ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒๕ ภาษาบาลี อักษรไทย พระสุตตันตปิฎกเล่มที่ ๑๗ สุตฺต. ขุ. ขุทฺทกปาฐ-ธมฺมปทคาถา-อุทานํ-อิติวุตฺตก-สุตฺตนิปาตา

                              สุตฺตนิปาเต ตติยสฺส มหาวคฺคสฺส
                               ทฺวาทสมํ ทฺวยตานุปสฺสนาสุตฺตํ
     [๓๙๐]   ๑๒   เอวมฺเม  สุตํ  ฯ  เอกํ  สมยํ  ภควา  สาวตฺถิยํ
วิหรติ   ปุพฺพาราเม  มิคารมาตุ  ปาสาเท  ฯ  เตน  โข  ปน  สมเยน
ภควา     ตทหุโปสเถ    ปณฺณรเส    ปุณฺณาย    ปุณฺณมาย    รตฺติยา
ภิกฺขุสงฺฆปริวุโต   อพฺโภกาเส   นิสินฺโน   โหติ   ฯ   อถ  โข  ภควา
ตุณฺหีภูตํ ตุณฺหีภูตํ ภิกฺขุสงฺฆํ อนุวิโลเกตฺวา ภิกฺขู อามนฺเตสิ
     {๓๙๐.๒๑๔}   เย  เต  ภิกฺขเว  กุสลา  ธมฺมา อริยา นิยฺยานิกา
สมฺโพธิคามิโน  ๒-  เตสํ โว ภิกฺขเว กุสลานํ ธมฺมานํ อริยานํ นิยฺยานิกานํ
สมฺโพธิคามีนํ   กา   อุปนิสา  สวนายาติ  อิติ  เจ  ภิกฺขเว  ปุจฺฉิตาโร
อสฺสุ   เต   เอวมสฺสุ   วจนียา  ยาวเทว  ทฺวยตานํ  ธมฺมานํ  ยถาภูตํ
ญาณายาติ กิญฺจ ทฺวยตํ วเทถ
     {๓๙๐.๒๑๕}   อิทํ  ทุกฺขํ  อยํ  ทุกฺขสมุทโยติ อยเมกานุปสฺสนา อยํ
ทุกฺขนิโรโธ   อยํ  ทุกฺขนิโรธคามินี  ปฏิปทาติ  อยํ  ทุติยานุปสฺสนา  เอวํ
สมฺมาทฺวยตานุปสฺสิโน  ภิกฺขเว  ภิกฺขุโน  อปฺปมตฺตสฺส อาตาปิโน ปหิตตฺตสฺส
วิหรโต  ทฺวินฺนํ  ผลานํ  อญฺญตรํ  ผลํ  ปาฏิกงฺขํ ทิฏฺเฐว ธมฺเม อญฺญา สติ
@เชิงอรรถ:  ม. ยุ. โมนมชฺชคา ฯ  ม. ยุ. สมฺโพธคามิโน ฯ
วา อุปาทิเสเส อนาคามิตาติ ฯ
                         อิทมโวจ ภควา        อิทํ วตฺวาน สุคโต
                                อถาปรํ เอตทโวจ สตฺถา
     [๓๙๑]   |๓๙๑.๑๑๕๑| เย ทุกฺขํ นปฺปชานนฺติ  อโถ ทุกฺขสฺส สมฺภวํ
                          ยตฺถ จ สพฺพโส ทุกฺขํ      อเสสํ อุปรุชฺฌติ
                          ตญฺจ มคฺคํ น ชานนฺติ     ทุกฺขูปสมคามินํ
     |๓๙๑.๑๑๕๒| เจโตวิมุตฺติหีนา เต          อโถ ปญฺญาวิมุตฺติยา
                          อภพฺพา เต อนฺตกิริยาย  เต เว ชาติชรูปคา ฯ
     |๓๙๑.๑๑๕๓| เย จ ทุกฺขํ ปชานนฺติ       อโถ ทุกฺขสฺส สมฺภวํ
                          ยตฺถ จ สพฺพโส ทุกฺขํ      อเสสํ อุปรุชฺฌติ
                          ตญฺจ มคฺคํ ปชานนฺติ      ทุกฺขูปสมคามินํ
