ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๘ ภาษาบาลี อักษรไทย พระวินัยปิฎกเล่มที่ ๘ วินย. ปริวาโร

     [๑๐๖๐]   สมฺมุขาวินโยติ   วา   สติวินโยติ   วา  อิเม  ธมฺมา
สํสฏฺฐา   อุทาหุ   วิสํสฏฺฐา   ลพฺภา  จ  ปนิเมสํ  ธมฺมานํ  วินิพฺภุชิตฺวา
วินิพฺภุชิตฺวา    นานากรณํ    ปญฺญาเปตุํ    ฯ    สมฺมุขาวินโยติ    วา
อมูฬฺหวินโยติ    วา    ฯเปฯ   สมฺมุขาวินโยติ   วา   ปฏิญฺญาตกรณนฺติ
วา    สมฺมุขาวินโยติ    วา    เยภุยฺยสิกาติ    วา    สมฺมุขาวินโยติ
วา    ตสฺสปาปิยสิกาติ    วา    สมฺมุขาวินโยติ   วา   ติณวตฺถารโกติ
วา   อิเม   ธมฺมา   สํสฏฺฐา   อุทาหุ   วิสํสฏฺฐา  ลพฺภา  จ  ปนิเมสํ
ธมฺมานํ    วินิพฺภุชิตฺวา    วินิพฺภุชิตฺวา    นานากรณํ    ปญฺญาเปตุํ   ฯ
สมฺมุขาวินโยติ    วา    สติวินโยติ    วา    อิเม   ธมฺมา   สํสฏฺฐา
โน    วิสํสฏฺฐา    น    จ   ลพฺภา   อิเมสํ   ธมฺมานํ   วินิพฺภุชิตฺวา
วินิพฺภุชิตฺวา    นานากรณํ    ปญฺญาเปตุํ    ฯ    สมฺมุขาวินโยติ    วา
อมูฬฺหวินโยติ     วา   ฯเปฯ   สมฺมุขาวินโยติ   วา   ปฏิญฺญาตกรณนฺติ
วา    สมฺมุขาวินโยติ    วา    เยภุยฺยสิกาติ    วา    สมฺมุขาวินโยติ
วา    ตสฺสปาปิยสิกาติ    วา    สมฺมุขาวินโยติ   วา   ติณวตฺถารโกติ
วา  อิเม  ธมฺมา  สํสฏฺฐา  โน  วิสํสฏฺฐา  น  จ  ลพฺภา อิเมสํ ธมฺมานํ
วินิพฺภุชิตฺวา วินิพฺภุชิตฺวา นานากรณํ ปญฺญาเปตุํ ฯ
     [๑๐๖๑]   สมฺมุขาวินโย    กึนิทาโน    กึสมุทโย    กึชาติโก
กึปภโว   กึสมฺภาโร   กึสมุฏฺฐาโน   ฯ   สติวินโย  ฯเปฯ  อมูฬฺหวินโย
ปฏิญฺญาตกรณํ       เยภุยฺยสิกา      ตสฺสปาปิยสิกา      ติณวตฺถารโก
กึนิทาโน   กึสมุทโย   กึชาติโก   กึปภโว   กึสมฺภาโร  กึสมุฏฺฐาโน  ฯ
สมฺมุขาวินโย       นิทานนิทาโน      นิทานสมุทโย      นิทานชาติโก
นิทานปฺปภโว   นิทานสมฺภาโร   นิทานสมุฏฺฐาโน   ฯ   สติวินโย  ฯเปฯ
อมูฬฺหวินโย       ปฏิญฺญาตกรณํ       เยภุยฺยสิกา      ตสฺสปาปิยสิกา
ติณวตฺถารโก       นิทานนิทาโน      นิทานสมุทโย      นิทานชาติโก
นิทานปฺปภโว    นิทานสมฺภาโร    นิทานสมุฏฺฐาโน    ฯ   สมฺมุขาวินโย
กึนิทาโน   กึสมุทโย   กึชาติโก   กึปภโว   กึสมฺภาโร  กึสมุฏฺฐาโน  ฯ
สติวินโย     ฯเปฯ     อมูฬฺหวินโย     ปฏิญฺญาตกรณํ     เยภุยฺยสิกา
