ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๓ ภาษาบาลี อักษรไทย พระสุตตันตปิฎกเล่มที่ ๕ สุตฺต. ม. มชฺฌิมปณฺณาสกํ

                      อสฺสลายนสุตฺตํ
     [๖๑๓]   เอวมฺเม   สุตํ   เอกํ  สมยํ  ภควา  สาวตฺถิยํ  วิหรติ
เชตวเน   อนาถปิณฺฑิกสฺส   อาราเม   ฯ   เตน   โข   ปน  สมเยน
นานาเวรชฺชกานํ      พฺราหฺมณานํ      ปญฺจมตฺตานิ     พฺราหฺมณสตานิ
สาวตฺถิยํ  ปฏิวสนฺติ  เกนจิเทว  กรณีเยน  ฯ  อถ  โข เตสํ พฺราหฺมณานํ
เอตทโหสิ   อยํ   โข   สมโณ   โคตโม   จาตุวณฺณึ  สุทฺธึ  ปญฺญาเปติ
โก  นุ  โข  ปโหติ  สมเณน  โคตเมน สทฺธึ อสฺมึ วจเน ปฏิมนฺเตตุนฺติ ฯ
เตน  โข  ปน  สมเยน  อสฺสลายโน  นาม  มาณโว  สาวตฺถิยํ  ปฏิวสติ
ทหโร   วุตฺตสิโร   โสฬสวสฺสุทฺเทสิโก   ชาติยา  ติณฺณํ  เวทานํ  ปารคู
สนิฆณฺฑุเกฏุภานํ      สากฺขรปฺปเภทานํ      อิติหาสปญฺจมานํ     ปทโก
เวยฺยากรโณ    โลกายตมหาปุริสลกฺขเณสุ    อนวโย    ฯ   อถ   โข
เตสํ    พฺราหฺมณานํ    เอตทโหสิ   อยํ   โข   อสฺสลายโน   มาณโว
สาวตฺถิยํ   ปฏิวสติ   ทหโร  ฯเปฯ  อนวโย  โส  โข  ปโหติ  สมเณน
โคตเมน สทฺธึ อสฺมึ วจเน ปฏิมนฺเตตุนฺติ ฯ
     [๖๑๔]   อถ  โข   เต  พฺราหฺมณา  เยน  อสฺสลายโน  มาณโว
เตนุปสงฺกมึสุ    อุปสงฺกมิตฺวา    อสฺสลายนํ   มาณวํ   เอตทโวจุํ   อยํ
โภ    อสฺสลายน    สมโณ    โคตโม   จาตุวณฺณึ   สุทฺธึ   ปญฺญาเปติ
เอตุ   ภวํ   อสฺสลายน   ๑-   สมเณน  โคตเมน  สทฺธึ  อสฺมึ  วจเน
ปฏิมนฺเตตูติ   ฯ   เอวํ   วุตฺเต  อสฺสลายโน  มาณโว  เต  พฺราหฺมเณ
@เชิงอรรถ:  ยุ. อสฺสลายโน ฯ     ยุ. ปฏิมนฺเตตุนฺติ ฯ
เอตทโวจ   สมโณ   ขลุ   โภ   โคตโม   ธมฺมวาที   ธมฺมวาทิโน  จ
ปน    ทุปฺปฏิมนฺติยา    ภวนฺติ    นาหํ   สกฺโกมิ   สมเณน   โคตเมน
สทฺธึ   อสฺมึ   วจเน   ปฏิมนฺเตตุนฺติ  ฯ  ทุติยมฺปิ  โข  เต  พฺราหฺมณา
อสฺสลายนํ    มาณวํ    เอตทโวจุํ    อยํ    โภ   อสฺสลายน   สมโณ
โคตโม    จาตุวณฺณึ    สุทฺธึ    ปญฺญาเปติ    เอตุ   ภวํ   อสฺสลายน
สมเณน  โคตเมน  สทฺธึ  อสฺมึ  วจเน  ปฏิมนฺเตตูติ  [๑]-  ฯ  ทุติยมฺปิ
โข    อสฺสลายโน    มาณโว   เต   พฺราหฺมเณ   เอตทโวจ   สมโณ
ขลุ   โภ   โคตโม   ธมฺมวาที   ธมฺมวาทิโน   จ   ปน  ทุปฺปฏิมนฺติยา
ภวนฺติ    นาหํ   สกฺโกมิ   สมเณน   โคตเมน   สทฺธึ   อสฺมึ   วจเน
ปฏิมนฺเตตุนฺติ   ฯ   ตติยมฺปิ   โข   เต  พฺราหฺมณา  อสฺสลายนํ  มาณวํ
เอตทโวจุํ    อยํ    โภ    อสฺสลายน    สมโณ   โคตโม   จาตุวณฺณึ
สุทฺธึ    ปญฺญาเปติ    เอตุ    ภวํ    อสฺสลายน   สมเณน   โคตเมน
สทฺธึ   อสฺมึ   วจเน  ปฏิมนฺเตตุ  จริตํ  โข  ปน  โภตา  อสฺสลายเนน
ปริพฺพาชกํ มา ภวํ อสฺสลายโน อยุทฺธปราชิตํ ปราชยีติ ฯ
     {๖๑๔.๑}   เอวํ   วุตฺเต  อสฺสลายโน  มาณโว  เต  พฺราหฺมเณ
เอตทโวจ  อทฺธา  โข  อหํ  ภนฺเต  น  ลภามิ  สมโณ  ขลุ โภ โคตโม
ธมฺมวาที    ธมฺมวาทิโน    จ    ปน    ทุปฺปฏิมนฺติยา   ภวนฺติ   นาหํ
สกฺโกมิ   สมเณน   โคตเมน   สทฺธึ  อสฺมึ  วจเน  ปฏิมนฺเตตุํ  อปิจาหํ
ภวตํ ๒- วจเนน คมิสฺสามีติ ฯ
