ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๓ ภาษาบาลี อักษรไทย พระสุตตันตปิฎกเล่มที่ ๕ สุตฺต. ม. มชฺฌิมปณฺณาสกํ

                        ทีฆนขสุตฺตํ
     [๒๖๙]   เอวมฺเม   สุตํ   เอกํ  สมยํ  ภควา  ราชคเห  วิหรติ
คิชฺฌกูเฏ  [๑]-  สูกรขตายํ  ๒-  ฯ  อถ  โข ทีฆนโข ปริพฺพาชโก เยน
ภควา     เตนุปสงฺกมิ    อุปสงฺกมิตฺวา    ภควตา    สทฺธึ    สมฺโมทิ
สมฺโมทนียํ    กถํ   สาราณียํ   วีติสาเรตฺวา   เอกมนฺตํ   อฏฺฐาสิ   ฯ
เอกมนฺตํ    ฐิโต   โข   ทีฆนโข   ปริพฺพาชโก   ภควนฺตํ   เอตทโวจ
อหญฺหิ  โภ  โคตม  เอวํวาที  เอวํทิฏฺฐี  สพฺพํ  เม  น  ขมตีติ  ฯ ยาปิ
โข   เต   เอสา   อคฺคิเวสฺสน  ทิฏฺฐิ  สพฺพํ  เม  น  ขมตีติ  เอสาปิ
เต  ทิฏฺฐิ  น  ขมตีติ  ฯ  เอสา  ๓-  เจ  เม โภ โคตม ทิฏฺฐิ ขเมยฺย
ตํปิสฺส  ๔-  ตาทิสเมว  ตํปิสฺส  ตาทิสเมวาติ ฯ อโต โข เต อคฺคิเวสฺสน
พหู   หิ   พหุตรา  โลกสฺมึ  เย  เอวมาหํสุ  ตํปิสฺส  ตาทิสเมว  ตํปิสฺส
ตาทิสเมวาติ    เต    ตญฺเจว    ทิฏฺฐึ   นปฺปชหนฺติ   อญฺญญฺจ   ทิฏฺฐึ
อุปาทิยนฺติ   ฯ  อโต  โข  เต  อคฺคิเวสฺสน  ตนู  หิ  ตนุตรา  โลกสฺมึ
เย   เอวมาหํสุ  ตํปิสฺส  ตาทิสเมว  ตํปิสฺส  ตาทิสเมวาติ  เต  ตญฺเจว
ทิฏฺฐึ ปชหนฺติ อญฺญญฺจ ทิฏฺฐึ น อุปาทิยนฺติ ฯ
     [๒๗๐]   สนฺติ  อคฺคิเวสฺสน  ๕-  เอเก สมณพฺราหฺมณา เอวํวาทิโน
เอวํทิฏฺฐิโน    สพฺพํ   เม   ขมตีติ   ฯ   สนฺติ   อคฺคิเวสฺสน   เอเก
สมณพฺราหฺมณา   เอวํวาทิโน   เอวํทิฏฺฐิโน   สพฺพํ   เม  น  ขมตีติ  ฯ
@เชิงอรรถ:  ม. ปพฺพเต ฯ    ม. สูกรขตาย ฯ    ม. เอสาปิ เม ฯ    ม. ยุ. ตํปสฺส ฯ
@ ยุ. สนฺตคฺคิเวสฺสนาติ ทิสฺสติ ฯ
สนฺติ   อคฺคิเวสฺสน   เอเก   สมณพฺราหฺมณา   เอวํวาทิโน  เอวํทิฏฺฐิโน
เอกจฺจํ   เม   ขมติ   เอกจฺจํ  เม  น  ขมตีติ  ฯ  ตตฺร  อคฺคิเวสฺสน
เย    เต    สมณพฺราหฺมณา   เอวํวาทิโน   เอวํทิฏฺฐิโน   สพฺพํ   เม
ขมตีติ    เตสมยํ    ทิฏฺฐิ    สราคาย   สนฺติเก   สํโยคาย   สนฺติเก
อภินนฺทนาย     สนฺติเก     อชฺโฌสานาย     สนฺติเก     อุปาทานาย
สนฺติเกติ   ฯ  ตตฺร  อคฺคิเวสฺสน  เย  เต  สมณพฺราหฺมณา  เอวํวาทิโน
เอวํทิฏฺฐิโน   สพฺพํ   เม   น   ขมตีติ   เตสมยํ   ทิฏฺฐิ   อสาราคาย
