ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๘ ภาษาบาลี อักษรไทย พระสุตตันตปิฎกเล่มที่ ๑๐ สังยุตตนิกาย สฬายตนวรรค

                     โมคฺคลฺลานสํยุตฺตํ
     [๕๑๕]   เอกํ   สมยํ   อายสฺมา   มหาโมคฺคลฺลาโน   สาวตฺถิยํ
วิหรติ   เชตวเน   อนาถปิณฺฑิกสฺส   อาราเม  ฯ  ตตฺร  โข  อายสฺมา
มหาโมคฺคลฺลาโน  ภิกฺขู  อามนฺเตสิ  อาวุโส  ภิกฺขเวติ  ๑-  ฯ อาวุโสติ
โข เต ภิกฺขู อายสฺมโต มหาโมคฺคลฺลานสฺส ปจฺจสฺโสสุํ ฯ
     {๕๑๕.๑}   อายสฺมา  มหาโมคฺคลฺลาโน  เต  ภิกฺขู  ๒- เอตทโวจ
อิธ   มยฺหํ  อาวุโส  รโหคตสฺส  ปฏิสลฺลีนสฺส  เอวํ  เจตโส  ปริวิตกฺโก
อุทปาทิ    ปฐมชฺฌานํ    ปฐมชฺฌานนฺติ    วุจฺจติ    กตมํ    นุ    โข
ปฐมชฺฌานนฺติ  ฯ  ตสฺส  มยฺหํ  อาวุโส  เอตทโหสิ  อิธ  ภิกฺขุ  วิวิจฺเจว
กาเมหิ   วิวิจฺจ   อกุสเลหิ  ธมฺเมหิ  สวิตกฺกํ  สวิจารํ  วิเวกชํ  ปีติสุขํ
ปฐมชฺฌานํ    อุปสมฺปชฺช    วิหรติ    อิทํ   วุจฺจติ   ปฐมชฺฌานนฺติ   ฯ
โส   ขฺวาหํ   อาวุโส   วิวิจฺเจว   กาเมหิ  วิวิจฺจ  อกุสเลหิ  ธมฺเมหิ
สวิตกฺกํ     สวิจารํ     วิเวกชํ    ปีติสุขํ    ปฐมชฺฌานํ    อุปสมฺปชฺช
วิหรามิ    ฯ    ตสฺส   มยฺหํ   อาวุโส   อิมินา   วิหาเรน   วิหรโต
กามสหคตา สญฺญามนสิการา สมุทาจรนฺติ ฯ
     {๕๑๕.๒}   อถ  โข  มํ  อาวุโส  ภควา  อิทฺธิยา  อุปสงฺกมิตฺวา
เอตทโวจ    โมคฺคลฺลาน    โมคฺคลฺลาน   มา   พฺราหฺมณ   ปฐมชฺฌานํ
ปมาโท     ปฐมชฺฌาเน     จิตฺตํ    สณฺฐเปหิ    ปฐมชฺฌาเน    จิตฺตํ
เอโกทึ   ๓-    กโรหิ  ปฐมชฺฌาเน  จิตฺตํ  สมาทหาติ  ฯ  โส  ขฺวาหํ
อาวุโส    อปเรน   สมเยน   วิวิจฺเจว   กาเมหิ   วิวิจฺจ   อกุสเลหิ
@เชิงอรรถ:  ยุ. ภิกฺขโวติ ฯ   ม. ยุ. เต ภิกฺขูติ ปาฐทฺวยํ น ทิสฺสติ ฯ  ยุ. เอโกทิ ฯ
@เอวมุปริปิ ฯ
ธมฺเมหิ   สวิตกฺกํ   สวิจารํ   วิเวกชํ   ปีติสุขํ   ปฐมชฺฌานํ  อุปสมฺปชฺช
วิหาสึ  ฯ  ยํ  หิ  ตํ  อาวุโส  สมฺมา วทมาโน วเทยฺย สตฺถารานุคฺคหิโต
สาวโก     มหาภิญฺญตํ     ปตฺโตติ     ฯ     มมํ     ตํ     สมฺมา
วทมาโน วเทยฺย สตฺถารานุคฺคหิโต สาวโก มหาภิญฺญตํ ปตฺโตติ ฯ
     [๕๑๖]   ทุติยชฺฌานํ   ทุติยชฺฌานนฺติ   วุจฺจติ   กตมํ   นุ   โข
ทุติยชฺฌานนฺติ    ฯ   ตสฺส   มยฺหํ   อาวุโส   เอตทโหสิ   อิธ   ภิกฺขุ
วิตกฺกวิจารานํ   วูปสมา   อชฺฌตฺตํ   สมฺปสาทนํ   เจตโส   เอโกทิภาวํ
อวิตกฺกํ   อวิจารํ   สมาธิชํ   ปีติสุขํ   ทุติยชฺฌานํ   อุปสมฺปชฺช   วิหรติ
อิทํ   วุจฺจติ   ทุติยชฺฌานนฺติ   ฯ   โส  ขฺวาหํ  อาวุโส  วิตกฺกวิจารานํ
วูปสมา   อชฺฌตฺตํ   สมฺปสาทนํ   เจตโส  เอโกทิภาวํ  อวิตกฺกํ  อวิจารํ
สมาธิชํ   ปีติสุขํ   ทุติยชฺฌานํ   อุปสมฺปชฺช   วิหรามิ   ฯ   ตสฺส  มยฺหํ
อาวุโส   อิมินา   วิหาเรน   วิหรโต   วิตกฺกสหคตา   สญฺญามนสิการา
สมุทาจรนฺติ ฯ
     {๕๑๖.๑}   อถ  โข  มํ  อาวุโส  ภควา  อิทฺธิยา  อุปสงฺกมิตฺวา
เอตทโวจ    โมคฺคลฺลาน    โมคฺคลฺลาน   มา   พฺราหฺมณ   ทุติยชฺฌานํ
ปมาโท   ทุติยชฺฌาเน   จิตฺตํ   สณฺฐเปหิ   ทุติยชฺฌาเน   จิตฺตํ  เอโกทึ
กโรหิ   ทุติยชฺฌาเน   จิตฺตํ   สมาทหาติ   ฯ   โส   ขฺวาหํ   อาวุโส
อปเรน    สมเยน    วิตกฺกวิจารานํ    วูปสมา   อชฺฌตฺตํ   สมฺปสาทนํ
เจตโส   เอโกทิภาวํ   อวิตกฺกํ   อวิจารํ   สมาธิชํ  ปีติสุขํ  ทุติยชฺฌานํ
อุปสมฺปชฺช    วิหาสึ   ฯ   ยํ   หิ   ตํ   อาวุโส   สมฺมา   วทมาโน
วเทยฺย   สตฺถารานุคฺคหิโต   สาวโก   มหาภิญฺญตํ   ปตฺโตติ   ฯ   มมํ
ตํ   สมฺมา   วทมาโน   วเทยฺย  สตฺถารานุคฺคหิโต  สาวโก  มหาภิญฺญตํ
ปตฺโตติ ฯ
     [๕๑๗]   ตติยชฺฌานํ   ตติยชฺฌานนฺติ   วุจฺจติ   กตมํ   นุ   โข
ตติยชฺฌานนฺติ    ฯ   ตสฺส   มยฺหํ   อาวุโส   เอตทโหสิ   อิธ   ภิกฺขุ
ปีติยา   จ   วิราคา   อุเปกฺขโก   จ   วิหรติ   สโต  จ  สมฺปชาโน
สุขญฺจ   กาเยน   ปฏิสํเวเทติ   ยนฺตํ   อริยา   อาจิกฺขนฺติ  อุเปกฺขโก
สติมา    สุขวิหารีติ    ตติยชฺฌานํ   อุปสมฺปชฺช   วิหรติ   อิทํ   วุจฺจติ
ตติยชฺฌานนฺติ   ฯ  โส  ขฺวาหํ  อาวุโส  ปีติยา  จ  วิราคา  อุเปกฺขโก
จ   วิหรามิ   สโต   จ   สมฺปชาโน   สุขญฺจ   กาเยน   ปฏิสํเวเทมิ
ยนฺตํ   อริยา   อาจิกฺขนฺติ   อุเปกฺขโก   สติมา  สุขวิหารีติ  ตติยชฺฌานํ
อุปสมฺปชฺช   วิหรามิ   ฯ   ตสฺส   มยฺหํ   อาวุโส   อิมินา   วิหาเรน
วิหรโต ปีติสหคตา สญฺญามนสิการา สมุทาจรนฺติ ฯ
     {๕๑๗.๑}   อถ  โข  มํ  อาวุโส  ภควา  อิทฺธิยา  อุปสงฺกมิตฺวา
เอตทโวจ    โมคฺคลฺลาน    โมคฺคลฺลาน   มา   พฺราหฺมณ   ตติยชฺฌานํ
ปมาโท   ตติยชฺฌาเน   จิตฺตํ   สณฺฐเปหิ   ตติยชฺฌาเน   จิตฺตํ  เอโกทึ
กโรหิ  ตติยชฺฌาเน  จิตฺตํ  สมาทหาติ  ฯ  โส  ขฺวาหํ  อาวุโส  อปเรน
สมเยน  ปีติยา  จ  วิราคา  อุเปกฺขโก จ วิหรามิ ๑- สโต จ สมฺปชาโน
