ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒๗ ภาษาบาลี อักษรไทย พระสุตตันตปิฎกเล่มที่ ๑๙ สุตฺต. ขุ. ชาตกํ (๑): เอก-จตฺตาลีสนิปาตชาตกํ

                                        ๑๐ จมฺเปยฺยชาตกํ
     [๒๑๘๐]      กา นุ วิชฺชุริวาภาสิ            โอสธี วิย ตารกา
                       เทวตา นุสิ คนฺธพฺพี           น ตํ มญฺญามิ มานุสี ๑- ฯ
     [๒๑๘๑]      นมฺหิ เทวี น คนฺธพฺพี          น มหาราช มานุสี
                       นาคกญฺญาสฺมิ ภทฺทนฺเต   อตฺเถนมฺหิ อิธาคตา ฯ
     [๒๑๘๒]      วิพฺภนฺตจิตฺตา กุปิตินฺทฺริยาสิ
                       เนตฺเตหิ เต วาริคณา สวนฺติ
@เชิงอรรถ:  ม. มานุสึ ฯ
                       กินฺเต นฏฺฐํ กึ ปน ปตฺถยานา
                       อิธาคตา นาริ ตทิงฺฆ พฺรูหิ ฯ
     [๒๑๘๓]      ยมุคฺคเตโช อุรโคติ จาหุ
                       นาโคติ นํ อาหุ ชโน ๑- ชนินฺท
                       ตมคฺคหี ปุริโส ชีวิกตฺโถ
                       ตํ พนฺธนา มุญฺจ ปตี มเมโส ฯ
     [๒๑๘๔]      กถนฺวยํ พลวิริยูปปนฺโน
                       หตฺถตฺถมาคจฺฉิ วนิพฺพกสฺส
                       อกฺขาหิ เม นาคกญฺเญ ตมตฺถํ
                       กตํ วิชาเนมุ คหีตนาคํ ฯ
     [๒๑๘๕]      นครํปิ นาโค ภสฺมํ กเรยฺย
                       ตถาหิ โส พลวิริยูปปนฺโน
                       ธมฺมญฺจ นาโค อปจายมาโน
                       ตสฺมา ปรกฺกมฺม ตโป กโรติ ฯ
     [๒๑๘๖]      จาตุทฺทสึ ปณฺณรสึ ๒- จ ราช
                       จตุปฺปเถ สมฺมติ นาคราชา
                       ตมคฺคหี ปุริโส ชีวิกตฺโถ
                       ตํ พนฺธนา มุญฺจ ปตี มเมโส ฯ
     [๒๑๘๗]      โสฬสิตฺถีสหสฺสานิ           อามุตฺตมณิกุณฺฑลา
                       วาริเคหสยา นารี            ตาปิ ตํ สรณํ คตา ฯ
@เชิงอรรถ:  ม. ชนา ฯ   ม. ปญฺจทสึ ฯ
                       ธมฺเมน โมเจหิ อสาหเสน
                       คาเมน นิกฺเขน ควํ สเตน
                       โอสฺสฏฺฐกาโย อุรโค จราตุ
                       ปุญฺญตฺถิโก มุญฺจตุ พนฺธนสฺมา ฯ
     [๒๑๘๘]      ธมฺเมน โมเจมิ อสาหเสน
                       คาเมน นิกฺเขน ควํ สเตน
                       โอสฺสฏฺฐกาโย อุรโค จราตุ
                       ปุญฺญตฺถิโก มุญฺจตุ พนฺธนสฺมา ฯ
                       ทมฺมิ นิกฺขสตํ ลุทฺท          ถูลญฺจ มณิกุณฺฑลํ
                       จตุรสฺสญฺจ ปลฺลงฺกํ          อุมฺมารปุปฺผสนฺนิภํ ฯ
                       เทฺว จ สาทิสิโย ภริยา       อุสภญฺจ ควํ สตํ
                       โอสฺสฏฺฐกาโย อุรโค จราตุ
                       ปุญฺญตฺถิโก มุญฺจตุ พนฺธนสฺมา ฯ
     [๒๑๘๙]      วินาปิ ทานา ตว วจนํ ชนินฺท
                       มุญฺเจมุ นํ อุรคํ พนฺธนสฺมา
