ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๓ ภาษาบาลี อักษรไทย พระสุตตันตปิฎกเล่มที่ ๕ สุตฺต. ม. มชฺฌิมปณฺณาสกํ

                      เสขปฏิปทาสุตฺตํ
     [๒๔]   เอวมฺเม   สุตํ   เอกํ   สมยํ   ภควา  สกฺเกสุ  วิหรติ
กปิลวตฺถุสฺมึ  นิโคฺรธาราเม  ฯ  เตน  โข  ปน  สมเยน  กาปิลวตฺถวานํ
สกฺยานํ   นวํ   สนฺถาคารํ   อจิรการิตํ   โหติ   อนชฺฌาวุฏฺฐปุพฺพํ   ๑-
สมเณน   วา  พฺราหฺมเณน  วา  เกนจิ  วา  มนุสฺสภูเตน  ฯ  อถ  โข
กาปิลวตฺถวา   ๒-   สกฺยา   เยน  ภควา  เตนุปสงฺกมึสุ  อุปสงฺกมิตฺวา
ภควนฺตํ   อภิวาเทตฺวา   เอกมนฺตํ   นิสีทึสุ  ฯ  เอกมนฺตํ  นิสินฺนา  โข
กาปิลวตฺถวา   สกฺยา   ภควนฺตํ  เอตทโวจุํ  อิธ  ภนฺเต  กาปิลวตฺถวานํ
สกฺยานํ   นวํ   สนฺถาคารํ   อจิรการิตํ   โหติ   ๓-   อนชฺฌาวุฏฺฐปุพฺพํ
สมเณน   วา   พฺราหฺมเณน   วา  เกนจิ  วา  มนุสฺสภูเตน  ตํ  ภนฺเต
ภควา   ปฐมํ   ปริภุญฺชตุ  ภควตา  ปฐมํ  ปริภุตฺตํ  ปจฺฉา  กาปิลวตฺถวา
สกฺยา    ปริภุญฺชิสฺสนฺติ    ตทสฺส    กาปิลวตฺถวานํ   สกฺยานํ   ทีฆรตฺตํ
หิตาย สุขายาติ ฯ อธิวาเสสิ ภควา ตุณฺหีภาเวน ฯ
     {๒๔.๑}   อถ  โข  กาปิลวตฺถวา  สกฺยา ภควโต อธิวาสนํ วิทิตฺวา
อุฏฺฐายาสนา   ภควนฺตํ   อภิวาเทตฺวา   ปทกฺขิณํ   กตฺวา   เยน   นวํ
สนฺถาคารํ   เตนุปสงฺกมึสุ   อุปสงฺกมิตฺวา   สพฺพสนฺถรึ   ๔-  สนฺถาคารํ
สนฺถราเปตฺวา   ๕-   อาสนานิ  ปญฺญาเปตฺวา  อุทกมณิกํ  ปติฏฺฐาเปตฺวา
เตลปฺปทีปํ   อาโรเปตฺวา   เยน   ภควา   เตนุปสงฺกมึสุ  อุปสงฺกมิตฺวา
@เชิงอรรถ:  สี. ยุ. อนชฺฌาวุฏฺฐํ ฯ   โป. สพฺพตฺถ " กาปิลวตฺถุกาติ ทิสฺสติ ฯ
@ ยุ. โหตีติ นตฺถิ ฯ   โป. " สพฺพสนฺถริสนฺถตํ ฯ   ยุ. สนฺถริตฺวา ฯ
ภควนฺตํ   อภิวาเทตฺวา   เอกมนฺตํ   อฏฺฐํสุ   ฯ   เอกมนฺตํ  ฐิตา  โข
กาปิลวตฺถวา    สกฺยา    ภควนฺตํ    เอตทโวจุํ    สพฺพสนฺถรึ   สนฺถตํ
ภนฺเต   สนฺถาคารํ   อาสนานิ  ปญฺญตฺตานิ  ๑-  อุทกมณิโก  ปติฏฺฐาปิโต
เตลปฺปทีโป อาโรปิโต ยสฺสทานิ ภนฺเต ภควา กาลํ มญฺญตีติ ฯ
     [๒๕]   อถ   โข   ภควา   นิวาเสตฺวา  ปตฺตจีวรมาทาย  สทฺธึ
ภิกฺขุสงฺเฆน   เยน   ๒-  สนฺถาคารํ  เตนุปสงฺกมิ  อุปสงฺกมิตฺวา  ปาเท