     |๓๙๑.๑๑๕๔| เจโตวิมุตฺติสมฺปนฺนา       อโถ ปญฺญาวิมุตฺติยา
                          ภพฺพา เต อนฺตกิริยาย    น เต ชาติชรูปคาติ ฯ
     [๓๙๒]   สิยา   อญฺเญนปิ   ปริยาเยน   สมฺมาทฺวยตานุปสฺสนาติ
อิติ   เจ   ภิกฺขเว   ปุจฺฉิตาโร  อสฺสุ  สิยาติสฺสุ  วจนียา  ๑-  กถญฺจ
สิยา   ยงฺกิญฺจิ   ทุกฺขํ   สมฺโภติ  สพฺพํ  อุปธิปจฺจยาติ  อยเมกานุปสฺสนา
อุปธีนํ   เตฺวว   อเสสวิราคนิโรธา   นตฺถิ   ทุกฺขสฺส   สมฺภโวติ   อยํ
ทุติยานุปสฺสนา     เอวํ     สมฺมาทฺวยตานุปสฺสิโน    ฯเปฯ    อถาปรํ
เอตทโวจ สตฺถา
     |๓๙๒.๑๑๕๕| อุปธินิทานา ปภวนฺติ ทุกฺขา
@เชิงอรรถ:  โป. สิยา ติสฺส วจนีโย ฯ
                          เย เกจิ โลกสฺมึ อเนกรูปา
                          โย เว อวิทฺวา อุปธึ กโรติ
                          ปุนปฺปุนํ ทุกฺขมุเปติ มนฺโท
                          ตสฺมา ปชานํ อุปธึ น กยิรา
                          ทุกฺขสฺส ชาติปฺปภวานุปสฺสีติ ฯ
     [๓๙๓]   สิยา   อญฺเญนปิ   ปริยาเยน   สมฺมาทฺวยตานุปสฺสนาติ
อิติ   เจ   ภิกฺขเว  ปุจฺฉิตาโร  อสฺสุ  สิยาติสฺสุ  วจนียา  กถญฺจ  สิยา
ยงฺกิญฺจิ    ทุกฺขํ   สมฺโภติ   สพฺพํ   อวิชฺชาปจฺจยาติ   อยเมกานุปสฺสนา
อวิชฺชาย   เตฺวว   อเสสวิราคนิโรธา   นตฺถิ   ทุกฺขสฺส  สมฺภโวติ  อยํ
ทุติยานุปสฺสนา    เอวํ    สมฺมาทฺวยตานุปสฺสิโน   ฯ   ฯเปฯ   อถาปรํ
เอตทโวจ สตฺถา
     |๓๙๓.๑๑๕๖| ชาติมรณสํสารํ               เย วชนฺติ ปุนปฺปุนํ
                          อิตฺถภาวญฺญถาภาวํ       อวิชฺชาเยว สา คติ ฯ
     |๓๙๓.๑๑๕๗| อวิชฺชา หายํ มหาโมโห    ยทิทํ สสฺสตํ ๑- จิรํ
                          วิชฺชาคตา จ เย สตฺตา     น ๓- เต คจฺฉนฺติ ปุนพฺภวนฺติ ฯ
     [๓๙๔]   สิยา  อญฺเญนปิ  ปริยาเยน  ฯเปฯ  กถญฺจ  สิยา ยงฺกิญฺจิ
ทุกฺขํ   สมฺโภติ   สพฺพํ   สงฺขารปจฺจยาติ   อยเมกานุปสฺสนา  สงฺขารานํ
เตฺวว  อเสสวิราคนิโรธา  นตฺถิ  ทุกฺขสฺส  สมฺภโวติ  อยํ  ทุติยานุปสฺสนา
เอวํ สมฺมาทฺวยตานุปสฺสิโน ฯเปฯ อถาปรํ เอตทโวจ สตฺถา
@เชิงอรรถ:  ม. ยุ. เยนิทํ สํสิตํ ฯ   ยุ. นาคจฺฉนฺติ ฯ
     |๓๙๔.๑๑๕๘| ยงฺกิญฺจิ ทุกฺขํ สมฺโภติ     สพฺพํ สงฺขารปจฺจยา