                       โอสฺสฏฺฐกาโย อุรโค จราตุ
                       ปุญฺญตฺถิโก มุญฺจตุ พนฺธนสฺมา ฯ
     [๒๑๙๐]      มุตฺโต จมฺเปยฺยโก นาโค    ราชานํ เอตทพฺรวิ
                       นโม เต กาสิราชตฺถุ          นโม เต กาสิวฑฺฒน
                       อญฺชลึ เต ปคฺคณฺหามิ      ปสฺเสยฺยํ เม นิเวสนํ ฯ
     [๒๑๙๑]      อทฺธา หิ ทุพฺพิสฺสสเมตมาหุ
                       ยํ มานุโส วิสฺสเส อมานุสมฺหิ
                       สเจ จ มํ ยาจสิ เอตมตฺถํ
                       ทกฺเขมุ เต นาค นิเวสนานิ ฯ
     [๒๑๙๒]      สเจปิ วาโต คิริมาวเหยฺย
                       จนฺโท จ สุริโย จ ฉมา ปเตยฺยุํ
                       สพฺพา จ นชฺโช ปฏิโสตํ วเชยฺยุํ
                       น เตฺววหํ ราช มุสา ภเณยฺยํ ฯ
                       นภํ ผเลยฺย อุทธิ วิสุสฺเส ๑-
                       สํวตฺเตยฺย ภูตธรา วสุนฺธรา
                       สิลุจฺจโย เมรุ สมูลมุพฺพเห
                       น เตฺววหํ ราช มุสา ภเณยฺยํ ฯ
     [๒๑๙๓]      อทฺธา หิ ทุพฺพิสฺสสเมตมาหุ
                       ยํ มานุโส วิสฺสเส อมานุสมฺหิ
                       สเจ จ มํ ยาจสิ เอตมตฺถํ
                       ทกฺเขมุ เต นาค นิเวสนานิ ฯ
     [๒๑๙๔]      ตุเมฺห โขตฺถ โฆรวิสา อุฬารา
                       มหาเตชา ขิปฺปโกปี จ โหถ
                       มม การณา พนฺธนสฺมา ปมุตฺโต
                       อรหสิ โน ชานิตเว ๒- กตานิ ฯ
@เชิงอรรถ:  ม. อุทธีปิ สุสฺเส ฯ   สี. ชานิตาเย ฯ ม. ชานิตุเย ฯ ยุ. ชานิตเย ฯ
     [๒๑๙๕]      โส ปจฺจตํ นิรเย โฆรรูเป
                       มา กายิกํ สาตมลตฺถ กิญฺจิ
                       เปฬาย พนฺโธ มรณํ อุเปตุ
                       โย ตาทิสํ กมฺมกตํ น ชาเน ฯ
     [๒๑๙๖]      สจฺจปฺปฏิญฺญา ตวเมส โหตุ
                       อกฺโกธโน โหหิ อนูปนาหี
                       สพฺพญฺจ เต นาคกุลํ สุปณฺณา
                       อคฺคึว คิมฺหาสุ ๑- วิวชฺชยนฺตุ ฯ
     [๒๑๙๗]      อนุกมฺปสิ นาคกุลํ ชนินฺท
                       มาตา ยถา สุปฺปิยเมกปุตฺตํ
                       อหญฺจ เต นาคกุเลน สทฺธึ
                       กาหามิ เวยฺยาวฏิกํ อุฬารํ ฯ
     [๒๑๙๘]      โยเชนฺตุ เว ราชรเถ สุจิตฺเต
                       กมฺโพชเก อสฺสตเร สุทนฺเต
                       นาเค จ โยเชนฺตุ สุวณฺณกปฺปเน
                       ทกฺเขมุ นาคสฺส นิเวสนานิ ฯ
     [๒๑๙๙]      เภรี มุทิงฺคา ปณวา จ สงฺขา
                       อาวชฺชยึสุ อุคฺคเสนรญฺโญ
                       ปายาสิ ราชา พหุ โสภมาโน
                       ปุรกฺขโต นาริคณสฺส มชฺเฌ ฯ
@เชิงอรรถ:  ม. คิเมฺหสุ ฯ
     [๒๒๐๐]      สุวณฺณจิตฺตกํ ภูมึ            อทฺทกฺขิ กาสิวฑฺฒโน