     [๖๑๕]   อถ   โข  อสฺสลายโน  มาณโว  มหตา  พฺราหฺมณคเณน
@เชิงอรรถ:  ยุ. เอตฺถนฺตเร จริตํ โข ปน โภตา อสฺสลายเนน ปริพฺพาชกนฺติ ทิสฺสนฺติ ฯ
@ ยุ. ภควนฺตานํ ฯ
สทฺธึ    เยน    ภควา   เตนุปสงฺกมิ   อุปสงฺกมิตฺวา   ภควตา   สทฺธึ
สมฺโมทิ   สมฺโมทนียํ   กถํ  สาราณียํ  วีติสาเรตฺวา  เอกมนฺตํ  นิสีทิ  ฯ
เอกมนฺตํ   นิสินฺโน   โข   อสฺสลายโน   มาณโว   ภควนฺตํ  เอตทโวจ
พฺราหฺมณา   โภ   โคตม   เอวมาหํสุ   พฺราหฺมณาว   เสฏฺโฐ   วณฺโณ
หีโน    อญฺโญ    วณฺโณ    พฺราหฺมณาว    สุกฺโก    วณฺโณ    กโณฺห
อญฺโญ     วณฺโณ     พฺราหฺมณาว     สุชฺฌนฺติ     โน    อพฺราหฺมณา
พฺราหฺมณาว   พฺรหฺมุโน   ปุตฺตา   โอรสา   มุขโต   ชาตา   พฺรหฺมชา
พฺรหฺมนิมฺมิตา พฺรหฺมทายาทาติ อิธ ภวํ โคตโม กิมาหาติ ฯ
     [๖๑๖]   ทิสฺสนฺเต  โข  ปน  อสฺสลายน  พฺราหฺมณานํ  พฺราหฺมณิโย
อุตุนิโยปิ   คพฺภินิโยปิ   วิชายมานาปิ   ปายมานาปิ  เต  จ  พฺราหฺมณา
โยนิชาว   สมานา   เอวมาหํสุ   พฺราหฺมณาว   เสฏฺโฐ   วณฺโณ  หีโน
อญฺโญ    วณฺโณ    พฺราหฺมณาว    สุกฺโก    วณฺโณ    กโณฺห   อญฺโญ
วณฺโณ    พฺราหฺมณาว    สุชฺฌนฺติ    โน    อพฺราหฺมณา    พฺราหฺมณาว
พฺรหฺมุโน   ปุตฺตา   โอรสา   มุขโต   ชาตา   พฺรหฺมชา  พฺรหฺมนิมฺมิตา
พฺรหฺมทายาทาติ   ฯ   กิญฺจาปิ   ภวํ   โคตโม  เอวมาห  อถ  เขฺวตฺถ
พฺราหฺมณา    เอวเมตํ    มญฺญนฺติ    พฺราหฺมณาว    เสฏฺโฐ    วณฺโณ
ฯเปฯ พฺรหฺมทายาทาติ ฯ
     [๖๑๗]   ตํ  กึ  มญฺญสิ  อสฺสลายน  สุตนฺเต  โยนกกมฺโพเชสุ  ๑-
อญฺเญสุ   จ   ปจฺจนฺติเมสุ   ชนปเทสุ   เทฺวว   วณฺณา   อยฺโย  เจว
ทาโส   จ   อยฺโย   หุตฺวา   ทาโส   โหติ   ทาโส   หุตฺวา  อยฺโย
@เชิงอรรถ:  ยุ. โยนกมฺโพเชสุ ฯ
โหตีติ  ฯ  เอวํ  โภ  สุตํ  เม  โยนกกมฺโพเชสุ  อญฺเญสุ จ ปจฺจนฺติเมสุ
ชนปเทสุ  เทฺวว  วณฺณา  อยฺโย  เจว  ทาโส  จ  อยฺโย  หุตฺวา ทาโส
โหติ  ทาโส  หุตฺวา  อยฺโย  โหตีติ  ฯ  เอตฺถ  อสฺสลายน  พฺราหฺมณานํ
กึ   พลํ   โก   อสฺสาโส  ยเทตฺถ  พฺราหฺมณา  เอวมาหํสุ  พฺราหฺมณาว
เสฏฺโฐ   วณฺโณ   หีโน   อญฺโญ   วณฺโณ   ฯเปฯ  พฺรหฺมทายาทาติ  ฯ
กิญฺจาปิ   ภวํ   โคตโม   เอวมาห  อถ  เขฺวตฺถ  พฺราหฺมณา  เอวเมตํ
มญฺญนฺติ    พฺราหฺมณาว    เสฏฺโฐ    วณฺโณ    หีโน   อญฺโญ   วณฺโณ
ฯเปฯ พฺรหฺมทายาทาติ ฯ
     [๖๑๘]   ตํ  กึ  มญฺญสิ  อสฺสลายน  ขตฺติโยว  นุ  โข ปาณาติปาตี
อทินฺนาทายี    กาเมสุมิจฺฉาจารี    มุสาวาที    ปิสุณวาโจ   ผรุสวาโจ
สมฺผปฺปลาปี     อภิชฺฌาลุ     พฺยาปนฺนจิตฺโต     มิจฺฉาทิฏฺฐี    กายสฺส
เภทา    ปรมฺมรณา    อปายํ   ทุคฺคตึ   วินิปาตํ   นิรยํ   อุปปชฺเชยฺย
โน  พฺราหฺมโณ  เวสฺโสว  ๑-  นุ  โข  ... สุทฺโทว นุ โข ปาณาติปาตี
อทินฺนาทายี    กาเมสุมิจฺฉาจารี    มุสาวาที    ปิสุณวาโจ   ผรุสวาโจ
สมฺผปฺปลาปี     อภิชฺฌาลุ     พฺยาปนฺนจิตฺโต     มิจฺฉาทิฏฺฐี    กายสฺส
เภทา   ปรมฺมรณา   อปายํ   ทุคฺคตึ   วินิปาตํ  นิรยํ  อุปปชฺเชยฺย  โน
พฺราหฺมโณติ ฯ