ปกฺขาเลตฺวา   สนฺถาคารํ   ปวิสิตฺวา  มชฺฌิมถมฺภํ  นิสฺสาย  ปุรตฺถาภิมุโข
นิสีทิ   ฯ  ภิกฺขุสงฺโฆปิ  โข  ปาเท  ปกฺขาเลตฺวา  สนฺถาคารํ  ปวิสิตฺวา
ปจฺฉิมํ  ภิตฺตึ  นิสฺสาย  ปุรตฺถาภิมุโข  นิสีทิ  ภควนฺตํเยว ปุรกฺขตฺวา ๓- ฯ
กาปิลวตฺถวาปิ   โข  สกฺยา  ปาเท  ปกฺขาเลตฺวา  สนฺถาคารํ  ปวิสิตฺวา
ปุรตฺถิมํ     ภิตฺตึ    นิสฺสาย    ปจฺฉิมาภิมุขา    นิสีทึสุ    ภควนฺตํเยว
ปุรกฺขตฺวา  ๓-  ฯ  อถ  โข  ภควา  กาปิลวตฺถเว  สกฺเย  ๔- พหุเทว
รตฺตึ   ธมฺมิยา   กถาย   สนฺทสฺเสตฺวา   สมาทเปตฺวา   สมุตฺเตเชตฺวา
สมฺปหํเสตฺวา   อายสฺมนฺตํ   อานนฺทํ   อามนฺเตสิ   ปฏิภาตุ  ตํ  อานนฺท
กาปิลวตฺถวานํ   สกฺยานํ   เสโข   ปฏิปโท   ๕-  ปิฏฺฐิ  เม  อคิลายติ
ตมหํ  อายมิสฺสามีติ  ฯ  เอวํ  ภนฺเตติ  โข  อายสฺมา  อานนฺโท ภควโต
ปจฺจสฺโสสิ   ฯ   อถ   โข   ภควา   จตุคุณํ   สงฺฆาฏึ   ปญฺญาเปตฺวา
ทกฺขิเณน    ปสฺเสน    สีหเสยฺยํ    กปฺเปสิ    ปาเทน    ๖-   ปาทํ
อจฺจาธาย สโต สมฺปชาโน อุฏฺฐานสญฺญํ มนสิกริตฺวา ฯ
     [๒๖]   อถ  โข  อายสฺมา  อานนฺโท มหานามํ สกฺกํ ๗- อามนฺเตสิ
@เชิงอรรถ:  ปญฺญาปิตานีติ ยุตฺตตรํ ฯ   โป. นวํ ฯ   โป. ปุรกฺขิตฺวาติปิ ทิสฺสติ ฯ
@ ยุ สกฺเก ฯ   ยุ. ปาฏิปโท ฯ   ม. ยุ. ปาเท ฯ   ยุ. สกฺยํ ฯ
อิธ   มหานาม  อริยสาวโก  สีลสมฺปนฺโน  โหติ  อินฺทฺริเยสุ  คุตฺตทฺวาโร
โหติ    โภชเน    มตฺตญฺญู    โหติ   ชาคริยมนุยุตฺโต   โหติ   สตฺตหิ
สทฺธมฺเมหิ    สมนฺนาคโต    โหติ    จตุนฺนํ   ฌานานํ   อาภิเจตสิกานํ
ทิฏฺฐธมฺมสุขวิหารานํ นิกามลาภี โหติ อกิจฺฉลาภี อกสิรลาภี ฯ
     [๒๗]   กถญฺจ   มหานาม   อริยสาวโก   สีลสมฺปนฺโน  โหติ  ฯ
อิธ   มหานาม   อริยสาวโก  สีลวา  โหติ  ปาติโมกฺขสํวรสํวุโต  วิหรติ
อาจารโคจรสมฺปนฺโน    อณุมตฺเตสุ    วชฺเชสุ    ภยทสฺสาวี   สมาทาย
สิกฺขติ สิกฺขาปเทสุ เอวํ โข มหานาม อริยสาวโก สีลสมฺปนฺโน โหติ ฯ
     [๒๘]   กถญฺจ   มหานาม   อริยสาวโก  อินฺทฺริเยสุ  คุตฺตทฺวาโร
โหติ   ฯ   อิธ   มหานาม   อริยสาวโก   จกฺขุนา   รูปํ   ทิสฺวา  น
นิมิตฺตคฺคาหี    โหติ    นานุพฺยญฺชนคฺคาหี   ยตฺวาธิกรณเมนํ   จกฺขุนฺทฺริยํ
อสํวุตํ    วิหรนฺตํ    อภิชฺฌาโทมนสฺสา    ปาปกา    อกุสลา    ธมฺมา