                       โสวณฺณมเย จ ปาสาเท    เวฬุริยผลกตฺถเต ฯ
                       ส ราชา ปาวิสิ พฺยมฺหํ      จมฺเปยฺยสฺส นิเวสนํ
                       อาทิจฺจวณฺณสนฺนิภํ         กํสวิชฺชุปภสฺสรํ ฯ
                       นานารุกฺเขหิ สญฺฉนฺนํ      นานาคนฺธสมีริตํ
                       โส ปาเวกฺขิ กาสิราชา      จมฺเปยฺยสฺส นิเวสนํ ฯ
                       ปวิฏฺฐสฺมึ กาสิรญฺเญ       จมฺเปยฺยสฺส นิเวสเน
                       ทิพฺพา ตุริยา ปวชฺชึสุ       นาคกญฺญา จ นจฺจิสุํ ๑- ฯ
                       ตํ นาคกญฺญา จริตํ คเณน
                       อนฺวารุหิ กาสิราชา ปสนฺโน
                       นิสีทิ โสวณฺณมยมฺหิ ปีเฐ
                       สาปสฺสเย จนฺทนสารลิตฺเต ฯ
     [๒๒๐๑]      โส ตตฺถ ภุตฺวา จ อโถ รมิตฺวา
                       จมฺเปยฺยกํ กาสิราชา อโวจ
                       วิมานเสฏฺฐานิ อิมานิ ตุยฺหํ
                       อาทิจฺจวณฺณานิ ปภสฺสรานิ
                       เนตาทิสํ อตฺถิ มนุสฺสโลเก
                       กิมตฺถิยํ ๒- นาค ตโป กโรสิ ฯ
                       ตา กมฺพุกายูรธรา สุวตฺถา
                       วฏฺฏงฺคุลี ตมฺพตลูปปนฺนา
@เชิงอรรถ:  สี. ยุ. นจฺจยุํ ฯ   ม. กึ ปตฺถยํ ฯ เอวมุปริปิ ฯ
                       ปคฺคยฺห ปาเยนฺติ อโนมวณฺณา
                       เนตาทิสํ อตฺถิ มนุสฺสโลเก
                       กิมตฺถิยํ นาค ตโป กโรสิ ฯ
                       นชฺโช จ เตมา ปุถุโลมมจฺฉา
                       อาทาสกุนฺตาภิรุทา สุติตฺถา
                       เนตาทิสํ อตฺถิ มนุสฺสโลเก
                       กิมตฺถิยํ นาค ตโป กโรสิ ฯ
                       โกญฺจา มยูรา ทิวิยา จ หํสา
                       วคฺคุสฺสรา โกกิลา สมฺปตนฺติ
                       เนตาทิสํ อตฺถิ มนุสฺสโลเก
                       กิมตฺถิยํ  นาค ตโป กโรสิ ฯ
                       อมฺพา จ สาลา ติลกา จ ชมฺพุโย
                       อุทฺทาลกา ปาฏลิโย จ ผุลฺลา
                       เนตาทิสํ อตฺถิ มนุสฺสโลเก
                       กิมตฺถิยํ นาค ตโป กโรสิ ฯ
                       อิมา จ เต โปกฺขรญฺญา สมนฺตโต
                       ทิพฺยา จ คนฺธา สตตํ สมฺปวายนฺติ
                       เนตาทิสํ อตฺถิ มนุสฺสโลเก
                       กิมตฺถิยํ นาค ตโป กโรสิ ฯ
     [๒๒๐๒]      น ปุตฺตเหตุ น ธนสฺส เหตุ
                       น อายุโน จาปิ ชนินฺท เหตุ
                       มนุสฺสโยนึ อภิปตฺถยาโน
                       ตสฺมา ปรกฺกมฺม ตโป กโรมิ ฯ
     [๒๒๐๓]      ตฺวํ โลหิตกฺโข วิหตนฺตรํโส
                       อลงฺกโต กปฺปิตเกสมสฺสุ