     {๖๑๘.๑}   โน   หิทํ   โภ   โคตม  ขตฺติโยปิ  หิ  โภ  โคตม
ปาณาติปาตี    อทินฺนาทายี    กาเมสุมิจฺฉาจารี   มุสาวาที   ปิสุณวาโจ
ผรุสวาโจ        สมฺผปฺปลาปี        อภิชฺฌาลุ        พฺยาปนฺนจิตฺโต
@เชิงอรรถ:  ยุ. จ. ฯ
มิจฺฉาทิฏฺฐี    กายสฺส   เภทา   ปรมฺมรณา   อปายํ   ทุคฺคตึ   วินิปาตํ
นิรยํ   อุปปชฺเชยฺย   พฺราหฺมโณปิ   หิ  โภ  โคตม  ...  เวสฺโสปิ  หิ
โภ  โคตม  ...  สุทฺโทปิ  หิ  โภ  โคตม  ...  สพฺเพปิ หิ โภ โคตม
จตฺตาโร   วณฺณา   ปาณาติปาติโน   อทินฺนาทายิโน  กาเมสุมิจฺฉาจาริโน
มุสาวาทิโน     ปิสุณวาจา    ผรุสวาจา    สมฺผปฺปลาปิโน    อภิชฺฌาลู
พฺยาปนฺนจิตฺตา    มิจฺฉาทิฏฺฐี    กายสฺส    เภทา   ปรมฺมรณา   อปายํ
ทุคฺคตึ    วินิปาตํ    นิรยํ    อุปปชฺเชยฺยุนฺติ   ฯ   เอตฺถ   อสฺสลายน
พฺราหฺมณานํ   กึ   พลํ   โก  อสฺสาโส  ยเทตฺถ  พฺราหฺมณา  เอวมาหํสุ
พฺราหฺมณาว    เสฏฺโฐ    วณฺโณ    หีโน    อญฺโญ    วณฺโณ   ฯเปฯ
พฺรหฺมทายาทาติ   ฯ   กิญฺจาปิ   ภวํ   โคตโม  เอวมาห  อถ  เขฺวตฺถ
พฺราหฺมณา    เอวเมตํ    มญฺญนฺติ    พฺราหฺมณาว    เสฏฺโฐ    วณฺโณ
หีโน อญฺโญ วณฺโณ ฯเปฯ พฺรหฺมทายาทาติ ฯ
     [๖๑๙]   ตํ   กึ   มญฺญสิ   อสฺสลายน   พฺราหฺมโณว   นุ   โข
ปาณาติปาตา  ปฏิวิรโต  อทินฺนาทานา  ปฏิวิรโต  กาเมสุมิจฺฉาจารา  ๑-
ปฏิวิรโต   มุสาวาทา   ปฏิวิรโต   ปิสุณาย   ๒-   วาจาย   ปฏิวิรโต
ผรุสาย   ๓-   วาจาย   ปฏิวิรโต  สมฺผปฺปลาปา  ปฏิวิรโต  อนภิชฺฌาลุ
อพฺยาปนฺนจิตฺโต    สมฺมาทิฏฺฐี    กายสฺส    เภทา   ปรมฺมรณา   สุคตึ
สคฺคํ โลกํ อุปปชฺเชยฺย โน ขตฺติโย โน เวสฺโส โน สุทฺโทติ ฯ
     {๖๑๙.๑}   โน  หิทํ โภ โคตม ขตฺติโยปิ หิ โภ โคตม ปาณาติปาตา
ปฏิวิรโต    อทินฺนาทานา    ปฏิวิรโต    กาเมสุมิจฺฉาจารา   ปฏิวิรโต
@เชิงอรรถ:  ยุ. กาเมสุมิจฺฉาจารา ฯเปฯ มุสาวาทา ปฏิวิรโตติ นตฺถิ     ยุ. ปิสุณาวาจา ฯ
@ ยุ. ผรุสาวาจา ฯ
มุสาวาทา   ปฏิวิรโต   ปิสุณาย   วาจาย   ปฏิวิรโต  ผรุสาย  วาจาย
ปฏิวิรโต    สมฺผปฺปลาปา    ปฏิวิรโต    อนภิชฺฌาลุ    อพฺยาปนฺนจิตฺโต
สมฺมาทิฏฺฐี   กายสฺส  เภทา  ปรมฺมรณา  สุคตึ  สคฺคํ  โลกํ  อุปปชฺเชยฺย
พฺราหฺมโณปิ  หิ  โภ  โคตม  ...  เวสฺโสปิ  หิ โภ โคตม ... สุทฺโทปิ
หิ  โภ  โคตม  ...  สพฺเพปิ หิ โภ โคตม จตฺตาโร วณฺณา ปาณาติปาตา
ปฏิวิรตา    อทินฺนาทานา    ปฏิวิรตา    กาเมสุมิจฺฉาจารา   ปฏิวิรตา
มุสาวาทา   ปฏิวิรตา   ปิสุณาย   วาจาย   ปฏิวิรตา  ผรุสาย  วาจาย
ปฏิวิรตา    สมฺผปฺปลาปา    ปฏิวิรตา     อนภิชฺฌาลู   อพฺยาปนฺนจิตฺตา
สมฺมาทิฏฺฐี    กายสฺส    เภทา    ปรมฺมรณา    สุคตึ    สคฺคํ   โลกํ
อุปปชฺเชยฺยุนฺติ   ฯ   เอตฺถ   อสฺสลายน   พฺราหฺมณานํ   กึ   พลํ  โก
อสฺสาโส    ยเทตฺถ    พฺราหฺมณา   เอวมาหํสุ   พฺราหฺมณาว   เสฏฺโฐ
วณฺโณ   หีโน   อญฺโญ   วณฺโณ   ฯเปฯ   พฺรหฺมทายาทาติ  ฯ  กิญฺจาปิ
ภวํ   โคตโม   เอวมาห   อถ  เขฺวตฺถ  พฺราหฺมณา  เอวเมตํ  มญฺญนฺติ
พฺราหฺมณาว    เสฏฺโฐ    วณฺโณ    หีโน    อญฺโญ    วณฺโณ   ฯเปฯ