สนฺติเก   อสํโยคาย   สนฺติเก   อนภินนฺทนาย   สนฺติเก  อนชฺโฌสานาย
สนฺติเก อนุปาทานาย สนฺติเกติ ฯ
     {๒๗๐.๑}   เอวํ  วุตฺเต  ทีฆนโข  ปริพฺพาชโก  ภควนฺตํ เอตทโวจ
อุกฺกํเสติ   เม   ภวํ   โคตโม  ทิฏฺฐิคตํ  สมุกฺกํเสติ  เม  ภวํ  โคตโม
ทิฏฺฐิคตนฺติ    ฯ    ตตฺร    อคฺคิเวสฺสน    เย   เต   สมณพฺราหฺมณา
เอวํวาทิโน   เอวํทิฏฺฐิโน  เอกจฺจํ  เม  ขมติ  เอกจฺจํ  เม  น  ขมตีติ
ยา  หิ  เตสํ  ขมติ  สายํ  ทิฏฺฐิ  สราคาย  สนฺติเก  สํโยคาย  สนฺติเก
อภินนฺทนาย     สนฺติเก     อชฺโฌสานาย     สนฺติเก     อุปาทานาย
สนฺติเก   ยา   หิ   เตสํ  น  ขมติ  สายํ  ทิฏฺฐิ  อสาราคาย  สนฺติเก
อสํโยคาย     สนฺติเก     อนภินนฺทนาย     สนฺติเก    อนชฺโฌสานาย
สนฺติเก อนุปาทานาย สนฺติเกติ ฯ
     [๒๗๑]   ตตฺร  อคฺคิเวสฺสน  ๑-  เย  เต  สมณพฺราหฺมณา  เอวํ
วาทิโน   เอวํทิฏฺฐิโน   สพฺพํ   เม   ขมตีติ   ตตฺถ  วิญฺญู  ปุริโส  อิติ
@เชิงอรรถ:  ยุ. ตตฺรคฺคิเวสฺสนาติ ทิสฺสติ ฯ
ปฏิสญฺจิกฺขติ  ยา  ๑-  โข  เม  อยํ  ทิฏฺฐิ  สพฺพํ เม ขมตีติ อิมญฺเจ ๒-
อหํ  ทิฏฺฐึ  ถามสา  ปรามสฺส  ๓-  อภินิวิสฺส  โวหเรยฺยํ  อิทเมว  สจฺจํ
โมฆมญฺญนฺติ   ทฺวีหิ   เม   อสฺส   วิคฺคโห   โย   จายํ   สมโณ  วา
พฺราหฺมโณ   วา   เอวํวาที   เอวํทิฏฺฐี   สพฺพํ   เม   น  ขมตีติ  โย
จายํ   สมโณ   วา   พฺราหฺมโณ   วา   เอวํวาที   เอวํทิฏฺฐี  เอกจฺจํ
เม   ขมติ   เอกจฺจํ    เม  น  ขมตีติ  อิเมหิ  เม  ๔-  อสฺส  ทฺวีหิ
วิคฺคโห  ฯ  อิติ  วิคฺคเห  สติ  วิวาโท  วิวาเท  สติ  วิฆาโต  วิฆาเต
สติ   วิเหสา   ฯ   อิติ  โส  วิคฺคหญฺจ  วิวาทญฺจ  วิฆาตญฺจ  วิเหสญฺจ
อตฺตนิ    สมฺปสฺสมาโน    ตญฺเจว    ทิฏฺฐึ    ปชหติ   อญฺญญฺจ   ทิฏฺฐึ
น   อุปาทิยติ   ฯ   เอวเมตาสํ   ทิฏฺฐีนํ   ปหานํ   โหติ  เอวเมตาสํ
ทิฏฺฐีนํ ปฏินิสฺสคฺโค โหติ ฯ
     {๒๗๑.๑}   ตตฺร  อคฺคิเวสฺสน  เย  เต สมณพฺราหฺมณา เอวํวาทิโน
เอวํทิฏฺฐิโน   สพฺพํ   เม   น   ขมตีติ   ตตฺร  ๕-  วิญฺญู  ปุริโส  อิติ
ปฏิสญฺจิกฺขติ   ยา   ๖-   โข   เม  อยํ  ทิฏฺฐิ  สพฺพํ  เม  น  ขมตีติ
อิมญฺเจ   อหํ   ทิฏฺฐึ  ถามสา  ปรามสฺส  อภินิวิสฺส  โวหเรยฺยํ  อิทเมว