ตสฺสปาปิยสิกา     ติณวตฺถารโก     กึนิทาโน    กึสมุทโย    กึชาติโก
กึปภโว    กึสมฺภาโร    กึสมุฏฺฐาโน   ฯ   สมฺมุขาวินโย   เหตุนิทาโน
เหตุสมุทโย   เหตุชาติโก  เหตุปฺปภโว  เหตุสมฺภาโร  เหตุสมุฏฺฐาโน  ฯ
สติวินโย     ฯเปฯ     อมูฬฺหวินโย     ปฏิญฺญาตกรณํ     เยภุยฺยสิกา
ตสฺสปาปิยสิกา       ติณวตฺถารโก       เหตุนิทาโน      เหตุสมุทโย
เหตุชาติโก เหตุปฺปภโว เหตุสมฺภาโร เหตุสมุฏฺฐาโน ฯ
     {๑๐๖๑.๑}   สมฺมุขาวินโย    กึนิทาโน    กึสมุทโย   กึชาติโก
กึปภโว   กึสมฺภาโร   กึสมุฏฺฐาโน   ฯ   สติวินโย  ฯเปฯ  อมูฬฺหวินโย
ปฏิญฺญาตกรณํ       เยภุยฺยสิกา      ตสฺสปาปิยสิกา      ติณวตฺถารโก
กึนิทาโน   กึสมุทโย   กึชาติโก   กึปภโว   กึสมฺภาโร  กึสมุฏฺฐาโน  ฯ
สมฺมุขาวินโย   ปจฺจยนิทาโน   ปจฺจยสมุทโย  ปจฺจยชาติโก  ปจฺจยปฺปภโว
ปจฺจยสมฺภาโร   ปจฺจยสมุฏฺฐาโน   ฯ   สติวินโย   ฯเปฯ   อมูฬฺหวินโย
ปฏิญฺญาตกรณํ       เยภุยฺยสิกา      ตสฺสปาปิยสิกา      ติณวตฺถารโก
ปจฺจยนิทาโน       ปจฺจยสมุทโย      ปจฺจยชาติโก      ปจฺจยปฺปภโว
ปจฺจยสมฺภาโร ปจฺจยสมุฏฺฐาโน ฯ
     [๑๐๖๒]   สตฺตนฺนํ   สมถานํ   กติ   มูลานิ  กติ  สมุฏฺฐานา  ฯ
สตฺตนฺนํ   สมถานํ   ฉพฺพีส   มูลานิ   ฉตฺตึส   สมุฏฺฐานา   ฯ  สตฺตนฺนํ
สมถานํ    กตมานิ    ฉพฺพีส    มูลานิ   ฯ   สมฺมุขาวินยสฺส   จตฺตาริ
มูลานิ   สงฺฆสมฺมุขตา   ธมฺมสมฺมุขตา   วินยสมฺมุขตา  ปุคฺคลสมฺมุขตา  ฯ
สติวินยสฺส     จตฺตาริ     มูลานิ     ฯ     อมูฬฺหวินยสฺส    จตฺตาริ
มูลานิ    ฯ    ปฏิญฺญาตกรณสฺส    เทฺว    มูลานิโย    จ    เทเสติ
ยสฺส   จ   เทเสติ  ฯ  เยภุยฺยสิกาย  จตฺตาริ  มูลานิ  ตสฺสปาปิยสิกาย
จตฺตาริ   มูลานิ   ฯ   ติณวตฺถารกสฺส   จตฺตาริ   มูลานิ  สงฺฆสมฺมุขตา
ธมฺมสมฺมุขตา    วินยสมฺมุขตา   ปุคฺคลสมฺมุขตา   ฯ   สตฺตนฺนํ   สมถานํ
อิมานิ  ฉพฺพีส  มูลานิ  ฯ  สตฺตนฺนํ  สมถานํ  กตเม  ฉตฺตึส สมุฏฺฐานา ฯ
สติวินยสฺส   กมฺมสฺส   กิริยา   กรณํ   อุปคมนํ   อชฺฌูปคมนํ  อธิวาสนา
อปฺปฏิกฺโกสนา   ฯ   อมุฬฺหวินยสฺส   กมฺมสฺส   ฯเปฯ   ปฏิญฺญาตกรณสฺส
กมฺมสฺส  ฯเปฯ  เยภุยฺยสิกาย  กมฺมสฺส  ฯเปฯ  ตสฺสปาปิยสิกาย  กมฺมสฺส