สุขญฺจ   กาเยน  ปฏิสํเวเทมิ  ๒-  ยนฺตํ  อริยา  อาจิกฺขนฺติ  อุเปกฺขโก
สติมา  สุขวิหารีติ  ตติยชฺฌานํ  อุปสมฺปชฺช  วิหาสึ  ฯ  ยํ  หิ  ตํ อาวุโส
สมฺมา วทมาโน วเทยฺย ฯเปฯ มหาภิญฺญตํ ปตฺโตติ ฯ
@เชิงอรรถ:  ยุ. วิหาสึ ฯ  ยุ. ปฏิสํเวเทสึ ฯ
     [๕๑๘]   จตุตฺถชฺฌานํ   จตุตฺถชฺฌานนฺติ   วุจฺจติ   กตมํ   นุ  โข
จตุตฺถชฺฌานนฺติ   ฯ   ตสฺส   มยฺหํ   อาวุโส   เอตทโหสิ   อิธ   ภิกฺขุ
สุขสฺส   จ  ปหานา  ทุกฺขสฺส  จ  ปหานา  ปุพฺเพว  โสมนสฺสโทมนสฺสานํ
อตฺถงฺคมา       อทุกฺขมสุขํ      อุเปกฺขาสติปาริสุทฺธึ      จตุตฺถชฺฌานํ
อุปสมฺปชฺช  วิหรติ  อิทํ  วุจฺจติ  จตุตฺถชฺฌานนฺติ  ฯ  โส  ขฺวาหํ  อาวุโส
สุขสฺส   จ  ปหานา  ทุกฺขสฺส  จ  ปหานา  ปุพฺเพว  โสมนสฺสโทมนสฺสานํ
อตฺถงฺคมา   อทุกฺขมสุขํ   อุเปกฺขาสติปาริสุทฺธึ   จตุตฺถชฺฌานํ   อุปสมฺปชฺช
วิหรามิ  ฯ  ตสฺส  มยฺหํ  อาวุโส  อิมินา  วิหาเรน  วิหรโต  สุขสหคตา
สญฺญามนสิการา สมุทาจรนฺติ ฯ
     {๕๑๘.๑}   อถ  โข  มํ  อาวุโส  ภควา  อิทฺธิยา  อุปสงฺกมิตฺวา
เอตทโวจ    โมคฺคลฺลาน   โมคฺคลฺลาน   มา   พฺราหฺมณ   จตุตฺถชฺฌานํ
ปมาโท    จตุตฺถชฺฌาเน    จิตฺตํ    สณฺฐเปหิ    จตุตฺถชฺฌาเน    จิตฺตํ
เอโกทึ   กโรหิ   จตุตฺถชฺฌาเน   จิตฺตํ   สมาทหาติ   ฯ   โส  ขฺวาหํ
อาวุโส   อปเรน   สมเยน   สุขสฺส  จ  ปหานา  ทุกฺขสฺส  จ  ปหานา
ปุพฺเพว  โสมนสฺสโทมนสฺสานํ  อตฺถงฺคมา  อทุกฺขมสุขํ  อุเปกฺขาสติปาริสุทฺธึ
จตุตฺถชฺฌานํ    อุปสมฺปชฺช    วิหาสึ    ฯ    ยํ    หิ    ตํ   อาวุโส
สมฺมา วทมาโน วเทยฺย ฯเปฯ มหาภิญฺญตํ ปตฺโตติ ฯ
     [๕๑๙]   อากาสานญฺจายตนํ   อากาสานญฺจายตนนฺติ  วุจฺจติ  กตมํ
นุ   โข   อากาสานญฺจายตนนฺติ   ฯ   ตสฺส  มยฺหํ  อาวุโส  เอตทโหสิ
อิธ   ภิกฺขุ   สพฺพโส   รูปสญฺญานํ   สมติกฺกมา  ปฏิฆสญฺญานํ  อตฺถงฺคมา
นานตฺตสญฺญานํ   อมนสิการา   อนนฺโต   อากาโสติ   อากาสานญฺจายตนํ
อุปสมฺปชฺช    วิหรติ    อิทํ   วุจฺจติ   อากาสานญฺจายตนนฺติ   ฯ   โส
ขฺวาหํ    อาวุโส    สพฺพโส    รูปสญฺญานํ    สมติกฺกมา   ปฏิฆสญฺญานํ
อตฺถงฺคมา     นานตฺตสญฺญานํ     อมนสิการา    อนนฺโต    อากาโสติ
อากาสานญฺจายตนํ  อุปสมฺปชฺช  วิหรามิ  ฯ  ตสฺส  มยฺหํ  อาวุโส  อิมินา
วิหาเรน วิหรโต รูปสหคตา สญฺญามนสิการา สมุทาจรนฺติ ฯ
     {๕๑๙.๑}   อถ โข มํ อาวุโส ภควา อิทฺธิยา อุปสงฺกมิตฺวา เอตทโวจ
โมคฺคลฺลาน     โมคฺคลฺลาน     มา    พฺราหฺมณ    อากาสานญฺจายตนํ
ปมาโท    อากาสานญฺจายตเน   จิตฺตํ   สณฺฐเปหิ   อากาสานญฺจายตเน
จิตฺตํ   เอโกทึ   กโรหิ   อากาสานญฺจายตเน   จิตฺตํ   สมาทหาติ   ฯ
โส   ขฺวาหํ  อาวุโส  อปเรน  สมเยน  สพฺพโส  รูปสญฺญานํ  สมติกฺกมา
ปฏิฆสญฺญานํ     อตฺถงฺคมา    นานตฺตสญฺญานํ    อมนสิการา    อนนฺโต
อากาโสติ   อากาสานญฺจายตนํ   อุปสมฺปชฺช   วิหาสึ   ฯ   ยํ   หิ  ตํ
อาวุโส สมฺมา วทมาโน วเทยฺย ฯเปฯ มหาภิญฺญตํ ปตฺโตติ ฯ
     [๕๒๐]   วิญฺญาณญฺจายตนํ    วิญฺญาณญฺจายตนนฺติ   วุจฺจติ   กตมํ
นุ   โข   วิญฺญาณญฺจายตนนฺติ  ฯ  ตสฺส  มยฺหํ  อาวุโส  เอตทโหสิ  อิธ
ภิกฺขุ    สพฺพโส   อากาสานญฺจายตนํ   สมติกฺกมฺม   อนนฺตํ   วิญฺญาณนฺติ
วิญฺญาณญฺจายตนํ   อุปสมฺปชฺช  วิหรติ  อิทํ  วุจฺจติ  วิญฺญาณญฺจายตนนฺติ  ฯ
โส       ขฺวาหํ       อาวุโส      สพฺพโส      อากาสานญฺจายตนํ
สมติกฺกมฺม     อนนฺตํ     วิญฺญาณนฺติ     วิญฺญาณญฺจายตนํ    อุปสมฺปชฺช
วิหรามิ    ฯ    ตสฺส   มยฺหํ   อาวุโส   อิมินา   วิหาเรน   วิหรโต
อากาสานญฺจายตนสหคตา สญฺญามนสิการา สมุทาจรนฺติ ฯ
     {๕๒๐.๑}   อถ  โข  มํ  อาวุโส  ภควา  อิทฺธิยา  อุปสงฺกมิตฺวา
เอตทโวจ   โมคฺคลฺลาน   โมคฺคลฺลาน   มา  พฺราหฺมณ  วิญฺญาณญฺจายตนํ
ปมาโท     วิญฺญาณญฺจายตเน    จิตฺตํ    สณฺฐเปหิ    วิญฺญาณญฺจายตเน
จิตฺตํ    เอโกทึ    กโรหิ   วิญฺญาณญฺจายตเน   จิตฺตํ   สมาทหาติ   ฯ
โส   ขฺวาหํ   อาวุโส   อปเรน   สมเยน  สพฺพโส  อากาสานญฺจายตนํ
สมติกฺกมฺม     อนนฺตํ     วิญฺญาณนฺติ     วิญฺญาณญฺจายตนํ    อุปสมฺปชฺช
วิหาสึ  ฯ  ยํ  หิ  ตํ  อาวุโส  สมฺมา วทมาโน วเทยฺย ฯเปฯ มหาภิญฺญตํ
ปตฺโตติ ฯ
     [๕๒๑]   อากิญฺจญฺญายตนํ    อากิญฺจญฺญายตนนฺติ   วุจฺจติ   กตมํ
นุ   โข   อากิญฺจญฺญายตนนฺติ   ฯ   ตสฺส   มยฺหํ   อาวุโส  เอตทโหสิ
อิธ    ภิกฺขุ    สพฺพโส   วิญฺญาณญฺจายตนํ   สมติกฺกมฺม   นตฺถิ   กิญฺจีติ
อากิญฺจญฺญายตนํ   อุปสมฺปชฺช  วิหรติ  อิทํ  วุจฺจติ  อากิญฺจญฺญายตนนฺติ  ฯ
โส   ขฺวาหํ   อาวุโส   สพฺพโส   วิญฺญาณญฺจายตนํ   สมติกฺกมฺม   นตฺถิ
กิญฺจีติ   อากิญฺจญฺญายตนํ   อุปสมฺปชฺช  วิหรามิ  ฯ  ตสฺส  มยฺหํ  อาวุโส
อิมินา    วิหาเรน   วิหรโต   วิญฺญาณญฺจายตนสหคตา   สญฺญามนสิการา
สมุทาจรนฺติ ฯ