อนฺวาสฺสเวยฺยุํ    ตสฺส    สํวราย    ปฏิปชฺชติ    รกฺขติ    จกฺขุนฺทฺริยํ
จกฺขุนฺทฺริเย   สํวรํ   อาปชฺชติ   โสเตน   สทฺทํ  สุตฺวา  ...  ฆาเนน
คนฺธํ    ฆายิตฺวา   ...   ชิวฺหาย   รสํ   สายิตฺวา   ...   กาเยน
โผฏฺฐพฺพํ   ผุสิตฺวา   ...   มนสา   ธมฺมํ   วิญฺญาย   น  นิมิตฺตคฺคาหี
โหติ     นานุพฺยญฺชนคฺคาหี     ยตฺวาธิกรณเมนํ     มนินฺทฺริยํ    อสํวุตํ
วิหรนฺตํ   อภิชฺฌาโทมนสฺสา   ปาปกา   อกุสลา   ธมฺมา  อนฺวาสฺสเวยฺยุํ
ตสฺส    สํวราย    ปฏิปชฺชติ    รกฺขติ   มนินฺทฺริยํ   มนินฺทฺริเย   สํวรํ
อาปชฺชติ   เอวํ   โข   มหานาม  อริยสาวโก  อินฺทฺริเยสุ  คุตฺตทฺวาโร
โหติ ฯ
     [๒๙]   กถญฺจ  มหานาม  อริยสาวโก  โภชเน  มตฺตญฺญู  โหติ  ฯ
อิธ   มหานาม   อริยสาวโก   ปฏิสงฺขา   โยนิโส  อาหารํ  อาหาเรติ
เนว   ทวาย  น  มทาย  น  มณฺฑนาย  น  วิภูสนาย  ยาวเทว  อิมสฺส
กายสฺส     ฐิติยา     ยาปนาย    วิหึสุปรติยา    พฺรหฺมจริยานุคฺคหาย
อิติ   ปุราณญฺจ   เวทนํ   ปฏิหงฺขามิ  นวญฺจ  เวทนํ  น  อุปฺปาเทสฺสามิ
ยาตฺรา   จ   เม   ภวิสฺสติ   อนวชฺชตา  จ  ผาสุวิหาโร  จาติ  เอวํ
โข มหานาม อริยสาวโก โภชเน มตฺตญฺญู โหติ ฯ
     [๓๐]   กถญฺจ  มหานาม  อริยสาวโก  ชาคริยมนุยุตฺโต  โหติ  ฯ
อิธ   มหานาม   อริยสาวโก   ทิวสํ   จงฺกเมน  นิสชฺชาย  อาวรณีเยหิ
ธมฺเมหิ   จิตฺตํ   ปริโสเธติ   รตฺติยา  ปฐมํ  ยามํ  จงฺกเมน  นิสชฺชาย
อาวรณีเยหิ  ธมฺเมหิ  จิตฺตํ  ปริโสเธติ  รตฺติยา  มชฺฌิมํ  ยามํ  ทกฺขิเณน
ปสฺเสน   สีหเสยฺยํ  กปฺเปสิ  ๑-  ปาเทน  ๒-  ปาทํ  อจฺจาธาย  สโต
สมฺปชาโน    อุฏฺฐานสญฺญํ    มนสิกริตฺวา    รตฺติยา    ปจฺฉิมํ    ยามํ
ปจฺจุฏฺฐาย   จงฺกเมน  นิสชฺชาย  อาวรณีเยหิ  ธมฺเมหิ  จิตฺตํ  ปริโสเธติ
เอวํ โข มหานาม อริยสาวโก ชาคริยมนุยุตฺโต โหติ ฯ
     [๓๑]    กถญฺจ    มหานาม   อริยสาวโก   สตฺตหิ   สทฺธมฺเมหิ
สมนฺนาคโต   โหติ   ฯ   อิธ   มหานาม   อริยสาวโก   สทฺโธ  โหติ
สทฺทหติ   ตถาคตสฺส   โพธึ   อิติปิ   โส  ภควา  อรหํ  สมฺมาสมฺพุทฺโธ
@เชิงอรรถ:  ม. ยุ. กปฺเปติ ฯ   ม. ยุ. ปาเท ฯ
วิชฺชาจรณสมฺปนฺโน   สุคโต   โลกวิทู   อนุตฺตโร  ปุริสทมฺมสารถิ  สตฺถา
