บาลีพระไตรปิฎกเล่มที่ ๒๗ - พระสุตตันตปิฎกเล่มที่ ๑๙

หน้าที่ ๓๑๐.

๔ อุทยชาตกํ [๑๕๒๖] เอกา นิสินฺนา สุจิ สญฺญตูรุ ^๑- ปาสาทมารุยฺห อนินฺทิตงฺคี ยาจามิ ตํ กินฺนรเนตฺตจกฺขุ อิเมกรตฺตึ อุภโย วเสม ฯ [๑๕๒๗] โอกิณฺณนฺตรปริกฺขํ ทฬฺหมฏฺฏาลโกฏฺฐกํ รกฺขิตํ ขคฺคหตฺเถหิ ทุปฺปเวสมิทํ ปุรํ ฯ ทหรสฺส ยุวิโน จาปิ อาคโม จ น วิชฺชติ อถ เกน นุ วณฺเณน สงฺคมํ อิจฺฉเส มยา ฯ [๑๕๒๘] ยกฺโขหมสฺมิ กลฺยาณิ อาคโตสฺมิ ตวนฺติเก ^๒- ตฺวํ มํ นนฺทสฺสุ ^๓- ภทฺทนฺเต ปุณฺณกํสํ ททามิ เต ฯ [๑๕๒๙] เทวํ เว ยกฺขํ อถวา มนุสฺสํ น ปตฺถเย อุทยมติจฺจ อญฺญํ คจฺเฉว ตฺวํ ยกฺข มหานุภาว มา จสฺสุ คนฺตฺวา ปุนราวชิตฺถ ฯ [๑๕๓๐] ยา สา รตี อุตฺตมา กามโภคินํ ยํเหตุ สตฺตา วิสมํ จรนฺติ มา ตํ รตึ ชียิ ตุวํ สุจิมฺหิ เต ททามิ เต รูปิยกํสปูรํ ฯ @เชิงอรรถ: ^๑ ม. สญฺญตูรู ฯ ^๒ สี. ยุ. ตวนฺติกํ ฯ ^๓ ม. นนฺทย ฯ

--------------------------------------------------------------------------------------------- หน้าที่ ๓๑๑.

[๑๕๓๑] นารึ นโร นิชฺฌปยํ ธเนน อุกฺกํสตี ยตฺถ กโรติ ฉนฺนํ ^๑- วิปจฺจนีโก ตว เทวธมฺโม ปจฺจกฺขโต โถกตเรน เอสิ ฯ [๑๕๓๒] อายุ จ วณฺโณ จ ^๒- มนุสฺสโลเก นิหิยฺยติ มนุชานํ สุคตฺเต เตเนว วณฺเณน ธนํปิ ตุยฺหํ นิหิยฺยติ ชิณฺณตราสิ อชฺช ฯ เอวํ เม เปกฺขมานสฺส ราชปุตฺติ ยสสฺสินิ หายเต วต เต ^๓- วณฺโณ อโหรตฺตานมจฺจเย อิมินาว ตฺวํ วยสา ราชปุตฺติ สุเมธเส พฺรหฺมจริยํ จเรยฺยาสิ ภิยฺโย วณฺณวตี สิยา ฯ [๑๕๓๓] เทวา น ชีรนฺติ ยถา มนุสฺสา คตฺเตสุ เตสํ วลิโย น โหนฺติ ปุจฺฉามิ ตํ ยกฺข มหานุภาวํ ^๔- กถนฺนุ เทวาน ^๕- สรีรเทโห ฯ [๑๕๓๔] เทวา น ชีรนฺติ ยถา มนุสฺสา คตฺเตสุ เตสํ วลิโย น โหนฺติ สุเว สุเว ภิยฺยตโรว เตสํ @เชิงอรรถ: ^๑ สี. ม. ฉนฺทํ ฯ ^๒ สี. ยุ. อายุํ จ วณฺณํ จ ฯ ^๓ ม. หายเตว ตว... ฯ @^๔ ม. มหานุภาว ฯ ^๕ ยุ. กถํ น เทวานํ ฯ

--------------------------------------------------------------------------------------------- หน้าที่ ๓๑๒.

