ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้า คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒๗ ภาษาบาลี อักษรไทย พระสุตตันตปิฎกเล่มที่ ๑๙ สุตฺต. ขุ. ชาตกํ (๑): เอก-จตฺตาลีสนิปาตชาตกํ

                                         ๕ จุลฺลสุตโสมชาตกํ
     [๒๕๑๙]      อามนฺตยามิ นิคมํ           มิตฺตามจฺเจ ปาริสชฺเช ๑-
                       สิรสฺมึ ปลิตํ ชาตํ             ปพฺพชฺชํทานิ โรจหํ ฯ
     [๒๕๒๐]      อภุํ เม กถํ นุ ภณสิ
                       สลฺลํ เม เทว อุรสิ กปฺเปสิ
                       สตฺตสตา เต ภริยา
@เชิงอรรถ:  ม. ปริสฺสเช ฯ
                       กถํ นุ เต ตา ภวิสฺสนฺติ ฯ
     [๒๕๒๑]      ปญฺญายิหินฺติ เอตา ทหรา
                       อญฺญํปิ ตา คมิสฺสนฺติ
                       สคฺคญฺจ ๑- ปตฺถยาโน
                       เตนาหํ ปพฺพชิสฺสามิ ฯ
     [๒๕๒๒]      ทุลฺลทฺธํ เม อาสิ สุตโสม
                       ยสฺส เต โหมหํ มาตา
                       ยํ เม วิลปนฺติยา
                       อนเปกฺโข ปพฺพชสิ เทว ฯ
                       ทุลฺลทฺธํ เม อาสิ สุตโสม
                       ยํ ตํ อหํ วิชายิสฺสํ
                       ยํ เม วิลปนฺติยา
                       อนเปกฺโข ปพฺพชสิ เทว ฯ
     [๒๕๒๓]      โก นาเมโส ธมฺโม สุตโสม
                       กา จ นาม ปพฺพชฺชา
                       ยํ โน อเมฺห ชิณฺเณ ปหาย
                       อนเปกฺโข ปพฺพชสิ เทว ฯ
     [๒๕๒๔]      ปุตฺตาปิ ตุยฺหํ พหโว
                       ทหรา อปฺปตฺตโยพฺพนา
                       มญฺชู เตปิ ตํ อปสฺสนฺตา
@เชิงอรรถ:  ม. สคฺคํ จสฺส ฯ
                       มญฺเญ ทุกฺขํ นิคจฺฉนฺติ ฯ
     [๒๕๒๕]      ปุตฺเตหิ จ เม เอเตหิ
                       ทหเรหิ อปฺปตฺตโยพฺพเนหิ
                       มญฺชูหิ สพฺเพหิปิ ตุเมฺหหิ
                       จิรํปิ ฐตฺวา วินาภาโว ๑- ฯ
     [๒๕๒๖]      ฉินฺนํ นุ ตุยฺหํ หทยํ
                       อาทู ๒- กรุณา จ นตฺถิ อเมฺหสุ
                       ยํ โน วิกนฺทนฺติโย
                       อนเปกฺโข ปพฺพชสิ เทว ฯ
     [๒๕๒๗]      น จ มยฺหํ ฉินฺนํ หทยํ
                       อตฺถิ กรุณาปิ มยฺหํ ตุเมฺหสุ
                       สคฺคญฺจ ปตฺถยมาโน
                       เตนาหํ ปพฺพชิสฺสามิ ฯ
     [๒๕๒๘]      ทุลฺลทฺธํ เม อาสิ สุตโสม
                       ยสฺส เต อหํ ภริยา
                       ยํ เม วิลปนฺติยา
                       อนเปกฺโข ปพฺพชสิ เทว ฯ
                       ทุลฺลทฺธํ เม อาสิ สุตโสม
                       ยสฺส เต อหํ ภริยา
                       ยํ เม กุจฺฉิปฏิสนฺธึ ๓-
@เชิงอรรถ:  ม. วินาสภาโว ฯ     ม. อทุ เต ฯ   ยุ. ยํ มํ กุจฺฉิมตึ  สนฺตึ ฯ
                       อนเปกฺโข ปพฺพชสิ เทว ฯ
                       ปริปกฺโก เม คพฺโภ กุจฺฉิคโต
                       ยาว นํ วิชายามิ
                       มาหํ เอกา วิธวา
                       ปจฺฉา ทุกฺขานิ อทฺทกฺขึ ฯ
     [๒๕๒๙]      ปริปกฺโก เต คพฺโภ กุจฺฉิคโต
                       อิงฺฆ ตฺวํ วิชายสฺสุ
                       ปุตฺตํ อโนมวณฺณํ