ฯเปฯ   ติณวตฺถารกสฺส   กมฺมสฺส   กิริยา   กรณํ   อุปคมนํ  อชฺฌูปคมนํ
อธิวาสนา อปฺปฏิโกสนา ฯ สตฺตนฺนํ สมถานํ อิเม ฉตฺตึส สมุฏฺฐานา ฯ
     [๑๐๖๓]   สมฺมุขาวินโยติ   วา   สติวินโยติ   วา  อิเม  ธมฺมา
นานตฺถา   นานาพฺยญฺชนา   อุทาหุ   เอกตฺถา   พฺยญฺชนเมว   นานํ  ฯ
สมฺมุขาวินโยติ   วา   อมูฬฺหวินโยติ   วา   ฯเปฯ  สมฺมุขาวินโยติ  วา
ปฏิญฺญาตกรณนฺติ    วา    สมฺมุขาวินโยติ    วา    เยภุยฺยสิกาติ   วา
สมฺมุขาวินโยติ     วา     ตสฺสปาปิยสิกาติ     วา     สมฺมุขาวินโยติ
วา   ติณวตฺถารโกติ   วา   อิเม   ธมฺมา   นานตฺถา   นานาพฺยญฺชนา
อุทาหุ    เอกตฺถา    พฺยญฺชนเมว    นานํ   ฯ   สมฺมุขาวินโยติ   วา
สติวินโยติ   วา   อิเม  ธมฺมา  นานตฺถา  เจว  นานาพฺยญฺชนา  จ  ฯ
สมฺมุขาวินโยติ    วา    อมูฬฺหวินโยติ    วา   ฯเปฯ   สมฺมุขาวินโยติ
วา    ปฏิญฺญาตกรณนฺติ    วา    สมฺมุขาวินโยติ    วา   เยภุยฺยสิกาติ
วา    สมฺมุขาวินโยติ    วา    ตสฺสปาปิยสิกาติ   วา   สมฺมุขาวินโยติ
วา   ติณวตฺถารโกติ  วา  อิเม  ธมฺมา  นานตฺถา  เจว  นานาพฺยญฺชนา
จ ฯ
     [๑๐๖๔]   วิวาโท    วิวาทาธิกรณํ    วิวาโท   โน   อธิกรณํ
อธิกรณํ   โน   วิวาโท   อธิกรณญฺเจว   วิวาโท   จ   สิยา  วิวาโท
วิวาทาธิกรณํ    สิยา    วิวาโท    โน    อธิกรณํ    สิยา   อธิกรณํ
โน   วิวาโท   สิยา   อธิกรณญฺเจว   วิวาโท   จ   ฯ  ตตฺถ  กตโม
วิวาโท    วิวาทาธิกรณํ    ฯ   อิธ   ภิกฺขู   วิวทนฺติ   ธมฺโมติ   วา
อธมฺโมติ    วา    ฯเปฯ    ทุฏฺฐุลฺลา    อาปตฺตีติ   วา   อทุฏฺฐุลฺลา
อาปตฺตีติ    วา    ยํ    ตตฺถ    ภณฺฑนํ   กลโห   วิคฺคโห   วิวาโท
นานาวาโท    อญฺญถาวาโท    วิปจฺจตาย    โวหาโร    เมธกํ   อยํ
วิวาโท วิวาทาธิกรณํ ฯ
     {๑๐๖๔.๑}   ตตฺถ   กตโม   วิวาโท  โน  อธิกรณํ  ฯ  มาตาปิ
ปุตฺเตน   วิวทติ   ปุตฺโตปิ   มาตรา   วิวทติ   ปิตาปิ  ปุตฺเตน  วิวทติ
ปุตฺโตปิ   ปิตรา   วิวทติ   ภาตาปิ   ภาตรา  วิวทติ  ภาตาปิ  ภคินิยา
วิวทติ   ภคินีปิ   ภาตรา   วิวทติ   สหาโยปิ   สหาเยน   วิวทติ  อยํ
วิวาโท   โน   อธิกรณํ   ฯ   ตตฺถ   กตมํ  อธิกรณํ  โน  วิวาโท  ฯ
อนุวาทาธิกรณํ     อาปตฺตาธิกรณํ     กิจฺจาธิกรณํ     อิทํ     อธิกรณํ
โน  วิวาโท  ฯ  ตตฺถ  กตมํ  อธิกรณญฺเจว  วิวาโท  จ ฯ วิวาทาธิกรณํ