                          สงฺขารานํ นิโรเธน          นตฺถิ ทุกฺขสฺส สมฺภโว ฯ
     |๓๙๔.๑๑๕๙| เอตมาทีนวํ ญตฺวา         ทุกฺขํ สงฺขารปจฺจยา
                          สพฺพสงฺขารสมถา          สญฺญานํ ๑- อุปโรธนา
                          เอวํ ทุกฺขกฺขโย โหติ        เอตํ ญตฺวา ยถาตถํ ฯ
     |๓๙๔.๑๑๖๐| สมฺมทฺทสา เวทคุโน        สมฺมทญฺญาย ปณฺฑิตา
                          อภิภุยฺย ๒- มารสํโยคํ     น คจฺฉนฺติ ปุนพฺภวนฺติ ฯ
     [๓๙๕]   สิยา   อญฺเญนปิ   ปริยาเยน   ฯเปฯ   กถญฺจ   สิยา
ยงฺกิญฺจิ       ทุกฺขํ       สมฺโภติ       สพฺพํ       วิญฺญาณปจฺจยาติ
อยเมกานุปสฺสนา    วิญฺญาณสฺส    เตฺวว    อเสสวิราคนิโรธา    นตฺถิ
ทุกฺขสฺส   สมฺภโวติ   อยํ   ทุติยานุปสฺสนา   เอวํ  สมฺมาทฺวยตานุปสฺสิโน
ฯเปฯ อถาปรํ เอตทโวจ สตฺถา
     |๓๙๕.๑๑๖๑| ยงฺกิญฺจิ ทุกฺขํ สมฺโภติ     สพฺพํ วิญฺญาณปจฺจยา
                          วิญฺญาณสฺส นิโรเธน      นตฺถิ ทุกฺขสฺส สมฺภโว ฯ
     |๓๙๕.๑๑๖๒| เอตมาทีนวํ ญตฺวา         ทุกฺขํ วิญฺญาณปจฺจยา
                          วิญฺญาณูปสมา ภิกฺขุ      นิจฺฉาโต ปรินิพฺพุโตติ ฯ
     [๓๙๖]   สิยา   อญฺเญนปิ   ปริยาเยน   ฯเปฯ   กถญฺจ   สิยา
ยงฺกิญฺจิ    ทุกฺขํ    สมฺโภติ    สพฺพํ   ผสฺสปจฺจยาติ   อยเมกานุปสฺสนา
ผสฺสสฺส   เตฺวว   อเสสวิราคนิโรธา   นตฺถิ   ทุกฺขสฺส   สมฺภโวติ  อยํ
ทุติยานุปสฺสนา     เอวํ     สมฺมาทฺวยตานุปสฺสิโน    ฯเปฯ    อถาปรํ
@เชิงอรรถ:  ยุ. สญฺญาย ฯ  โป. อภิภู ฯ
เอตทโวจ สตฺถา
     |๓๙๖.๑๑๖๓| เตสํ ผสฺสปเรตานํ           ภวโสตานุสารินํ
                          กุมฺมคฺคํ ปฏิปนฺนานํ       อารา สํโยชนกฺขโย ฯ
     |๓๙๖.๑๑๖๔| เย จ ผสฺสํ ปริญฺญาย      ปญฺญาย ๑- อุปสเม รตา
                          เตปิ ๒- ผสฺสาภิสมยา     นิจฺฉาตา ปรินิพฺพุตาติ ฯ
     [๓๙๗]   สิยา  อญฺเญนปิ  ปริยาเยน  ฯเปฯ  กถญฺจ  สิยา ยงฺกิญฺจิ
ทุกฺขํ   สมฺโภติ   สพฺพํ   เวทนาปจฺจยาติ   อยเมกานุปสฺสนา   เวทนานํ
เตฺวว  อเสสวิราคนิโรธา  นตฺถิ  ทุกฺขสฺส  สมฺภโวติ  อยํ  ทุติยานุปสฺสนา
เอวํ สมฺมาทฺวยตานุปสฺสิโน ฯเปฯ อถาปรํ เอตทโวจ สตฺถา
     |๓๙๗.๑๑๖๕| สุขํ วา ยทิ วา ทุกฺขํ         อทุกฺขมสุขํ สห
