ. อถ โข เต ฯ    ยุ. เอวํ โข เม ฯ
อนุปกฺกุฏฺโฐ   ชาติวาเทน   ยมฺปิ   ภวํ   จงฺกี   อุภโตสุชาโต  มาติโต
จ   ปิติโต   จ   สํสุทฺธคหณิโก   ยาว  สตฺตมา  ปิตามหยุคา  อกฺขิตฺโต
อนุปกฺกุฏฺโฐ    ชาติวาเทน    อิมินาปงฺเคน   น   อรหติ   ภวํ   จงฺกี
สมณํ    โคตมํ    ทสฺสนาย    อุปสงฺกมิตุํ    สมโณ   เตฺวว   โคตโม
อรหติ ภวนฺตํ จงฺกึ ทสฺสนาย อุปสงฺกมิตุํ
     {๖๔๙.๒}   ภวญฺหิ  จงฺกี  อทฺโธ  มหทฺธโน  มหาโภโค ภวญฺหิ จงฺกี
ติณฺณํ     เวทานํ     ปารคู     สนิฆณฺฑุเกฏุภานํ     สากฺขรปฺปเภทานํ
อิติหาสปญฺจมานํ     ปทโก    เวยฺยากรโณ    โลกายตมหาปุริสลกฺขเณสุ
อนวโย    ภวญฺหิ    จงฺกี   อภิรูโป   ทสฺสนีโย   ปาสาทิโก   ปรมาย
วณฺณโปกฺขรตาย       สมนฺนาคโต       พฺรหฺมวณฺณี       พฺรหฺมวจฺฉสี
อขุทฺทาวกาโส  ทสฺสนาย  ภวญฺหิ  จงฺกี  สีลวา  พุฑฺฒสีลี  พุฑฺฒสีเลน  ๑-
สมนฺนาคโต   ภวญฺหิ   จงฺกี   กลฺยาณวาโจ   กลฺยาณวากฺกรโณ  โปริยา
วาจาย   สมนฺนาคโต   วิสฏฺฐาย   อเนลคฬาย   อตฺถสฺส   วิญฺญาปนิยา
ภวญฺหิ   จงฺกี   พหุนฺนํ   อาจริยปาจริโย   ตีณิ   มาณวกสตานิ   มนฺเต
วาเจติ   ภวญฺหิ   จงฺกี  รญฺโญ  ปเสนทิสฺส  โกสลสฺส  สกฺกโต  ครุกโต
มานิโต   ปูชิโต   อปจิโต   ภวญฺหิ   จงฺกี  พฺราหฺมณสฺส  โปกฺขรสาติสฺส
สกฺกโต   ครุกโต   มานิโต   ปูชิโต  อปจิโต  ภวญฺหิ  จงฺกี  โอปาสาทํ
อชฺฌาวสติ   สตฺตุสฺสทํ   สติณกฏฺโฐทกํ   สธญฺญํ   ราชโภคฺคํ  รญฺญา  ๒-
ปเสนทินา    โกสเลน    ทินฺนํ   ราชทายํ   พฺรหฺมเทยฺยํ   ยมฺปิ   ภวํ
จงฺกี      โอปาสาทํ      อชฺฌาวสติ      สตฺตุสฺสทํ     สติณกฏฺโฐทกํ
@เชิงอรรถ:  ยุ. พุทฺธสีลี พุทฺธสีเลน ฯ     ยุ. รญโญ
สธญฺญํ   ราชโภคฺคํ   รญฺญา   ปเสนทินา   โกสเลน   ทินฺนํ   ราชทายํ
พฺรหฺมเทยฺยํ   อิมินาปงฺเคน   น   อรหติ   ภวํ   จงฺกี   สมณํ   โคตมํ
ทสฺสนาย   อุปสงฺกมิตุํ   สมโณ   เตฺวว   โคตโม  อรหติ  ภวนฺตํ  จงฺกึ
ทสฺสนาย อุปสงฺกมิตุนฺติ ฯ
     [๖๕๐]   เอวํ  วุตฺเต  จงฺกี  พฺราหฺมโณ  เต พฺราหฺมเณ เอตทโวจ
เตนหิ  โภ  มมาปิ  สุณาถ  ยถา  ยถา  มยเมว  อรหาม  ตํ  สมณํ ๑-
โคตมํ   ทสฺสนาย   อุปสงฺกมิตุํ   น   เตฺวว  อรหติ  โส  ภวํ  โคตโม
อมฺหากํ    ทสฺสนาย    อุปสงฺกมิตุํ    สมโณ    ขลุ    โภ    โคตโม
อุภโตสุชาโต   มาติโต   จ   ปิติโต   จ  สํสุทฺธคหณิโก  ยาว  สตฺตมา
ปิตามหยุคา   อกฺขิตฺโต   อนุปกฺกุฏฺโฐ   ชาติวาเทน   ยมฺปิ  ๒-  สมโณ
โคตโม    อุภโตสุชาโต    ฯเปฯ    ชาติวาเทน    อิมินาปงฺเคน   น
อรหติ   โส   ภวํ   โคตโม   อมฺหากํ  ทสฺสนาย  อุปสงฺกมิตุํ  อถ  โข
มยเมว   อรหาม   ตํ   ภวนฺตํ   โคตมํ   ทสฺสนาย  อุปสงฺกมิตุํ  สมโณ
ขลุ    โภ    โคตโม    ปหูตํ    หิรญฺญสุวณฺณํ    โอหาย    ปพฺพชิโต
ภูมิคตํ    จ    เวหาสฏฺฐญฺจ   สมโณ   ขลุ   โภ   โคตโม   ทหโรว
สมาโน    สุสุกาฬเกโส   ภเทฺรน   โยพฺพเนน   สมนฺนาคโต   ปฐเมน
วยสา   อคารสฺมา   อนคาริยํ   ปพฺพชิโต   สมโณ   ขลุ  โภ  โคตโม
อกามกานํ   มาตาปิตูนํ   อสฺสุมุขานํ   รุทนฺตานํ  เกสมสฺสุํ  โอหาเรตฺวา
กาสายานิ   วตฺถานิ   อจฺฉาเทตฺวา   อคารสฺมา   อนคาริยํ   ปพฺพชิโต
สมโณ   ขลุ   โภ   โคตโม   อภิรูโป   ทสฺสนีโย  ปาสาทิโก  ปรมาย
@เชิงอรรถ:  ยุ. ภวนฺตํ ฯ      ยุ. ยมฺปิ โภ ฯ