พฺรหฺมทายาทาติ ฯ
     [๖๒๐]   ตํ  กึ  มญฺญสิ  อสฺสลายน  พฺราหฺมโณว  นุ  โข  ปโหติ
อสฺมึ   ปเทเส   อเวรํ   อพฺยาปชฺฌํ  เมตฺตจิตฺตํ  ภาเวตุํ  โน  ขตฺติโย
โน   เวสฺโส   โน   สุทฺโทติ   ฯ   โน   หิทํ  โภ  โคตม  ขตฺติโยปิ
หิ    โภ    โคตม    ปโหติ    อสฺมึ   ปเทเส   อเวรํ   อพฺยาปชฺฌํ
เมตฺตจิตฺตํ   ภาเวตุํ   พฺราหฺมโณปิ   หิ   โภ   โคตม  ...  เวสฺโสปิ
หิ  โภ  โคตม  ...  สุทฺโทปิ  หิ  โภ โคตม ... สพฺเพปิ หิ โภ โคตม
จตฺตาโร    วณฺณา    ปโหนฺติ    อสฺมึ   ปเทเส   อเวรํ   อพฺยาปชฺฌํ
เมตฺตจิตฺตํ    ภาเวตุนฺติ    ฯ   เอตฺถ   อสฺสลายน   พฺราหฺมณานํ   กึ
พลํ   โก   อสฺสาโส   ยเทตฺถ   พฺราหฺมณา   เอวมาหํสุ   พฺราหฺมณาว
เสฏฺโฐ   วณฺโณ   หีโน   อญฺโญ   วณฺโณ   ฯเปฯ  พฺรหฺมทายาทาติ  ฯ
กิญฺจาปิ   ภวํ   โคตโม   เอวมาห  อถ  เขฺวตฺถ  พฺราหฺมณา  เอวเมตํ
มญฺญนฺติ    พฺราหฺมณาว    เสฏฺโฐ    วณฺโณ    หีโน   อญฺโญ   วณฺโณ
ฯเปฯ พฺรหฺมทายาทาติ ฯ
     [๖๒๑]   ตํ  กึ  มญฺญสิ  อสฺสลายน  พฺราหฺมโณว  นุ  โข  ปโหติ
โสตฺตึ   ๑-   สินานํ   อาทาย  นทึ  คนฺตฺวา  รโชชลฺลํ  ปวาเหตุํ  โน
ขตฺติโย  โน  เวสฺโส  โน  สุทฺโทติ  ฯ  โน  หิทํ  โภ  โคตม ขตฺติโยปิ
หิ   โภ   โคตม   ปโหติ   โสตฺตึ  ๒-  สินานํ  อาทาย  นทึ  คนฺตฺวา
รโชชลฺลํ  ปวาเหตุํ   พฺราหฺมโณปิ  หิ  โภ  โคตม  ... เวสฺโสปิ หิ โภ
โคตม  ...  สุทฺโทปิ  หิ  โภ โคตม ... สพฺเพปิ หิ โภ โคตม จตฺตาโร
วณฺณา   ปโหนฺติ   โสตฺตึ  ๓-  สินานํ  อาทาย  นทึ  คนฺตฺวา  รโชชลฺลํ
ปวาเหตุนฺติ    ฯ   เอตฺถ   อสฺสลายน   พฺราหฺมณานํ   กึ   พลํ   โก
อสฺสาโส      ยเทตฺถ      พฺราหฺมณา     เอวมาหํสุ     พฺราหฺมณาว
เสฏฺโฐ   วณฺโณ   หีโน   อญฺโญ   วณฺโณ   ฯเปฯ  พฺรหฺมทายาทาติ  ฯ
กิญฺจาปิ   ภวํ   โคตโม   เอวมาห  อถ  เขฺวตฺถ  พฺราหฺมณา  เอวเมตํ
มญฺญนฺติ    พฺราหฺมณาว    เสฏฺโฐ    วณฺโณ    หีโน   อญฺโญ   วณฺโณ
@เชิงอรรถ: ๑-๒-๓ ยุ. โสตฺถึ สินานึ ฯ
ฯเปฯ พฺรหฺมทายาทาติ ฯ
     [๖๒๒]   ตํ  กึ  มญฺญสิ  อสฺสลายน อิธ ราชา ขตฺติโย มุทฺธาวสิตฺโต
นานาชจฺจานํ    ปุริสานํ    ปุริสสตํ   สนฺนิปาเตยฺย   อายนฺตุ   โภนฺโต
เย    ตตฺถ    ขตฺติยกุลา    พฺราหฺมณกุลา    ราชญฺญกุลา    อุปฺปนฺนา
สากสฺส  วา  สาลสฺส  วา  สลฬสฺส  วา  จนฺทนสฺส  วา  ปทุมกสฺส  วา
อุตฺตรารณึ    อาทาย    อคฺคึ    อภินิพฺพตฺเตนฺตุ   เตโช   ปาตุกโรนฺตุ
อายนฺตุ   ปน   โภนฺโต   เย  จ  ๑-  ตตฺถ  จณฺฑาลกุลา  เนสาทกุลา
เวณุกุลา    ๒-   รถการกุลา   ปุกฺกุสกุลา   อุปฺปนฺนา   สาปานโทณิยา
วา    สูกรโทณิยา    วา    รชกโทณิยา   วา   เอลณฺฑกฏฺฐสฺส   วา
อุตฺตรารณึ อาทาย อคฺคึ อภินิพฺพตฺเตนฺตุ เตโช ปาตุกโรนฺตูติ
     {๖๒๒.๑}   ตํ  กึ  มญฺญสิ  อสฺสลายน  โย จ ๓- นุ โข ขตฺติยกุลา
พฺราหฺมณกุลา   ราชญฺญกุลา   อุปฺปนฺเนหิ   สากสฺส   วา   สาลสฺส  วา
สลฬสฺส   วา   จนฺทนสฺส   วา   ปทุมกสฺส   วา   อุตฺตรารณึ  อาทาย
อคฺคิ  อภินิพฺพตฺโต  เตโช  ปาตุกโต  โส  เอว  นุ  ขฺวสฺส อคฺคิ อจฺจิมา