                          อชฺฌตฺตญฺจ พหิทฺธา จ   ยงฺกิญฺจิ อตฺถิ เวทิตํ
     |๓๙๗.๑๑๖๖| เอตํ ทุกฺขนฺติ ญตฺวาน     โมสธมฺมํ ปโลกินํ
                          ผุสฺส ผุสฺส วยํ ปสฺสํ        เอวํ ตตฺถ วิชานติ ๓- ฯ
                          เวทนานํ ขยา เยว ๔-      นตฺถิ ทุกฺขสฺส สมฺภโวติ ฯ
     [๓๙๘]   สิยา  อญฺเญนปิ  ปริยาเยน  ฯเปฯ  กถญฺจ  สิยา ยงฺกิญฺจิ
ทุกฺขํ    สมฺโภติ    สพฺพํ   ตณฺหาปจฺจยาติ   อยเมกานุปสฺสนา   ตณฺหาย
เตฺวว  อเสสวิราคนิโรธา  นตฺถิ  ทุกฺขสฺส  สมฺภโวติ  อยํ  ทุติยานุปสฺสนา
เอวํ สมฺมาทฺวยตานุปสฺสิโน ฯเปฯ อถาปรํ เอตทโวจ สตฺถา
@เชิงอรรถ:  ม. อญฺญายุปสเม ฯ ยุ. อญฺญาย อุปสเม ฯ  ม. ยุ. เต เว ฯ
@ โป. ยุ. วิรชฺชติ ฯ   ม. ยุ. ภิกฺขุ ฯ
     |๓๙๘.๑๑๖๗| ตณฺหาทุติโย ปุริโส         ทีฆมทฺธาน สํสรํ
                          อิตฺถภาวญฺญถาภาวํ      สํสารํ นาติวตฺตติ ฯ
     |๓๙๘.๑๑๖๘| เอตมาทีนวํ ญตฺวา         ตณฺหา ๑- ทุกฺขสฺส สมฺภวํ
                          วีตตโณฺห อนาทาโน       สโต ภิกฺขุ ปริพฺพเชติ ฯ
     [๓๙๙]   สิยา  อญฺเญนปิ  ปริยาเยน  ฯเปฯ  กถญฺจ  สิยา ยงฺกิญฺจิ
ทุกฺขํ  สมฺโภติ  สพฺพํ  อุปาทานปจฺจยาติ  อยเมกานุปสฺสนา อุปาทานสฺส ๒-
เตฺวว  อเสสวิราคนิโรธา  นตฺถิ  ทุกฺขสฺส  สมฺภโวติ  อยํ  ทุติยานุปสฺสนา
เอวํ สมฺมาทฺวยตานุปสฺสิโน ฯเปฯ อถาปรํ เอตทโวจ สตฺถา
     |๓๙๙.๑๑๖๙| อุปาทานปจฺจยา ภโว     ภูโต ทุกฺขํ นิคจฺฉติ
                          ชาตสฺส มรณํ โหติ          เอโส ทุกฺขสฺส สมฺภโว ฯ
     |๓๙๙.๑๑๗๐| ตสฺมา อุปาทานกฺขยา     สมฺมทญฺญาย ปณฺฑิตา
                          ชาติกฺขยํ อภิญฺญาย       น คจฺฉนฺติ ปุนพฺภวนฺติ ฯ
     [๔๐๐]   สิยา  อญฺเญนปิ  ปริยาเยน  ฯเปฯ  กถญฺจ  สิยา ยงฺกิญฺจิ
ทุกฺขํ   สมฺโภติ   สพฺพํ   อารมฺภปจฺจยาติ   อยเมกานุปสฺสนา  อารมฺภานํ
เตฺวว  อเสสวิราคนิโรธา  นตฺถิ  ทุกฺขสฺส  สมฺภโวติ  อยํ  ทุติยานุปสฺสนา
เอวํ สมฺมาทฺวยตานุปสฺสิโน ฯเปฯ อถาปรํ เอตทโวจ สตฺถา
     |๔๐๐.๑๑๗๑| ยงฺกิญฺจิ ทุกฺขํ สมฺโภติ     สพฺพํ อารมฺภปจฺจยา
                          อารมฺภานํ นิโรเธน         นตฺถิ ทุกฺขสฺส สมฺภโว ฯ
@เชิงอรรถ:  ม. ตณฺหํ ฯ  ม. อุปาทานานํ ฯ
     |๔๐๐.๑๑๗๒| เอตมาทีนวํ ญตฺวา         ทุกฺขํ อารมฺภปจฺจยา