                       ตํ หิตฺวา ปพฺพชิสฺสามิ ฯ
     [๒๕๓๐]      มา ตฺวํ จนฺเท รุทิ
                       มา โสจิ วนติมิรมตฺตกฺขิ
                       อาโรห วรปาสาทํ
                       อนเปกฺโข อหํ คมิสฺสามิ ฯ
     [๒๕๓๑]      โก ตํ อมฺม โกเปสิ
                       กึ โรทสิ เปกฺขสิ จ มํ พาฬฺหํ
                       กํ อวชฺฌํ ฆาเตมิ
                       ญาตีนํ อุทิกฺขมานานํ ฯ
     [๒๕๓๒]      น หิ โส สกฺกา หนฺตุํ
                       วิชิตาวี โย มํ ตาต โกเปสิ
                       ปิตา เต มํ ตาต อวจ
                       อนเปกฺโข อหํ คมิสฺสามิ ฯ
     [๒๕๓๓]      โยหํ ปุพฺเพ รเถน ยามิ ๑-
                       อุยฺยานํ มตฺตกุญฺชเร จ โยเธมิ
                       สุตโสม ปพฺพชิเต
                       กถํ นุทานิ กริสฺสามิ ฯ
     [๒๕๓๔]      มาตุ จ เม รุทนฺตฺยา
                       เชฏฺฐสฺส จ ภาตุโน อกามสฺส
                       หตฺเถปิ เม คหิสฺสํ ๒-
                       น หิ คจฺฉสิ โน อกามานํ ฯ
     [๒๕๓๕]      อุฏฺเฐหิ ตฺวํ ธาติ
                       อิมํ กุมารํ รเมหิ อญฺญตฺถ
                       มา เม ปริปนฺถมกาสิ
                       สคฺคํ มม ปตฺถยานสฺส ฯ
     [๒๕๓๖]      ยนฺนูนิมํ ทเทยฺยํ ๓- ปภงฺกรํ
                       โก นุ เม อิมินา อตฺโถ
                       สุตโสเม ปพฺพชิเต
                       กึ นุ เมนํ กริสฺสามิ ฯ
     [๒๕๓๗]      โกโส จ ตุยฺหํ วิปุโล
                       โกฏฺฐาคารญฺจ ตุยฺหํ ปริปูรํ
                       ปฐวี จ ตุยฺหํ วิชิตา
@เชิงอรรถ:  ม. นิยฺยามิ ฯ   ม. เต คเหสฺสํ ฯ    ยุ. ชเหยฺยํ ฯ
                       รมสฺสุ มา ปพฺพชิ ๑- เทว ฯ
     [๒๕๓๘]      โกโส จ มยฺหํ วิปุโล
                       โกฏฺฐาคารญฺจ มยฺหํ ปริปูรํ
                       ปฐวี จ มยฺหํ วิชิตา
                       ตํ หิตฺวา ปพฺพชิสฺสามิ ฯ
     [๒๕๓๙]      มยฺหํปิ ธนํ ปหูตํ
                       สงฺขาตุํ โนปิ เทว สกฺโกมิ
                       ตํ [๒]- เต ททามิ สพฺพมฺปิ ๓-
                       รมสฺสุ มา ปพฺพชิ เทว ฯ
     [๒๕๔๐]      ชานามิ เต ธนํ ปหูตํ
                       กุลวฑฺฒน ปูชิโต ตยา จสฺมิ
                       สคฺคญฺจ ปตฺถยมาโน
                       เตนาหํ ปพฺพชิสฺสามิ ฯ
     [๒๕๔๑]      อุกฺกณฺฐิโตสฺมิ พาฬฺหํ
                       อรติ มํ โสมทตฺต อาวิสติ
                       พหุกา หิ ๔- อนฺตรายา
                       อชฺเชวาหํ ปพฺพชิสฺสามิ ฯ
     [๒๕๔๒]      อิทํ จ ตุยฺหํ รุจิตํ สุตโสม
                       อชฺเชวทานิ ตฺวํ ปพฺพช
                       อหํปิ ปพฺพชิสฺสามิ
@เชิงอรรถ:  สี. ปพฺพชสฺสุ ฯ ยุ. ปพฺพช ฯ    สี. เทว ฯ   ยุ. สพฺพํ ฯ    ม. พหุกาปิ เม ฯ
                       น อุสฺสเห ตยา วินา อหํ ฐาตุํ ฯ
     [๒๕๔๓]      น หิ สกฺกา ปพฺพชิตุํ นคเร
                       น หิ ปจฺจติ ชนปเท จ ฯ
     [๒๕๔๔]      สุตโสเม ปพฺพชิเต
                       กถนฺนุทานิ กริสฺสาม ฯ
     [๒๕๔๕]      อุปนิยฺยติทํ มญฺเญ
                       ปริตฺตํ อุทกํว ปงฺกวารมฺหิ ๑-
