ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒๔ ภาษาบาลี อักษรไทย พระสุตตันตปิฎกเล่มที่ ๑๖ สุตฺต. องฺ. (๕): ทสก-เอกาทสกนิปาตา

     [๘๗]   ตตฺร  โข  ภควา  กาฬกภิกฺขุํ  ๑- อารพฺภ ภิกฺขู อามนฺเตสิ
ภิกฺขโวติ   ฯ   ภทนฺเตติ   เต   ภิกฺขู  ภควโต  ปจฺจสฺโสสุํ  ฯ  ภควา
เอตทโวจ   อิธ   ภิกฺขเว   ภิกฺขุ   อธิกรณิโก   โหติ   อธิกรณสมถสฺส
น   วณฺณวาที   ยมฺปิ   ภิกฺขเว  ภิกฺขุ  อธิกรณิโก  โหติ  อธิกรณสมถสฺส
น   วณฺณวาที   อยมฺปิ   ธมฺโม  น  ปิยตาย  น  ครุตาย  น  ภาวนาย
น สามญฺญาย น เอกีภาวาย สํวตฺตติ ฯ
     {๘๗.๑}   ปุน   จปรํ   ภิกฺขเว   ภิกฺขุ   น  สิกฺขากาโม  โหติ
สิกฺขาสมาทานสฺส    ๒-   น   วณฺณวาที   ยมฺปิ   ภิกฺขเว   ภิกฺขุ   น
สิกฺขากาโม     โหติ    สิกฺขาสมาทานสฺส    น    วณฺณวาที    อยมฺปิ
ธมฺโม   น   ปิยตาย   น   ครุตาย   น  ภาวนาย  น  สามญฺญาย  น
เอกีภาวาย สํวตฺตติ ฯ
     {๘๗.๒}   ปุน  จปรํ  ภิกฺขเว  ภิกฺขุ  ปาปิจฺโฉ  โหติ อิจฺฉาวินยสฺส
น   วณฺณวาที   ยมฺปิ  ภิกฺขเว  ภิกฺขุ  ปาปิจฺโฉ  โหติ  อิจฺฉาวินยสฺส  น
วณฺณวาที   อยมฺปิ   ธมฺโม   น  ปิยตาย  น  ครุตาย  น  ภาวนาย  น
สามญฺญาย น เอกีภาวาย สํวตฺตติ ฯ
     {๘๗.๓}   ปุน  จปรํ  ภิกฺขเว  ภิกฺขุ  โกธโน  โหติ โกธวินยสฺส น
วณฺณวาที  ยมฺปิ  ภิกฺขเว  ภิกฺขุ  โกธโน  โหติ  โกธวินยสฺส  น วณฺณวาที
อยมฺปิ   ธมฺโม   น  ปิยตาย  น  ครุตาย  น  ภาวนาย  น  สามญฺญาย
น เอกีภาวาย สํวตฺตติ ฯ
     {๘๗.๔}   ปุน   จปรํ   ภิกฺขเว  ภิกฺขุ  มกฺขี  โหติ  มกฺขวินยสฺส
น   วณฺณวาที   ยมฺปิ   ภิกฺขเว   ภิกฺขุ   มกฺขี   โหติ  มกฺขวินยสฺส  น
วณฺณวาที   อยมฺปิ   ธมฺโม   น  ปิยตาย  น  ครุตาย  น  ภาวนาย  น
สามญฺญาย  น  เอกีภาวาย  สํวตฺตติ  ฯ   ปุน  จปรํ  ภิกฺขเว ภิกฺขุ สโฐ
@เชิงอรรถ:  ม. กาลงฺกตํ ภิกฺขุํ ฯ ยุ. กาลกํ ภิกฺขุํ ฯ
@ ม. สิกฺขากามสฺส ฯ สพฺพตฺถ อีทิสเมว ฯ
โหติ   สาเฐยฺยวินยสฺส   น   วณฺณวาที   ยมฺปิ   ภิกฺขเว   ภิกฺขุ  สโฐ
โหติ   สาเฐยฺยวินยสฺส   น   วณฺณวาที   อยมฺปิ   ธมฺโม   น  ปิยตาย
น ครุตาย น ภาวนาย น สามญฺญาย น เอกีภาวาย สํวตฺตติ ฯ
     {๘๗.๕}   ปุน  จปรํ  ภิกฺขเว  ภิกฺขุ  มายาวี โหติ มายาวินยสฺส น
วณฺณวาที   ยมฺปิ   ภิกฺขเว   ภิกฺขุ   มายาวี   โหติ   มายาวินยสฺส  น
วณฺณวาที   อยมฺปิ   ธมฺโม   น  ปิยตาย  น  ครุตาย  น  ภาวนาย  น
สามญฺญาย น เอกีภาวาย สํวตฺตติ ฯ
