บาลีพระไตรปิฎกเล่มที่ ๒๗ - พระสุตตันตปิฎกเล่มที่ ๑๙

หน้าที่ ๒๘๘.

๙ มหาธมฺมปาลชาตกํ [๑๔๑๐] กินฺเต วตํ กึ ปน พฺรหฺมจริยํ กิสฺส สุจิณฺณสฺส อยํ วิปาโก อกฺขาหิ เม พฺราหฺมณ เอตมตฺถํ กสฺมา นุ ตุมฺหํ ทหรา น มิยฺยเร ฯ [๑๔๑๑] ธมฺมํ จราม น มุสา ภณาม ปาปานิ กมฺมานิ วิวชฺชยาม ^๑- อนริยํ ปริวชฺเชม ^๒- สพฺพํ ตสฺมา หิ อมฺหํ ทหรา น มิยฺยเร ฯ [๑๔๑๒] สุโณม ธมฺมํ อสตํ สตญฺจ น จาปิ ธมฺมํ อสตํ โรจยาม หิตฺวา อสนฺเต น ชหาม สนฺเต ตสฺมา หิ อมฺหํ ทหรา น มิยฺยเร ฯ [๑๔๑๓] ปุพฺเพว ทานา สุมนา ภวาม ททํปิ เว อตฺตมนา ภวาม ทตฺวาปิ เว นานุตปาม ปจฺฉา ตสฺมา หิ อมฺหํ ทหรา น มิยฺยเร ฯ [๑๔๑๔] สมเณ มยํ พฺราหฺมเณ อทฺธิเก จ วณิพฺพเก ยาจนเก ทลิทฺเท อนฺเนน ปาเนน อภิตปฺปยาม @เชิงอรรถ: ^๑ ม. ปริวชฺชยาม ฯ ^๒ ม. ปริวชฺเชมุ ฯ

--------------------------------------------------------------------------------------------- หน้าที่ ๒๘๙.

ตสฺมา หิ อมฺหํ ทหรา น มิยฺยเร ฯ [๑๔๑๕] มยญฺจ ภริยํ นาติกฺกมาม ภริยาปิ อเมฺห ^๑- นาติกฺกมนฺติ อญฺญตฺร ตาหิ พฺรหฺมจริยํ จราม ตสฺมา หิ อมฺหํ ทหรา น มิยฺยเร ฯ [๑๔๑๖] ปาณาติปาตา วิรมาม สพฺเพ โลเก อทินฺนํ ปริวชฺชยาม อมชฺชปา โนปิ มุสา ภณาม ตสฺมา หิ อมฺหํ ทหรา น มิยฺยเร ฯ [๑๔๑๗] เอตาสุ เว ชายเร สุตฺตมาสุ เมธาวิโน โหนฺติ พหูตปญฺญา พหุสฺสุตา เวทคุนา ^๒- จ โหนฺติ ตสฺมา หิ อมฺหํ ทหรา น มิยฺยเร ฯ [๑๔๑๘] มาตาปิตโร ^[๓]- ภคินีภาตโร จ ปุตฺตา จ ทารา จ มยญฺจ สพฺเพ ธมฺมํ จราม ปรโลกเหตุ ตสฺมา หิ อมฺหํ ทหรา น มิยฺยเร ฯ [๑๔๑๙] ทาสา จ ทาสี ^๔- อนุชีวิโน จ ปริจารกา กมฺมกรา จ สพฺเพ ธมฺมํ จรนฺติ ปรโลกเหตุ @เชิงอรรถ: ^๑ ม. อเมฺห จ ภริยา ฯ ^๒ ม. เวทคุโน ฯ ^๓ ม. จ ฯ @^๔ ม. ทาโสฺย ฯ สี. ยุ. ทาสฺโส ฯ

--------------------------------------------------------------------------------------------- หน้าที่ ๒๙๐.

ตสฺมา หิ อมฺหํ ทหรา น มิยฺยเร ฯ [๑๔๒๐] ธมฺโม หเว รกฺขติ ธมฺมจารึ ธมฺโม สุจิณฺโณ สุขมาวหาติ เอสานิสํโส ธมฺเม สุจิณฺเณ น ทุคฺคตึ คจฺฉติ ธมฺมจารี ฯ [๑๔๒๑] ธมฺโม หเว รกฺขติ ธมฺมจารึ ฉตฺตํ มหนฺตํ วิย วสฺสกาเล ธมฺเมน คุตฺโต มม ธมฺมปาโล อญฺญสฺส อฏฺฐีนิ สุขี กุมาโรติ ฯ มหาธมฺมปาลชาตกํ นวมํ ฯ ---------

เนื้อความพระไตรปิฎกฉบับภาษาบาลี อักษรไทย เล่มที่ ๒๗ หน้าที่ ๒๘๘-๒๙๐. https://84000.org/tipitaka/read/pali_read.php?B=27&A=5866&w=&modeTY=2&pagebreak=1 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=27&A=5866&modeTY=2&pagebreak=1 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=27&item=1410&items=12 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=27&siri=447 ศึกษาอรรถกถาชาดกนี้ได้ที่ :- https://84000.org/tipitaka/attha/attha.php?b=27&i=1410 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=39&A=9819 The Pali Atthakatha in Roman :- https://84000.org/tipitaka/atthapali/read_rm.php?B=39&A=9819 สารบัญพระไตรปิฎกเล่มที่ ๒๗ https://84000.org/tipitaka/read/?index_27 https://84000.org/tipitaka/english/?index_27