อธิกรณญฺเจว วิวาโท จ ฯ
     [๑๐๖๕]   อนุวาโท   อนุวาทาธิกรณํ   อนุวาโท   โน   อธิกรณํ
อธิกรณํ    โน    อนุวาโท    อธิกรณญฺเจว    อนุวาโท    จ   สิยา
อนุวาโท    อนุวาทาธิกรณํ    สิยา   อนุวาโท   โน   อธิกรณํ   สิยา
อธิกรณํ    โน   อนุวาโท   สิยา   อธิกรณญฺเจว   อนุวาโท   จ   ฯ
ตตฺถ    กตโม    อนุวาโท   อนุวาทาธิกรณํ   ฯ   อิธ   ภิกฺขู   ภิกฺขุํ
อนุวทนฺติ    สีลวิปตฺติยา    วา   อาจารวิปตฺติยา   วา   ทิฏฺฐิวิปตฺติยา
วา   อาชีววิปตฺติยา   วา   โย  ตตฺถ  อนุวาโท  อนุวทนา  อนุลฺลปนา
อนุภณนา     อนุสมฺปวงฺกตา     อพฺภุสฺสหนตา     อนุพลปฺปทานํ    อยํ
อนุวาโท   อนุวาทาธิกรณํ  ฯ  ตตฺถ  กตโม  อนุวาโท  โน  อธิกรณํ  ฯ
มาตาปิ    ปุตฺตํ    อนุวทติ    ปุตฺโตปิ    มาตรํ    อนุวทติ    ปิตาปิ
ปุตฺตํ     อนุวทติ    ปุตฺโตปิ    ปิตรํ    อนุวทติ    ภาตาปิ    ภาตรํ
อนุวทติ    ภาตาปิ    ภคินึ    อนุวทติ    ภคินีปิ    ภาตรํ    อนุวทติ
สหาโยปิ    สหายํ    อนุวทติ    อยํ   อนุวาโท   โน   อธิกรณํ   ฯ
ตตฺถ   กตมํ   อธิกรณํ   โน  อนุวาโท  ฯ  อาปตฺตาธิกรณํ  กิจฺจาธิกรณํ
วิวาทาธิกรณํ     อิทํ     อธิกรณํ     โน    อนุวาโท    ฯ    ตตฺถ
กตมํ   อธิกรณญฺเจว   อนุวาโท   จ   ฯ  อนุวาทาธิกรณํ  อธิกรณญฺเจว
อนุวาโท จ ฯ
     [๑๐๖๖]   อาปตฺติ    อาปตฺตาธิกรณํ   อาปตฺติ   โน   อธิกรณํ
อธิกรณํ     โน    อาปตฺติ    อธิกรณญฺเจว    อาปตฺติ    จ    สิยา
อาปตฺติ    อาปตฺตาธิกรณํ    สิยา    อาปตฺติ    โน   อธิกรณํ   สิยา
อธิกรณํ    โน    อาปตฺติ    สิยา   อธิกรณญฺเจว   อาปตฺติ   จ   ฯ
ตตฺถ   กตมา   อาปตฺติ   อาปตฺตาธิกรณํ   ฯ   ปญฺจปิ   อาปตฺติกฺขนฺธา
อาปตฺตาธิกรณํ     สตฺตปิ     อาปตฺติกฺขนฺธา     อาปตฺตาธิกรณํ    อยํ
อาปตฺติ   อาปตฺตาธิกรณํ   ฯ   ตตฺถ  กตมา  อาปตฺติ  โน  อธิกรณํ  ฯ
โสตาปตฺติ    สมาปตฺติ    อยํ    อาปตฺติ   โน   อธิกรณํ   ฯ   ตตฺถ
กตมํ    อธิกรณํ    โน    อาปตฺติ    ฯ   กิจฺจาธิกรณํ   วิวาทาธิกรณํ
อนุวาทาธิกรณํ    อิทํ    อธิกรณํ    โน   อาปตฺติ   ฯ   ตตฺถ   กตมํ
อธิกรณญฺเจว    อาปตฺติ    จ    ฯ    อาปตฺตาธิกรณํ    อธิกรณญฺเจว
อาปตฺติ จ ฯ
     [๑๐๖๗]   กิจฺจํ   กิจฺจาธิกรณํ   กิจฺจํ   โน   อธิกรณํ   อธิกรณํ
