บาลีพระไตรปิฎกเล่มที่ ๒๗ - พระสุตตันตปิฎกเล่มที่ ๑๙

หน้าที่ ๒๕๓.

นวกนิปาตชาตกํ ๑ คิชฺฌชาตกํ [๑๒๐๗] ปริสงฺกุปโถ นาม คิชฺฌปโถ ^๑- สนนฺตโน ตตฺราสิ มาตาปิตโร คิชฺโฌ โปเสสิ ชิณฺณเก ฯ [๑๒๐๘] เตสํ อชครํ เมทํ อจฺจหาสิ พหุตโส ^๒- ปิตา จ ปุตฺตํ อวจ ชานํ อุจฺจํ ปปาตินํ สุปตฺตํ ปกฺขสมฺปนฺนํ ^๓- เตชสึ ทูรคามินํ ฯ [๑๒๐๙] ปริปฺลวนฺตํ ปฐวึ ยทา ตาต วิชานหิ สาคเรน ปริกฺขิตฺตํ จกฺกํว ปริมณฺฑลํ ตโต ตาต นิวตฺตสฺสุ มาสฺสุ เอตฺโต ปรํ คมิ ฯ [๑๒๑๐] อุทปตฺโตสิ ^๔- เวเคน พลี ปกฺขี ทิชุตฺตโม โอโลกยนฺโต วงฺกงฺโค ปพฺพตานิ วนานิ จ ฯ [๑๒๑๑] อทฺทส ปฐวึ คิชฺโฌ ยถาสฺสาสิ ปิตุสฺสุตํ สาคเรน ปริกฺขิตฺตํ จกฺกํว ปริมณฺฑลํ ฯ [๑๒๑๒] ตญฺจ โส สมติกฺกมฺม ปรเมว ปวตฺตถ ^๕- ตญฺจ วาตสิขา ติกฺขา อจฺจหาสิ พลึ ทิชํ ฯ [๑๒๑๓] นาสกฺขาติคโต โปโส ปุนเทว นิวตฺติตุํ ทิโช พฺยสนมาปาทิ เวรพฺภานํ ^๖- วสํ คโต ฯ @เชิงอรรถ: ^๑ ม. คิชฺฌปนฺโถ ฯ ^๒ สี. ปหุตฺตโต ฯ ม. พหุตฺตโส ฯ ^๓ ม. ถามสมฺปนฺนํ ฯ @^๔ สี. อุทฺธํ ปตฺโตสิ ฯ ^๕ ม. ปรเมวจฺจวตฺตถ ฯ ^๖ ม. เวรมฺภานํ ฯ สี. ยุ. @เวรมฺพานํ ฯ

--------------------------------------------------------------------------------------------- หน้าที่ ๒๕๔.

[๑๒๑๔] ตสฺส ปุตฺตา จ ทารา จ เย จญฺเญ อนุชีวิโน สพฺเพ พฺยสนมาปาทุํ อโนวาทกเร ทิเช ฯ [๑๒๑๕] เอวมฺปิ อิธ วุฑฺฒานํ โย วากฺยํ นาวพุชฺฌติ อติสีมจโร ทิตฺโต คิชฺโฌ วาตีตสาสโน สพฺเพ พฺยสนํ ปปฺโปนฺติ ^๑- อกตฺวา วุฑฺฒสาสนนฺติ ฯ คิชฺฌชาตกํ ปฐมํ ฯ ---------