เทวมนุสฺสานํ   พุทฺโธ   ภควาติ   หิริมา   โหติ  หิริยติ  กายทุจฺจริเตน
วจีทุจฺจริเตน   มโนทุจฺจริเตน   หิริยติ   ปาปกานํ   อกุสลานํ   ธมฺมานํ
สมาปตฺติยา   โอตฺตปฺปี   โหติ  โอตฺตปฺปติ  กายทุจฺจริเตน  วจีทุจฺจริเตน
มโนทุจฺจริเตน      โอตฺตปฺปติ     ปาปกานํ     อกุสลานํ     ธมฺมานํ
สมาปตฺติยา    พหุสฺสุโต    โหติ    สุตธโร   สุตสนฺนิจโย   เย   เต
ธมฺมา       อาทิกลฺยาณา      มชฺเฌกลฺยาณา      ปริโยสานกลฺยาณา
สาตฺถา    ๑-    สพฺยญฺชนา    เกวลปริปุณฺณํ    ปริสุทฺธํ    พฺรหฺมจริยํ
อภิวทนฺติ    ตถารูปาสฺส    ธมฺมา   พหุสฺสุตา   โหนฺติ   ธตา   วจสา
ปริจิตา     มนสานุเปกฺขิตา     ทิฏฺฐิยา    สุปฏิวิทฺธา    อารทฺธวิริโย
โหติ  ๒-   อกุสลานํ  ธมฺมานํ  ปหานาย  กุสลานํ  ธมฺมานํ  อุปสมฺปทาย
ถามวา    ทฬฺหปรกฺกโม    อนิกฺขิตฺตธุโร    กุสเลสุ   ธมฺเมสุ   สติมา
โหติ    ปรเมน   สติเนปกฺเกน   สมนฺนาคโต   จิรกตมฺปิ   จิรภาสิตมฺปิ
สริตา   อนุสฺสริตา   ปญฺญวา   ๓-   โหติ   อุทยตฺถคามินิยา   ปญฺญาย
สมนฺนาคโต    ๔-   อริยาย   นิพฺเพธิกาย   สมฺมา   ทุกฺขกฺขยคามินิยา
เอวํ โข มหานาม อริยสาวโก สตฺตหิ สทฺธมฺเมหิ สมนฺนาคโต โหติ ฯ
     [๓๒]   กถญฺจ มหานาม อริยสาวโก จตุนฺนํ ฌานานํ อาภิเจตสิกานํ ๕-
ทิฏฺฐธมฺมสุขวิหารานํ    นิกามลาภี   โหติ   อกิจฺฉลาภี   อกสิรลาภี   ฯ
อิธ   มหานาม   อริยสาวโก   วิวิจฺเจว   กาเมหิ   วิวิจฺจ   อกุสเลหิ
ธมฺเมหิ     สวิตกฺกํ    สวิจารํ    วิเวกชํ    ปีติสุขํ    ปฐมํ    ฌานํ
@เชิงอรรถ:  โป. สาตฺถํ สพฺยญฺชนํ ฯ   ม. ยุ. วิหรติ ฯ   ยุ. ปญฺญา วา โหติ ฯ
@ ม. โหติ ฯ   ยุ. อภิ ฯ
อุปสมฺปชฺช    วิหรติ    วิตกฺกวิจารานํ   วูปสมา   อชฺฌตฺตํ   สมฺปสาทนํ
เจตโส   เอโกทิภาวํ   อวิตกฺกํ   อวิจารํ  สมาธิชํ  ปีติสุขํ  ทุติยํ  ฌานํ
อุปสมฺปชฺช  วิหรติ  ปีติยา  จ  วิราคา  อุเปกฺขโก  จ  วิหรติ  สโต  จ
สมฺปชาโน   สุขญฺจ   กาเยน   ปฏิสํเวเทติ   ยนฺตํ   อริยา  อาจิกฺขนฺติ
อุเปกฺขโก    สติมา    สุขวิหารีติ   ตติยํ   ฌานํ   อุปสมฺปชฺช   วิหรติ
สุขสฺส   จ  ปหานา  ทุกฺขสฺส  จ  ปหานา  ปุพฺเพว  โสมนสฺสโทมนสฺสานํ