                       เอวํ สุปริตฺตเก ชีวิเต
                       น จ ปมชฺชิตุํ กาโล ฯ
                       อุปนิยฺยติทํ มญฺเญ
                       ปริตฺตํ อุทกํว ปงฺกวารมฺหิ ๒-
                       เอวํ สุปริตฺตเก ชีวิเต
                       อถ พาลา ๓- ปมชฺชนฺติ ฯ
                       เต วฑฺฒยนฺติ นิรยํ
                       ติรจฺฉานโยนิญฺจ ปิตฺติวิสยญฺจ ๔-
                       ตณฺหาพนฺธนพนฺธา
                       วฑฺเฒนฺติ อสุรกายํ ฯ
     [๒๕๔๖]      อูหญฺญเต รชคฺคํ อวิทูเร
                       ปุปฺผกมฺหิ ๕- จ ปาสาเท
                       มญฺเญ โน เกสา ฉินฺนา
@เชิงอรรถ: ๑-๒ ม. จงฺกวาลมุหิ ฯ   ม. อนฺธพาลา ฯ   ม. เปตฺติวิสยํ ฯ   ม. ปุพฺพกมฺหิ ฯ
                       ยสสฺสิโน ธมฺมราชสฺส ฯ
     [๒๕๔๗]      อยมสฺส ปาสาโท
                       โสวณฺณปุปฺผมาลฺยวีติกิณฺโณ
                       ยหิมนุวิจริ ราชา
                       ปริกิณฺโณ อิตฺถาคาเรหิ ฯ
                       อยมสฺส ปาสาโท
                       โสวณฺณปุปฺผมาลฺยวีติกิณฺโณ
                       ยหิมนุวิจริ ราชา
                       ปริกิณฺโณ ญาติสงฺเฆน ฯ
                       อิทมสฺส กูฏาคารํ
                       โสวณฺณปุปฺผมาลฺยวีติกิณฺณํ
                       ยหิมนุวิจริ ราชา
                       ปริกิณฺโณ อิตฺถาคาเรหิ ฯ
                       อิทมสฺส กูฏาคารํ
                       โสวณฺณปุปฺผมาลฺยวีติกิณฺณํ
                       ยหิมนุวิจริ ราชา
                       ปริกิณฺโณ ญาติสงฺเฆน ฯ
                       อยมสฺส อโสกวนิกา
                       สุปุปฺผิตา สพฺพกาลิกา รมฺมา
                       ยหิมนุวิจริ ราชา
                       ปริกิณฺโณ อิตฺถาคาเรหิ ฯ
                       อยมสฺส อโสกวนิกา
                       สุปุปฺผิตา สพฺพกาลิกา รมฺมา
                       ยหิมนุวิจริ ราชา
                       ปริกิณฺโณ ญาติสงฺเฆน ฯ
                       อิทมสฺส อุยฺยานํ
                       สุปุปฺผิตํ สพฺพกาลิกํ รมฺมํ
                       ยหิมนุวิจริ ราชา
                       ปริกิณฺโณ อิตฺถาคาเรหิ ฯ
                       อิทมสฺส อุยฺยานํ
                       สุปุปฺผิตํ สพฺพกาลิกํ รมฺมํ
                       ยหิมนุวิจริ ราชา
                       ปริกิณฺโณ ญาติสงฺเฆน ฯ
                       อิทมสฺส กณิการวนํ
                       สุปุปฺผิตํ สพฺพกาลิกํ รมฺมํ
                       ยหิมนุวิจริ ราชา
                       ปริกิณฺโณ อิตฺถาคาเรหิ ฯ
                       อิทมสฺส กณิการวนํ
                       สุปุปฺผิตํ สพฺพกาลิกํ รมฺมํ
                       ยหิมนุวิจริ ราชา
                       ปริกิณฺโณ ญาติสงฺเฆน ฯ
                       อิทมสฺส ปาฏลิวนํ
                       สุปุปฺผิตํ สพฺพกาลิกํ รมฺมํ
                       ยหิมนุวิจริ ราชา
                       ปริกิณฺโณ อิตฺถาคาเรหิ ฯ
                       อิทมสฺส ปาฏลิวนํ
                       สุปุปฺผิตํ สพฺพกาลิกํ รมฺมํ
                       ยหิมนุวิจริ ราชา