วณฺณโปกฺขรตาย       สมนฺนาคโต       พฺรหฺมวณฺณี       พฺรหฺมวจฺฉสี
อขุทฺทาวกาโส   ทสฺสนาย   สมโณ   ขลุ  โภ  โคตโม  สีลวา  อริยสีลี
กุสลสีลี   กุสเลน   สีเลน   สมนฺนาคโต   สมโณ   ขลุ   โภ  โคตโม
กลฺยาณวาโจ    กลฺยาณวากฺกรโณ    โปริยา    วาจาย    สมนฺนาคโต
วิสฏฺฐาย    อเนลคฬาย    อตฺถสฺส   วิญฺญาปนิยา   สมโณ   ขลุ   โภ
โคตโม พหุนฺนํ อาจริยปาจริโย
     {๖๕๐.๑}   สมโณ  ขลุ  โภ  โคตโม  ขีณกามราโค  วิคตจาปลฺโล
สมโณ   ขลุ   โภ   โคตโม   กมฺมวาที   กิริยวาที   อปาปปุเรกฺขาโร
พฺรหฺมญฺญาย   ปชาย   สมโณ   ขลุ  โภ  โคตโม  อุจฺจากุลา  ปพฺพชิโต
อสํภินฺนา  ๑-  ขตฺติยกุลา  สมโณ  ขลุ  โภ  โคตโม  อทฺธกุลา ปพฺพชิโต
มหทฺธนา   มหาโภคา   สมณํ  ขลุ  โภ  โคตมํ  ติโรรฏฺฐา  ติโรชนปทา
สํปุจฺฉิตุํ   อาคจฺฉนฺติ  สมณํ  ขลุ  โภ  โคตมํ  อเนกานิ  เทวตาสหสฺสานิ
ปาเณน   ๒-   สรณํ   คตานิ   สมณํ   ขลุ  โภ  โคตมํ  เอวํกลฺยาโณ
กิตฺติสทฺโท    อพฺภุคฺคโต   อิติปิ   โส   ภควา   อรหํ   สมฺมาสมฺพุทฺโธ
วิชฺชาจรณสมฺปนฺโน     สุคโต    โลกวิทู    อนุตฺตโร    ปุริสทมฺมสารถิ
สตฺถา เทวมนุสฺสานํ พุทฺโธ ภควาติ
     {๖๕๐.๒}   สมโณ   ขลุ   โภ  โคตโม  ทฺวตฺตึสมหาปุริสลกฺขเณหิ
สมนฺนาคโต  สมณํ  ขลุ  โภ  โคตมํ  ราชา  มาคโธ  เสนิโย พิมฺพิสาโร
สปุตฺตทาโร  ปาเณหิ  สรณํ  คโต  สมณํ  ขลุ  โภ  โคตมํ ราชา ปเสนทิ
โกสโล [๓]- ปาเณหิ สรณํ คโต สมณํ ขลุ โภ โคตมํ พฺราหฺมโณ โปกฺขรสาติ
@เชิงอรรถ:  ยุ. อาทีนขตฺติยกุลา ฯ    ยุ. ปาเณหิ ฯ     ยุ. เอตฺถนฺตเร สปุตฺตทาโรติ
@ทิสฺสติ ฯ
สปุตฺตทาโร ปาเณหิ สรณํ คโต
     {๖๕๐.๓}   สมโณ   ขลุ   โภ   โคตโม  โอปาสาทํ  อนุปฺปตฺโต
โอปาสาเท  วิหรติ  อุตฺตเรน  โอปาสาทํ  เทววเน สาลวเน เย ปน โข
เกจิ   สมณา   วา   พฺราหฺมณา  วา  อมฺหากํ  คามกฺเขตฺตํ  อาคจฺฉนฺติ
อติถิโน  ๑-  เต  โหนฺติ  อติถี  โข  ปนเมฺหหิ  สกฺกาตพฺพา ครุกาตพฺพา
มาเนตพฺพา   ปูเชตพฺพา   ยมฺปิ    โภ   สมโณ   โคตโม   โอปาสาทํ
อนุปฺปตฺโต  โอปาสาเท  วิหรติ  อุตฺตเรน  โอปาสาทํ  เทววเน สาลวเน
อติถิมฺหากํ    สมโณ    โคตโม   อติถิ   โข   ปนเมฺหหิ   สกฺกาตพฺโพ
ครุกาตพฺโพ   มาเนตพฺโพ   ปูเชตพฺโพ   อิมินาปงฺเคน   น  อรหติ  โส
ภวํ  โคตโม  อมฺหากํ   ทสฺสนาย  อุปสงฺกมิตุํ  อถ  โข  มยเมว อรหาม
ตํ  ภวนฺตํ  โคตมํ   ทสฺสนาย  อุปสงฺกมิตุํ  เอตฺตกํ  โข  อหํ  โภ  ตสฺส
โภโต  โคตมสฺส   วณฺณํ  ปริยาปุณามิ  น จ โส ภวํ โคตโม เอตฺตกวณฺโณ
อปฺปริมาณวณฺโณ   หิ   โส   ภวํ   โคตโม  เอกเมเกนปิ  โภ  องฺเคน
สมนฺนาคโต    น   อรหติ   โส   ภวํ   โคตโม   อมฺหากํ   ทสฺสนาย
อุปสงฺกมิตุํ   อถ   โข   มยเมว  อรหาม  ตํ  ภวนฺตํ  โคตมํ  ทสฺสนาย
อุปสงฺกมิตุนฺติ  ๒-  ฯ  เตนหิ  โภ  สพฺเพว  มยํ  สมณํ  โคตมํ ทสฺสนาย
อุปสงฺกมิสฺสามาติ ฯ
     {๖๕๐.๔}   อถ   โข   จงฺกี  พฺราหฺมโณ  มหตา  พฺราหฺมณคเณน
สทฺธึ   เยน  ภควา  เตนุปสงฺกมิ  อุปสงฺกมิตฺวา  ภควตา  สทฺธึ  สมฺโมทิ
สมฺโมทนียํ  กถํ  สาราณียํ  วีติสาเรตฺวา  เอกมนฺตํ  นิสีทิ ฯ เตน โข ปน
@เชิงอรรถ:  ยุ. อติถี โน เต โหนฺติ ฯ    ยุ. อิติสทฺโท นตฺถิ ฯ
สมเยน    ภควา    วุฑฺเฒหิ    วุฑฺเฒหิ    พฺราหฺมเณหิ   สทฺธึ   กิญฺจิ
กิญฺจิ กถํ สาราณียํ วีติสาเรตฺวา นิสินฺโน โหติ ฯ