     {๘๗.๖}   ปุน  จปรํ  ภิกฺขเว  ภิกฺขุ  ธมฺมานํ  น  นิสามกชาติโก
โหติ   ธมฺมนิสนฺติยา   น   วณฺณวาที  ยมฺปิ  ภิกฺขเว  ภิกฺขุ  ธมฺมานํ  น
นิสามกชาติโก    ๑-    โหติ   ธมฺมนิสนฺติยา   น   วณฺณวาที   อยมฺปิ
ธมฺโม   น   ปิยตาย   น   ครุตาย   น  ภาวนาย  น  สามญฺญาย  น
เอกีภาวาย สํวตฺตติ ฯ
     {๘๗.๗}   ปุน   จปรํ   ภิกฺขเว   ภิกฺขุ   น  ปฏิสลฺลาโน  โหติ
ปฏิสลฺลานสฺส   น   วณฺณวาที   ยมฺปิ   ภิกฺขเว   ภิกฺขุ  น  ปฏิสลฺลาโน
โหติ   ปฏิสลฺลานสฺส   น   วณฺณวาที   อยมฺปิ   ธมฺโม  น  ปิยตาย  น
ครุตาย น ภาวนาย น สามญฺญาย น เอกีภาวาย สํวตฺตติ ฯ
     {๘๗.๘}   ปุน  จปรํ  ภิกฺขเว  ภิกฺขุ  สพฺรหฺมจารีนํ น ปฏิสนฺถารโก
โหติ  ปฏิสนฺถารกสฺส  ๒-  น  วณฺณวาที  ยมฺปิ ภิกฺขเว ภิกฺขุ สพฺรหฺมจารีนํ
น  ปฏิสนฺถารโก  โหติ  ปฏิสนฺถารกสฺส  น  วณฺณวาที  อยมฺปิ  ธมฺโม  น
ปิยตาย น ครุตาย น ภาวนาย น สามญฺญาย น เอกีภาวาย สํวตฺตติ ฯ
     {๘๗.๙}   เอวรูปสฺส ภิกฺขเว ภิกฺขุโน กิญฺจาปิ เอวํ อิจฺฉา อุปฺปชฺเชยฺย อโห
@เชิงอรรถ:  ยุ. นิสามกชาติโย ฯ สพฺพตฺถ อีทิสเมว ฯ  โป. ปฏิสณฺฐารโก โหติ
@ปฏิสณฺฐารกสฺส ฯ สพฺพตฺถ อีทิสเมว ฯ
วต  มํ  สพฺรหฺมจารี  สกฺกเรยฺยุํ  ครุกเรยฺยุํ  มาเนยฺยุํ  ปูเชยฺยุนฺติ อถโข
นํ  สพฺรหฺมจารี  เนว  สกฺกโรนฺติ  น  ครุกโรนฺติ  น มาเนนฺติ น ปูเชนฺติ
ตํ   กิสฺส   เหตุ   ตถาหิสฺส  ภิกฺขเว  วิญฺญู  สพฺรหฺมจารี  เต  ปาปเก
อกุสเล    ธมฺเม    อปฺปหีเน    สมนุปสฺสนฺติ     เสยฺยถาปิ   ภิกฺขเว
อสฺสมูฬฺหกสฺส   กิญฺจาปิ   เอวํ   อิจฺฉา   อุปฺปชฺเชยฺย   อโห   วต  มํ
มนุสฺสา      อาชานียฏฺฐาเน     จ     ฐเปยฺยุํ     อาชานียโภชนญฺจ
โภเชยฺยุํ   อาชานียปริมชฺชนญฺจ   ปริมชฺเชยฺยุนฺติ   อถโข   ตํ   มนุสฺสา
น   เจว   อาชานียฏฺฐาเน  ฐเปนฺติ  น  จ  อาชานียโภชนํ  โภเชนฺติ
น   จ   อาชานียปริมชฺชนํ   ปริมชฺชนฺติ   ตํ   กิสฺส   เหตุ   ตถาหิสฺส
ภิกฺขเว   วิญฺญู   มนุสฺสา   ตานิ   สาเฐยฺยานิ  กูเฏยฺยานิ  ชิเมฺหยฺยานิ
วงฺเกยฺยานิ  อปฺปหีนานิ  สมนุปสฺสนฺติ  เอวเมว  โข  ภิกฺขเว  เอวรูปสฺส
ภิกฺขุโน  กิญฺจาปิ  เอวํ  อิจฺฉา  อุปฺปชฺเชยฺย  อโห  วต  มํ  สพฺรหฺมจารี
สกฺกเรยฺยุํ   ครุกเรยฺยุํ   มาเนยฺยุํ   ปูเชยฺยุนฺติ  อถโข  นํ  สพฺรหฺมจารี
เนว  สกฺกโรนฺติ  น  ครุกโรนฺติ  น  มาเนนฺติ  น  ปูเชนฺติ ตํ กิสฺส เหตุ
ตถาหิสฺส   ภิกฺขเว   วิญฺญู   สพฺรหฺมจารี  เต  ปาปเก  อกุสเล  ธมฺเม