                       ปริกิณฺโณ ญาติสงฺเฆน ฯ
                       อิทมสฺส อมฺพวนํ
                       สุปุปฺผิตํ สพฺพกาลิกํ รมฺมํ
                       ยหิมนุวิจริ ราชา
                       ปริกิณฺโณ อิตฺถาคาเรหิ ฯ
                       อิทมสฺส อมฺพวนํ
                       สุปุปฺผิตํ สพฺพกาลิกํ รมฺมํ
                       ยหิมนุวิจริ ราชา
                       ปริกิณฺโณ ญาติสงฺเฆน ฯ
                       อยมสฺส โปกฺขรณี
                       สญฺฉนฺนา อณฺฑเชหิ วีติกิณฺณา
                       ยหิมนุวิจริ ราชา
                       ปริกิณฺโณ อิตฺถาคาเรหิ ฯ
                       อยมสฺส โปกฺขรณี
                       สญฺฉนฺนา อณฺฑเชหิ วีติกิณฺณา
                       ยหิมนุวิจริ ราชา
                       ปริกิณฺโณ ญาติสงฺเฆน ฯ
     [๒๕๔๘]      ราชา โข ๑- ปพฺพชิโต สุตโสโม
                       รชฺชํ อิมํ ปหนฺตฺวาน
                       กาสายวตฺถวสโน
                       นาโคว เอกโก ๒- จรติ ฯ
     [๒๕๔๙]      มาสฺสุ ปุพฺเพ รติกีฬิตานิ
                       หสิตานิ อนุสฺสริตฺถ ๓-
                       มา โว กามา หนึสุ
                       สุรมฺมญฺหิ ๔- สุทสฺสนํ นครํ
                       เมตฺตจิตฺตญฺจ ภาเวถ
                       อปฺปมาณํ ทิวา จ รตฺโต จ
                       อถ คจฺฉิตฺถ ๕- เทวปุรํ
                       อาวาสํ ปุญฺญกมฺมินนฺติ ๖- ฯ
                                    จุลฺลสุตโสมชาตกํ ปญฺจมํ ฯ
                                                ---------
@เชิงอรรถ:  ม. ราชา โว โข ฯ    สี. เอกโกว ฯ   ยุ. อนุสฺสริตฺโถ ฯ   ม. รมฺมํ หิ ฯ
@ ม. อคจฺฉิตฺถ ฯ    ยุ. ปุญฺญกมฺมานนฺติ ฯ
                                              ตสฺสุทฺทานํ
                                สุวปณฺฑิตชมฺพุก กุณฺฑลิโน
                                วรกญฺญมลมฺพุสชาตกํ จ
                                ปวรุตฺตมสงฺขสิรีวฺหยโก
                                สุตโสมอรินฺทมราชวโร ฯ
                                จตฺตาลีสนิปาตํ นิฏฺฐิตํ ฯ

             เนื้อความพระไตรปิฎกฉบับภาษาบาลี อักษรไทย เล่มที่ ๒๗ หน้าที่ ๕๖๐-๕๗๑. https://84000.org/tipitaka/read/pali_read.php?B=27&A=11569&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=27&A=11569&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=27&item=2519&items=31              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=27&siri=525              ศึกษาอรรถกถาชาดกนี้ได้ที่ :- https://84000.org/tipitaka/attha/attha.php?b=27&i=2519              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=41&A=8921              The Pali Atthakatha in Roman :- https://84000.org/tipitaka/atthapali/read_rm.php?B=41&A=8921              สารบัญพระไตรปิฎกเล่มที่ ๒๗ https://84000.org/tipitaka/read/?index_27 https://84000.org/tipitaka/english/?index_27

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้า คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]