     {๕๒๑.๑}   อถ โข มํ อาวุโส ภควา อิทฺธิยา อุปสงฺกมิตฺวา เอตทโวจ
โมคฺคลฺลาน   โมคฺคลฺลาน   มา   พฺราหฺมณ   อากิญฺจญฺญายตนํ  ปมาโท
อากิญฺจญฺญายตเน  จิตฺตํ  สณฺฐเปหิ  อากิญฺจญฺญายตเน จิตฺตํ เอโกทึ กโรหิ
อากิญฺจญฺญายตเน   จิตฺตํ   สมาทหาติ  ฯ  โส  ขฺวาหํ  อาวุโส  อปเรน
สมเยน    สพฺพโส    วิญฺญาณญฺจายตนํ    สมติกฺกมฺม    นตฺถิ    กิญฺจีติ
อากิญฺจญฺญายตนํ   อุปสมฺปชฺช   วิหาสึ   ฯ   ยํ  หิ  ตํ  อาวุโส  สมฺมา
วทมาโน วเทยฺย ฯเปฯ มหาภิญฺญตํ ปตฺโตติ ฯ
     [๕๒๒]   เนวสญฺญานาสญฺญายตนํ     เนวสญฺญานาสญฺญายตนนฺติ
วุจฺจติ    กตมํ    นุ    โข    เนวสญฺญานาสญฺญายตนนฺติ    ฯ   ตสฺส
มยฺหํ    อาวุโส   เอตทโหสิ   อิธ   ภิกฺขุ   สพฺพโส   อากิญฺจญฺญายตนํ
สมติกฺกมฺม       เนวสญฺญานาสญฺญายตนํ       อุปสมฺปชฺช       วิหรติ
อิทํ    วุจฺจติ   เนวสญฺญานาสญฺญายตนนฺติ   ฯ   โส   ขฺวาหํ   อาวุโส
สพฺพโส      อากิญฺจญฺญายตนํ     สมติกฺกมฺม     เนวสญฺญานาสญฺญายตนํ
อุปสมฺปชฺช  วิหรามิ  ฯ  ตสฺส  มยฺหํ  อาวุโส  อิมินา  วิหาเรน  วิหรโต
อากิญฺจญฺญายตนสหคตา สญฺญามนสิการา สมุทาจรนฺติ ฯ
     {๕๒๒.๑}   อถ  โข  มํ  อาวุโส  ภควา  อิทฺธิยา  อุปสงฺกมิตฺวา
เอตทโวจ      โมคฺคลฺลาน      โมคฺคลฺลาน      มา      พฺราหฺมณ
เนวสญฺญานาสญฺญายตนํ         ปมาโท        เนวสญฺญานาสญฺญายตเน
จิตฺตํ    สณฺฐเปหิ    เนวสญฺญานาสญฺญายตเน   จิตฺตํ   เอโกทึ   กโรหิ
เนวสญฺญานาสญฺญายตเน   จิตฺตํ   สมาทหาติ   ฯ   โส  ขฺวาหํ  อาวุโส
อปเรน      สมเยน      สพฺพโส     อากิญฺจญฺญายตนํ     สมติกฺกมฺม
เนวสญฺญานาสญฺญายตนํ    อุปสมฺปชฺช    วิหาสึ    ฯ    ยํ    หิ    ตํ
อาวุโส สมฺมา วทมาโน วเทยฺย ฯเปฯ มหาภิญฺญตํ ปตฺโตติ ฯ
     [๕๒๓]   อนิมิตฺโต   เจโตสมาธิ  อนิมิตฺโต  เจโตสมาธีติ  วุจฺจติ
กตโม   นุ   โข   อนิมิตฺโต   เจโตสมาธีติ   ฯ  ตสฺส  มยฺหํ  อาวุโส
เอตทโหสิ   อิธ  ภิกฺขุ  สพฺพนิมิตฺตานํ  อมนสิการา  อนิมิตฺตํ  เจโตสมาธึ
อุปสมฺปชฺช    วิหรติ    อยํ    วุจฺจติ    อนิมิตฺโต   เจโตสมาธีติ   ฯ
โส   ขฺวาหํ   อาวุโส  สพฺพนิมิตฺตานํ  อมนสิการา  อนิมิตฺตํ  เจโตสมาธึ
อุปสมฺปชฺช   วิหรามิ   ฯ   ตสฺส   มยฺหํ   อาวุโส   อิมินา   วิหาเรน
วิหรโต นิมิตฺตานุสาริวิญฺญาณํ โหติ ฯ
     {๕๒๓.๑}   อถ  โข  มํ  อาวุโส  ภควา  อิทฺธิยา  อุปสงฺกมิตฺวา
เอตทโวจ    โมคฺคลฺลาน    โมคฺคลฺลาน    มา    พฺราหฺมณ   อนิมิตฺตํ
เจโตสมาธึ    ปมาโท    อนิมิตฺเต   เจโตสมาธิสฺมึ   จิตฺตํ   สณฺฐเปหิ
อนิมิตฺเต  เจโตสมาธิสฺมึ  จิตฺตํ  เอโกทึ  กโรหิ  อนิมิตฺเต เจโตสมาธิสฺมึ
จิตฺตํ  สมาทหาติ  ฯ  โส  ขฺวาหํ  อาวุโส  อปเรน สมเยน สพฺพนิมิตฺตานํ
อมนสิการา  อนิมิตฺตํ  เจโตสมาธึ  อุปสมฺปชฺช  วิหาสึ  ฯ ยํ หิ ตํ อาวุโส
สมฺมา    วทมาโน   วเทยฺย   สตฺถารานุคฺคหิโต   สาวโก   มหาภิญฺญตํ
ปตฺโตติ  ฯ  มมํ  ตํ  สมฺมา  วทมาโน  วเทยฺย สตฺถารานุคฺคหิโต สาวโก
มหาภิญฺญตํ ปตฺโตติ ฯ
     [๕๒๔]   อถ  โข  อายสฺมา  มหาโมคฺคลฺลาโน  เสยฺยถาปิ  นาม
พลวา    ปุริโส   สมฺมิญฺชิตํ   วา   พาหํ   ปสาเรยฺย   ปสาริตํ   วา
พาหํ   สมฺมิญฺเชยฺย  เอวเมว  เชตวเน  อนฺตรหิโต  เทเวสุ  ตาวตึเสสุ
ปาตุรโหสิ   ฯ   อถ   โข  สกฺโก  เทวานมินฺโท  ปญฺจหิ  เทวตาสเตหิ
สทฺธึ    เยนายสฺมา    มหาโมคฺคลฺลาโน    เตนุปสงฺกมิ   อุปสงฺกมิตฺวา
อายสฺมนฺตํ    มหาโมคฺคลฺลานํ   อภิวาเทตฺวา   เอกมนฺตํ   อฏฺฐาสิ   ฯ
เอกมนฺตํ   ฐิตํ   โข   สกฺกํ   เทวานมินฺทํ  อายสฺมา  มหาโมคฺคลฺลาโน
เอตทโวจ  สาธุ  โข  เทวานมินฺท พุทฺธสรณคมนํ โหติ ฯ พุทฺธสรณคมนเหตุ
โข    เทวานมินฺท    เอวมิเธกจฺเจ   สตฺตา   กายสฺส   เภทา   ปรํ
มรณา   สุคตึ   สคฺคํ   โลกํ   อุปปชฺชนฺติ   ฯ  สาธุ  โข  เทวานมินฺท
ธมฺมสรณคมนํ    โหติ    ฯ    ธมฺมสรณคมนเหตุ    โข    เทวานมินฺท
เอวมิเธกจฺเจ   สตฺตา   กายสฺส   เภทา   ปรํ   มรณา   สุคตึ  สคฺคํ
โลกํ อุปปชฺชนฺติ ฯ
     {๕๒๔.๑}   สาธุ   โข   เทวานมินฺท   สงฺฆสรณคมนํ   โหติ  ฯ
สงฺฆสรณคมนเหตุ   โข   เทวานมินฺท   เอวมิเธกจฺเจ   สตฺตา  กายสฺส
เภทา   ปรํ   มรณา   สุคตึ   สคฺคํ  โลกํ  อุปปชฺชนฺตีติ  ฯ  สาธุ  โข
มาริส    โมคฺคลฺลาน    พุทฺธสรณคมนํ    โหติ   ฯ   พุทฺธสรณคมนเหตุ
โข   มาริส   โมคฺคลฺลาน  เอวมิเธกจฺเจ  สตฺตา  กายสฺส  เภทา  ปรํ
มรณา    สุคตึ   สคฺคํ   โลกํ   อุปปชฺชนฺติ   ฯ   สาธุ   โข   มาริส
โมคฺคลฺลาน    ธมฺมสรณคมนํ    โหติ    ฯ    ธมฺมสรณคมนเหตุ    โข
มาริส  โมคฺคลฺลาน  เอวมิเธกจฺเจ  สตฺตา  กายสฺส  เภทา  ปรํ  มรณา
สุคตึ   สคฺคํ   โลกํ   อุปปชฺชนฺติ   ฯ   สาธุ  โข  มาริส  โมคฺคลฺลาน
สงฺฆสรณคมนํ ฯเปฯ สุคตึ สคฺคํ โลกํ อุปปชฺชนฺตีติ ฯ
     [๕๒๕]   อถ  โข สกฺโก เทวานมินฺโท ฉหิ เทวตาสเตหิ สทฺธึ ฯเปฯ