ทิพฺโพ จ วณฺโณ วิปุลา จ โภคา ฯ [๑๕๓๕] กึสูธ ภีตา ชนตา อเนกา มคฺโค จ เนกายตนปฺปวุตฺโต ปุจฺฉามิ ตํ ยกฺข มหานุภาว กตฺถ ฐิโต ปรโลกํ น ภาเย ฯ [๑๕๓๖] วาจํ มนญฺจ ปณิธาย สมฺมา กาเยน ปาปานิ อกุพฺพมาโน พหุนฺนปานํ ฆรมาวสนฺโต สทฺโธ มุทู สํวิภาคี วทญฺญู สงฺคาหโก สขิโล สณฺหวาโจ เอตฺถ ฐิโต ปรโลกํ น ภาเย ฯ [๑๕๓๗] อนุสาสสิ มํ ยกฺข ยถา มาตา ยถา ปิตา อุฬารวณฺณ ปุจฺฉามิ โก นุ ตฺวมสิ สุพฺรหา ฯ [๑๕๓๘] อุทโยหมสฺมิ กลฺยาณิ สงฺกรตฺถายิธาคโต ^๑- อามนฺต โข ตํ คจฺฉามิ มุตฺโตสฺมิ ตว สงฺกรา ฯ [๑๕๓๙] สเจ โข ตฺวํ อุทโยสิ สงฺกรตฺถายิธาคโต ^๑- อนุสาส มํ ราชปุตฺต ยถาสฺส ปุน สงฺคโม ฯ [๑๕๔๐] อติปตติ ^๒- วโย ขโณ ตเถว ฐานํ นตฺถิ ธุวํ จวนฺติ สตฺตา ปริชียติ อธุวํ สรีรํ @เชิงอรรถ: ^๑ ม. สงฺกรตฺตา อิธาคโต ฯ สี. ยุ. สงฺกรตฺถา อิธาคโต ฯ ^๒ สี. ยุ. อธิปตตี ฯ

--------------------------------------------------------------------------------------------- หน้าที่ ๓๑๓.

อุทเย มา ปมาท จรสฺสุ ธมฺมํ ฯ กสิณา ปฐวี ธนสฺส ปูรา เอกสฺเสว สิยา อนญฺญเธยฺยา ตํ วาปิ ชหาติ ^๑- อวีตราโค อุทเย มา ปมาท จรสฺสุ ธมฺมํ ฯ มาตา ปิตา จ ภาตโร จ ภคินี ภริยา สามิโก สธเนน โหติ ^๒- เต วาปิ ชหนฺติ อญฺญมญฺญํ อุทเย มา ปมาท จรสฺสุ ธมฺมํ ฯ กาโย ปรโภชนนฺติ วิทิตฺวา ^๓- สํสาเร สุคตี จ ทุคฺคตี จ ^๔- อิตฺตรวาโสติ ชานิตฺวา ^๕- อุทเย มา ปมาท จรสฺสุ ธมฺมํ ฯ [๑๕๔๑] สาธุ ภาสติ ^๖- ยํ ยกฺโข อปฺปํ มจฺจาน ชีวิตํ กสิรญฺจ ปริตฺตญฺจ ตญฺจ ทุกฺเขน สํยุตํ สาหํ เอกา ปพฺพชิสฺสามิ หิตฺวา กาสึ สุรุนฺธนนฺติ ฯ อุทยชาตกํ จตุตฺถํ ฯ --------- @เชิงอรรถ: ^๑ ม. ตํ จาปิ ชหติ ฯ ^๒ ม. ภริยา ยาปิ ธเนน โหติ กีตา ฯ ^๓ ม. ญตฺวา ฯ @^๔ ม. ... สุคติญฺจ ทุคฺคติญฺจ ฯ ^๕ ม. ชานิยาน ฯ ^๖ สี. ยุ. ภาสตยํ ฯ