                          สพฺพารมฺภํ ปฏินิสฺสชฺช   อนารมฺเภ วิมุตฺติโน
     |๔๐๐.๑๑๗๓| อุจฺฉินฺนภวตณฺหสฺส        สนฺตจิตฺตสฺส ภิกฺขุโน
                          วิกฺขีโณ ๑- ชาติสํสาโร    นตฺถิ ตสฺส ปุนพฺภโวติ ฯ
     [๔๐๑]   สิยา  อญฺเญนปิ  ปริยาเยน  ฯเปฯ  กถญฺจ  สิยา ยงฺกิญฺจิ
ทุกฺขํ   สมฺโภติ   สพฺพํ   อาหารปจฺจยาติ   อยเมกานุปสฺสนา  อาหารานํ
เตฺวว  อเสสวิราคนิโรธา  นตฺถิ  ทุกฺขสฺส  สมฺภโวติ  อยํ  ทุติยานุปสฺสนา
เอวํ สมฺมาทฺวยตานุปสฺสิโน ฯเปฯ อถาปรํ เอตทโวจ สตฺถา
     |๔๐๑.๑๑๗๔| ยงฺกิญฺจิ ทุกฺขํ สมฺโภติ     สพฺพํ อาหารปจฺจยา
                          อาหารานํ นิโรเธน         นตฺถิ ทุกฺขสฺส สมฺภโว ฯ
     |๔๐๑.๑๑๗๕| เอตมาทีนวํ ญตฺวา         ทุกฺขํ อาหารปจฺจยา
                          สพฺพาหาเร ๒- ปริญฺญาย  สพฺพาหารมนิสฺสิโต
     |๔๐๑.๑๑๗๖| อาโรคฺยํ สมฺมทญฺญาย   อาสวานํ ปริกฺขยา
                          สงฺขาย เสวี ธมฺมฏฺโฐ      สงฺขยนฺโนเปติ ๓- เวทคูติ ฯ
     [๔๐๒]   สิยา   อญฺเญนปิ   ปริยาเยน   ฯเปฯ   กถญฺจ   สิยา
ยงฺกิญฺจิ    ทุกฺขํ    สมฺโภติ   สพฺพํ   อิญฺชิตปจฺจยาติ   อยเมกานุปสฺสนา
อิญฺชิตานํ   เตฺวว   อเสสวิราคนิโรธา   นตฺถิ   ทุกฺขสฺส  สมฺภโวติ  อยํ
ทุติยานุปสฺสนา     เอวํ     สมฺมาทฺวยตานุปสฺสิโน    ฯเปฯ    อถาปรํ
เอตทโวจ สตฺถา
@เชิงอรรถ:  ยุ. วิติณฺโณ ฯ  ม. ยุ. สพฺพาหารํ ฯ  ยุ. สงฺขํ น อุเปติ ฯ
     |๔๐๒.๑๑๗๗| ยงฺกิญฺจิ ทุกฺขํ สมฺโภติ    สพฺพํ อิญฺชิตปจฺจยา
                          อิญฺชิตานํ นิโรเธน         นตฺถิ ทุกฺขสฺส สมฺภโว ฯ
     |๔๐๒.๑๑๗๘| เอตมาทีนวํ ญตฺวา         ทุกฺขํ อิญฺชิตปจฺจยา
                          ตสฺมา หิ ๑- เอชํ โวสฺสชฺช   สงฺขาเร อุปรุนฺธิยา ๒-
                          อเนโช อนุปาทาโน         ตโต ภิกฺขุ ปริพฺพเชติ ฯ
     [๔๐๓]   สิยา   อญฺเญนปิ   ปริยาเยน   ฯเปฯ   กถญฺจ   สิยา
นิสฺสิตสฺส    จลิตํ   โหตีติ   อยเมกานุปสฺสนา   อนิสฺสิโต   น   จลตีติ
อยํ    ทุติยานุปสฺสนา    เอวํ    สมฺมาทฺวยตานุปสฺสิโน    ฯ    ฯเปฯ
อถาปรํ เอตทโวจ สตฺถา
     |๔๐๓.๑๑๗๙| อนิสฺสิโต น จลติ            นิสฺสิโต จ อุปาทิยํ