     [๖๕๑]   เตน  โข  ปน  สมเยน กาปทิโก ๑- นาม มาณโว ทหโร
วุตฺตสิโร    โสฬสวสฺสุทฺเทสิโก    ชาติยา    ติณฺณํ    เวทานํ   ปารคู
สนิฆณฺฑุ     เกฏุภานํ    สากฺขรปฺปเภทานํ    อิติหาสปญฺจมานํ    ปทโก
เวยฺยากรโณ    โลกายตมหาปุริสลกฺขเณสุ    อนวโย    ตสฺสํ   ปริสายํ
นิสินฺโน   โหติ   ฯ  โส  วุฑฺฒานํ  วุฑฺฒานํ  พฺราหฺมณานํ  ภควตา  สทฺธึ
มนฺตยมานานํ  อนฺตรนฺตรา  กถํ  โอปาเตติ  ฯ  อถ  โข  ภควา กาปทิกํ
มาณวํ   อปสาเทสิ   มา   อายสฺมา   ภารทฺวาโช   วุฑฺฒานํ   วุฑฺฒานํ
พฺราหฺมณานํ    มนฺตยมานานํ    อนฺตรนฺตรา    กถํ    โอปาเตสิ   ๒-
กถาปริโยสานํ อายสฺมา ภารทฺวาโช อาคเมตูติ ฯ
     [๖๕๒]   เอวํ   วุตฺเต   จงฺกี   พฺราหฺมโณ  ภควนฺตํ  เอตทโวจ
มา    ภวํ    โคตโม   กาปทิกํ   มาณวํ   อปสาเทสิ   กุลปุตฺโต   จ
กาปทิโก   มาณโว   พหุสฺสุโต   จ   กาปทิโก   มาณโว  ปณฺฑิโต  ๓-
จ    กาปทิโก    มาณโว    กลฺยาณวากฺกรโณ    ๔-   จ   กาปทิโก
มาณโว   ปโหติ   จ   กาปทิโก   มาณโว   โภตา   โคตเมน   สทฺธึ
อสฺมึ   วจเน   ปติมนฺเตตุนฺติ  ฯ  อถ  โข  ภควโต  เอตทโหสิ  อทฺธา
โข   กาปทิกสฺส   มาณวสฺส   เตวิชฺชเก  ปาวจเน  กตํ  ภวิสฺสติ  ตถา
หิ   นํ  พฺราหฺมณา  สํปุเรกฺขโรนฺตีติ  ฯ  อถ  โข  กาปทิกสฺส  มาณวสฺส
@เชิงอรรถ:  สี. กาปฐโก ฯ ยุ. กาปฐิโก ฯ    ยุ. โอปาเตตุ ฯ     ยุ. กลฺยาณวากฺกรโณ ฯ
@ ยุ. ปณฺฑิโต ฯ
เอตทโหสิ   ยทา   เม   สมโณ   โคตโม  จกฺขุนา  จกฺขุํ  อุปสํหริสฺสติ
อถาหํ สมณํ โคตมํ ปญฺหํ ปุจฺฉิสฺสามีติ ฯ
     {๖๕๒.๑}   อถ  โข  ภควา  กาปทิกสฺส  มาณวสฺส  เจตสา เจโต
ปริวิตกฺกมญฺญาย   เยน   กาปทิโก  มาณโว  เตน  จกฺขูนิ  อุปสํหาสิ  ฯ
อถ  โข  กาปทิกสฺส  มาณวสฺส  เอตทโหสิ  สมนฺนาหรติ  โข  มํ  สมโณ
โคตโม   ยนฺนูนาหํ   สมณํ   โคตมํ   ปญฺหํ   ปุจฺเฉยฺยนฺติ  ฯ  อถ  โข
กาปทิโก   มาณโว  ภควนฺตํ  เอตทโวจ  ยทิทํ  โภ  โคตม  พฺราหฺมณานํ
โปราณํ     มนฺตปทํ    อิติหีติหปรํปราย    ปิฏกสมฺปทาย    ตตฺถ    จ
พฺราหฺมณา   เอกํเสน   นิฏฺฐํ   คจฺฉนฺติ   อิทเมว   สจฺจํ   โมฆมญฺญนฺติ
อิธ ภวํ โคตโม กิมาหาติ ฯ
     [๖๕๓]   กึ    ปน    ภารทฺวาช   อตฺถิ   โกจิ   พฺราหฺมณานํ
เอกพฺราหฺมโณปิ   โย   เอวมาห   อหเมตํ   ชานามิ  อหเมตํ  ปสฺสามิ
อิทเมว   สจฺจํ   โมฆมญฺญนฺติ   ฯ   โน  หิทํ  โภ  โคตม  ฯ  กึ  ปน
ภารทฺวาช   อตฺถิ  โกจิ  พฺราหฺมณานํ  เอกาจริโยปิ  เอกาจริยปาจริโยปิ
ยาว   สตฺตมา   อาจริยมหยุคา   ๑-  โย  เอวมาห  อหเมตํ  ชานามิ
อหเมตํ   ปสฺสามิ   อิทเมว   สจฺจํ   โมฆมญฺญนฺติ   ฯ   โน  หิทํ  โภ
โคตม   ฯ   กึ   ปน   ภารทฺวาช   เยปิ   เต  พฺราหฺมณานํ  ปุพฺพกา
อิสโย   มนฺตานํ   กตฺตาโร   มนฺตานํ   ปวตฺตาโร   เยสมิทํ   เอตรหิ
พฺราหฺมณา    โปราณํ    มนฺตปทํ   คีตํ   ปวุตฺตํ   สมิหิตํ   ตทนุคายนฺติ
ตทนุภาสนฺติ      ภาสิตมนุภาสนฺติ      วาจิตมนุวาเจนฺติ      เสยฺยถีทํ
@เชิงอรรถ:  ยุ. อาจริยมหยุคาปิ ฯ
อฏฺฐโก    วามโก    วามเทโว    เวสฺสามิตฺโต   ยมตคฺคิ   องฺคีรโส
ภารทฺวาโช   วาเสฏฺโฐ   กสฺสโป   ภคุ   เตปิ   เอวมาหํสุ   มยเมตํ
ชานาม   มยเมตํ   ปสฺสาม   อิทเมว  สจฺจํ  โมฆมญฺญนฺติ  ฯ  โน  หิทํ
โภ โคตม ฯ