สจฺจํ   โมฆมญฺญนฺติ   ทฺวีหิ   เม   อสฺส   วิคฺคโห   โย  จายํ  สมโณ
วา  พฺราหฺมโณ  วา  เอวํวาที  เอวํทิฏฺฐี  สพฺพํ  เม  ขมตีติ  โย  จายํ
สมโณ   วา   พฺราหฺมโณ  วา  เอวํวาที  เอวํทิฏฺฐี  เอกจฺจํ  เม  ขมติ
เอกจฺจํ  เม  น  ขมตีติ  อิเมหิ เม ทฺวีหิ อสฺส วิคฺคโห ฯ อิติ วิคฺคเห สติ
วิวาโท  วิวาเท  สติ  วิฆาโต  วิฆาเต  สติ วิเหสา ฯ อิติ โส วิคฺคหญฺจ
@เชิงอรรถ: ๑-๖ ม. ยา จ โข ฯ  ม. อิมญฺจาหํ ฯ  ม. ปรามสา ฯ  ม. อยํ ปาโฐ น ทิสฺสติ ฯ
@ ม. ตตฺถ ฯ
วิวาทญฺจ    วิฆาตญฺจ    วิเหสญฺจ    อตฺตนิ    สมฺปสฺสมาโน   ตญฺเจว
ทิฏฺฐึ   ปชหติ   อญฺญญฺจ   ทิฏฺฐึ   น  อุปาทิยติ  ฯ  เอวเมตาสํ  ทิฏฺฐีนํ
ปหานํ โหติ เอวเมตาสํ ทิฏฺฐีนํ ปฏินิสฺสคฺโค โหติ ฯ
     {๒๗๑.๒}   ตตฺร  อคฺคิเวสฺสน  เย  เต สมณพฺราหฺมณา เอวํวาทิโน
เอวํทิฏฺฐิโน   เอกจฺจํ  เม  ขมติ  เอกจฺจํ  เม  น  ขมตีติ  ตตฺร  วิญฺญู
ปุริโส  อิติ  ปฏิสญฺจิกฺขติ  ยา  โข  เม  อยํ  ทิฏฺฐิ  เอกจฺจํ  เม  ขมติ
เอกจฺจํ   เม   น   ขมตีติ   อิมญฺเจ   อหํ   ทิฏฺฐึ  ถามสา  ปรามสฺส
อภินิวิสฺส    โวหเรยฺยํ    อิทเมว    สจฺจํ   โมฆมญฺญนฺติ   ทฺวีหิ   เม
อสฺส   วิคฺคโห   โย   จายํ   สมโณ   วา  พฺราหฺมโณ  วา  เอวํวาที
เอวํทิฏฺฐี   สพฺพํ   เม   ขมตีติ   โย   จายํ   สมโณ  วา  พฺราหฺมโณ
วา   เอวํวาที   เอวํทิฏฺฐี   สพฺพํ   เม  น  ขมตีติ  อิเมหิ  เม  อสฺส
ทฺวีหิ   วิคฺคโห   ฯ  อิติ  วิคฺคเห  สติ  วิวาโท  วิวาเท  สติ  วิฆาโต
วิฆาเต   สติ   วิเหสา   ฯ   อิติ  โส  วิคฺคหญฺจ  วิวาทญฺจ  วิฆาตญฺจ
วิเหสญฺจ    อตฺตนิ   สมฺปสฺสมาโน   ตญฺเจว   ทิฏฺฐึ   ปชหติ   อญฺญญฺจ
ทิฏฺฐึ   น  อุปาทิยติ  ฯ  เอวเมตาสํ  ทิฏฺฐีนํ  ปหานํ  โหติ  เอวเมตาสํ
ทิฏฺฐีนํ ปฏินิสฺสคฺโค โหติ ฯ
     [๒๗๒]   อยํ  โข  ปน  อคฺคิเวสฺสน  กาโย  รูปี  จาตุมฺมหาภูติโก
มาตาเปตฺติกสมฺภโว      โอทนกุมฺมาสูปจโย      อนิจฺจุจฺฉาทนปริมทฺธน-
เภทนวิทฺธํสนธมฺโม     อนิจฺจโต     ทุกฺขโต     โรคโต     คณฺฑโต
สลฺลโต   อฆโต   อาพาธโต   ปรโต   ปโลกโต   สุญฺญโต   อนตฺตโต
สมนุปสฺสิตพฺโพ    ฯ    ตสฺสิมํ    กายํ   อนิจฺจโต   ทุกฺขโต   โรคโต