อตฺถงฺคมา     อทุกฺขมสุขํ     อุเปกฺขาสติปาริสุทฺธึ     จตุตฺถํ     ฌานํ
อุปสมฺปชฺช   วิหรติ   เอวํ  โข  มหานาม  อริยสาวโก  จตุนฺนํ  ฌานานํ
อาภิเจตสิกานํ    ทิฏฺฐธมฺมสุขวิหารานํ    นิกามลาภี   โหติ   อกิจฺฉลาภี
อกสิรลาภี ฯ
     [๓๓]   ยโต  ๑-  โข มหานาม อริยสาวโก เอวํ สีลสมฺปนฺโน โหติ
เอวํ   อินฺทฺริเยสุ   คุตฺตทฺวาโร   โหติ   เอวํ  โภชเน  มตฺตญฺญู  โหติ
เอวํ   ชาคริยมนุยุตฺโต   โหติ   เอวํ   สตฺตหิ  สทฺธมฺเมหิ  สมนฺนาคโต
โหติ    เอวํ   จตุนฺนํ   ฌานานํ   อาภิเจตสิกานํ   ทิฏฺฐธมฺมสุขวิหารานํ
นิกามลาภี    โหติ   อกิจฺฉลาภี   อกสิรลาภี   อยํ   วุจฺจติ   มหานาม
อริยสาวโก  เสโข  ปฏิปโท  อปูจฺจณฺฑตาย  ๒-  สมาปนฺโน  ๓-  ภพฺโพ
อภินิพฺภิทาย    ภพฺโพ   สมฺโพธาย   ภพฺโพ   อนุตฺตรสฺส   โยคกฺเขมสฺส
อธิคมาย   ฯ   เสยฺยถาปิ   มหานาม   กุกฺกุฏิยา   อณฺฑานิ  อฏฺฐ  วา
ทส   วา   ทฺวาทส  วา  ตานสฺสุ  กุกฺกุฏิยา  สมฺมา  อธิสยิตานิ  สมฺมา
ปริเสจิตานิ   สมฺมา   ปริภาวิตานิ   ๔-   กิญฺจาปิ   ตสฺสา   กุกฺกุฏิยา
@เชิงอรรถ:  โป. จสทฺโท ทิสฺสติ ฯ   ม. ยุ. อปุจฺจณฺฑตาย ฯ
@ โป. สมนฺนาคโตติปิ ทิสฺสติ ฯ  โป. ปริเสทิตานิ ฯ
น  เอวํ  อิจฺฉา  อุปฺปชฺเชยฺย  อโห  วติเม  กุกฺกุฏโปตกา  ปาทนขสิขาย
วา     มุขตุณฺฑเกน     วา     อณฺฑโกสํ    ปทาเลตฺวา    โสตฺถินา
อภินิพฺภิชฺเชยฺยุนฺติ   ๑-   เอวเมว   โข   มหานาม  ยโต  อริยสาวโก
เอวํ   สีลสมฺปนฺโน   โหติ   เอวํ  อินฺทฺริเยสุ  คุตฺตทฺวาโร  โหติ  เอวํ
โภชเน   มตฺตญฺญู   โหติ   เอวํ   ชาคริยมนุยุตฺโต  โหติ  เอวํ  สตฺตหิ
สทฺธมฺเมหิ   สมนฺนาคโต   โหติ   เอวํ  จตุนฺนํ  ฌานานํ  อาภิเจตสิกานํ
ทิฏฺฐธมฺมสุขวิหารานํ   นิกามลาภี   โหติ   อกิจฺฉลาภี   อกสิรลาภี   อยํ
วุจฺจติ    มหานาม    อริยสาวโก    เสโข    ปฏิปโท   อปูจฺจณฺฑตาย
สมาปนฺโน     ภพฺโพ    อภินิพฺภิทาย    ภพฺโพ    สมฺโพธาย    ภพฺโพ
อนุตฺตรสฺส โยคกฺเขมสฺส อธิคมาย ฯ
     {๓๓.๑}   สโข  โส  ๒- มหานาม อริยสาวโก อิมํเยว ๓- อนุตฺตรํ
อุเปกฺขาสติปาริสุทฺธึ    อาคมฺม    อเนกวิหิตํ    ปุพฺเพนิวาสํ   อนุสฺสรติ
เสยฺยถีทํ  เอกมฺปิ  ชาตึ  เทฺวปิ  ชาติโย  ฯเปฯ  อิติ  สาการํ สอุทฺเทสํ