     [๖๕๔]   อิติ  กิร ภารทฺวาช นตฺถิ โกจิ พฺราหฺมณานํ เอกพฺราหฺมโณปิ
โย   เอวมาห   อหเมตํ   ชานามิ   อหเมตํ   ปสฺสามิ  อิทเมว  สจฺจํ
โมฆญฺญนฺติ    นตฺถิ    โกจิ   พฺราหฺมณานํ   เอกาจริโยปิ   เอกาจริย-
ปาจริโยปิ   ยาว   สตฺตมา   อาจริยมหยุคา   โย  เอวมาห  อหเมตํ
ชานามิ   อหเมตํ   ปสฺสามิ   อิทเมว   สจฺจํ   โมฆมญฺญนฺติ  เยปิ  เต
พฺราหฺมณานํ   ปุพฺพกา   อิสโย   มนฺตานํ  กตฺตาโร  มนฺตานํ  ปวตฺตาโร
เยสมิทํ   เอตรหิ   พฺราหฺมณา   โปราณํ   มนฺตปทํ  คีตํ  ปวุตฺตํ  สมิหิตํ
ตทนุคายนฺติ      ตทนุภาสนฺติ     ภาสิตมนุภาสนฺติ     วาจิตมนุวาเจนฺติ
เสยฺยถีทํ  อฏฺฐโก  วามโก  วามเทโว  เวสฺสามิตฺโต  ยมตคฺคิ  องฺคีรโส
ภารทฺวาโช  วาเสฏฺโฐ  กสฺสโป  ภคุ  เตปิ น เอวมาหํสุ มยเมตํ ชานาม
มยเมตํ ปสฺสาม อิทเมว สจฺจํ โมฆมญฺญนฺติ ฯ
     {๖๕๔.๑}   เสยฺยถาปิ   ภารทฺวาช   อนฺธเวณิ   ปรมฺปราสํสตฺตา
ปุริโมปิ  น  ปสฺสติ  มชฺฌิโมปิ  น  ปสฺสติ  ปจฺฉิโมปิ  น  ปสฺสติ เอวเมว
โข   ภารทฺวาช   อนฺธเวณูปมํ   มญฺเญ   พฺราหฺมณานํ  ภาสิตํ  สมฺปชฺชติ
ปุริโมปิ  น  ปสฺสติ  มชฺฌิโมปิ  น  ปสฺสติ  ปจฺฉิโมปิ น ปสฺสติ ตํ กึ มญฺญสิ
ภารทฺวาช    นนุ    เอวํ    สนฺเต    พฺราหฺมณานํ   อมูลิกา   สทฺธา
สมฺปชฺชตีติ   ฯ   น   เขฺวตฺถ   โภ   โคตม   พฺราหฺมณา  สทฺธายเยว
ปยิรุปาสนฺติ อนุสฺสวาเปตฺถ พฺราหฺมณา ปยิรุปาสนฺตีติ ฯ
     [๖๕๕]   ปุพฺเพว   โข  ตฺวํ  ภารทฺวาช  สทฺธํ  อคมาสิ  อนุสฺสวํ
อิทานิ   วเทสิ   ปญฺจ   โข  อิเม  ภารทฺวาช  ธมฺมา  ทิฏฺเฐว  ธมฺเม
ทฺวิธาวิปากา   กตเม   ปญฺจ   สทฺธา  รุจิ  อนุสฺสโว  อาการปริวิตกฺโก
ทิฏฺฐินิชฺฌานกฺขนฺติ     อิเม     โข     ภารทฺวาช     ปญฺจ    ธมฺมา
ทิฏฺเฐว    ธมฺเม   ทฺวิธาวิปากา   อปิจ   ภารทฺวาช   สุสทฺทหิตํ   ๑-
เยว   โหติ   ตญฺจ   โหติ   ริตฺตํ   ตุจฺฉํ  มุสา  โน  เจปิ  สุสทฺทหิตํ
โหติ    ตญฺจ    โหติ    ภูตํ    ตจฺฉํ   อนญฺญถา   อปิจ   ภารทฺวาช
สุรุจิตํเยว   โหติ   ฯเปฯ  สฺวานุสฺสุตํเยว  โหติ  ฯเปฯ  สุปริวิตกฺกํเยว
โหติ    ฯเปฯ    สุนิชฺฌายิตํเยว   โหติ   ตญฺจ   โหติ   ริตฺตํ   ตุจฺฉํ
มุสา   โน   เจปิ  สุนิชฺฌายิตํ  โหติ  ตญฺจ  โหติ  ภูตํ  ตจฺฉํ  อนญฺญถา
สจฺจํ   อนุรกฺขตา   ภารทฺวาช   วิญฺญุนา  ปุริเสน  นาลเมตฺถ  เอกํเสน
นิฏฺฐํ   คนฺตุํ   อิทเมว   สจฺจํ   โมฆมญฺญนฺติ   ฯ  กิตฺตาวตา  ปน  โภ
โคตม      สจฺจานุรกฺขณา      โหติ     กิตฺตาวตา     สจฺจมนุรกฺขติ
สจฺจานุรกฺขณํ มยํ ภวนฺตํ โคตมํ ปุจฺฉามาติ ฯ
     [๖๕๖]   สทฺธา   เจปิ   ภารทฺวาช   ปุริสสฺส  โหติ  เอวํ  เม
สทฺธาติ   อิติ   วทํ   สจฺจมนุรกฺขติ   น  เตฺวว  ตาว  เอกํเสน  นิฏฺฐํ
@เชิงอรรถ:  สี. สุสทฺธิตํ ฯ
คจฺฉติ   อิทเมว   สจฺจํ   โมฆมญฺญนฺติ   เอตฺตาวตา   โข   ภารทฺวาช
สจฺจมนุรกฺขณา    โหติ   เอตฺตาวตา   สจฺจมนุรกฺขติ   เอตฺตาวตา   จ
มยํ    สจฺจานุรกฺขณํ    ปญฺญาเปม   น   เตฺวว   ตาว   สจฺจานุโพโธ
โหติ
     {๖๕๖.๑}   รุจิ  เจปิ  ภารทฺวาช ปุริสสฺส โหติ ... อนุสฺสโว เจปิ
ภารทฺวาช   ปุริสสฺส   โหติ   ...  อาการปริวิตกฺโก  เจปิ  ภารทฺวาช
ปุริสสฺส   โหติ   ...   ทิฏฺฐินิชฺฌานกฺขนฺติ   เจปิ   ภารทฺวาช  ปุริสสฺส
โหติ   เอวํ   เม   ทิฏฺฐินิชฺฌานกฺขนฺตีติ   อิติ   วทํ   สจฺจมนุรกฺขติ  น