โน   กิจฺจํ   กิจฺจญฺเจว   อธิกรณญฺจ   ๑-   สิยา   กิจฺจํ  กิจฺจาธิกรณํ
สิยา    กิจฺจํ    โน   อธิกรณํ   สิยา   อธิกรณํ   โน   กิจฺจํ   สิยา
อธิกรณญฺเจว    กิจฺจญฺจ   ฯ   ตตฺถ   กตมํ   กิจฺจํ   กิจฺจาธิกรณํ   ฯ
ยา     สงฺฆสฺส    กิจฺจยตา    กรณียตา    อปโลกนกมฺมํ    ญตฺติกมฺมํ
ญตฺติทุติยกมฺมํ      ญตฺติจตุตฺถกมฺมํ    อิทํ    กิจฺจํ    กิจฺจาธิกรณํ    ฯ
ตตฺถ   กตมํ   กิจฺจํ   โน   อธิกรณํ   ฯ   อาจริยกิจฺจํ   อุปชฺฌายกิจฺจํ
สมานุปชฺฌายกิจฺจํ    สมานาจริยกิจฺจํ   อิทํ   กิจฺจํ   โน   อธิกรณํ   ฯ
ตตฺถ   กตมํ   อธิกรณํ   โน   กิจฺจํ   ฯ  วิวาทาธิกรณํ  อนุวาทาธิกรณํ
อาปตฺตาธิกรณํ    อิทํ    อธิกรณํ    โน    กิจฺจํ    ฯ   ตตฺถ   กตมํ
อธิกรณญฺเจว      กิจฺจญฺจ      ฯ      กิจฺจาธิกรณํ     อธิกรณญฺเจว
กิจฺจญฺจาติ ฯ
                             อธิกรณเภทํ นิฏฺฐิตํ ฯ
@เชิงอรรถ:  ม. อธิกรณญฺเจว กิจฺจญฺจ ฯ
                                  ตสฺสุทฺทานํ ฯ
     [๑๐๖๘]   อธิกรณํ อุกฺโกฏา            อาการา ปุคฺคเลน จ
                นิทานเหตุปจฺจยา           มูลํ สมุฏฺฐาเนน จ
                อาปตฺติ โหติ ยตฺถ จ        สํสฏฺฐา นิทาเนน จ ๑-
                เหตุปจฺจยมูลานิ             สมุฏฺฐาเนน พฺยญฺชนา ๒-
                วิวาโท อธิกรณนฺติ          เภทาธิกรเณ อิทนฺติ ฯ
                                     ---------
@เชิงอรรถ:  โป. นิทานปภวา ฯ   โป. พฺยญฺชนํ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๘ หน้าที่ ๓๘๔-๓๙๑. https://84000.org/tipitaka/read/pali_read.php?B=8&A=7797&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=8&A=7797&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=8&item=1060&items=9              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=8&siri=95              ศึกษาอรรถกถานี้ได้ที่ :- https://84000.org/tipitaka/attha/attha.php?b=8&i=1060              สารบัญพระไตรปิฎกเล่มที่ ๘ https://84000.org/tipitaka/read/?index_8 https://84000.org/tipitaka/english/?index_8

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]