คณฺฑโต    สลฺลโต   อฆโต   อาพาธโต   ปรโต   ปโลกโต   สุญฺญโต
อนตฺตโต    สมนุปสฺสโต    โย    กายสฺมึ   กายจฺฉนฺโท   กายสิเนโห
กายนฺวยตา สา ปหียติ ฯ
     [๒๗๓]   ติสฺโส  โข  อิมา  อคฺคิเวสฺสน  เวทนา  สุขา  เวทนา
ทุกฺขา   เวทนา   อทุกฺขมสุขา   เวทนา  ฯ  ยสฺมึ  อคฺคิเวสฺสน  สมเย
สุขํ   เวทนํ   เวเทติ   เนว  ตสฺมึ  สมเย  ทุกฺขํ  เวทนํ  เวเทติ  น
อทุกฺขมสุขํ   เวทนํ  เวเทติ  สุขํเยว  ตสฺมึ  สมเย  เวทนํ  เวเทติ  ฯ
ยสฺมึ   อคฺคิเวสฺสน   สมเย  ทุกฺขํ  เวทนํ  เวเทติ  เนว  ตสฺมึ  สมเย
สุขํ   เวทนํ   เวเทติ  น  อทุกฺขมสุขํ  เวทนํ  เวเทติ  ทุกฺขํเยว  ตสฺมึ
สมเย  เวทนํ  เวเทติ  ฯ  ยสฺมึ  อคฺคิเวสฺสน  สมเย  อทุกฺขมสุขํ เวทนํ
เวเทติ   เนว   ตสฺมึ  สมเย  สุขํ  เวทนํ  เวเทติ   น  ทุกฺขํ  เวทนํ
เวเทติ   อทุกฺขมสุขํเยว   ตสฺมึ  สมเย  เวทนํ  เวเทติ  ฯ  สุขา  ๑-
อคฺคิเวสฺสน    [๒]-   อนิจฺจา   สงฺขตา   ปฏิจฺจสมุปฺปนฺนา   ขยธมฺมา
วยธมฺมา  วิราคธมฺมา  นิโรธธมฺมา  ฯ  ทุกฺขาปิ  โข  อคฺคิเวสฺสน [๓]-
อนิจฺจา   สงฺขตา   ปฏิจฺจสมุปฺปนฺนา   ขยธมฺมา   วยธมฺมา  วิราคธมฺมา
นิโรธธมฺมา  ฯ  อทุกฺขมสุขาปิ  โข  อคฺคิเวสฺสน  เวทนา อนิจฺจา สงฺขตา
ปฏิจฺจสมุปฺปนฺนา   ขยธมฺมา   วยธมฺมา   วิราคธมฺมา   นิโรธธมฺมา   ฯ
เอวํ    ปสฺสํ   อคฺคิเวสฺสน   สุตวา   อริยสาวโก   สุขายปิ  เวทนาย
นิพฺพินฺทติ   ทุกฺขายปิ   เวทนาย   นิพฺพินฺทติ   อทุกฺขมสุขายปิ   เวทนาย
@เชิงอรรถ:  ม. สุขาปิ โข ฯ ๒-๓ ม. เอตฺถนฺตเร เวทนาติ อยํ ปาโฐ ทิสฺสติ ฯ
นิพฺพินฺทติ   นิพฺพินฺทํ  วิรชฺชติ  วิราคา  วิมุจฺจติ  วิมุตฺตสฺมึ  วิมุตฺตมิติ
ญาณํ   โหติ   ขีณา   ชาติ   วุสิตํ   พฺรหฺมจริยํ   กตํ   กรณียํ  นาปรํ
อิตฺถตฺตายาติ   ปชานาติ   ฯ   เอวํ   วิมุตฺตจิตฺโต   โข   อคฺคิเวสฺสน
ภิกฺขุ   น   เกนจิ  สํวทติ  น  เกนจิ  วิวทติ  ยญฺจ  โข  โลเก  วุตฺตํ
เตน โวหรติ อปรามสนฺติ ฯ
     [๒๗๔]   เตน  โข  ปน  สมเยน  อายสฺมา  สารีปุตฺโต  ภควโต
ปิฏฺฐิโต   นิสินฺโน   ๑-   ภควนฺตํ  วีชิยมาโน  ฯ  อถ  โข  อายสฺมโต
สารีปุตฺตสฺส   เอตทโหสิ   เตสํ   เตสํ   กิร   โน   ภควา   ธมฺมานํ
อภิญฺญา   ปหานมาห   เตสํ   เตสํ  กิร  โน  สุคโต  ธมฺมานํ  อภิญฺญา