อเนกวิหิตํ    ปุพฺเพนิวาสํ   อนุสฺสรติ   อยมสฺส   ปฐมาภินิพฺภิทา   โหติ
กุกฺกุฏจฺฉาปกสฺเสว อณฺฑโกสมฺหา ฯ
     {๓๓.๒}   สโข   โส   มหานาม  อริยสาวโก  อิมํเยว  อนุตฺตรํ
อุเปกฺขาสติปาริสุทฺธึ     อาคมฺม     ทิพฺเพน     จกฺขุนา     วิสุทฺเธน
อติกฺกนฺตมานุสเกน     ฯเปฯ     ยถากมฺมูปเค     สตฺเต    ปชานาติ
อยมสฺส ทุติยาภินิพฺภิทา โหติ กุกฺกุฏจฺฉาปกสฺเสว อณฺฑโกสมฺหา ฯ
     {๓๓.๓}   ส โข โส มหานาม อริยสาวโก อิมํเยว อนุตฺตรํ อุเปกฺขาสติ-
ปาริสุทฺธึ   อาคมฺม  อาสวานํ  ขยา  อนาสวํ  เจโตวิมุตฺตึ  ปญฺญาวิมุตฺตึ
@เชิงอรรถ:  โป. เอตฺถนฺตเร " อถ โข ภพฺพาว เต กุกฺกุฏโปตกา ปาทนขสิขาย วา มุขตุณฺฑเกน วา
@อณฺฑโกสํ ปทาเลตฺวา โสตฺถินา อภินิพฺภิชฺชิตุนฺติ อิเม ปาฐา ทิสฺสนฺติ ฯ
@ ยุ. สพฺพตฺถ ส โข โส ฯ   โป. " อนุตฺตรํ โยคกฺเขมํ ฯ
วิมุตฺตึ   ทิฏฺเฐว   ธมฺเม   สยํ  อภิญฺญา  สจฺฉิกตฺวา  อุปสมฺปชฺช  วิหรติ
อยมสฺส ตติยาภินิพฺภิทา โหติ กุกฺกุฏจฺฉาปกสฺเสว อณฺฑโกสมฺหา ฯ
     [๓๔]   ยมฺปิ   ๑-   มหานาม   อริยสาวโก  สีลสมฺปนฺโน  โหติ
อิทมฺปิสฺส   โหติ   จรณสฺมึ   ยมฺปิ   มหานาม   อริยสาวโก  อินฺทฺริเยสุ
คุตฺตทฺวาโร    โหติ    อิทมฺปิสฺส    โหติ   จรณสฺมึ   ยมฺปิ   มหานาม
อริยสาวโก    โภชเน    มตฺตญฺญู   โหติ   อิทมฺปิสฺส   โหติ   จรณสฺมึ
ยมฺปิ    มหานาม    อริยสาวโก    ชาคริยมนุยุตฺโต   โหติ   อิทมฺปิสฺส
โหติ    จรณสฺมึ   ยมฺปิ   มหานาม   อริยสาวโก   สตฺตหิ   สทฺธมฺเมหิ
สมนฺนาคโต    โหติ    อิทมฺปิสฺส    โหติ   จรณสฺมึ   ยมฺปิ   มหานาม
อริยสาวโก    จตุนฺนํ    ฌานานํ   อาภิเจตสิกานํ   ทิฏฺฐธมฺมสุขวิหารานํ
นิกามลาภี โหติ อกิจฺฉลาภี อกสิรลาภี อิทมฺปิสฺส โหติ จรณสฺมึ
     {๓๔.๑}   ยญฺจ  โข  มหานาม  อริยสาวโก อเนกวิหิตํ ปุพฺเพนิวาสํ
อนุสฺสรติ    เสยฺยถีทํ    เอกมฺปิ    ชาตึ    เทฺวปิ   ชาติโย   ฯเปฯ
อิติ   สาการํ   สอุทฺเทสํ   อเนกวิหิตํ  ปุพฺเพนิวาสํ  อนุสฺสรติ  อิทมฺปิสฺส
โหติ    วิชฺชาย    ยมฺปิ   มหานาม   อริยสาวโก   ทิพฺเพน   จกฺขุนา
วิสุทฺเธน   อติกฺกนฺตมานุสเกน   ฯเปฯ   ยถากมฺมูปเค  สตฺเต  ปชานาติ
อิทมฺปิสฺส   โหติ  วิชฺชาย  ยมฺปิ  มหานาม  อริยสาวโก  อาสวานํ  ขยา