อถ   โข   สกฺโก   เทวานมินฺโท   สตฺตหิ  เทวตาสเตหิ  สทฺธึ  ฯเปฯ
อถ โข สกฺโก เทวามินฺโท อฏฺฐหิ เทวตาสเตหิ สทฺธึ ฯเปฯ
     [๕๒๖]   อถ  โข  สกฺโก  เทวานมินฺโท  อสีติยา  เทวตาสหสฺเสหิ
สทฺธึ    เยนายสฺมา    มหาโมคฺคลฺลาโน    เตนุปสงฺกมิ   อุปสงฺกมิตฺวา
อายสฺมนฺตํ    มหาโมคฺคลฺลานํ   อภิวาเทตฺวา   เอกมนฺตํ   อฏฺฐาสิ   ฯ
เอกมนฺตํ   ฐิตํ   โข   สกฺกํ   เทวานมินฺทํ  อายสฺมา  มหาโมคฺคลฺลาโน
เอตทโวจ  สาธุ  โข  เทวานมินฺท พุทฺธสรณคมนํ โหติ ฯ พุทฺธสรณคมนเหตุ
โข     เทวานมินฺท     เอวมิเธกจฺเจ    สตฺตา    กายสฺส    เภทา
ปรํ   มรณา  สุคตึ  สคฺคํ  โลกํ  อุปปชฺชนฺติ  ฯ  สาธุ  โข  เทวานมินฺท
ธมฺมสรณคมนํ    โหติ    ฯ    ธมฺมสรณคมนเหตุ    โข    เทวานมินฺท
เอวมิเธกจฺเจ   สตฺตา   กายสฺส   เภทา   ปรํ   มรณา   สุคตึ  สคฺคํ
โลกํ   อุปปชฺชนฺติ   ฯ  สาธุ  โข  เทวานมินฺท  สงฺฆสรณคมนํ  โหติ  ฯ
สงฺฆสรณคมนเหตุ   โข   เทวานมินฺท   เอวมิเธกจฺเจ   สตฺตา  กายสฺส
เภทา ปรํ มรณา สุคตึ สคฺคํ โลกํ อุปปชฺชนฺตีติ ฯ
     {๕๒๖.๑}   สาธุ    โข   มาริส   โมคฺคลฺลาน   พุทฺธสรณคมนํ
โหติ   ฯ   พุทฺธสรณคมนเหตุ   โข  มาริส  โมคฺคลฺลาน  เอวมิเธกจฺเจ
สตฺตา   กายสฺส  เภทา  ปรํ  มรณา  สุคตึ  สคฺคํ  โลกํ  อุปปชฺชนฺติ  ฯ
สาธุ   โข   มาริส   โมคฺคลฺลาน   ธมฺมสรณคมนํ   โหติ  ฯเปฯ  สาธุ
โข   มาริส   โมคฺคลฺลาน   สงฺฆสรณคมนํ   โหติ  ฯ  สงฺฆสรณคมนเหตุ
โข   มาริส   โมคฺคลฺลาน  เอวมิเธกจฺเจ  สตฺตา  กายสฺส  เภทา  ปรํ
มรณา สุคตึ สคฺคํ โลกํ อุปปชฺชนฺตีติ ฯ
     [๕๒๗]   อถ   โข   สกฺโก  เทวานมินฺโท  ปญฺจหิ  เทวตาสเตหิ
สทฺธึ    เยนายสฺมา    มหาโมคฺคลฺลาโน    เตนุปสงฺกมิ   อุปสงฺกมิตฺวา
อายสฺมนฺตํ    มหาโมคฺคลฺลานํ   อภิวาเทตฺวา   เอกมนฺตํ   อฏฺฐาสิ   ฯ
เอกมนฺตํ   ฐิตํ   โข   สกฺกํ   เทวานมินฺทํ  อายสฺมา  มหาโมคฺคลฺลาโน
เอตทโวจ  สาธุ  โข  เทวานมินฺท  พุทฺเธ  อเวจฺจปฺปสาเทน สมนฺนาคมนํ
โหติ   อิติปิ   โส   ภควา   อรหํ   สมฺมาสมฺพุทฺโธ  วิชฺชาจรณสมฺปนฺโน
สุคโต    โลกวิทู    อนุตฺตโร   ปุริสทมฺมสารถิ   สตฺถา   เทวมนุสฺสานํ
พุทฺโธ    ภควาติ    ฯ    พุทฺเธ   อเวจฺจปฺปสาเทน   สมนฺนาคมนเหตุ
โข   เทวานมินฺท   เอวมิเธกจฺเจ  สตฺตา  กายสฺส  เภทา  ปรํ  มรณา
สุคตึ สคฺคํ โลกํ อุปปชฺชนฺติ ฯ
     {๕๒๗.๑}   สาธุ   โข   เทวานมินฺท   ธมฺเม  อเวจฺจปฺปสาเทน
สมนฺนาคมนํ   โหติ   สฺวากฺขาโต  ภควตา  ธมฺโม  สนฺทิฏฺฐิโก  อกาลิโก
เอหิปสฺสิโก   โอปนยิโก   ปจฺจตฺตํ   เวทิตพฺโพ   วิญฺญูหีติ   ฯ   ธมฺเม
อเวจฺจปฺปสาเทน   สมนฺนาคมนเหตุ   โข   เทวานมินฺท   เอวมิเธกจฺเจ
สตฺตา กายสฺส เภทา ปรํ มรณา สุคตึ สคฺคํ โลกํ อุปปชฺชนฺติ ฯ
     {๕๒๗.๒}   สาธุ   โข   เทวานมินฺท   สงฺเฆ  อเวจฺจปฺปสาเทน
สมนฺนาคมนํ    โหติ   สุปฏิปนฺโน   ภควโต   สาวกสงฺโฆ   อุชุปฏิปนฺโน
ภควโต     สาวกสงฺโฆ     ญายปฏิปนฺโน     ภควโต     สาวกสงฺโฆ
สามีจิปฏิปนฺโน    ภควโต    สาวกสงฺโฆ   ยทิทํ   จตฺตาริ   ปุริสยุคานิ
อฏฺฐ    ปุริสปุคฺคลา    เอส    ภควโต    สาวกสงฺโฆ    อาหุเนยฺโย
ปาหุเนยฺโย         ทกฺขิเณยฺโย        อญฺชลิกรณีโย        อนุตฺตรํ
ปุญฺญกฺเขตฺตํ      โลกสฺสาติ      ฯ      สงฺเฆ     อเวจฺจปฺปสาเทน
สมนฺนาคมนเหตุ     โข     เทวานมินฺท     เอวมิเธกจฺเจ     สตฺตา
กายสฺส เภทา ปรํ มรณา สุคตึ สคฺคํ โลกํ อุปปชฺชนฺติ ฯ
     {๕๒๗.๓}   สาธุ    โข    เทวานมินฺท   อริยกนฺเตหิ   สีเลหิ
สมนฺนาคมนํ    โหติ    อขณฺเฑหิ   อจฺฉิทฺเทหิ   อสพเลหิ   อกมฺมาเสหิ
ภุชิสฺเสหิ     วิญฺญูปสตฺเถหิ     อปรามฏฺเฐหิ    สมาธิสํวตฺตนิเกหิ    ฯ
อริยกนฺเตหิ   สีเลหิ   สมนฺนาคมนเหตุ  โข  เทวานมินฺท  เอวมิเธกจฺเจ
สตฺตา กายสฺส เภทา ปรํ มรณา สุคตึ สคฺคํ โลกํ อุปปชฺชนฺตีติ ฯ
     {๕๒๗.๔}   สาธุ  โข  มาริส  โมคฺคลฺลาน พุทฺเธ อเวจฺจปฺปสาเทน
สมนฺนาคมนํ  โหติ  อิติปิ  โส  ภควา  ฯเปฯ  สตฺถา เทวมนุสฺสานํ พุทฺโธ
ภควาติ  ฯ พุทฺเธ อเวจฺจปฺปสาเทน สมนฺนาคมนเหตุ โข มาริส โมคฺคลฺลาน
เอวมิเธกจฺเจ สตฺตา กายสฺส เภทา ปรํ มรณา สุคตึ สคฺคํ โลกํ อุปปชฺชนฺติ ฯ
     {๕๒๗.๕}   สาธุ  โข  มาริส  โมคฺคลฺลาน  ธมฺเม อเวจฺจปสาเทน
สมนฺนาคมนํ   โหติ   สฺวากฺขาโต   ภควตา   ธมฺโม   ฯเปฯ   ปจฺจตฺตํ
เวทิตพฺโพ   วิญฺญูหีติ  ฯ  ธมฺเม  อเวจฺจปฺปสาเทน  สมนฺนาคมนเหตุ  โข
มาริส  โมคฺคลฺลาน  เอวมิเธกจฺเจ  สตฺตา  กายสฺส  เภทา  ปรํ  มรณา
สุคตึ สคฺคํ โลกํ อุปปชฺชนฺติ ฯ
     {๕๒๗.๖}   สาธุ  โข  มาริส  โมคฺคลฺลาน สงฺเฆ อเวจฺจปฺปสาเทน
สมนฺนาคมนํ      โหติ      สุปฏิปนฺโน      ภควโต      สาวกสงฺโฆ
ฯเปฯ      อนุตฺตรํ     ปุญฺญกฺเขตฺตํ     โลกสฺสาติ     ฯ     สงฺเฆ