ปฏินิสฺสคฺคมาหาติ   ฯ   อิติ  หิทํ  อายสฺมโต  สารีปุตฺตสฺส  ปฏิสญฺจิกฺขโต
อนุปาทาย    อาสเวหิ   จิตฺตํ   วิมุจฺจิ   ฯ   ทีฆนขสฺส   ปริพฺพาชกสฺส
วิรชํ    วีตมลํ    ธมฺมจกฺขุํ   อุทปาทิ   ยงฺกิญฺจิ   สมุทยธมฺมํ   สพฺพนฺตํ
นิโรธธมฺมนฺติ ฯ
     [๒๗๕]   อถ   โข  ทีฆนโข  ปริพฺพาชโก  ทิฏฺฐธมฺโม  ปตฺตธมฺโม
วิทิตธมฺโม       ปริโยคาฬฺหธมฺโม      ติณฺณวิจิกิจฺโฉ      วิคตกถํกโถ
เวสารชฺชปฺปตฺโต   อปรปฺปจฺจโย   สตฺถุ   สาสเน   ภควนฺตํ  เอตทโวจ
อภิกฺกนฺตํ   โภ   โคตม  อภิกฺกนฺตํ  โภ  โคตม  เสยฺยถาปิ  โภ  โคตม
นิกฺกุชฺชิตํ   วา   อุกฺกุชฺเชยฺย   ปฏิจฺฉนฺนํ   วา  วิวเรยฺย  มูฬฺหสฺส  วา
มคฺคํ   อาจิกฺเขยฺย   อนฺธกาเร  วา  เตลปชฺโชตํ  ธาเรยฺย  จกฺขุมนฺโต
รูปานิ    ทกฺขนฺตีติ    เอวเมว    โภตา   โคตเมน   อเนกปริยาเยน
@เชิงอรรถ:  ม. ฐิโต โหติ ฯ
ธมฺโม   ปกาสิโต   เอสาหํ   ภควนฺตํ   [๑]-  สรณํ  คจฺฉามิ  ธมฺมญฺจ
ภิกฺขุสงฺฆญฺจ    อุปาสกํ    มํ    ภวํ    โคตโม   ธาเรตุ   อชฺชตคฺเค
ปาณุเปตํ สรณงฺคตนฺติ ฯ
                  ทีฆนขสุตฺตํ นิฏฺฐิตํ จตุตฺถํ ฯ
                        -------
@เชิงอรรถ:  ม. เอตฺถนฺตเร โคตมนฺติ อยํ ปาโฐ ทิสฺสติ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๑๓ หน้าที่ ๒๖๓-๒๖๙. https://84000.org/tipitaka/read/pali_read.php?B=13&A=5398&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=13&A=5398&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=13&item=269&items=7              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=13&siri=24              ศึกษาอรรถกถานี้ได้ที่ :- https://84000.org/tipitaka/attha/attha.php?b=13&i=269              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=9&A=3767              The Pali Atthakatha in Roman :- https://84000.org/tipitaka/atthapali/read_rm.php?B=9&A=3767              สารบัญพระไตรปิฎกเล่มที่ ๑๓ https://84000.org/tipitaka/read/?index_13 https://84000.org/tipitaka/english/?index_13

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]