อนาสวํ   เจโตวิมุตฺตึ   ปญฺญาวิมุตฺตึ   ทิฏฺเฐว   ธมฺเม   สยํ   อภิญฺญา
สจฺฉิกตฺวา     อุปสมฺปชฺช     วิหรติ     อิทมฺปิสฺส    โหติ    วิชฺชาย
@เชิงอรรถ:  ม. ยมฺปิ โข ฯ
อยํ   วุจฺจติ  มหานาม  อริยสาวโก  วิชฺชาสมฺปนฺโน  อิติปิ  จรณสมฺปนฺโน
อิติปิ   วิชฺชาจรณสมฺปนฺโน   อิติปิ   ฯ   พฺรหฺมุนาเปสา   ๑-  มหานาม
สนงฺกุมาเรน คาถา ภาสิตา
       ขตฺติโย เสฏฺโฐ ชเนตสฺมึ    เย โคตฺตปฏิสาริโน
       วิชฺชาจรณสมฺปนฺโน          โส เสฏฺโฐ เทวมานุเสติ ฯ
     [๓๕]   สา  โข  ปเนสา  มหานาม  พฺรหฺมุนา สนงฺกุมาเรน คาถา
สุคีตา   น   ทุคฺคีตา   สุภาสิตา   น   ทุพฺภาสิตา   อตฺถสญฺหิตา   โน
อนตฺถสญฺหิตา   อนุมตา   ภควตาติ   ฯ   อถ   โข  ภควา  อุฏฺฐหิตฺวา
อายสฺมนฺตํ   อานนฺทํ   อามนฺเตสิ   สาธุ   สาธุ   อานนฺท   สาธุ  โข
ตฺวํ อานนฺท กาปิลวตฺถวานํ สกฺยานํ เสขปฏิปทํ อภาสีติ ฯ
     อิทมโวจ    อายสฺมา    อานนฺโท    สมนุญฺโญ   สตฺถา   อโหสิ
อตฺตมนา    กาปิลวตฺถวา    สกฺยา    อายสฺมโต   อานนฺทสฺส   ภาสิตํ
อภินนฺทุนฺติ ฯ
               เสขปฏิปทาสุตฺตํ ๒- นิฏฺฐิตํ ตติยํ ฯ
                     ------------
@เชิงอรรถ:  ม. พฺรหฺมุนา โข ปเนสา ฯ   ม. ยุ. เสขสุตฺตนฺตํ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๑๓ หน้าที่ ๒๔-๓๒. https://84000.org/tipitaka/read/pali_read.php?B=13&A=472&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=13&A=472&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=13&item=24&items=12              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=13&siri=3              ศึกษาอรรถกถานี้ได้ที่ :- https://84000.org/tipitaka/attha/attha.php?b=13&i=24              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=9&A=300              The Pali Atthakatha in Roman :- https://84000.org/tipitaka/atthapali/read_rm.php?B=9&A=300              สารบัญพระไตรปิฎกเล่มที่ ๑๓ https://84000.org/tipitaka/read/?index_13 https://84000.org/tipitaka/english/?index_13

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]