บาลีพระไตรปิฎกเล่มที่ ๒๗ - พระสุตตันตปิฎกเล่มที่ ๑๙

หน้าที่ ๒๓๘.

อฏฺฐกนิปาตชาตกํ ๑ กจฺจานิวคฺโค ๑ กจฺจานิชาตกํ [๑๑๒๑] โอทาตวตฺถา สุจิ อลฺลเกสา กจฺจานิ กึ กุมฺภิมธิสฺสยิตฺวา ^๑- ปิฏฺฐา ติลา โธวสิ ตณฺฑุลานิ ติโลทโน เหหิติ กิสฺส เหตุ ฯ [๑๑๒๒] น โข อยํ พฺราหฺมณ โภชนตฺถํ ^๒- ติโลทโน เหหิติ สาธุปกฺโก ธมฺโม มโต ตสฺส ปหูนมชฺช ^๓- อหํ กริสฺสามิ สุสานมชฺเฌ ฯ [๑๑๒๓] อนุวิจฺจ กจฺจานิ กโรหิ กิจฺจํ ธมฺโม มโต โก นุ ตเวตสํสิ ^๔- สหสฺสเนตฺโต อตุลานุภาโว น มิยฺยตี ธมฺมวโร กทาจิ ฯ [๑๑๒๔] ทฬฺหปฺปมาณํ มม เอตฺถ พฺรหฺเม ธมฺโม มโต นตฺถิ มเมตฺถ กงฺขา เย เยวทานิ ปาปา ภวนฺติ @เชิงอรรถ: ^๑ ยุ. กุมฺภิมปสฺสยิตฺวา ฯ ^๒ สี. ม. โภชนตฺถา ฯ ^๓ สี. ปหูตมชฺช ฯ @ม. ปหุตฺตมชฺช ฯ ยุ. พหูตมชฺช ฯ ^๔ ม. เตฺวว สํสิ ฯ

--------------------------------------------------------------------------------------------- หน้าที่ ๒๓๙.

เต เตวทานิ สุขิตา ภวนฺติ ฯ สุณิสา หิ มยฺหํ วชฺฌา อโหสิ สา มํ วธิตฺวาน วิชายิ ปุตฺตํ สาทานิ สพฺพสฺส กุลสฺส อิสฺสรา อหํ วสามิ ^๑- อปวิฏฺฐา เอกิกา ฯ [๑๑๒๕] ชีวามิ โวหํ น มโตหมสฺมิ ^๒- ตเวว อตฺถาย อิธาคโตสฺมิ ยา ตํ วธิตฺวาน วิชายิ ปุตฺตํ สหาว ปุตฺเตน กโรมิ ภสฺมํ ฯ [๑๑๒๖] เอวญฺจ เต รุจฺจติ เทวราช มเมว อตฺถาย อิธาคโตสิ อหญฺจ ปุตฺโต สุณิสา จ นตฺตา สมฺโมทมานา ฆรมาวเสม ฯ [๑๑๒๗] เอวญฺจ เต รุจฺจติ กาติยานิ หตาปิ สนฺตา น ชหาสิ ธมฺมํ ตุวญฺจ ปุตฺโต สุณิสา จ นตฺตา สมฺโมทมานา ฆรมาวเสถ ฯ [๑๑๒๘] สา กาติยานี สุณิสาย สทฺธึ สมฺโมทมานา ฆรมาวสิตฺถ @เชิงอรรถ: ^๑ สี. ม. ปนมฺหิ ฯ ^๒ สี. ยุ. นาหํ มโตสฺมิ ฯ

--------------------------------------------------------------------------------------------- หน้าที่ ๒๔๐.

ปุตฺโต จ นตฺตา จ อุปฏฺฐหึสุ ฯ เทวานมินฺเทน อธิคฺคหีตาติ ฯ กจฺจานิชาตกํ ปฐมํ ฯ ---------