เจว   วณฺณิมา  จ  ปภสฺสโร  จ  เตน  จ  สกฺกา  อคฺคินา  อคฺคิกรณียํ
กาตุํ   โย   ปน  โส  จณฺฑาลกุลา  เนสาทกุลา  เวณุกุลา  รถการกุลา
ปุกฺกุสกุลา      อุปฺปนฺเนหิ     สาปานโทณิยา     วา     สูกรโทณิยา
วา    รชกโทณิยา   วา   เอลณฺฑกฏฺฐสฺส   วา   อุตฺตรารณึ   อาทาย
อคฺคิ    อภินิพฺพตฺโต   เตโช   ปาตุกโต   สฺวาสฺส   อคฺคิ   น   เจว
อจฺจิมา   น   จ   วณฺณิมา   น   จ   ปภสฺสโร  น  จ  เตน  สกฺกา
@เชิงอรรถ:  ยุ. จสทฺโท นตฺถิ ฯ     ยุ. เวณกุลา ฯ    ยุ. โย เอวํ นุ โข โส ฯ
อคฺคินา อคฺคิกรณียํ กาตุนฺติ ฯ
     {๖๒๒.๒}   โน  หิทํ  โภ โคตม โยปิ ๑- โส โภ โคตม ขตฺติยกุลา
พฺราหฺมณกุลา   ราชญฺญกุลา   อุปฺปนฺเนหิ   สากสฺส   ๒-   วา  สาลสฺส
วา   สลฬสฺส   วา  จนฺทนสฺส  วา  ปทุมกสฺส  วา  อุตฺตรารณึ  อาทาย
อคฺคิ   อภินิพฺพตฺโต   เตโช   ปาตุกโต   สฺวาสฺส   อคฺคิ   อจฺจิมา  จ
วณฺณิมา   จ   ปภสฺสโร   จ   เตน   จ  สกฺกา   อคฺคินา  อคฺคิกรณียํ
กาตุํ   โยปิ   โส   จณฺฑาลกุลา   เนสาทกุลา   เวณุกุลา  รถการกุลา
ปุกฺกุสกุลา    อุปฺปนฺเนหิ    สาปานโทณิยา    วา    สูกรโทณิยา   วา
รชกโทณิยา   วา   เอลณฺฑกฏฺฐสฺส   วา    อุตฺตรารณึ   อาทาย  อคฺคิ
อภินิพฺพตฺโต  เตโช  ปาตุกโต  โสปสฺส  ๓-  อคฺคิ  อจฺจิมา  จ  วณฺณิมา
จ  ปภสฺสโร  จ  เตนปิ  จ  สกฺกา  [๔]-  อคฺคิกรณียํ  กาตุํ สพฺโพปิ หิ
โภ  โคตม  อคฺคิ  อจฺจิมา  จ  วณฺณิมา  จ  ปภสฺสโร  จ  สพฺเพนปิ  จ
สกฺกา    อคฺคินา    อคฺคิกรณียํ    กาตุนฺติ    ฯ   เอตฺถ   อสฺสลายน
พฺราหฺมณานํ   กึ   พลํ   โก  อสฺสาโส  ยเทตฺถ  พฺราหฺมณา  เอวมาหํสุ
พฺราหฺมณาว    เสฏฺโฐ   วณฺโณ   หีโน   อญฺโญ   วณฺโณ   พฺราหฺมณาว
สุกฺโก    วณฺโณ    กโณฺห    อญฺโญ    วณฺโณ   พฺราหฺมณาว   สุชฺฌนฺติ
โน   อพฺราหฺมณา   พฺราหฺมณาว   พฺรหฺมุโน   ปุตฺตา   โอรสา   มุขโต
ชาตา    พฺรหฺมชา    พฺรหฺมนิมฺมิตา    พฺรหฺมทายาทาติ    ฯ   กิญฺจาปิ
ภวํ   โคตโม   เอวมาห   อถ  เขฺวตฺถ  พฺราหฺมณา  เอวเมตํ  มญฺญนฺติ
พฺราหฺมณาว    เสฏฺโฐ    วณฺโณ    หีโน    อญฺโญ    วณฺโณ   ฯเปฯ
พฺรหฺมทายาทาติ ฯ
@เชิงอรรถ:  ยุ. ปิสทฺโท นตฺถิ ฯ     ยุ. อยํ ปาโฐ นตฺถิ ฯ
@ ยุ. โสจสฺส ฯ    ยุ. อคฺคินา ฯ
     [๖๒๓]   ตํ  กึ  มญฺญสิ  อสฺสลายน  อิธ  ขตฺติยกุมาโร  พฺราหฺมณ-
กญฺญาย    สทฺธึ    สํวาสํ   กปฺเปยฺย   เตสํ   สํวาสมนฺวาย   ปุตฺโต
ชาเยถ     โย    โส    ขตฺติยกุมาเรน    พฺราหฺมณกญฺญาย    ปุตฺโต
อุปฺปนฺโน    สิยา   โส   มาตุปิ   สทิโส   ปิตุปิ   สทิโส   ขตฺติโยติปิ
วตฺตพฺโพ   พฺราหฺมโณติปิ   วตฺตพฺโพติ   ฯ    โย   โส   โภ   โคตม
ขตฺติยกุมาเรน    พฺราหฺมณกญฺญาย    ปุตฺโต    อุปฺปนฺโน    สิยา   โส
มาตุปิ   สทิโส   ปิตุปิ   สทิโส   ขตฺติโยติปิ   วตฺตพฺโพ   พฺราหฺมโณติปิ
วตฺตพฺโพติ ฯ
     [๖๒๔]   ตํ   กึ   มญฺญสิ   อสฺสลายน   อิธ   พฺราหฺมณกุมาโร
ขตฺติยกญฺญาย   สทฺธึ   สํวาสํ   กปฺเปยฺย   เตสํ   สํวาสมนฺวาย  ปุตฺโต
ชาเยถ     โย    โส    พฺราหฺมณกุมาเรน    ขตฺติยกญฺญาย    ปุตฺโต