                          อิตฺถภาวญฺญถาภาวํ      สํสารํ นาติวตฺตติ ฯ
     |๔๐๓.๑๑๘๐| เอตมาทีนวํ ญตฺวา         นิสฺสเยสุ มหพฺภยํ
                          อนิสฺสิโต อนุปาทาโน     สโต ภิกฺขุ ปริพฺพเชติ ฯ
     [๔๐๔]   สิยา   อญฺเญนปิ   ปริยาเยน   ฯเปฯ   กถญฺจ   สิยา
รูเปหิ   ภิกฺขเว   อรูปา   ๓-   สนฺตตราติ  อยเมกานุปสฺสนา  อรูเปหิ
นิโรโธ   สนฺตตโรติ   อยํ   ทุติยานุปสฺสนา  เอวํ  สมฺมาทฺวยตานุปสฺสิโน
ฯเปฯ อถาปรํ เอตทโวจ สตฺถา
     |๔๐๔.๑๑๘๑| เย จ รูปูปคา สตฺตา        เย จ อรูปฏฺฐายิโน ๔-
                          นิโรธํ อปฺปชานนฺตา       อาคนฺตาโร เต ปุนพฺภวํ
     |๔๐๔.๑๑๘๒| เย จ รูเป ปริญฺญาย        อรูเปสุ สุสณฺฐิตา ๕-
@เชิงอรรถ:  ยุ. หิสทฺโท นตฺถิ ฯ   ม. ยุ. อุปรนฺธิย ฯ   ยุ. สพฺพตฺถ อารุปฺปาติ
@ทิสฺสติ  ฯ   ยุ. อารุปฺปวาสิโน ฯ   โป. อารูเปสุ จ สณฺฐิตา ฯ ม. อรูเปสุ
@อสณฺฐิตา ฯ
                          นิโรเธ  เยว มุจฺจนฺติ ๑-     เต ชนา มจฺจุหายิโนติ ฯ
     [๔๐๕]   สิยา  อญฺเญนปิ  ปริยาเยน  ฯเปฯ กถญฺจ สิยา ยํ ภิกฺขเว
สเทวกสฺส    โลกสฺส    สมารกสฺส    สพฺรหฺมกสฺส   สสฺสมณพฺราหฺมณิยา
ปชาย    สเทวมนุสฺสาย    อิทํ    สจฺจนฺติ    อุปนิชฺฌายิตํ   ตทมริยานํ
เอตํ    มุสาติ    ยถาภูตํ    สมฺมปฺปญฺญาย   สุทิฏฺฐํ   อยเมกานุปสฺสนา
ยํ  ภิกฺขเว  สเทวกสฺส  ฯเปฯ  สเทวมนุสฺสาย  อิทํ  มุสาติ  อุปนิชฺฌายิตํ
ตทมริยานํ    เอตํ    สจฺจนฺติ   ยถาภูตํ   สมฺมปฺปญฺญาย   สุทิฏฺฐํ   อยํ
ทุติยานุปสฺสนา     เอวํ     สมฺมาทฺวยตานุปสฺสิโน    ฯเปฯ    อถาปรํ
เอตทโวจ สตฺถา
     |๔๐๕.๑๑๘๓| อนตฺตนิ อตฺตมานี ๒-     ปสฺส โลกํ สเทวกํ
                          นิวิฏฺฐํ นามรูปสฺมึ          อิทํ สจฺจนฺติ มญฺญติ ฯ
     |๔๐๕.๑๑๘๔| เยน เยน หิ มญฺญนฺติ     ตโต ตํ โหติ อญฺญถา
                          ตญฺหิ ตสฺส มุสา โหติ     โมสธมฺมญฺหิ อิตฺตรํ ฯ
     |๔๐๕.๑๑๘๕| อโมสธมฺมํ นิพฺพานํ        ตทริยา สจฺจโต วิทู
                          เต เว สจฺจาภิสมยา        นิจฺฉาตา ปรินิพฺพุตาติ ฯ
     [๔๐๖]   สิยา   อญฺเญนปิ   ปริยาเยน   สมฺมาทฺวยตานุปสฺสนาติ
อิติ   เจ   ภิกฺขเว  ปุจฺฉิตาโร  อสฺสุ  สิยาติสฺสุ  วจนียา  กถญฺจ  สิยา