                       สุโรสิโต โลหิตจนฺทเนน
                       คนฺธพฺพราชาว ทิสา ปภาสสิ ฯ
                       เทวิทฺธิปตฺโตสิ มหานุภาโว
                       สพฺเพหิ กาเมหิ สมงฺคิภูโต
                       ปุจฺฉามิ ตํ นาคราเชตมตฺถํ
                       เสยฺโย อิโต เกน มนุสฺสโลโก ฯ
     [๒๒๐๔]      ชนินฺท นาญฺญตฺร มนุสฺสโลกา
                       สุทฺธี ว สํวิชฺชติ สํยโม วา
                       อหญฺจ ลทฺธาน มนุสฺสโยนึ
                       กามามิ ชาติมรณสฺส อนฺตํ ฯ
     [๒๒๐๕]      อทฺธา หเว เสวิตพฺพา สปญฺญา
                       พหุสฺสุตา เย พหุฐานจินฺติโน
                       นาริโย จ ทิสฺวาน ตุวญฺจ นาค
                       กาหามิ ปุญฺญานิ อนปฺปกานิ ฯ
     [๒๒๐๖]      อทฺธา หเว เสวิตพฺพา สปญฺญา
                       พหุสฺสุตา เย พหุฐานจินฺติโน
                       นาริโย จ ทิสฺวาน มมญฺจ ราช
                       กโรหิ ปุญฺญานิ อนปฺปกานิ ฯ
     [๒๒๐๗]      อิทญฺจ เม ชาตรูปํ ปหูตํ
                       ราสิ สุวณฺณสฺส จ ตาลมตฺตา
                       อิโต ๑- หริตฺวา โสวณฺณฆรานิ การย
                       รูปิยสฺส จ ปาการํ กโรนฺตุ ๑- ฯ
                       มุตฺตานญฺจ วาหสหสฺสานิ ปญฺจ
                       เวฬุริยมิสฺสานิ อิโต หริตฺวา
                       อนฺเตปุเร ภูมิยํ สนฺถรนฺตุ
                       นิกฺกทฺทมา เหหิติ นีรชา จ ฯ
                       เอตาทิสํ อาวส ราชเสฏฺฐ
                       วิมานเสฏฺฐํ พหุ โสภมานํ
                       พาราณสึ นครํ อิทฺธํ ผีตํ
                       รชฺชญฺจ กาเรหิ อโนมปญฺญาติ ฯ
                                        จมฺเปยฺยชาตกํ ทสมํ ฯ
                                                ---------


             เนื้อความพระไตรปิฎกฉบับภาษาบาลี อักษรไทย เล่มที่ ๒๗ หน้าที่ ๔๔๘-๔๕๖. https://84000.org/tipitaka/read/pali_read.php?B=27&A=9223&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=27&A=9223&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=27&item=2180&items=28              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=27&siri=506              ศึกษาอรรถกถาชาดกนี้ได้ที่ :- https://84000.org/tipitaka/attha/attha.php?b=27&i=2180              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=41&A=2270              The Pali Atthakatha in Roman :- https://84000.org/tipitaka/atthapali/read_rm.php?B=41&A=2270              สารบัญพระไตรปิฎกเล่มที่ ๒๗ https://84000.org/tipitaka/read/?index_27 https://84000.org/tipitaka/english/?index_27

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]