เตฺวว   ตาว   เอกํเสน   นิฏฺฐํ   คจฺฉติ   อิทเมว  สจฺจํ  โมฆมญฺญนฺติ
เอตฺตาวตา   โข   ภารทฺวาช   สจฺจมนุรกฺขณา  ๑-  โหติ  เอตฺตาวตา
สจฺจมนุรกฺขติ   เอตฺตาวตา   จ   มยํ   สจฺจานุรกฺขณํ   ปญฺญาเปม   น
เตฺวว ตาว สจฺจานุโพโธ โหตีติ ฯ
     {๖๕๖.๒}   เอตฺตาวตา  โภ โคตม สจฺจมนุรกฺขณา โหติ เอตฺตาวตา
สจฺจมนุรกฺขติ   เอตฺตาวตา  จ  มยํ  สจฺจานุรกฺขณํ  เปกฺขาม  กิตฺตาวตา
ปน    โภ   โคตม   สจฺจานุโพโธ   โหติ   กิตฺตาวตา   สจฺจมนุพุชฺฌติ
สจฺจานุโพธํ มยํ ภวนฺตํ โคตมํ ปุจฺฉามาติ ฯ
     [๖๕๗]   อิธ   กิร  ภารทฺวาช  ภิกฺขุ  อญฺญตรํ  คามํ  วา  นิคมํ
วา   อุปนิสฺสาย   วิหรติ   ฯ   ตเมว   คหปติ  วา  คหปติปุตฺโต  วา
อุปสงฺกมิตฺวา   ตีสุ  ธมฺเมสุ  สมนฺเนสติ  โลภนีเยสุ  ธมฺเมสุ  โทสนีเยสุ
ธมฺเมสุ  โมหนีเยสุ  ธมฺเมสุ  อตฺถิ  นุ  โข  อิมสฺส  อายสฺมโต ตถารูปา
โลภนียา   ธมฺมา   ยถารูเปหิ   โลภนีเยหิ   ธมฺเมหิ   ปริยาทินฺนจิตฺโต
@เชิงอรรถ:  ยุ. สจฺจานุรกฺขณา ฯ
อชานํ     วา     วเทยฺย     ชานามีติ    อปสฺสํ    วา    วเทยฺย
ปสฺสามีติ    ปรํ    วา   ตถตฺตาย   สมาทเปยฺย   ยํ   ปเรสํ   อสฺส
ทีฆรตฺตํ    อหิตาย    ทุกฺขายาติ   ฯ   ตเมนํ   สมนฺเนสมาโน   เอวํ
ชานาติ    นตฺถิ   โข   อิมสฺสายสฺมโต   ตถารูปา   โลภนียา   ธมฺมา
ยถารูเปหิ    โลภนีเยหิ    ธมฺเมหิ    ปริยาทินฺนจิตฺโต    อชานํ   วา
วเทยฺย   ชานามีติ  อปสฺสํ  วา  วเทยฺย  ปสฺสามีติ  ปรํ  วา  ตถตฺตาย
สมาทเปยฺย   ยํ   ปเรสํ  อสฺส  ทีฆรตฺตํ  อหิตาย  ทุกฺขายาติ  ฯ  ตถา
โข    ปนิมสฺสายสฺมโต   กายสมาจาโร   ตถา   วจีสมาจาโร   ยถาตํ
อลุทฺธสฺส    ยํ    โข   ปน   อยมายสฺมา   ธมฺมํ   เทเสติ   คมฺภีโร
โส    ธมฺโม    ทุทฺทโส   ทุรนุโพโธ   สนฺโต   ปณีโต   อตกฺกาวจโร
นิปุโณ ปณฺฑิตเวทนีโย น โส ธมฺโม สุเทสิโย ลุทฺเธนาติ ฯ
     {๖๕๗.๑}   ยโต  นํ  สมนฺเนสมาโน  วิสุทฺธํ  โลภนีเยหิ  ธมฺเมหิ
ปสฺสติ  ๑-  สมนุปสฺสติ  ตโต  นํ  อุตฺตรึ  สมนฺเนสติ  โทสนีเยสุ ธมฺเมสุ
อตฺถิ   นุ   โข  อิมสฺสายสฺมโต  ตถารูปา  โทสนียา  ธมฺมา  ยถารูเปหิ
โทสนีเยหิ   ธมฺเมหิ   ปริยาทินฺนจิตฺโต   อชานํ  วา  วเทยฺย  ชานามีติ
อปสฺสํ   วา   วเทยฺย   ปสฺสามีติ  ปรํ  วา  ตถตฺตาย  สมาทเปยฺย  ยํ
ปเรสํ   อสฺส   ทีฆรตฺตํ  อหิตาย  ทุกฺขายาติ  ฯ  ตเมนํ  สมนฺเนสมาโน
เอวํ   ชานาติ   นตฺถิ  โข  อิมสฺสายสฺมโต  ตถารูปา  โทสนียา  ธมฺมา
ยถารูเปหิ   โทสนีเยหิ   ธมฺเมหิ  ปริยาทินฺนจิตฺโต  อชานํ  วา  วเทยฺย
ชานามีติ    อปสฺสํ   วา   วเทยฺย   ปสฺสามีติ   ปรํ   วา   ตถตฺตาย
@เชิงอรรถ:  ยุ. ปสฺสตีติ ปาโฐ นตฺถิ ฯ
สมาทเปยฺย   ยํ   ปเรสํ  อสฺส  ทีฆรตฺตํ  อหิตาย  ทุกฺขายาติ  ฯ  ตถา
โข    ปนิมสฺสายสฺมโต   กายสมาจาโร   ตถา   วจีสมาจาโร   ยถาตํ
อทุฏฺฐสฺส   ยํ   โข   ปน   อยมายสฺมา   ธมฺมํ  เทเสติ  คมฺภีโร  โส
ธมฺโม   ทุทฺทโส   ทุรนุโพโธ   สนฺโต   ปณีโต   อตกฺกาวจโร   นิปุโณ
ปณฺฑิตเวทนีโย น โส ธมฺโม สุเทสิโย ทุฏฺเฐนาติ ฯ
     {๖๕๗.๒}   ยโต นํ สมนฺเนสมาโน วิสุทฺธํ โทสนีเยหิ ธมฺเมหิ ปสฺสติ ๑-
สมนุปสฺสติ   ตโต  นํ  อุตฺตรึ  สมนฺเนสติ  โมหนีเยสุ  ธมฺเมสุ  อตฺถิ  นุ
โข   อิมสฺสายสฺมโต  ตถารูปา  โมหนียา  ธมฺมา  ยถารูเปหิ  โมหนีเยหิ