อเวจฺจปฺปสาเทน     สมนฺนาคมนเหตุ     โข    มาริส    โมคฺคลฺลาน
เอวมิเธกจฺเจ   สตฺตา  กายสฺส  เภทา  ปรํ  มรณา  สุคตึ  สคฺคํ  โลกํ
อุปปชฺชนฺติ ฯ
     {๕๒๗.๗}   สาธุ   โข  มาริส  โมคฺคลฺลาน  อริยกนฺเตหิ  สีเลหิ
สมนฺนาคมนํ     โหติ    อขณฺเฑหิ    ฯเปฯ    สมาธิสํวตฺตนิเกหิ    ฯ
อริยกนฺเตหิ    สีเลหิ    สมนฺนาคมนเหตุ    โข   มาริส   โมคฺคลฺลาน
เอวมิเธจฺเจ   สตฺตา   กายสฺส   เภทา   ปรํ   มรณา   สุคตึ   สคฺคํ
โลกํ อุปปชฺชนฺตีติ ฯ
     [๕๒๘]   อถ  โข  สกฺโก  เทวานมินฺโท  ฉหิ  เทวตาสเตหิ  สทฺธึ
ฯเปฯ   อถ   โข   สกฺโก   เทวานมินฺโท  สตฺตหิ  เทวตาสเตหิ  สทฺธึ
ฯเปฯ    อถ    โข    สกฺโก   เทวานมินฺโท   อฏฺฐหิ   เทวตาสเตหิ
สทฺธึ ฯเปฯ
     [๕๒๙]   อถ  โข  สกฺโก  เทวานมินฺโท  อสีติยา  เทวตาสหสฺเสหิ
สทฺธึ    เยนายสฺมา    มหาโมคฺคลฺลาโน    เตนุปสงฺกมิ   อุปสงฺกมิตฺวา
อายสฺมนฺตํ    มหาโมคฺคลฺลานํ   อภิวาเทตฺวา   เอกมนฺตํ   อฏฺฐาสิ   ฯ
เอกมนฺตํ   ฐิตํ   โข   สกฺกํ   เทวานมินฺทํ  อายสฺมา  มหาโมคฺคลฺลาโน
เอตทโวจ
     {๕๒๙.๑}   สาธุ   โข   เทวานมินฺท   พุทฺเธ  อเวจฺจปฺปสาเทน
สมนฺนาคมนํ   โหติ   อิติปิ   โส   ภควา  ฯเปฯ  สตฺถา  เทวมนุสฺสานํ
พุทฺโธ    ภควาติ    ฯ    พุทฺเธ   อเวจฺจปฺปสาเทน   สมนฺนาคมนเหตุ
โข    เทวานมินฺท    เอวมิเธกจฺเจ   สตฺตา   กายสฺส   เภทา   ปรํ
มรณา สุคตึ สคฺคํ โลกํ อุปปชฺชนฺติ ฯ
     {๕๒๙.๒}   สาธุ   โข   เทวานมินฺท   ธมฺเม  อเวจฺจปฺปสาเทน
สมนฺนาคมนํ     โหติ     สฺวากฺขาโต     ภควตา    ธมฺโม    ฯเปฯ
ปจฺจตฺตํ     เวทิตพฺโพ    วิญฺญูหีติ    ฯ    ธมฺเม    อเวจฺจปฺปสาเทน
สมนฺนาคมนเหตุ     โข     เทวานมินฺท     เอวมิเธกจฺเจ     สตฺตา
กายสฺส เภทา ปรํ มรณา สุคตึ สคฺคํ โลกํ อุปปชฺชนฺติ ฯ
     {๕๒๙.๓}   สาธุ   โข   เทวานมินฺท   สงฺเฆ  อเวจฺจปฺปสาเทน
สมนฺนาคมนํ    โหติ    สุปฏิปนฺโน    ภควโต    สาวกสงฺโฆ    ฯเปฯ
อนุตฺตรํ    ปุญฺญกฺเขตฺตํ    โลกสฺสาติ    ฯ   สงฺเฆ   อเวจฺจปฺปสาเทน
สมนฺนาคมนเหตุ   โข   เทวานมินฺท   เอวมิเธกจฺเจ   สตฺตา   กายสฺส
เภทา ปรํ มรณา สุคตึ สคฺคํ โลกํ อุปปชฺชนฺติ ฯ
     {๕๒๙.๔}   สาธุ  โข  เทวานมินฺท  อริยกนฺเตหิ สีเลหิ สมนฺนาคมนํ
โหติ   อขณฺเฑหิ   ฯเปฯ   สมาธิสํวตฺตนิเกหิ   ฯ   อริยกนฺเตหิ  สีเลหิ
สมนฺนาคมนเหตุ   โข   เทวานมินฺท   เอวมิเธกจฺเจ   สตฺตา   กายสฺส
เภทา ปรํ มรณา สุคตึ สคฺคํ โลกํ อุปปชฺชนฺตีติ ฯ
     {๕๒๙.๕}   สาธุ  โข  มาริส  โมคฺคลฺลาน พุทฺเธ อเวจฺจปฺปสาเทน
สมนฺนาคมนํ   โหติ   อิติปิ   โส   ภควา  ฯเปฯ  สตฺถา  เทวมนุสฺสานํ
พุทฺโธ   ภควาติ   ฯ   พุทฺเธ   อเวจฺจปฺปสาเทน  สมนฺนาคมนเหตุ  โข
มาริส  โมคฺคลฺลาน  เอวมิเธกจฺเจ  สตฺตา  กายสฺส  เภทา  ปรํ  มรณา
สุคตึ สคฺคํ โลกํ อุปปชฺชนฺติ ฯ
     {๕๒๙.๖}   สาธุ  โข  มาริส  โมคฺคลฺลาน ธมฺเม อเวจฺจปฺปสาเทน
สมนฺนาคมนํ   โหติ   สฺวากฺขาโต   ภควตา   ธมฺโม   ฯเปฯ   ปจฺจตฺตํ
เวทิตพฺโพ   วิญฺญูหีติ   ฯ   ธมฺเม   อเวจฺจปฺปสาเทน   สมนฺนาคมนเหตุ
โข   มาริส   โมคฺคลฺลาน   เอวมิเธกจฺเจ   สตฺตา   กายสฺส   เภทา
ปรํ    มรณา    สุคตึ    สคฺคํ   โลกํ   อุปปชฺชนฺติ   ฯ   สาธุ   โข
มาริส    โมคฺคลฺลาน   สงฺเฆ   อเวจฺจปฺปสาเทน   สมนฺนาคมนํ   โหติ
สุปฏิปนฺโน    ภควโต    สาวกสงฺโฆ    ฯเปฯ   อนุตฺตรํ   ปุญฺญกฺเขตฺตํ
โลกสฺสาติ    ฯ    สงฺเฆ    อเวจฺจปฺปสาเทน   สมนฺนาคมนเหตุ   โข
มาริส   โมคฺคลฺลาน   เอวมิเธกจฺเจ   สตฺตา   กายสฺส   เภทา   ปรํ
มรณา สุคตึ สคฺคํ โลกํ อุปปชฺชนฺติ ฯ
     {๕๒๙.๗}   สาธุ   โข  มาริส  โมคฺคลฺลาน  อริยกนฺเตหิ  สีเลหิ
สมนฺนาคมนํ     โหติ    อขณฺเฑหิ    ฯเปฯ    สมาธิสํวตฺตนิเกหิ    ฯ
อริยกนฺเตหิ    สีเลหิ    สมนฺนาคมนเหตุ    โข   มาริส   โมคฺคลฺลาน
เอวมิเธกจฺเจ   สตฺตา   กายสฺส   เภทา   ปรํ   มรณา   สุคตึ  สคฺคํ
โลกํ อุปปชฺชนฺตีติ ฯ
     [๕๓๐]   อถ   โข   สกฺโก  เทวานมินฺโท  ปญฺจหิ  เทวตาสเตหิ
สทฺธึ    เยนายสฺมา    มหาโมคฺคลฺลาโน    เตนุปสงฺกมิ   อุปสงฺกมิตฺวา
ฯเปฯ  เอกมนฺตํ  ฐิตํ  โข  สกฺกํ  เทวานมินฺทํ อายสฺมา มหาโมคฺคลฺลาโน
เอตทโวจ     สาธุ    โข    เทวานมินฺท   พุทฺธสรณคมนํ   โหติ   ฯ
พุทฺธสรณคมนเหตุ     โข     เทวานมินฺท     เอวมิเธกจฺเจ    สตฺตา
กายสฺส   เภทา   ปรํ   มรณา   สุคตึ   สคฺคํ   โลกํ  อุปปชฺชนฺติ  เต
อญฺเญ   เทเว   ทสหิ  ฐาเนหิ  อธิคฺคณฺหนฺติ  ทิพฺเพน  อายุนา  ทิพฺเพน
วณฺเณน   ทิพฺเพน   สุเขน   ทิพฺเพน   ยเสน   ทิพฺเพน  อาธิปเตยฺเยน
ทิพฺเพหิ   รูเปหิ   ทิพฺเพหิ   สทฺเทหิ  ทิพฺเพหิ  คนฺเธหิ  ทิพฺเพหิ  รเสหิ
ทิพฺเพหิ โผฏฺฐพฺเพหิ ฯ
     {๕๓๐.๑}   สาธุ   โข   เทวานมินฺท   ธมฺมสรณคมนํ   โหติ  ฯ
ธมฺมสรณคมนเหตุ     โข     เทวานมินฺท     เอวมิเธกจฺเจ    สตฺตา