ยํ      ภิกฺขเว    สเทวกสฺส    โลกสฺส    สมารกสฺส    สพฺรหฺมกสฺส
สสฺสมณพฺราหฺมณิยา   ปชาย   สเทวมนุสฺสาย   อิทํ   สุขนฺติ  อุปนิชฺฌายิตํ
ตทมริยานํ     เอตํ     ทุกฺขนฺติ    ยถาภูตํ    สมฺมปฺปญฺญาย    สุทิฏฺฐํ
@เชิงอรรถ:  ม. ยุ. นิโรเธ เย วิมุจฺจนฺติ ฯ  ม. อตฺตมานึ ฯ ยุ. อตฺตมานํ ฯ
อยเมกานุปสฺสนา  ยํ  ภิกฺขเว  สเทวกสฺส  โลกสฺส  ฯเปฯ สเทวมนุสฺสาย
อิทํ    ทุกฺขนฺติ    อุปนิชฺฌายิตํ    ตทมริยานํ   เอตํ   สุขนฺติ   ยถาภูตํ
สมฺมปฺปญฺญาย   สุทิฏฺฐํ   อยํ   ทุติยานุปสฺสนา  อยํ  สมฺมาทฺวยตานุปสฺสิโน
โข   ภิกฺขเว   ภิกฺขุโน   อปฺปมตฺตสฺส   อาตาปิโน  ปหิตตฺตสฺส  วิหรโต
ทฺวินฺนํ   ผลานํ   อญฺญตรํ   ผลํ  ปาฏิกงฺขํ  ทิฏฺเฐว  ธมฺเม  อญฺญา  สติ
วา อุปาทิเสเส อนาคามิตาติ ฯ
                          อิทมโวจ ภควา          อิทํ วตฺวาน สุคโต
                                  อถาปรํ เอตทโวจ สตฺถา
     |๔๐๖.๑๑๘๖| รูปา สทฺทา คนฺธา รสา ๑-  ผสฺสา ธมฺมา จ เกวลา
                          อิฏฺฐา กนฺตา มนาปา จ    ยาวตตฺถีติ วุจฺจติ
     |๔๐๖.๑๑๘๗| สเทวกสฺส โลกสฺส            เอเต โว สุขสมฺมตา
                          ยตฺถ เจเต นิรุชฺฌนฺติ        ตํ เนสํ ทุกฺขสมฺมตํ ฯ
     |๔๐๖.๑๑๘๘| สุขนฺติ ทิฏฺฐมริเยหิ           สกฺกายสฺสุปโรธนํ
                          ปจฺจนีกมิทํ โหติ              สพฺพโลเกน ปสฺสตํ ฯ
     |๔๐๖.๑๑๘๙| ยํ ปเร สุขโต อาหุ             ตทริยา อาหุ ทุกฺขโต
                          ยํ ปเร ทุกฺขโต อาหุ          ตทริยา สุขโต วิทู
     |๔๐๖.๑๑๙๐| ปสฺส ธมฺมํ ทุราชานํ         สมฺปมูเฬฺหตฺถ อวิทฺทสู ๒-
                          นิวุตานํ ตโม โหติ            อนฺธกาโร อปสฺสตํ
     |๔๐๖.๑๑๙๑| สตญฺจ วิวฏํ โหติ             อาโลโก ปสฺสตามิว
                          สนฺติเก น วิชานนฺติ          มคา ธมฺมสฺส โกวิทา ฯ
@เชิงอรรถ:  ม. ยุ. รสา คนฺธา ฯ    ม. สมฺปมูเฬฺหตฺถวิทฺทสุ ฯ
     |๔๐๖.๑๑๙๒| ภวราคปเรเตหิ                ภวโสตานุสาริหิ
                          มารเธยฺยานุปฺปนฺเนหิ      นายํ ธมฺโม สุสมฺพุโธ ฯ
     |๔๐๖.๑๑๙๓| โก นุ อญฺญตฺร อริเยหิ ๑- ปทํ สมฺพุทฺธมรหติ
                          ยํ ปทํ สมฺมทญฺญาย        ปรินิพฺพนฺติ อนาสวาติ ฯ