อุปฺปนฺโน    สิยา   โส   มาตุปิ   สทิโส   ปิตุปิ   สทิโส   ขตฺติโยติปิ
วตฺตพฺโพ    พฺราหฺมโณติปิ   วตฺตพฺโพติ   ฯ   โย   โส   โภ   โคตม
พฺราหฺมณกุมาเรน    ขตฺติยกญฺญาย    ปุตฺโต    อุปฺปนฺโน    สิยา   โส
มาตุปิ   สทิโส   ปิตุปิ   สทิโส   ขตฺติโยติปิ   วตฺตพฺโพ   พฺราหฺมโณติปิ
วตฺตพฺโพติ ฯ
     [๖๒๕]   ตํ   กึ   มญฺญสิ   อสฺสลายน   อิธ   วลวํ   คทฺรเภน
สมฺปโยเชยฺยุํ   เตสํ   สํปโยคมนฺวาย  กิสฺสโร  ๑-  ชาเยถ  โย  โสปิ
วลวาย   คทฺรเภน   กิสฺสโร  ๒-  อุปฺปนฺโน  สิยา  โส  มาตุปิ  สทิโส
ปิตุปิ   สทิโส   อสฺโสติปิ   วตฺตพฺโพ   คทฺรโภติปิ   วตฺตพฺโพ   ฯ  โส
@เชิงอรรถ: ๑-๒ ยุ. กิโสโร ฯ
กุมารณฺฑุปิ   ๑-   โส   โภ   โคตม  อสฺสตโร  โหติ  อิทํ  หิสฺส  โภ
โคตม    นานากรณํ   ปสฺสามิ   อมุตฺร   จ   ปน   สานํ   น   กิญฺจิ
นานากรณํ ปสฺสามีติ ฯ
     [๖๒๖]   ตํ   กึ   มญฺญสิ   อสฺสลายน  อิธาสฺสุ  เทฺว  มาณวกา
ภาตโร  โสทริยา  ๒-  เอโก  อชฺฌายโก  อุปนีโต  เอโก  อนชฺฌายโก
อนุปนีโต    กเมตฺถ    พฺราหฺมณา    ปฐมํ    โภเชยฺยุํ   สทฺเธ   วา
ถาลิปาเก   วา  ยญฺเญ  วา  ปาหุเน  วาติ  ฯ  โย  โส  โภ  โคตม
มาณวโก   อชฺฌายโก   อุปนีโต   ตเมตฺถ   พฺราหฺมณา  ปฐมํ  โภเชยฺยุํ
สทฺเธ   วา   ถาลิปาเก   วา  ยญฺเญ  วา  ปาหุเน  วา  กึ  หิ  โภ
โคตม อนชฺฌายเก อนุปนีเต ทินฺนํ มหปฺผลํ ภวิสฺสตีติ ฯ
     [๖๒๗]   ตํ   กึ   มญฺญสิ   อสฺสลายน  อิธาสฺสุ  เทฺว  มาณวกา
ภาตโร   โสทริยา   เอโก   อชฺฌายโก   อุปนีโต  ทุสฺสีโล  ปาปธมฺโม
เอโก    อนชฺฌายโก    อนุปนีโต    สีลวา    กลฺยาณธมฺโม   กเมตฺถ
พฺราหฺมณา   ปฐมํ   โภเชยฺยุํ   สทฺเธ   วา   ถาลิปาเก   วา  ยญฺเญ
วา   ปาหุเน   วาติ  ฯ  โย  โส  โภ  โคตม  มาณวโก  อนชฺฌายโก
อนุปนีโต   สีลวา   กลฺยาณธมฺโม   ตเมตฺถ  พฺราหฺมณา  ปฐมํ  โภเชยฺยุํ
สทฺเธ  วา  ถาลิปาเก  วา  ยญฺเญ  วา  ปาหุเน  วา  กึ หิ โภ โคตม
ทุสฺสีเล   ปาปธมฺเม   ทินฺนํ   มหปฺผลํ   ภวิสฺสตีติ  ฯ  ปุพฺเพ  โข  ตฺวํ
อสฺสลายน   ชาตึ   อคมาสิ   ชาตึ   คนฺตฺวา   มนฺเต  อคมาสิ  มนฺเต
@เชิงอรรถ:  ยุ. เวกุรญฺชายาติ ทิสฺสติ ฯ  ม. กุณฺฑนฺติ ทิสฺสติ ฯ     ยุ. สอุทริยา ฯ
คนฺตฺวา   ตเมว  ๑-  ฐเปตฺวา  ๒-  จาตุวณฺณึ  สุทฺธึ  ปจฺจาคโต  ยมหํ
ปญฺญเปมีติ   ฯ  เอวํ  วุตฺเต  อสฺสลายโน  มาณโว  ตุณฺหีภูโต  มงฺกุภูโต
ปตฺตกฺขนฺโธ อโธมุโข ปชฺฌายนฺโต อปฺปฏิภาโณ นิสีทิ ฯ
     [๖๒๘]   อถ   โข  ภควา  อสฺสลายนํ  มาณวํ  ตุณฺหีภูตํ  มงฺกุภูตํ
ปตฺตกฺขนฺธํ    อโธมุขํ    ปชฺฌายนฺตํ   อปฺปฏิภาณํ   วิทิตฺวา   อสฺสลายนํ
มาณวํ    เอตทโวจ    ภูตปุพฺพํ    อสฺสลายน    สตฺตนฺนํ   พฺราหฺมณิสีนํ
อรญฺญายตเน    ปณฺณกุฏีสุ    สมฺมนฺตานํ    เอวรูปํ    ปาปกํ   ทิฏฺฐิคตํ
อุปฺปนฺนํ   โหติ   พฺราหฺมณาว   เสฏฺโฐ   วณฺโณ   หีโน  อญฺโญ  วณฺโณ
ฯเปฯ   พฺรหฺมทายาทาติ   ฯ  อสฺโสสิ  โข  อสฺสลายน  อสิโต  เทวโล
อิสิ     สตฺตนฺนํ     กิร     พฺราหฺมณิสีนํ    อรญฺญายตเน    ปณฺณกุฏีสุ