กายสฺส   เภทา   ปรํ   มรณา   สุคตึ   สคฺคํ   โลกํ  อุปปชฺชนฺติ  เต
อญฺเญ   เทเว   ทสหิ  ฐาเนหิ  อธิคฺคณฺหนฺติ  ทิพฺเพน  อายุนา  ทิพฺเพน
วณฺเณน   ทิพฺเพน   สุเขน   ทิพฺเพน   ยเสน   ทิพฺเพน  อาธิปเตยฺเยน
ทิพฺเพหิ   รูเปหิ   ทิพฺเพหิ   สทฺเทหิ  ทิพฺเพหิ  คนฺเธห  ทิพฺเพหิ  รเสหิ
ทิพฺเพหิ โผฏฺฐพฺเพหิ ฯ
     {๕๓๐.๒}   สาธุ   โข   เทวานมินฺท   สงฺฆสรณคมนํ   โหติ  ฯ
สงฺฆสรณคมนเหตุ     โข     เทวานมินฺท     เอวมิเธกจฺเจ    สตฺตา
กายสฺส   เภทา   ปรํ   มรณา   สุคตึ   สคฺคํ   โลกํ  อุปปชฺชนฺติ  เต
อญฺเญ   เทเว   ทสหิ  ฐาเนหิ  อธิคฺคณฺหนฺติ  ทิพฺเพน  อายุนา  ทิพฺเพน
วณฺเณน   ทิพฺเพน   สุเขน   ทิพฺเพน   ยเสน   ทิพฺเพน  อาธิปเตยฺเยน
ทิพฺเพหิ   รูเปหิ   ทิพฺเพหิ   สทฺเทหิ  ทิพฺเพหิ  คนฺเธหิ  ทิพฺเพหิ  รเสหิ
ทิพฺเพหิ โผฏฺฐพฺเพหีติ ฯ
     {๕๓๐.๓}   สาธุ    โข   มาริส   โมคฺคลฺลาน   พุทฺธสรณคมนํ
โหติ     ฯ     พุทฺธสรณคมนเหตุ     โข     มาริส     โมคฺคลฺลาน
เอวมิเธกจฺเจ   สตฺตา  กายสฺส  เภทา  ปรํ  มรณา  สุคตึ  สคฺคํ  โลกํ
อุปปชฺชนฺติ   เต   อญฺเญ   เทเว  ทสหิ  ฐาเนหิ  อธิคฺคณฺหนฺติ  ทิพฺเพน
อายุนา    ฯเปฯ    ทิพฺเพหิ   โผฏฺฐพฺเพหิ   ฯ   สาธุ   โข   มาริส
โมคฺคลฺลาน    ธมฺมสรณคมนํ    โหติ    ฯเปฯ    สาธุ   โข   มาริส
โมคฺคลฺลาน    สงฺฆสรณคมนํ    โหติ    ฯ    สงฺฆสรณคมนเหตุ    โข
มาริส   โมคฺคลฺลาน  เอวมิเธกจฺเจ  สตฺตา  กายสฺส  ภทา  ปรํ  มรณา
สุคตึ   สคฺคํ   โลกํ   อุปปชฺชนฺติ   เต   อญฺเญ  เทเว  ทสหิ  ฐาเนหิ
อธิคฺคณฺหนฺติ   ทิพฺเพน   อายุนา   ทิพฺเพน   วณฺเณน   ทิพฺเพน   สุเขน
ทิพฺเพน   ยเสน   ทิพฺเพน   อาธิปเตยฺเยน   ทิพฺเพหิ   รูเปหิ  ทิพฺเพหิ
สทฺเทหิ ทิพฺเพหิ คนฺเธหิ ทิพฺเพหิ รเสหิ ทิพฺเพหิ โผฏฺฐพฺเพหีติ ฯ
     [๕๓๑]   อถ  โข  สกฺโก  เทวานมินฺโท  ฉหิ  เทวตาสเตหิ  สทฺธึ
ฯเปฯ   อถ   โข   สกฺโก   เทวานมินฺโท  สตฺตหิ  เทวตาสเตหิ  สทฺธึ
ฯเปฯ    อถ    โข    สกฺโก   เทวานมินฺโท   อฏฺฐหิ   เทวตาสเตหิ
สทฺธึ ฯเปฯ
     [๕๓๒]   อถ  โข  สกฺโก  เทวานมินฺโท  อสีติยา  เทวตาสหสฺเสหิ
สทฺธึ    เยนายสฺมา    มหาโมคฺคลฺลาโน    เตนุปสงฺกมิ   อุปสงฺกมิตฺวา
อายสฺมนฺตํ    มหาโมคฺคลฺลานํ   อภิวาเทตฺวา   เอกมนฺตํ   อฏฺฐาสิ   ฯ
เอกมนฺตํ   ฐิตํ   โข   สกฺกํ   เทวานมินฺทํ  อายสฺมา  มหาโมคฺคลฺลาโน
เอตทโวจ
     {๕๓๒.๑}   สาธุ   โข   เทวานมินฺท   พุทฺธสรณคมนํ   โหติ  ฯ
พุทฺธสรณคมนเหตุ   โข   เทวานมินฺท   เอวมิเธกจฺเจ   สตฺตา  กายสฺส
เภทา  ปรํ  มรณา  สุคตึ  สคฺคํ  โลกํ  อุปปชฺชนฺติ เต อญฺเญ เทเว ทสหิ
ฐาเนหิ   อธิคฺคณฺหนฺติ   ทิพฺเพน   อายุนา   ทิพฺเพน   ฯเปฯ   ทิพฺเพหิ
โผฏฺฐพฺเพหิ ฯ
     {๕๓๒.๒}   สาธุ   โข  เทวานมินฺท  ธมฺมสรณคมนํ  โหติ  ฯเปฯ
สาธุ   โข   เทวานมินฺท   สงฺฆสรณคมนํ   โหติ   ฯ  สงฺฆสรณคมนเหตุ
โข   เทวานมินฺท   เอวมิเธกจฺเจ  สตฺตา  กายสฺส  เภทา  ปรํ  มรณา
สุคตึ   สคฺคํ   โลกํ   อุปปชฺชนฺติ   เต   อญฺเญ  เทเว  ทสหิ  ฐาเนหิ
อธิคฺคณฺหนฺติ   ทิพฺเพน   อายุนา   ทิพฺเพน   วณฺเณน   ทิพฺเพน   สุเขน
ทิพฺเพน   ยเสน   ทิพฺเพน   อาธิปเตยฺเยน   ทิพฺเพหิ   รูเปหิ  ทิพฺเพหิ
สทฺเทหิ ทิพฺเพหิ คนฺเธหิ ทิพฺเพหิ รเสหิ ทิพฺเพหิ โผฏฺฐพฺเพหีติ ฯ
     {๕๓๒.๓}   สาธุ   โข  มาริส  โมคฺคลฺลาน  พุทฺธสรณคมนํ  โหติ
ฯเปฯ   สาธุ   โข   มาริส   โมคฺคลฺลาน  ธมฺมสรณคมนํ  โหติ  ฯเปฯ
สาธุ  โข  มาริส  โมคฺคลฺลาน  สงฺฆสรณคมนํ  โหติ  ฯ สงฺฆสรณคมนเหตุ
โข   มาริส   โมคฺคลฺลาน  เอวมิเธกจฺเจ  สตฺตา  กายสฺส  เภทา  ปรํ
มรณา   สุคตึ   สคฺคํ   โลกํ   อุปปชฺชนฺติ   เต   อญฺเญ  เทเว  ทสหิ
ฐาเนหิ   อธิคฺคณฺหนฺติ   ทิพฺเพน   อายุนา   ทิพฺเพน   วณฺเณน  ทิพฺเพน
สุเขน   ทิพฺเพน   ยเสน   ทิพฺเพน   อาธิปเตยฺเยน   ทิพฺเพหิ   รูเปหิ
ทิพฺเพหิ    สทฺเทหิ    ทิพฺเพหิ    คนฺเธหิ   ทิพฺเพหิ   รเสหิ   ทิพฺเพหิ
โผฏฺฐพฺเพหีติ ฯ
     [๕๓๓]   อถ   โข   สกฺโก  เทวานมินฺโท  ปญฺจหิ  เทวตาสเตหิ
สทฺธึ    เยนายสฺมา    มหาโมคฺคลฺลาโน    เตนุปสงฺกมิ   อุปสงฺกมิตฺวา
อายสฺมนฺตํ    มหาโมคฺคลฺลานํ   อภิวาเทตฺวา   เอกมนฺตํ   อฏฺฐาสิ   ฯ
เอกมนฺตํ   ฐิตํ   โข   สกฺกํ   เทวานมินฺทํ  อายสฺมา  มหาโมคฺคลฺลาโน
เอตทโวจ
     {๕๓๓.๑}   สาธุ   โข   เทวานมินฺท   พุทฺเธ  อเวจฺจปฺปสาเทน
สมนฺนาคมนํ   โหติ   อิติปิ   โส   ภควา  ฯเปฯ  สตฺถา  เทวมนุสฺสานํ
พุทฺโธ   ภควาติ   ฯ   พุทฺเธ   อเวจฺจปฺปสาเทน  สมนฺนาคมนเหตุ  โข
เทวานมินฺท   เอวมิเธกจฺเจ  สตฺตา  กายสฺส  เภทา  ปรํ  มรณา  สุคตึ
สคฺคํ  โลกํ  อุปปชฺชนฺติ  เต  อญฺเญ  เทเว  ทสหิ  ฐาเนหิ  อธิคฺคณฺหนฺติ
ทิพฺเพน   อายุนา   ฯเปฯ   ทิพฺเพหิ   โผฏฺฐพฺเพหิ   ฯ    สาธุ   โข