     [๔๐๗]   อิทมโวจ   ภควา   ฯ   อตฺตมนา  เต  ภิกฺขู  ภควโต
ภาสิตํ   อภินนฺทุนฺติ   ฯ  อิมสฺมิญฺจ  ปน  ๒-  เวยฺยากรณสฺมึ  ภญฺญมาเน
สฏฺฐิมตฺตานํ ภิกฺขูนํ อนุปาทาย อาสเวหิ จิตฺตานิ วิมุจฺจึสูติ ฯ
                         ทฺวยตานุปสฺสนาสุตฺตํ ทฺวาทสมํ ฯ
                                     ตสฺสุทฺทานํ
           สจฺจํ อุปธิ อวิชฺชา จ         สงฺขารวิญฺญาณปญฺจมํ ๓-
           ผสฺสเวทนิยา ตณฺหา        อุปาทานารมฺภอาหรา ๔-
           อิญฺชิตํ ผนฺทิตํ ๕- รูปํ        สจฺจํ ทุกฺเขน ๖- โสฬสาติ ฯ
                               มหาวคฺโค ตติโย ฯ
                                     ตสฺสุทฺทานํ
           ปพฺพชฺชา จ ปธานา จ      สุภา จ สุนฺทรี ตถา
           มาฆสุตฺตสภิโย จ            เสโล สลฺลํ ปวุจฺจติ
           วาเสฏฺโฐ จาปิ โกกาลิ      นาลโก ทฺวยตานุปสฺสนํ
           ทฺวาทเสตานิ สุตฺตานิ       มหาวคฺโคติ วุจฺจตีติ ฯ
                                  --------------
@เชิงอรรถ:  ม. ยุ. อญฺญตฺรมริเยหิ ฯ   ยุ. ... อภินนฺทุํ อิมสฺมึ โข ปน ฯ
@ ม. สงฺขาเร ฯ ยุ. สงฺขารา ฯ  ม. ยุ. ... ภา อาหารา ฯ
@ ม. อิญฺชิตํ จลิตํ ฯ ยุ. อิญฺชิเต ผนฺทิตํ ฯ   โป. ยุ. สจฺจา ทุกฺเขน ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๒๕ หน้าที่ ๔๗๓-๔๘๓. https://84000.org/tipitaka/read/pali_read.php?B=25&A=9837&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=25&A=9837&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=25&item=390&items=18              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=25&siri=265              ศึกษาอรรถกถานี้ได้ที่ :- https://84000.org/tipitaka/attha/attha.php?b=25&i=390              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=29&A=7544              The Pali Atthakatha in Roman :- https://84000.org/tipitaka/atthapali/read_rm.php?B=29&A=7544              สารบัญพระไตรปิฎกเล่มที่ ๒๕ https://84000.org/tipitaka/read/?index_25 https://84000.org/tipitaka/english/?index_25

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]