สมฺมนฺตานํ   เอวรูปํ   ปาปกํ   ทิฏฺฐิคตํ   อุปฺปนฺนํ   [๓]-  พฺราหฺมณาว
เสฏฺโฐ  วณฺโณ  ฯเปฯ  พฺรหฺมทายาทาติ  ฯ  อถ  โข  อสฺสลายน อสิโต
เทวโล  อิสิ  เกสมสฺสุํ  กปฺเปตฺวา  มญฺเชฏฺฐวณฺณานิ  ทุสฺสานิ นิวาเสตฺวา
อคลิโย  ๔-  อุปาหนา  อาโรหิตฺวา  ชาตรูปมยํ  ทณฺฑํ  คเหตฺวา สตฺตนฺนํ
พฺราหฺมณิสีนํ   ปตฺถิณฺฑิเล   ๕-   ปาตุรโหสิ   ฯ   อถ  โข  อสฺสลายน
อสิโต   เทวโล   อิสิ   สตฺตนฺนํ   พฺราหฺมณิสีนํ  ปตฺถิณฺฑิเล  จงฺกมมาโน
เอวมาห  หนฺท  โก  นุ  โข  อิเม  ภวนฺโต  พฺราหฺมณิสโย  คนฺตา  ๖-
หนฺท  โก  นุ  โข  อิเม  ภวนฺโต  พฺราหฺมณิสโย  คนฺตาติ  ฯ  อถ  โข
อสฺสลายน   สตฺต   ๗-   พฺราหฺมณิสโย   อสิตํ  เทวลํ  อิสึ  เอตทโวจุํ
@เชิงอรรถ:  ยุ. ตเมตํ ตฺวํ ฯ      ยุ. ฐเปตฺวาติ นตฺถิ ฯ
@ ยุ. เอตฺถนฺตเร โหตีติ ทิสฺสติ ฯ  ยุ. อฏฺลิโย ฯ  ยุ. ปตฺถณฺฑิเล ฯ
@ สี. ยุ. คตา ฯ  ยุ. สตฺตนฺนํ พฺราหฺมณิสีนํ เอตทโหสิ ฯ
โก    นายํ   คามณฺฑลรูโป   วิย   สตฺตนฺนํ   พฺราหฺมณิสีนํ   ปตฺถิณฺฑิเล
จงฺกมมาโน  เอวมาห  หนฺท  โก  นุ  โข  อิเม  ภวนฺโต  พฺราหฺมณิสโย
คนฺตา  หนฺท  โก  นุ  โข  อิเม  ภวนฺโต  พฺราหฺมณิสโย  คนฺตาติ  หนฺท
นํ อภิสปิสฺสามาติ ๑- ฯ
     {๖๒๘.๑}   อถ  โข  อสฺสลายน  สตฺต  พฺราหฺมณิสโย  อสิตํ เทวลํ
อิสึ   อภิสปึสุ   ภสฺมา   จปลี   ๒-  โหหิ  ภสฺมา  จปลี  โหหิ  ภสฺมา
จปลี   โหหีติ   ฯ   ยถา   ยถา  โข  อสฺสลายน  สตฺต  พฺราหฺมณิสโย
อสิตํ  เทวลํ  อิสึ   อภิสปึสุ  ตถา  ตถา  อสิโต  เทวโล อิสิ อภิรูปตโร
เจว  โหติ  ทสฺสนียตโร  จ  ปาสาทิกตโร  จ  ฯ  อถ  โข  อสฺสลายน
สตฺตนฺนํ   พฺราหฺมณิสีนํ   เอตทโหสิ   โมฆํ   วต   โน   ตโป   อปฺผลํ
พฺรหฺมจริยํ   มยํ   หิ   ปุพฺเพ  ยํ  อภิสปาม  ภสฺมา  จปลี  ๓-  โหหีติ
ภสฺมา  [๔]-  ภวติ  เอกจฺโจ  อิมํ  ปน  มยํ  ยถา ยถา อภิสปาม ตถา
ตถา   อภิรูปตโร  เจว  โหติ  ทสฺสนียตโร  จ  ปาสาทิกตโร  จาติ  ฯ
น   ภวนฺตานํ   โมฆํ   ตโป   น  ปนาปฺผลํ  พฺรหฺมจริยํ  อิงฺฆ  ภวนฺโต
โย   มยิ   มโนปโทโส   ตํ  ปชหถาติ  ฯ  โย  ภวติ  มโนปโทโส  ตํ
ปชหาม  โก  นุ  ภวํ  โหตีติ  ฯ  สุโต  โน ภวตํ อสิโต เทวโล อิสีติ ฯ
เอวํ  โภติ  ฯ  โส  ขฺวาหํ  โภ  โหมีติ  ฯ  อถ  โข  อสฺสลายน สตฺต
พฺราหฺมณิสโย อสิตํ เทวลํ อิสึ อภิวาเทตุํ อุปกฺกมึสุ ฯ ๕-
     {๖๒๘.๒}   อถ   โข   อสฺสลายน   อสิโต  เทวโล  อิสิ  สตฺต
พฺราหฺมณิสโย   เอตทโวจ   สุตเมตํ   โภ   สตฺตนฺนํ   กิร  พฺราหฺมณิสีนํ
อรญฺญายตเน    ปณฺณกุฏีสุ    สมฺมนฺตานํ    เอวรูปํ    ปาปกํ   ทิฏฺฐิคตํ
@เชิงอรรถ:  ยุ. อภิสปามาติ ฯ   ๒-๓ ยุ. ภสฺมา วสลี โหตีติ ฯ    ยุ. วสทฺโท ทิสฺสติ ฯ
@ ยุ. อุปสงฺกมึสุ ฯ
อุปฺปนฺนํ    พฺราหฺมณาว    เสฏฺโฐ    วณฺโณ    หีโน   อญฺโญ   วณฺโณ
พฺราหฺมณาว    สุกฺโก   วณฺโณ   กโณฺห   อญฺโญ   วณฺโณ   พฺราหฺมณาว
สุชฺฌนฺติ  โน  อพฺราหฺมณา  พฺราหฺมณาว  พฺรหฺมุโน  ปุตฺตา  โอรสา มุขโต
ชาตา พฺรหฺมชา พฺรหฺมนิมฺมิตา พฺรหฺมทายาทาติ ฯ เอวํ โภติ ฯ
     {๖๒๘.๓}   ชานนฺติ  ปน  โภนฺโต  ยา  ชนิมาตา ๑- พฺราหฺมณํเยว