เทวานมินฺท ธมฺเม อเวจฺจปฺปสาเทน สมนฺนาคมนํ โหติ ฯเปฯ
     {๕๓๓.๒}   สาธุ   โข   เทวานมินฺท   สงฺเฆ  อเวจฺจปฺปสาเทน
สมนฺนาคมนํ   โหติ  ฯเปฯ  สาธุ  โข  เทวานมินฺท  อริยกนฺเตหิ  สีเลหิ
สมนฺนาคมนํ  โหติ  อขณฺเฑหิ  ฯเปฯ  สมาธิสํวตฺตนิเกหิ  ฯ  อริยกนฺเตหิ
สีเลหิ  สมนฺนาคมนเหตุ  โข  เทวานมินฺท  เอวมิเธกจฺเจ  สตฺตา กายสฺส
เภทา  ปรํ  มรณา  สุคตึ  สคฺคํ  โลกํ  อุปปชฺชนฺติ เต อญฺเญ เทเว ทสหิ
ฐาเนหิ อธิคฺคณฺหนฺติ ทิพฺเพน อายุนา ฯเปฯ ทิพฺเพหิ โผฏฺฐพฺเพหีติ ฯ
     {๕๓๓.๓}   สาธุ  โข  มาริส  โมคฺคลฺลาน พุทฺเธ อเวจฺจปฺปสาเทน
สมนฺนาคมนํ  โหติ  อิติปิ  โส  ภควา  ฯเปฯ  สตฺถา เทวมนุสฺสานํ พุทฺโธ
ภควาติ   ฯ   พุทฺเธ   อเวจฺจปฺปสาเทน   สมนฺนาคมนเหตุ  โข  มาริส
โมคฺคลฺลาน   เอวมิเธกจฺเจ  สตฺตา  กายสฺส  เภทา  ปรํ  มรณา  สุคตึ
สคฺคํ  โลกํ  อุปปชฺชนฺติ  เต  อญฺเญ  เทเว  ทสหิ  ฐาเนหิ  อธิคฺคณฺหนฺติ
ทิพฺเพน อายุนา ฯเปฯ ทิพฺเพหิ โผฏฺฐพฺเพหิ ฯ
     {๕๓๓.๔}   สาธุ โข มาริส ๑- โมคฺคลฺลาน ธมฺเม อเวจฺจปฺปสาเทน
สมนฺนาคมนํ   โหติ   สฺวากฺขาโต   ภควตา   ธมฺโม   ฯเปฯ   ปจฺจตฺตํ
เวทิตพฺโพ   วิญฺญูหีติ   ฯ   ธมฺเม   อเวจฺจปฺปสาเทน   สมนฺนาคมนเหตุ
โข     มาริส     โมคฺคลฺลาน    เอวมิเธกจฺเจ    สตฺตา    กายสฺส
เภทา   ปรํ   มรณา   สุคตึ   สคฺคํ   โลกํ   อุปปชฺชนฺติ   เต  อญฺเญ
เทเว    ทสหิ    ฐาเนหิ    อธิคฺคณฺหนฺติ   ทิพฺเพน   อายุนา   ฯเปฯ
ทิพฺเพหิ    โผฏฺฐพฺเพหิ    ฯ     สาธุ    โข    มาริส   โมคฺคลฺลาน
@เชิงอรรถ:  ม. มาริสาติ นตฺถิ ฯ
สงฺเฆ      อเวจฺจปฺปสาเทน     สมนฺนาคมนํ     โหติ     สุปฏิปนฺโน
ภควโต   สาวกสงฺโฆ   ฯเปฯ   อนุตฺตรํ   ปุญฺญกฺเขตฺตํ   โลกสฺสาติ  ฯ
สงฺเฆ   อเวจฺจปฺปสาเทน   สมนฺนาคมนเหตุ   โข   มาริส  โมคฺคลฺลาน
เอวมิเธกจฺเจ   สตฺตา  กายสฺส  เภทา  ปรํ  มรณา  สุคตึ  สคฺคํ  โลกํ
อุปปชฺชนฺติ    เต    อญฺเญ    เทเว    ทสหิ   ฐาเนหิ   อธิคฺคณฺหนฺติ
ทิพฺเพน อายุนา ฯเปฯ ทิพฺเพหิ โผฏฺฐพฺเพหิ ฯ
     {๕๓๓.๕}   สาธุ   โข  มาริส  โมคฺคลฺลาน  อริยกนฺเตหิ  สีเลหิ
สมนฺนาคมนํ   โหติ  อขณฺเฑหิ  ฯเปฯ  สมาธิสํวตฺตนิเกหิ  ฯ  อริยกนฺเตหิ
สีเลหิ  สมนฺนาคมนเหตุ  โข  มาริส  โมคฺคลฺลาน  เอวมิเธกจฺเจ  สตฺตา
กายสฺส  เภทา  ปรํ  มรณา  สุคตึ สคฺคํ โลกํ อุปปชฺชนฺติ เต อญฺเญ เทเว
ทสหิ    ฐาเนหิ    อธิคฺคณฺหนฺติ   ทิพฺเพน   อายุนา   ฯเปฯ   ทิพฺเพหิ
โผฏฺฐพฺเพหีติ ฯ
     [๕๓๔]   อถ  โข  สกฺโก  เทวานมินฺโท  ฉหิ  เทวตาสเตหิ  สทฺธึ
ฯเปฯ   อถ   โข   สกฺโก   เทวานมินฺโท  สตฺตหิ  เทวตาสเตหิ  สทฺธึ
ฯเปฯ อถ โข สกฺโก เทวานมินฺโท อฏฺฐหิ เทวตาสเตหิ สทฺธึ ฯเปฯ
     [๕๓๕]   อถ  โข  สกฺโก  เทวานมินฺโท  อสีติยา  เทวตาสหสฺเสหิ
สทฺธึ    เยนายสฺมา    มหาโมคฺคลฺลาโน    เตนุปสงฺกมิ   อุปสงฺกมิตฺวา
อายสฺมนฺตํ    มหาโมคฺคลฺลานํ   อภิวาเทตฺวา   เอกมนฺตํ   อฏฺฐาสิ   ฯ
เอกมนฺตํ   ฐิตํ   โข   สกฺกํ   เทวานมินฺทํ  อายสฺมา  มหาโมคฺคลฺลาโน
เอตทโวจ
     {๕๓๕.๑}   สาธุ โข เทวานมินฺท พุทฺเธ อเวจฺจปฺปสาเทน สมนฺนาคมนํ
โหติ   อิติปิ   โส   ภควา   อรหํ   สมฺมาสมฺพุทฺโธ  วิชฺชาจรณสมฺปนฺโน
สุคโต    โลกวิทู    อนุตฺตโร   ปุริสทมฺมสารถิ   สตฺถา   เทวมนุสฺสานํ
พุทฺโธ    ภควาติ    ฯ    พุทฺเธ   อเวจฺจปฺปสาเทน   สมนฺนาคมนเหตุ
โข     เทวานมินฺท     เอวมิเธกจฺเจ    สตฺตา    กายสฺส    เภทา
ปรํ   มรณา   สุคตึ   สคฺคํ   โลกํ   อุปปชฺชนฺติ   เต   อญฺเญ  เทเว
ทสหิ    ฐาเนหิ   อธิคฺคณฺหนฺติ   ทิพฺเพน   อายุนา   ทิพฺเพน   วณฺเณน
ทิพฺเพน   สุเขน   ทิพฺเพน   ยเสน   ทิพฺเพน   อาธิปเตยฺเยน  ทิพฺเพหิ
รูเปหิ   ทิพฺเพหิ   สทฺเทหิ   ทิพฺเพหิ  คนฺเธหิ  ทิพฺเพหิ  รเสหิ  ทิพฺเพหิ
โผฏฺฐพฺเพหิ ฯ
     {๕๓๕.๒}   สาธุ   โข   เทวานมินฺท   ธมฺเม  อเวจฺจปฺปสาเทน
สมนฺนาคมนํ   โหติ   สฺวากฺขาโต  ภควตา  ธมฺโม  สนฺทิฏฺฐิโก  อกาลิโก
เอหิปสฺสิโก   โอปนยิโก   ปจฺจตฺตํ   เวทิตพฺโพ   วิญฺญูหีติ   ฯ   ธมฺเม
อเวจฺจปฺปสาเทน   สมนฺนาคมนเหตุ   โข   เทวานมินฺท   เอวมิเธกจฺเจ
สตฺตา   กายสฺส   เภทา   ปรํ   มรณา  สุคตึ  สคฺคํ  โลกํ  อุปปชฺชนฺติ
เต  อญฺเญ  เทเว  ทสหิ  ฐาเนหิ  อธิคฺคณฺหนฺติ  ทิพฺเพน  อายุนา ฯเปฯ
ทิพฺเพหิ โผฏฺฐพฺเพหิ ฯ
     {๕๓๕.๓}   สาธุ   โข   เทวานมินฺท   สงฺเฆ  อเวจฺจปฺปสาเทน
สมนฺนาคมนํ    โหติ   สุปฏิปนฺโน   ภควโต   สาวกสงฺโฆ   อุชุปฏิปนฺโน
ภควโต     สาวกสงฺโฆ     ญายปฏิปนฺโน     ภควโต     สาวกสงฺโฆ
สามีจิปฏิปนฺโน   ภควโต   สาวกสงฺโฆ  ยทิทํ  จตฺตาริ  ปุริสยุคานิ  อฏฺฐ
ปุริสปุคฺคลา   เอส   ภควโต   สาวกสงฺโฆ   อาหุเนยฺโย   ปาหุเนยฺโย
ทกฺขิเณยฺโย    อญฺชลิกรณีโย    อนุตฺตรํ   ปุญฺญกฺเขตฺตํ   โลกสฺสาติ   ฯ