ธมฺเมหิ   ปริยาทินฺนจิตฺโต   อชานํ  วา  วเทยฺย  ชานามีติ  อปสฺสํ  วา
วเทยฺย   ปสฺสามีติ   ปรํ  วา  ตถตฺตาย  สมาทเปยฺย  ยํ  ปเรสํ  อสฺส
ทีฆรตฺตํ   อหิตาย  ทุกฺขายาติ  ฯ  ตเมนํ  สมนฺเนสมาโน  เอวํ  ชานาติ
นตฺถิ   โข   อิมสฺสายสฺมโต   ตถารูปา   โมหนียา   ธมฺมา  ยถารูเปหิ
โมหนีเยหิ   ธมฺเมหิ   ปริยาทินฺนจิตฺโต   อชานํ  วา  วเทยฺย  ชานามีติ
อปสฺสํ   วา   วเทยฺย   ปสฺสามีติ  ปรํ  วา  ตถตฺตาย  สมาทเปยฺย  ยํ
ปเรสํ  อสฺส  ทีฆรตฺตํ  อหิตาย  ทุกฺขายาติ  ฯ  ตถา โข ปนิมสฺสายสฺมโต
กายสมาจาโร   ตถา   วจีสมาจาโร   ยถาตํ   อมูฬฺหสฺส  ยํ  โข  ปน
อยมายสฺมา   ธมฺมํ  เทเสติ  คมฺภีโร   โส  ธมฺโม  ทุทฺทโส  ทุรนุโพโธ
สนฺโต   ปณีโต   อตกฺกาวจโร   นิปุโณ  ปณฺฑิตเวทนีโย  น  โส  ธมฺโม
สุเทสิโย มูเฬฺหนาติ ฯ
     {๖๕๗.๓}   ยโต  นํ สมนฺเนสมาโน วิสุทฺธํ โมหนีเยหิ ธมฺเมหิ ปสฺสติ
@เชิงอรรถ:  ยุ. ปสฺสตีติ ปาโฐ นตฺถิ ฯ
สมนุปสฺสติ   อถ   ตมฺหิ   สทฺธํ  นิเวเสติ  สทฺธาชาโต  อุปสงฺกมติ  ๑-
อุปสงฺกมนฺโต   ปยิรุปาสติ   ปยิรุปาสนฺโต   โสตํ   โอทหติ  โอหิตโสโต
ธมฺมํ  สุณาติ  สุตฺวา  ธมฺมํ  ธาเรติ  ธตานํ  ๒- ธมฺมานํ อตฺถํ อุปปริกฺขติ
อตฺถํ    อุปปริกฺขโต    ธมฺมา   นิชฺฌานํ   ขมนฺติ   ธมฺมนิชฺฌานกฺขนฺติยา
สติ   ฉนฺโท   ชายติ  ฉนฺทชาโต  อุสฺสหติ  อุสฺสหิตฺวา  ตุเลติ  ตุลยิตฺวา
ปทหติ   ปหิตตฺโต  สมาโน  กาเยน  เจว  ปรมตฺถสจฺจํ  ๓-  สจฺฉิกโรติ
ปญฺญาย   จ   ตํ   อติวิชฺฌ   ปสฺสติ   ฯ  เอตฺตาวตา  โข  ภารทฺวาช
สจฺจานุโพโธ    โหติ    เอตฺตาวตา   สจฺจมนุพุชฺฌติ   เอตฺตาวตา   จ
มยํ สจฺจานุโพธํ ปญฺญาเปม น เตฺวว สจฺจานุปตฺติ โหตีติ ฯ
     {๖๕๗.๔}   เอตฺตาวตา  โภ  โคตม สจฺจานุโพโธ โหติ เอตฺตาวตา
สจฺจมนุพุชฺฌติ   เอตฺตาวตา   จ  มยํ  สจฺจานุโพธํ  เปกฺขาม  กิตฺตาวตา
ปน   โภ   โคตม   สจฺจานุปตฺติ   โหติ   กิตฺตาวตา   สจฺจมนุปาปุณาติ
สจฺจานุปตฺตึ มยํ ภวนฺตํ โคตมํ ปุจฺฉามาติ ฯ
     [๖๕๘]   เตสํเยว  [๓]-  ภารทฺวาช  ธมฺมานํ  อาเสวนา ภาวนา
พหุลีกมฺมํ   สจฺจานุปตฺติ  โหติ  เอตฺตาวตา  โข  ภารทฺวาช  สจฺจานุปตฺติ
โหติ   เอตฺตาวตา   สจฺจมนุปาปุณาติ  เอตฺตาวตา  จ  มยํ  สจฺจานุปตฺตึ
ปญฺญาเปมาติ    ฯ    เอตฺตาวตา   โภ   โคตม   สจฺจานุปตฺติ   โหติ
เอตฺตาวตา    สจฺจมนุปาปุณาติ    เอตฺตาวตา   จ   มยํ   สจฺจานุปตฺตึ
เปกฺขาม   สจฺจานุปตฺติยา   ปน   โภ  โคตม  กตโม  ธมฺโม  พหุกาโร
สจฺจานุปตฺติยา พหุการํ ธมฺมํ มยํ ภวนฺตํ โคตมํ ปุจฺฉามาติ ฯ
@เชิงอรรถ:  ยุ. อุปสงฺกมตีติ ปาโฐ นตฺถิ ฯ  ยุ. ธาริตานํ ฯ  ยุ. ปรมสจฺจํ ฯ
@ ยุ. เอตฺถนฺตเร โขติ ทิสฺสติ ฯ
     [๖๕๙]   สจฺจานุปตฺติยา   โข   ภารทฺวาช  ปธานํ  พหุการํ  โน
เจ   ตํ   ปทเหยฺย  น  ยิทํ  สจฺจมนุปาปุเณยฺย  ยสฺมา  จ  โข  ปทหติ
ตสฺมา      สจฺจมนุปาปุณาติ      ตสฺมา     สจฺจานุปตฺติยา     ปธานํ
พหุการนฺติ ฯ
     {๖๕๙.๑}   ปธานสฺส  ปน  โภ  โคตม  กตโม  ธมฺโม  พหุกาโร
ปธานสฺส   พหุการํ  ธมฺมํ  มยํ  ภวนฺตํ  โคตมํ  ปุจฺฉามาติ  ฯ  ปธานสฺส
โข   ภารทฺวาช  ตุลนา  พหุกาโร  ๑-  โน  เจ  ตํ  ตุเลยฺย  น  ยิทํ
ปทเหยฺย   ยสฺมา   จ   โข   ตุเลติ  ตสฺมา  ปทหติ  ตสฺมา  ปธานสฺส
ตุลนา พหุการาติ ฯ