อคมาสิ  โน  อพฺราหฺมณนฺติ  ฯ  โน  หิทํ  โภ  ฯ  ชานนฺติ  ปน โภนฺโต
ยา    ชนิมาตุ    มาตา    ยาว    สตฺตมา    มาตุ    มาตามหยุคา
พฺราหฺมณํเยว   อคมาสิ   โน   อพฺราหฺมณนฺติ   ฯ   โน   หิทํ  โภ  ฯ
ชานนฺติ   ปน   โภนฺโต   โย   ชนิปิตา   พฺราหฺมณึเยว   อคมาสิ  โน
อพฺราหฺมณินฺติ   ฯ   โน   หิทํ   โภ   ฯ   ชานนฺติ  ปน  โภนฺโต  โย
ชนิปิตุ    ปิตา    ยาว    สตฺตมา   ปิตุ   ปิตามหยุคา   พฺราหฺมณึเยว
อคมาสิ   โน   อพฺราหฺมณินฺติ   ฯ   โน   หิทํ   โภ  ฯ  ชานนฺติ  ปน
โภนฺโต   ยถา   คพฺภสฺส   อวกฺกนฺติ   โหตีติ   ฯ   ชานาม  มยํ  โภ
ยถา   คพฺภสฺส   อวกฺกนฺติ  โหติ  อิธ  มาตาปิตโร  จ  ๒-  สนฺนิปติตา
โหนฺติ   มาตา   จ   อุตุนี   โหติ   คนฺธพฺโพ   จ  ปจฺจุปฏฺฐิโต  โหติ
เอวํ   ติณฺณํ   สนฺนิปาตา   คพฺภสฺส    อวกฺกนฺติ   โหตีติ   ฯ  ชานนฺติ
ปน   โภนฺโต   ยคฺเฆ   โส   คนฺธพฺโพ  ขตฺติโย  วา  พฺราหฺมโณ  วา
เวสฺโส   วา   สุทฺโท   วาติ   ฯ  น  มยํ  โภ  ชานาม  ยคฺเฆ  โส
คนฺธพฺโพ  ขตฺติโย  วา  พฺราหฺมโณ  วา  เวสฺโส  วา  สุทฺโท  วาติ  ฯ
เอวํ  สนฺเต  โภนฺโต  ๓-  ชานาถ  เก  ตุเมฺห  โหถาติ ฯ เอวํ สนฺเต
@เชิงอรรถ:  ยุ. ชนีมาตา ฯ    ยุ. ว ฯ    ยุ. โภ ฯ
โภ  น  มยํ  ชานาม  เกจิ  มยํ  โหมาติ  ฯ  เต  หิ  นาม อสฺสลายน
สตฺต   พฺราหฺมณิสโย   อสิเตน   เทวเลน   อิสินา   สเก   ชาติวาเท
สมนุยุญฺชิยมานา     สมนุคฺคาหิยมานา     ๑-    สมนุภาสิยมานา    น
สมฺปายิสฺสนฺติ    กึ   ปน   ตฺวํ   เอตรหิ   มยา   สกสฺมึ   ชาติวาเท
สมนุยุญฺชิยมาโน           สมนุคฺคาหิยมาโน          สมนุภาสิยมาโน
สมฺปายิสฺสสิ เยสํ ตฺวํ สาจริยโก น ปุณฺโณ ทพฺพิคาโหติ ฯ
     [๖๒๙]   เอวํ  วุตฺเต  อสฺสลายโน  มาณโว  ภควนฺตํ  เอตทโวจ
อภิกฺกนฺตํ   โภ   โคตม   ฯเปฯ   อุปาสกํ   มํ  ภวํ  โคตโม  ธาเรตุ
อชฺชตคฺเค ปาณุเปตํ สรณงฺคตนฺติ ฯ
                 อสฺสลายนสุตฺตํ นิฏฺฐิตํ ตติยํ ฯ
                    ---------------
@เชิงอรรถ:  ยุ. สมนุภาสิยมานา สมนุคฺคาหิยมานา ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๑๓ หน้าที่ ๕๕๘-๕๗๒. https://84000.org/tipitaka/read/pali_read.php?B=13&A=11416&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=13&A=11416&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=13&item=613&items=17              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=13&siri=43              ศึกษาอรรถกถานี้ได้ที่ :- https://84000.org/tipitaka/attha/attha.php?b=13&i=613              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=9&A=7387              The Pali Atthakatha in Roman :- https://84000.org/tipitaka/atthapali/read_rm.php?B=9&A=7387              สารบัญพระไตรปิฎกเล่มที่ ๑๓ https://84000.org/tipitaka/read/?index_13 https://84000.org/tipitaka/english/?index_13

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]