สงฺเฆ     อเวจฺจปฺปสาเทน     สมนฺนาคมนเหตุ    โข    เทวานมินฺท
เอวมิเธกจฺเจ   สตฺตา  กายสฺส  เภทา  ปรํ  มรณา  สุคตึ  สคฺคํ  โลกํ
อุปปชฺชนฺติ   เต   อญฺเญ   เทเว  ทสหิ  ฐาเนหิ  อธิคฺคณฺหนฺติ  ทิพฺเพน
อายุนา ฯเปฯ ทิพฺเพหิ โผฏฺฐพฺเพหิ ฯ
     {๕๓๕.๔}   สาธุ  โข  เทวานมินฺท  อริยกนฺเตหิ สีเลหิ สมนฺนาคมนํ
โหติ    อขณฺเฑหิ    อจฺฉิทฺเทหิ    อสพเลหิ    อกมฺมาเสหิ   ภุชิสฺเสหิ
วิญฺญูปสตฺเถหิ    อปรามฏฺเฐหิ     สมาธิสํวตฺตนิเกหิ    ฯ   อริยกนฺเตหิ
สีเลหิ    สมนฺนาคมนเหตุ   โข   เทวานมินฺท   เอวมิเธกจฺเจ   สตฺตา
กายสฺส  เภทา  ปรํ  มรณา  สุคตึ  สคฺคํ  โลกํ  อุปปชฺชนฺติ  เต  อญฺเญ
เทเว    ทสหิ    ฐาเนหิ   อธิคฺคณฺหนฺติ   ทิพฺเพน   อายุนา   ทิพฺเพน
วณฺเณน   ทิพฺเพน   สุเขน   ทิพฺเพน   ยเสน   ทิพฺเพน  อาธิปเตยฺเยน
ทิพฺเพหิ   รูเปหิ   ทิพฺเพหิ   สทฺเทหิ  ทิพฺเพหิ  คนฺเธหิ  ทิพฺเพหิ  รเสหิ
ทิพฺเพหิ โผฏฺฐพฺเพหีติ ฯ
     {๕๓๕.๕}   สาธุ  โข  มาริส  โมคฺคลฺลาน พุทฺเธ อเวจฺจปฺปสาเทน
สมนฺนาคมนํ   โหติ   อิติปิ   โส  ภควา  ฯเปฯ  สตฺถา  เทวมนุสฺสานํ
พุทฺโธ   ภควาติ   ฯ   พุทฺเธ   อเวจฺจปฺปสาเทน  สมนฺนาคมนเหตุ  โข
มาริส  โมคฺคลฺลาน  เอวมิเธกจฺเจ  สตฺตา  กายสฺส  เภทา  ปรํ  มรณา
สุคตึ   สคฺคํ   โลกํ   อุปปชฺชนฺติ   เต   อญฺเญ  เทเว  ทสหิ  ฐาเนหิ
อธิคฺคณฺหนฺติ ทิพฺเพน อายุนา ฯเปฯ ทิพฺเพหิ โผฏฺฐพฺเพหิ ฯ
     {๕๓๕.๖}   สาธุ       โข      มาริส      โมคฺคลฺลาน
ธมฺเม          อเวจฺจปฺปสาเทน         สมนฺนาคมนํ         โหติ
สฺวากฺขาโต     ภควตา     ธมฺโม    ฯเปฯ    ปจฺจตฺตํ    เวทิตพฺโพ
วิญฺญูหีติ    ฯ    ธมฺเม    อเวจฺจปฺปสาเทน    สมนฺนาคมนเหตุ    โข
มาริส   โมคฺคลฺลาน   เอวมิเธกจฺเจ   สตฺตา   กายสฺส   เภทา   ปรํ
มรณา   สุคตึ   สคฺคํ   โลกํ   อุปปชฺชนฺติ   เต   อญฺเญ  เทเว  ทสหิ
ฐาเนหิ     อธิคฺคณฺหนฺติ     ทิพฺเพน     อายุนา    ฯเปฯ    ทิพฺเพหิ
โผฏฺฐพฺเพหิ ฯ
     {๕๓๕.๗}   สาธุ  โข  มาริส  โมคฺคลฺลาน สงฺเฆ อเวจฺจปฺปสาเทน
สมนฺนาคมนํ   โหติ   สุปฏิปนฺโน  ภควโต  สาวกสงฺโฆ  ฯเปฯ  อนุตฺตรํ
ปุญฺญกฺเขตฺตํ   โลกสฺสาติ   ฯ  สงฺเฆ  อเวจฺจปฺปสาเทน  สมนฺนาคมนเหตุ
โข   มาริส   โมคฺคลฺลาน  เอวมิเธกจฺเจ  สตฺตา  กายสฺส  เภทา  ปรํ
มรณา  สุคตึ  สคฺคํ  โลกํ  อุปปชฺชนฺติ  เต  อญฺเญ  เทเว  ทสหิ ฐาเนหิ
อธิคฺคณฺหนฺติ ทิพฺเพน อายุนา ฯเปฯ ทิพฺเพหิ โผฏฺฐพฺเพหิ ฯ
     {๕๓๕.๘}   สาธุ   โข  มาริส  โมคฺคลฺลาน  อริยกนฺเตหิ  สีเลหิ
สมนฺนาคมนํ   โหติ  อขณฺเฑหิ  ฯเปฯ  สมาธิสํวตฺตนิเกหิ  ฯ  อริยกนฺเตหิ
สีเลหิ  สมนฺนาคมนเหตุ  โข  มาริส  โมคฺคลฺลาน  เอวมิเธกจฺเจ  สตฺตา
กายสฺส  เภทา  ปรํ  มรณา  สุคตึ สคฺคํ โลกํ อุปปชฺชนฺติ เต อญฺเญ เทเว
ทสหิ  ฐาเนหิ  อธิคฺคณฺหนฺติ  ทิพฺเพน  อายุนา  ทิพฺเพน  วณฺเณน  ทิพฺเพน
สุเขน  ทิพฺเพน  ยเสน  ทิพฺเพน  อาธิปเตยฺเยน  ทิพฺเพหิ  รูเปหิ ทิพฺเพหิ
สทฺเทหิ ทิพฺเพหิ คนฺเธหิ ทิพฺเพหิ รเสหิ ทิพฺเพหิ โผฏฺฐพฺเพหีติ ฯ
     [๕๓๖]   อถ  โข  จนฺทโน  เทวปุตฺโต  ฯเปฯ  อถ  โข  สุยาโม
เทวปุตฺโต   ฯ  อถ  โข  สนฺตุสิโต  เทวปุตฺโต  ฯ  อถ  โข  สุนิมฺมิโต
เทวปุตฺโต   ฯ   อถ   โข   วสวตฺติ   เทวปุตฺโต   ฯ   (อิเม  ปญฺจ
เปยฺยาลา ๑- ยถา สกฺโก เทวานมินฺโท ตถา วิตฺถาเรตพฺพาติ) ฯ
                   โมคฺคลฺลานสํยุตฺตํ สมตฺตํ ฯ
                        ตสฺสุทฺทานํ
         สวิตกฺกาวิตกฺกญฺจ             สุเขน จ ๒- อุเปกฺขโก
         อากาสญฺเจว วิญฺญาณํ        อากิญฺจญฺญา เนวสญฺญินา ๓-
         อนิมิตฺโต จ สกฺโก จ           จนฺทเนกาทเสน จาติ ฯ
                    --------------
@เชิงอรรถ:  ม. เปยฺยาลี ฯ   ยุ. จสทฺโท นตฺถิ ฯ   ม. อากิญฺจํ เนวสญฺญินา
@ยุ. อากิญฺจเนวสญฺญินา ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๑๘ หน้าที่ ๓๒๓-๓๔๖. https://84000.org/tipitaka/read/pali_read.php?B=18&A=6548&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=18&A=6548&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=18&item=515&items=22              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=18&siri=256              ศึกษาอรรถกถานี้ได้ที่ :- https://84000.org/tipitaka/attha/attha.php?b=18&i=515              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=13&A=3301              The Pali Atthakatha in Roman :- https://84000.org/tipitaka/atthapali/read_rm.php?B=13&A=3301              สารบัญพระไตรปิฎกเล่มที่ ๑๘ https://84000.org/tipitaka/read/?index_18 https://84000.org/tipitaka/english/?index_18

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]