     {๖๕๙.๒}   ตุลนาย   ปน  โภ  โคตม  กตโม  ธมฺโม  พหุกาโร
ตุลนาย    พหุการํ    ธมฺมํ    มยํ   ภวนฺตํ   โคตมํ   ปุจฺฉามาติ   ฯ
ตุลนาย   โข  ภารทฺวาช  อุสฺสาโห  พหุกาโร  โน  เจ  ตํ  อุสฺสเหยฺย
น   ยิทํ   ตุเลยฺย   ยสฺมา   จ   โข  อุสฺสหติ  ตสฺมา  ตุเลติ  ตสฺมา
ตุลนาย   อุสฺสาโห   พหุกาโรติ   ฯ   อุสฺสาหสฺส   ปน   โภ   โคตม
กตโม   ธมฺโม   พหุกาโร   อุสฺสาหสฺส   พหุการํ   ธมฺมํ   มยํ  ภวนฺตํ
โคตมํ ปุจฺฉามาติ ฯ
     {๖๕๙.๓}   อุสฺสาหสฺส    โข   ภารทฺวาช   ฉนฺโท   พหุกาโร
โน   เจ   ตํ   ฉนฺโท   ชาเยถ  น  ยิทํ  อุสฺสเหยฺย  ยสฺมา  จ  โข
ฉนฺโท    ชายติ    ตสฺมา    อุสฺสหติ    ตสฺมา    อุสฺสาหสฺส   ฉนฺโท
พหุกาโรติ ฯ
     {๖๕๙.๔}   ฉนฺทสฺส   ปน  โภ  โคตม  กตโม  ธมฺโม  พหุกาโร
ฉนฺทสฺส   พหุการํ   ธมฺมํ   มยํ  ภวนฺตํ  โคตมํ  ปุจฺฉามาติ  ฯ  ฉนฺทสฺส
โข   ภารทฺวาช   ธมฺมนิชฺฌานกฺขนฺติ   พหุการา   โน   เจ  ตํ  ธมฺมา
นิชฺฌานํ   ๒-   ขเมยฺยุํ   น   ยิทํ   ฉนฺโท   ชาเยถ  ยสฺมา  จ  โข
@เชิงอรรถ:  ยุ. พหุการา ฯ  ยุ. ธมฺมนิชฺฌานํ ฯ
ธมฺมา   นิชฺฌานํ   ขมนฺติ   ตสฺมา   ฉนฺโท   ชายติ   ตสฺมา   ฉนฺทสฺส
ธมฺมนิชฺฌานกฺขนฺติ พหุการาติ ฯ
     {๖๕๙.๕}   ธมฺมนิชฺฌานกฺขนฺติยา  ปน  โภ  โคตม  กตโม  ธมฺโม
พหุกาโร   ธมฺมนิชฺฌานกฺขนฺติยา   พหุการํ   ธมฺมํ   มยํ   ภวนฺตํ  โคตมํ
ปุจฺฉามาติ   ฯ   ธมฺมนิชฺฌานกฺขนฺติยา   โข   ภารทฺวาช   อตฺถุปปริกฺขา
พหุการา   โน   เจ  ตํ  อตฺถํ  อุปปริกฺเขยฺย  น  ยิทํ  ธมฺมา  นิชฺฌานํ
ขเมยฺยุํ   ยสฺมา   จ   โข   อตฺถํ  อุปปริกฺขติ  ตสฺมา  ธมฺมา  นิชฺฌานํ
ขมนฺติ ตสฺมา ธมฺมนิชฺฌานกฺขนฺติยา อตฺถุปปริกฺขา พหุการาติ ฯ
     {๖๕๙.๖}   อตฺถุปปริกฺขาย  ปน  โภ  โคตม กตโม ธมฺโม พหุกาโร
อตฺถุปปริกฺขาย   พหุการํ   ธมฺมํ   มยํ   ภวนฺตํ   โคตมํ  ปุจฺฉามาติ  ฯ
อตฺถุปปริกฺขาย  โข  ภารทฺวาช  ธมฺมธารณา  พหุการา  โน  เจ ตํ ธมฺมํ
ธาเรยฺย  น  ยิทํ  อตฺถํ  อุปปริกฺเขยฺย  ยสฺมา จ โข ธมฺมํ ธาเรติ ตสฺมา
อตฺถํ อุปปริกฺขติ ตสฺมา อตฺถุปปริกฺขาย ธมฺมธารณา พหุการาติ ฯ
     {๖๕๙.๗}   ธมฺมธารณาย  ปน  โภ  โคตม  กตโม ธมฺโม พหุกาโร
ธมฺมธารณาย   พหุการํ   ธมฺมํ   มยํ   ภวนฺตํ   โคตมํ   ปุจฺฉามาติ  ฯ
ธมฺมธารณาย   โข  ภารทฺวาช  ธมฺมสฺสวนํ  พหุการํ  โน  เจ  ตํ  ธมฺมํ
สุเณยฺย  น  ยิทํ  ธมฺมํ  ธาเรยฺย  ยสฺมา  จ  โข  ธมฺมํ  สุณาติ  ตสฺมา
ธมฺมํ ธาเรติ ตสฺมา ธมฺมธารณาย ธมฺมสฺสวนํ พหุการนฺติ ฯ
     {๖๕๙.๘}   ธมฺมสฺสวนสฺส   ปน   โภ   โคตม   กตโม   ธมฺโม
พหุกาโร    ธมฺมสฺสวนสฺส    พหุการํ    ธมฺมํ    มยํ   ภวนฺตํ   โคตมํ
ปุจฺฉามาติ   ฯ   ธมฺมสฺสวนสฺส   โข   ภารทฺวาช  โสตาวธานํ  พหุการํ
โน  เจ  ตํ  โสตํ  โอทเหยฺย  น  ยิทํ  ธมฺมํ สุเณยฺย ยสฺมา จ โข โสตํ
โอทหติ   ตสฺมา   ธมฺมํ   สุณาติ   ตสฺมา   ธมฺมสฺสวนสฺส   โสตาวธานํ
พหุการนฺติ ฯ
     {๖๕๙.๙}   โสตาวธานสฺส  ปน  โภ  โคตม กตโม ธมฺโม พหุกาโร
โสตาวธานสฺส   พหุการํ   ธมฺมํ   มยํ   ภวนฺตํ   โคตมํ  ปุจฺฉามาติ  ฯ
โสตาวธานสฺส   โข   ภารทฺวาช  ปยิรุปาสนา  ๑-  พหุการา  โน  เจ
ตํ  ปยิรุปาเสยฺย  น  ยิทํ  โสตํ  โอทเหยฺย  ยสฺมา  จ  โข  ปยิรุปาสติ
ตสฺมา โสตํ โอทหติ ตสฺมา โสตาวธานสฺส ปยิรุปาสนา พหุการาติ ฯ