อปฺปหีเน  สมนุปสฺสนฺติ  ฯ   อิธ  ปน  ภิกฺขเว  ภิกฺขุ  น อธิกรณิโก โหติ
อธิกรณสมถสฺส    วณฺณวาที    ยมฺปิ   ภิกฺขเว   ภิกฺขุ   น   อธิกรณิโก
โหติ     อธิกรณสมถสฺส     วณฺณวาที     อยมฺปิ    ธมฺโม    ปิยตาย
ครุตาย ภาวนาย สามญฺญาย เอกีภาวาย สํวตฺตติ ฯ
     {๘๗.๑๐}   ปุน   จปรํ   ภิกฺขเว   ภิกฺขุ   สิกฺขากาโม   โหติ
สิกฺขาสมาทานสฺส    วณฺณวาที    ยมฺปิ    ภิกฺขเว   ภิกฺขุ   สิกฺขากาโม
โหติ   สิกฺขาสมาทานสฺส   วณฺณวาที   อยมฺปิ   ธมฺโม  ปิยตาย  ครุตาย
ภาวนาย สามญฺญาย เอกีภาวาย สํวตฺตติ ฯ
     {๘๗.๑๑}   ปุน  จปรํ  ภิกฺขเว  ภิกฺขุ อปฺปิจฺโฉ โหติ อิจฺฉาวินยสฺส
วณฺณวาที  ยมฺปิ  ภิกฺขเว  ภิกฺขุ  อปฺปิจฺโฉ  โหติ  อิจฺฉาวินยสฺส  วณฺณวาที
อยมฺปิ ธมฺโม ฯเปฯ เอกีภาวาย สํวตฺตติ ฯ
     {๘๗.๑๒}   ปุน  จปรํ  ภิกฺขเว  ภิกฺขุ  อกฺโกธโน โหติ โกธวินยสฺส
วณฺณวาที  ยมฺปิ  ภิกฺขเว  ภิกฺขุ  อกฺโกธโน  โหติ  โกธวินยสฺส  วณฺณวาที
อยมฺปิ ธมฺโม ฯเปฯ เอกีภาวาย สํวตฺตติ ฯ
     {๘๗.๑๓}   ปุน  จปรํ  ภิกฺขเว  ภิกฺขุ  อมกฺขี  โหติ  มกฺขวินยสฺส
วณฺณวาที   ยมฺปิ   ภิกฺขเว   ภิกฺขุ  อมกฺขี  โหติ  มกฺขวินยสฺส  วณฺณวาที
อยมฺปิ  ธมฺโม  ฯเปฯ  เอกีภาวาย  สํวตฺตติ  ฯ  ปุน  จปรํ ภิกฺขเว ภิกฺขุ
อสโฐ   โหติ   สาเฐยฺยวินยสฺส  วณฺณวาที  ยมฺปิ  ภิกฺขเว  ภิกฺขุ  อสโฐ
โหติ   สาเฐยฺยวินยสฺส   วณฺณวาที   อยมฺปิ  ธมฺโม  ฯเปฯ  เอกีภาวาย
สํวตฺตติ ฯ
     {๘๗.๑๔}   ปุน  จปรํ  ภิกฺขเว  ภิกฺขุ  อมายาวี โหติ มายาวินยสฺส
วณฺณวาที  ยมฺปิ  ภิกฺขเว  ภิกฺขุ  อมายาวี  โหติ  มายาวินยสฺส  วณฺณวาที
อยมฺปิ ธมฺโม ฯเปฯ เอกีภาวาย สํวตฺตติ ฯ
     {๘๗.๑๕}   ปุน   จปรํ   ภิกฺขเว  ภิกฺขุ  ธมฺมานํ  นิสามกชาติโก
โหติ    ธมฺมนิสนฺติยา    วณฺณวาที    ยมฺปิ   ภิกฺขเว   ภิกฺขุ   ธมฺมานํ
นิสามกชาติโก    โหติ    ธมฺมนิสนฺติยา    วณฺณวาที    อยมฺปิ   ธมฺโม
ฯเปฯ เอกีภาวาย สํวตฺตติ ฯ
     {๘๗.๑๖}   ปุน   จปรํ   ภิกฺขเว   ภิกฺขุ   ปฏิสลฺลาโน   โหติ
ปฏิสลฺลานสฺส     วณฺณวาที    ยมฺปิ    ภิกฺขเว    ภิกฺขุ    ปฏิสลฺลาโน
โหติ     ปฏิสลฺลานสฺส     วณฺณวาที     อยมฺปิ     ธมฺโม     ฯเปฯ
เอกีภาวาย สํวตฺตติ ฯ
     {๘๗.๑๗}   ปุน  จปรํ  ภิกฺขเว  ภิกฺขุ  สพฺรหฺมจารีนํ  ปฏิสนฺถารโก
โหติ   ปฏิสนฺถารกสฺส   วณฺณวาที   ยมฺปิ   ภิกฺขเว  ภิกฺขุ  สพฺรหฺมจารีนํ
ปฏิสนฺถารโก    โหติ    ปฏิสนฺถารกสฺส    วณฺณวาที    อยมฺปิ   ธมฺโม
ปิยตาย ครุตาย ภาวนาย สามญฺญาย เอกีภาวาย สํวตฺตติ ฯ
     {๘๗.๑๘}   เอวรูปสฺส  ภิกฺขเว  ภิกฺขุโน  กิญฺจาปิ  น  เอวํ อิจฺฉา
อุปฺปชฺเชยฺย  อโห  วต  มํ  สพฺรหฺมจารี  สกฺกเรยฺยุํ  ครุกเรยฺยุํ มาเนยฺยุํ
ปูเชยฺยุนฺติ   อถโข   นํ   สพฺรหฺมจารี  สกฺกโรนฺติ  ครุกโรนฺติ  มาเนนฺติ
ปูเชนฺติ   ตํ   กิสฺส   เหตุ  ตถาหิสฺส  ภิกฺขเว  วิญฺญู  สพฺรหฺมจารี  เต
ปาปเก   อกุสเล   ธมฺเม   ปหีเน   สมนุปสฺสนฺติ   เสยฺยถาปิ  ภิกฺขเว
ภทฺทสฺส   อสฺสาชานียสฺส   กิญฺจาปิ  น  เอวํ  อิจฺฉา  อุปฺปชฺเชยฺย  อโห
วต   มํ   มนุสฺสา   อาชานียฏฺฐาเน   จ   ฐเปยฺยุํ   อาชานียโภชนญฺจ
โภเชยฺยุํ   อาชานียปริมชฺชนญฺจ   ปริมชฺเชยฺยุนฺติ   อถโข   นํ   มนุสฺสา
อาชานียฏฺฐาเน     จ     ฐเปนฺติ     อาชานียโภชนญฺจ     โภเชนฺติ
อาชานียปริมชฺชนญฺจ   ปริมชฺชนฺติ   ตํ   กิสฺส   เหตุ  ตถาหิสฺส  ภิกฺขเว
วิญฺญู   มนุสฺสา  ตานิ  สาเฐยฺยานิ  กูเฏยฺยานิ  ชิเมฺหยฺยานิ  วงฺเกยฺยานิ
ปหีนานิ สมนุปสฺสนฺติ
     {๘๗.๑๙}   เอวเมว  โข  ภิกฺขเว  เอวรูปสฺส  ภิกฺขุโน  กิญฺจาปิ
น   เอวํ   อิจฺฉา  อุปฺปชฺเชยฺย  อโห  วต  มํ  สพฺรหฺมจารี  สกฺกเรยฺยุํ
ครุกเรยฺยุํ   มาเนยฺยุํ   ปูเชยฺยุนฺติ   อถโข  นํ  สพฺรหฺมจารี  สกฺกโรนฺติ
ครุกโรนฺติ  มาเนนฺติ  ปูเชนฺติ  ตํ  กิสฺส  เหตุ  ตถาหิสฺส  ภิกฺขเว  วิญฺญู
สพฺรหฺมจารี เต ปาปเก อกุสเล ธมฺเม ปหีเน สมนุปสฺสนฺตีติ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๒๔ หน้าที่ ๑๗๖-๑๘๐. https://84000.org/tipitaka/read/pali_read.php?B=24&A=3685&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=24&A=3685&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=24&item=87&items=1              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=24&siri=85              ศึกษาอรรถกถานี้ได้ที่ :- https://84000.org/tipitaka/attha/attha.php?b=24&i=87              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=16&A=8143              The Pali Atthakatha in Roman :- https://84000.org/tipitaka/atthapali/read_rm.php?B=16&A=8143              สารบัญพระไตรปิฎกเล่มที่ ๒๔ https://84000.org/tipitaka/read/?index_24 https://84000.org/tipitaka/english/?index_24

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]