     {๖๕๙.๑๐}   ปยิรุปาสนาย  ปน  โภ  โคตม กตโม ธมฺโม พหุกาโร
ปยิรุปาสนาย   พหุการํ   ธมฺมํ   มยํ   ภวนฺตํ   โคตมํ   ปุจฺฉามาติ  ฯ
ปยิรุปาสนาย   โข   ภารทฺวาช   อุปสงฺกมนํ   พหุการํ   โน   เจ  ตํ
อุปสงฺกเมยฺย   น   ยิทํ   ปยิรุปาเสยฺย   ยสฺมา   จ   โข  อุปสงฺกมติ
ตสฺมา ปยิรุปาสติ ตสฺมา ปยิรุปาสนาย อุปสงฺกมนํ พหุการนฺติ ฯ
     {๖๕๙.๑๑}   อุปสงฺกมนสฺส   ปน   โภ   โคตม   กตโม  ธมฺโม
พหุกาโร    อุปสงฺกมนสฺส    พหุการํ    ธมฺมํ    มยํ   ภวนฺตํ   โคตมํ
ปุจฺฉามาติ    ฯ   อุปสงฺกมนสฺส   โข   ภารทฺวาช   สทฺธา   พหุการา
โน  เจ  ตํ  สทฺธา  ชาเยถ  น  ยิทํ  อุปสงฺกเมยฺย ยสฺมา จ โข สทฺธา
ชายติ ตสฺมา อุปสงฺกมติ ตสฺมา อุปสงฺกมนสฺส สทฺธา พหุการาติ ฯ
     [๖๖๐]   สจฺจานุรกฺขณํ มยํ ภวนฺตํ โคตมํ อปุจฺฉิมฺหา ๒- สจฺจานุรกฺขณํ
@เชิงอรรถ:  ยุ. ปยิรูปาสนา ฯ  ยุ. อปุจฺฉิมฺห ฯ
ภวํ   โคตโม  พฺยากาสิ  ตญฺจ  ปนมฺหากํ  รุจฺจติ  เจว  ขมติ  จ  เตน
จมฺหา    อตฺตมนา    สจฺจมนุโพธํ   มยํ   ภวนฺตํ   โคตมํ   อปุจฺฉิมฺหา
สจฺจมนุโพธํ   ภวํ   โคตโม   พฺยากาสิ   ตญฺจ  ปนมฺหากํ  รุจฺจติ  เจว
ขมติ   จ   เตน   จมฺหา   อตฺตมนา  สจฺจานุปตฺตึ  มยํ  ภวนฺตํ  โคตมํ
อปุจฺฉิมฺหา   สจฺจานุปตฺตึ   ภวํ   โคตโม   พฺยากาสิ   ตญฺจ   ปนมฺหากํ
รุจฺจติ  เจว  ขมติ  จ  เตน  จมฺหา  อตฺตมนา  สจฺจานุปตฺติยา  พหุการํ
ธมฺมํ   มยํ   ภวนฺตํ   โคตมํ  อปุจฺฉิมฺหา  สจฺจานุปตฺติยา  พหุการํ  ธมฺมํ
ภวํ   โคตโม   พฺยากาสิ   ตญฺจ   ปนมฺหากํ   รุจฺจติ   เจว  ขมติ  จ
เตน   จมฺหา  อตฺตมนา  ยํ  ยเทว  จ  มยํ  ภวนฺตํ  โคตมํ  อปุจฺฉิมฺหา
ตํ  ตเทว  ภวํ  โคตโม  พฺยากาสิ  ตญฺจ  ปนมฺหากํ  รุจฺจติ  เจว  ขมติ
จ  เตน  จมฺหา  อตฺตมนา  มยํ  หิ โภ โคตม ปุพฺเพ เอวํ ชานาม เก จ
มุณฺฑกา   สมณกา  อิพฺภา  กณฺหา  พนฺธุปาทปจฺจา  ๑-  เก  จ  ธมฺมสฺส
อญฺญาตาโรติ   อชเนสิ   วต   เม   ภวํ   โคตโม  สมเณสุ  สมณเปมํ
สมเณสุ    สมณปสาทํ   สมเณสุ   สมณคารวํ   อภิกฺกนฺตํ   โภ   โคตม
อภิกฺกนฺตํ   โภ   โคตม   ฯเปฯ   อุปาสกํ   มํ  ภวํ  โคตโม  ธาเรตุ
อชฺชตคฺเค ปาณุเปตํ สรณงฺคตนฺติ ฯ
                  จงฺกีสุตฺตํ นิฏฺฐิตํ ปญฺจมํ ฯ
                       ---------
@เชิงอรรถ:  ยุ. พนฺธุปาทาปจฺจา ฯ



             เนื้อความพระไตรปิฎกฉบับภาษาบาลีอักษรไทย เล่มที่ ๑๓ หน้าที่ ๕๙๑-๖๐๙. http://84000.org/tipitaka/read/pali_item_s.php?book=13&item=646&items=15&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/read/pali_item_s.php?book=13&item=646&items=15&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=13&item=646&items=15&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=13&item=646&items=15&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=13&i=646              The Pali Atthakatha in Thai :- http://84000.org/tipitaka/atthapali/read_th.php?B=9&A=7504              The Pali Atthakatha in Roman :- http://84000.org/tipitaka/atthapali/read_rm.php?B=9&A=7504              สารบัญพระไตรปิฎกเล่มที่ ๑๓ http://84000.org/tipitaka/read/?index_13

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :