ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒๘ ภาษาบาลี อักษรไทย พระสุตตันตปิฎกเล่มที่ ๒๐ สุตฺต. ขุ. ชาตกํ (๒): ปญฺญาส-มหานิปาตชาตกํ

                                         ๔ เนมิราชชาตกํ ๑-
     [๕๒๕]        |๕๒๕.๑|   อจฺเฉรํ วต โลกสฺมึ       อุปฺปชฺชนฺติ วิจกฺขณา
                       ยทา อหุ นิมิราชา            ปณฺฑิโต กุสลตฺถิโก
                       |๕๒๕.๒|   ราชา สพฺพวิเทหานํ          อทา ทานํ อรินฺทโม ฯ
                        ตสฺส ตํ ททโต ทานํ          สงฺกปฺโป อุปปชฺชถ
                       ทานํ วา พฺรหฺมจริยํ วา     กตมํ สุ มหปฺผลํ ฯ
     [๕๒๖]        |๕๒๖.๑|   ตสฺส สงฺกปฺปมญฺญาย มฆวา เทวกุญฺชโร
                       สหสฺสเนตฺโต ปาตุรหุ       วณฺเณน วิหตนฺตมํ ฯ
                       |๕๒๖.๒|   สโลมหฏฺโฐ มนุชินฺโท      วาสวํ อวจา นิมิ
                       เทวตา นุสิ คนฺธพฺโพ       อาทู สกฺโก ปุรินฺทโท ฯ
                       |๕๒๖.๓|   น จ เมตาทิโส วณฺโณ      ทิฏฺโฐ วา ยทิวา สุโต
                       อาจิกฺข เม ตฺวํ ภทฺทนฺเต   กถํ ชาเนมุ ตํ มยํ ฯ
                       |๕๒๖.๔|   สโลมหฏฺฐํ ญตฺวาน         วาสโว อวจา นิมึ
                       สกฺโกหมสฺมิ เทวินฺโท       อาคโตสฺมิ ตวนฺติเก
                       อโลมหฏฺโฐ มนุชินฺท       ปุจฺฉ ปญฺหํ ยมิจฺฉสิ ฯ
                       |๕๒๖.๕|   โส จ เตน กโตกาโส         วาสวํ อวจา นิมิ
                       ปุจฺฉามิ ตํ มหาราช          สพฺพภูตานมิสฺสร
                       ทานํ วา พฺรหฺมจริยํ วา     กตมํ สุ มหปฺผลํ ฯ
                       |๕๒๖.๖|   โส ปุฏฺโฐ นรเทเวน          วาสโว อวจา นิมึ
                       วิปากํ พฺรหฺมจริยสฺส        ชานํ อกฺขาสิชานโต ฯ
@เชิงอรรถ:  ม. นิมิชาตกํ ฯ
                       |๕๒๖.๗|   หีเนน พฺรหฺมจริเยน         ขตฺติเย อุปปชฺชติ
                       มชฺฌิเมน จ เทวตฺตํ         อุตฺตเมน วิสุชฺฌติ ฯ
                       |๕๒๖.๘|   น เหเต สุลภา กายา        ยาจโยเคน เกนจิ
                       เย กาเย อุปปชฺชนฺติ         อนาคารา ตปสฺสิโน ฯ
     [๕๒๗]        |๕๒๗.๑|   ทุทีโป สาคโร เสโล      มุจลินฺโท ภคีรโส ๑-
                       อุสินฺนโร อตฺถโก จ          อสฺสโก จ ปุถุทฺธโน ฯ
                       |๕๒๗.๒|   เอเต จญฺเญ จ ราชาโน     ขตฺติยาย พฺราหฺมณา พหู
                       ปุถุยญฺญํ ยชิตฺวาน          เปตตฺตํ นาติวตฺตึสุ ๒- ฯ
     [๕๒๘]        เย อทุติยา น รมนฺติ เอกิกา
                       วิเวกชํ เย น ลภนฺติ ปีตึ
                       กิญฺจาปิ เต อินฺทสมานโภคา
                       เต เว ปราธีนสุขา วรากา ฯ
     [๕๒๙]        |๕๒๙.๑|   อทฺธายิเม ๓- อติวตฺตึสุ  อนาคารา ตปสฺสิโน
                       สตฺติสโย ยามหนุ            โสมยาโค มโนชโว ฯ
                       |๕๒๙.๒|   สมุทฺโท มาโฆ ภรโต ๔-   อิสิ กาลปุรกฺขิโต
                       องฺคีรโส กสฺสโป จ           กีสวจฺโฉ อกนฺติ จ ฯ
     [๕๓๐]        |๕๓๐.๑|   อุตฺตเรน นที สีทา        คมฺภีรา ทุรติกฺกมา
                       นฬคฺคิวณฺณา โชตนฺติ      สทา กญฺจนปพฺพตา ฯ
                       |๕๓๐.๒|   ปรุฬฺหคจฺฉา ตคฺครา        ปรุฬฺหคจฺฉา วนา นคา
                       ตตฺราสุํ ทสสหสฺสา          โปราณา อิสโย ปุเร ฯ
@เชิงอรรถ:  ภคีรโถติ มญฺเญ ฯ    ม. นาติวตฺติสุํ ฯ   ม. อถ ยิเม ฯ   ม. ภรโต จ ฯ
                       |๕๓๐.๓|   อหํ เสฏฺโฐสฺมิ ทาเนน      สญฺญเมน ทเมน จ
                       อนุตฺตรํ วตํ กตฺวา            ปกีรจารี สมาหิเต ฯ
                       |๕๓๐.๔|   ชาติมนฺตํ อชจฺจญฺจ         อหมุชุคตํ นรํ
                       อติเวลํ นมสฺสิสฺสํ            กมฺมพนฺธู หิ มาณวา ฯ
                       |๕๓๐.๕|   สพฺเพ วณฺณา อธมฺมฏฺฐา  ปตนฺติ นิรยํ อโธ
                       สพฺเพ วณฺณา วิสุชฺฌนฺติ  จริตฺวา ธมฺมมุตฺตมํ ฯ
     [๕๓๑]        อิทํ วตฺวาน มาฆวา                   เทวราชา สุชมฺปติ
                       เวเทหมนุสาสิตฺวา                       สคฺคกายํ อปกฺกมิ ฯ
     [๕๓๒]        |๕๓๒.๑|   อิมํ โภนฺโต นิสาเมถ    ยาวนฺเตตฺถ สมาคตา
                       ธมฺมิกานํ มนุสฺสานํ         วณฺณํ อุจฺจาวจํ พหุํ ฯ
                       |๕๓๒.๒|   ยถา อยํ นิมิราชา            ปณฺฑิโต กุสลตฺถิโก
                       ราชา สพฺพวิเทหานํ         อทา ทานํ อรินฺทโม ฯ
                       |๕๓๒.๓|   ตสฺส ตํ ททโต ทานํ          สงฺกปฺโป อุปปชฺชถ
                       ทานํ วา พฺรหฺมจริยํ วา     กตมํ สุ มหปฺผลํ ฯ
     [๕๓๓]        อพฺภูโต วต โลกสฺมึ                   อุปฺปชฺชิ โสมหํสโน
                       ทิพฺโพ รโถ ปาตุรหุ                    เวเทหสฺส ยสสฺสิโน ฯ
     [๕๓๔]        |๕๓๔.๑|   เทวปุตฺโต มหิทฺธิโก     มาตลิ เทวสารถิ
                       นิมนฺตยิตฺถ ราชานํ               เวเทหํ มิถิลคฺคหํ ฯ
                       |๕๓๔.๒|   เอหิมํ รถมารุยฺห                  ราช เสฏฺฐ ทิสมฺปติ
                       เทวา ทสฺสนกามา เต            ตาวตึสา สอินฺทกา
                       สรมานา หิ เต เทวา              สุธมฺมายํ สมจฺฉเร ฯ
     [๕๓๕]        |๕๓๕.๑|   ตโต ราชา ตรมาโน     เวเทโห มิถิลคฺคโห
                       อาสนา วุฏฺฐหิตฺวาน             ปมุโข รถมารุหิ ฯ
                       |๕๓๕.๒|   อภิรุฬฺหํ รถํ ทิพฺพํ                 มาตลิ เอตทพฺรวิ
                       เกน ตํ เนมิ มคฺเคน               ราช เสฏฺฐ ทิสมฺปติ
                       เยน วา ปาปกมฺมนฺตา          ปุญฺญกมฺมา จ เย นรา ฯ
     [๕๓๖]        อุภเยเนว มํ เนหิ                       มาตลิ เทวสารถิ
                       เยน วา ปาปกมฺมนฺตา              ปุญฺญกมฺมา จ เย นรา ฯ
     [๕๓๗]        เกน ตํ ปฐมํ เนมิ                       ราช เสฏฺฐ ทิสมฺปติ
                       เยน วา ปาปกมฺมนฺตา               ปุญฺญกมฺมา จ เย นรา ฯ
     [๕๓๘]        นิรยํ ๑- ตาว ปสฺสามิ                 อาวาสํ ๒- ปาปกมฺมินํ
                       ฐานานิ ลุทฺทกมฺมานํ                 ทุสฺสีลานญฺจ ยา คติ ฯ
     [๕๓๙]        ทสฺเสสิ มาตลิ รญฺโญ                ทุคฺคํ เวตรณึ นทึ
                       กุฏฺฐิตํ ขารสํยุตฺตํ                     ตตฺตํ อคฺคิสิขูปมํ ฯ
     [๕๔๐]        เนมิ หเว มาตลิมชฺฌภาสิ ๓-
                       ทิสฺวา ชนํ ปตมานํ วิทุคฺเค
                       ภยํ หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ ปาปํ
                       เยเม ชนา เวตรณึ ปตนฺติ ฯ
@เชิงอรรถ:  ม. นิรเย ฯ   ม. อาวาเส ฯ   ม. ...อชฺฌภาสถ ฯ
     [๕๔๑]        |๕๔๑.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปาปกมฺมานํ        ชานํ อกฺขาสิชานโต ฯ
                       |๕๔๑.๒|   เย ทุพฺพเล พลวนฺโต ชีวโลเก
                       หึเสนฺติ โรเสนฺติ ๑- สุปาปธมฺมา
                       เต ลุทฺทกมฺมา ปสเวตฺว ปาปํ
                       เตเม ชนา เวตรณึ ปตนฺติ ฯ
     [๕๔๒]        สามา จ โสณา สวลา จ คิชฺฌา
                       กาโกลุสงฺฆา จ อเทนฺติ ๒- เภรวา
                       ภยํ หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ ปาปํ
                       เยเม ชเน กาโกลุสงฺฆา อเทนฺติ ฯ
     [๕๔๓]        |๕๔๓.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปาปกมฺมานํ        ชานํ อกฺขาสิชานโต ฯ
                       |๕๔๓.๒|   เยเกจิเม มจฺฉริโน กทริยา
                       ปริภาสกา สมณพฺราหฺมณานํ
                       หึเสนฺติ โรเสนฺติ สุปาปธมฺมา
                       เต ลุทฺทกมฺมา ปสเวตฺว ปาปํ
                       เตเม ชเน กาโกลุสงฺฆา อเทนฺติ ฯ
     [๕๔๔]        สญฺโชติภูตา ปฐวึ กมนฺติ
@เชิงอรรถ:  ม. หึสนฺติ โรสนฺติ ฯ อิโต ปรํ อีทิสเมว ฯ   ม. กาโกลสงฺฆา อทนฺติ ฯ
@อิโต ปรํ อีทิสเมว ฯ
                       ตตฺเตหิ ขนฺเธหิ จ โปถยนฺติ
                       ภยํ หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ ปาปํ
                       เยเม ชนา ขนฺธหตา สยนฺติ ฯ
     [๕๔๕]        |๕๔๕.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปาปกมฺมานํ       ชานํ อกฺขาสิชานโต ฯ
                       |๕๔๕.๒|   เย ชีวโลกสฺมึ สุปาปธมฺมิโน
                       นรญฺจ นาริญฺจ อปาปธมฺมํ
                       หึเสนฺติ โรเสนฺติ สุปาปธมฺมา
                       เต ลุทฺทกมฺมา ปสเวตฺว ปาปํ
                       เตเม ชนา ขนฺธหตา สยนฺติ ฯ
     [๕๔๖]        องฺคารกาสุํ อปเร ถุนนฺติ ๑-
                       นรา รุทนฺตา ปริทฑฺฒคตฺตา
                       ภยํ หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ ปาปํ
                       เยเม ชนา องฺคารกาสุํ ถุนนฺติ ๑- ฯ
     [๕๔๗]        |๕๔๗.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปาปกมฺมานํ      ชานํ อกฺขาสิชานโต ฯ
@เชิงอรรถ:  ม. ผุณนฺติ ฯ ยุ. ผุนนฺติ ฯ
                       |๕๔๗.๒|   เยเกจิ ปูคาย ธนสฺส ๑- เหตุ
                       สกฺขึ กริตฺวา อิณํ ชาปยนฺติ
                       เต ชาปยิตฺวา ชนตํ ชนินฺท
                       เต ลุทฺทกมฺมา ปสเวตฺว ปาปํ
                       เตเม ชนา องฺคารกาสุํ ถุนนฺติ ฯ
     [๕๔๘]        สญฺโชติภูตา ชลิตา ปทิตฺตา
                       ปทิสฺสติ มหตี โลหกุมฺภี
                       ภยํ หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ ปาปํ
                       เยเม ชนา (อวํสิรา) โลหกุมฺภึ ปตนฺติ ฯ
     [๕๔๙]        |๕๔๙.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปาปกมฺมานํ       ชานํ อกฺขาสิชานโต ฯ
                       |๕๔๙.๒|   เย สีลวนฺตํ สมณํ พฺราหฺมณํ วา
                       หึเสนฺติ โรเสนฺติ สุปาปธมฺมา
                       เต ลุทฺทกมฺมา ปสเวตฺว ปาปํ
                       เตเม ชนา (อวํสิรา) โลหกุมฺภึ ปตนฺติ ฯ
     [๕๕๐]        ลุญฺจนฺติ คีวํ อถ เวฐยิตฺวา
                       อุโณฺหทกสฺมึ ปกิโลทยิตฺวา ๒-
                       ภยํ หิ มํ วินฺทติ สูต ทิสฺวา
@เชิงอรรถ:  สี. ยุ. ปูคายตนสฺส ฯ    ม. ปกิโลตยิตฺวา ฯ สี. ยุ. ปกิเลทยิตฺวา ฯ
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ ปาปํ
                       เยเม ชนา ลุตฺตสิรา สยนฺติ ฯ
     [๕๕๑]        |๕๕๑.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปาปกมฺมานํ        ชานํ อกฺขาสิชานโต ฯ
                       |๕๕๑.๒|   เย ชีวโลกสฺมึ สุปาปธมฺมิโน
                       ปกฺขี คเหตฺวาน วิเหฐยนฺติ
                       เต เหฐยิตฺวา สกุณํ ชนินฺท
                       เต ลุทฺทกมฺมา ปสเวตฺว ปาปํ
                       เตเม ชนา ลุตฺตสิรา สยนฺติ ฯ
     [๕๕๒]        |๕๕๒.๑|   พหุตโตยา อนิขาตกูลา ๑-
                       นที อยํ สนฺทติ สุปฺปติตฺถา
                       ฆมฺมาภิตตฺตา มนุชา ปิวนฺติ
                       ปิวตญฺจ ๒- เตสํ ถุส ๓- โหติ ปานิ
                       |๕๕๒.๒|   ภยํ หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ ปาปํ
                       ปิวตญฺจ เตสํ ถุส โหติ ปานิ ฯ
     [๕๕๓]        |๕๕๓.๑|   ตสฺส ปุฏฺโฐ วิยากาสิ    มาตลิ เทวสารถิ
@เชิงอรรถ:  ม. อนิคาธกูลา ฯ   ม. ปีตญฺจ ฯ อิโต ปรํ อีทิสเมว ฯ   ม. ภุส ฯ อิโต ปรํ
@อีทิสเมว ฯ
                       วิปากํ ปาปกมฺมานํ       ชานํ อกฺขาสิชานโต ฯ
                       |๕๕๓.๒|   เย สุทฺธธญฺญํ ปลาเสน มิสฺสํ
                       อสุทฺธกมฺมา กยิโน ททนฺติ
                       ฆมฺมาภิตตฺตาน ปิปาสิตานํ
                       ปิวตญฺจ เตสํ ถุส โหติ ปานิ ฯ
     [๕๕๔]        อุสูหิ สตฺตีหิ จ โตมเรหิ
                       อุภยานิ ปสฺสานิ ตุทนฺติ กนฺทตํ
                       ภยํ หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ ปาปํ
                       เยเม ชนา สตฺติหตา สยนฺติ ฯ
     [๕๕๕]        |๕๕๕.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปาปกมฺมานํ        ชานํ อกฺขาสิชานโต ฯ
                       |๕๕๕.๒|   เย ชีวโลกสฺมึ อสาธุกมฺมิโน
                       อทินฺนมาทาย กโรนฺติ ชีวิตํ
                       ธญฺญํ ธนํ รชตํ ชาตรูปํ
                       อเชฬกญฺจาปิ ปสุํ มหึสํ ๑-
                       เต ลุทฺทกมฺมา ปสเวตฺว ปาปํ
                       เตเม ชนา สตฺติหตา สยนฺติ ฯ
     [๕๕๖]        คีวาย พนฺธา กิสฺสิเม ปุเนเก
@เชิงอรรถ:  สี. ยุ. มหีสํ ฯ
                       อญฺเญ วิกนฺตา ๑- วิลกตา สยนฺติ ๒-
                       ภยํ หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ ปาปํ
                       เยเม ชนา วิลกตา สยนฺติ ฯ
     [๕๕๗]        |๕๕๗.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปาปกมฺมานํ        ชานํ อกฺขาสิชานโต ฯ
                       |๕๕๗.๒|   โอรพฺภิกา สูกริกา จ มจฺฉิกา
                       ปสุํ มหึสญฺจ อเชฬกญฺจ
                       หนฺตฺวาน สูเณสุ ปสารยึสุ
                       เต ลุทฺทกมฺมา ปสเวตฺว ปาปํ
                       เตเม ชนา วิลกตา สยนฺติ ฯ
     [๕๕๘]        รหโท อยํ มุตฺตกรีสปูโร
                       ทุคฺคนฺธรูโป อสุจิ ปูติ วาติ
                       ขุทฺทาปเรตา มนุชา อเทนฺติ
                       ภยํ หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ ปาปํ
                       เยเม ชนา มุตฺตกรีสภกฺขา ฯ
     [๕๕๙]        |๕๕๙.๑|   ตสฺส ปุฏฺโฐ วิยากาสิ    มาตลิ เทวสารถิ
@เชิงอรรถ:  สี. ยุ. วิกตฺตา ฯ    สี. ยุ. ปุเนเก ฯ
                       วิปากํ ปาปกมฺมานํ     ชานํ อกฺขาสิชานโต ฯ
                       |๕๕๙.๒|   เยเกจิเม การณิกา วิโรสิกา ๑-
                       ปเรสํ วิหึสาย สทา นิวิฏฺฐา
                       เต ลุทฺทกมฺมา ปสเวตฺว ปาปํ
                       มิตฺตทฺทุโน มิฬฺหมเทนฺติ พาลา ฯ
     [๕๖๐]        รหโท อยํ โลหิตปุพฺพปูโร
                       ทุคฺคนฺธรูโป อสุจิ ปูติ วาติ
                       ฆมฺมาภิตตฺตา มนุชา ปิวนฺติ
                       ภยํ หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ ปาปํ
                       เยเม ชนา โลหิตปุพฺพภกฺขา ฯ
     [๕๖๑]        |๕๖๑.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปาปกมฺมานํ        ชานํ อกฺขาสิชานโต ฯ
                       |๕๖๑.๒|   เย มาตรํ วา ปิตรํ วา ชีวโลเก
                       ปาราชิกา อรหนฺเต หนนฺติ
                       เต ลุทฺทกมฺมา ปสเวตฺว ปาปํ
                       เตเม ชนา โลหิตปุพฺพภกฺขา ฯ
     [๕๖๒]        |๕๖๒.๑|   ชิวฺหญฺจ ปสฺส พลิเสน วิทฺธํ
                       วิหตํ ยถา สงฺกุสเกน จมฺมํ
@เชิงอรรถ:  ม. วิโรสกา ฯ
                       ผนฺทนฺติ มจฺฉาว ถลมฺหิ ขิตฺตา
                       มุญฺจนฺติ เขฬํ รุทมานา กิเมเต
                       |๕๖๒.๒|   ภยํ หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ ปาปํ
                       เยเม ชนา วงฺกฆสฺตา สยนฺติ ฯ
     [๕๖๓]        |๕๖๓.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปาปกมฺมานํ        ชานํ อกฺขาสิชานโต ฯ
                       |๕๖๓.๒|   เยเกจิ สณฺฐานคตา ๑- มนุสฺสา
                       อคฺเฆน อคฺฆํ กยํ หาปยนฺติ
                       กูเฏน กูฏํ ธนโลภเหตุ
                       ฉนฺนํ ยถา วาริจรํ วธาย ฯ
                       |๕๖๓.๓|   น หิ กูฏการิสฺส ภวนฺติ ตาณา
                       สเกหิ กมฺเมหิ ปุรกฺขิตสฺส ๒-
                       เต ลุทฺทกมฺมา ปสเวตฺว ปาปํ
                       เตเม ชนา วงฺกฆสฺตา สยนฺติ ฯ
     [๕๖๔]        |๕๖๔.๑|   นาริโย อิมา สมฺปริภินฺนคตฺตา
                       ปคฺคยฺห กนฺทนฺติ ภุเช ทุชจฺจา
                       สมกฺขิตา โลหิตปุพฺพลิตฺตา
                       คาโว ยถา อาฆาตเน วิกนฺตา
@เชิงอรรถ:  ม. สนฺธานคตา ฯ สี. ยุ. สนฺถานคตา ฯ    ม. ปุรกฺขตสฺส ฯ อิโต ปรํ
@อีทิสเมว ฯ
                       ตา ภูมิภาคสฺมึ สทา นิขาตา
                       ขนฺธาติวตฺตนฺติ สโชติภูตา ฯ
                       |๕๖๔.๒|   ภยํ หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิมา นุ นาริโย กิมกํสุ ปาปํ
                       ยา ภูมิภาคสฺมึ สทา นิขาตา
                       ขนฺธาติวตฺตนฺติ สโชติภูตา ฯ
     [๕๖๕]        |๕๖๕.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปาปกมฺมานํ           ชานํ อกฺขาสิชานโต ฯ
                       |๕๖๕.๒|   โกลิตฺถิยาโย ๑- อิธ ชีวโลเก
                       อสุทฺธกมฺมา อสตํ ๒- อจารุํ
                       ตา ทิตฺตรูปา ปติ วิปฺปหาย
                       อญฺญํ อจารุํ รติขิฑฺฑเหตุ
                       ตา ชีวโลกสฺมึ รมาปยิตฺวา
                       ขนฺธาติวตฺตนฺติ สโชติภูตา ฯ
     [๕๖๖]        ปาเท คเหตฺวา กิสฺสิเม ปุเนเก
                       อวํสิรา นรเก ปาตยนฺติ
                       ภยํ หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
@เชิงอรรถ:  สี. ยุ. โกลีนิยาโย ฯ   อยุตฺตนฺติปิ ฯ
                       อิเม นุ มจฺจา กิมกํสุ ปาปํ
                       เยเม ชนา (อวํสิรา) นรเก ปาตยนฺติ ฯ
     [๕๖๗]        |๕๖๗.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปาปกมฺมานํ        ชานํ อกฺขาสิชานโต ฯ
                       |๕๖๗.๒|   เย ชีวโลกสฺมึ อสาธุกมฺมิโน
                       ปรสฺส ทารานิ อติกฺกมนฺติ
                       เต ตาทิสา อุตฺตมภณฺฑเถนา
                       เตเม ชนา (อวํสิรา) นรเก ปาตยนฺติ ฯ
                       |๕๖๗.๓|   เต วสฺสปูคานิ พหูนิ ตตฺถ
                       นิรเยสุ ทุกฺขํ เวทนํ เวทยนฺติ
                       น หิ ปาปการิสฺส ภวนฺติ ตาณา
                       สเกหิ กมฺเมหิ ปุรกฺขิตสฺส
                       เต ลุทฺทกมฺมา ปสเวตฺว ปาปํ
                       เตเม ชนา (อวํสิรา) นรเก ปาตยนฺติ ฯ
     [๕๖๘]        อุจฺจาวจาเม วิวิธา อุปกฺกมา
                       นิรเยสุ ทิสฺสนฺติ สุโฆรรูปา
                       ภยํ หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ ปาปํ
                       เยเม ชนา อธิมตฺตา ทุกฺขา ติปฺปา ๑-
@เชิงอรรถ:  ม. ติพฺพา ฯ อิโต ปรํ อีทิสเมว ฯ
                       ขรา กฏุกา เวทนา เวทยนฺติ ฯ
     [๕๖๙]        |๕๖๙.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปาปกมฺมานํ        ชานํ อกฺขาสิชานโต ฯ
                       |๕๖๙.๒|   เย ชีวโลกสฺมึ สุปาปทิฏฺฐิโน
                       วิสฺสาสกมฺมานิ กโรนฺติ โมหา
                       ปรญฺจ ทิฏฺฐีสุ สมาทเปนฺติ
                       เต ปาปทิฏฺฐี ๑- ปสเวตฺว ปาปํ
                       เตเม ชนา อธิมตฺตา ทุกฺขา ติปฺปา
                       ขรา กฏุกา เวทนา เวทยนฺติ ฯ
     [๕๗๐]        วิทิตานิ เต มหาราช                   อาวาสํ ปาปกมฺมินํ
                       ฐานานิ ลุทฺทกมฺมานํ                   ทุสฺสีลานญฺจ ยา คติ
                       อุยฺยาหิทานิ ราชิสิ                       เทวราชสฺส สนฺติเก ฯ
     [๕๗๑]        |๕๗๑.๑|   ปญฺจถูปํ ทิสฺสติทํ วิมานํ
                       มาลาปิลนฺธา สยนสฺส มชฺเฌ
                       ตตฺถจฺฉตี นาริ มหานุภาวา
                       อุจฺจาวจํ อิทฺธิ วิกุพฺพมานา
                       |๕๗๑.๒|   วิตฺตี หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อยํ นุ นารี กิมกาสิ สาธุํ
                       ยา โมทตี สคฺคปฺปตฺตา วิมาเน ฯ
@เชิงอรรถ:  ยุ. ปาปทิฏฺฐีสุ ฯ
     [๕๗๒]        ตสฺส ปุฏฺโฐ วิยากาสิ                  มาตลิ เทวสารถิ
                       วิปากํ ปุญฺญกมฺมานํ                   ชานํ อกฺขาสิชานโต ฯ
                       ยทิ เต สุตา พิรณี ๑- ชีวโลเก
                       อามายทาสี อหุ พฺราหฺมณสฺส
                       สา ปตฺตกาลํ ๒- อติถึ วิทิตฺวา
                       มาตาว ปุตฺตํ สกิมาภินนฺที
                       สญฺญมา สํวิภาคา จ                   สา วิมานสฺมิ โมทติ ฯ
     [๕๗๓]        |๕๗๓.๑|   ททฺทลฺลมานา อาภนฺติ ๓-   วิมานา สตฺต นิมฺมิตา
                       ตตฺถ ยกฺโข มหิทฺธิโก     สพฺพาภรณภูสิโต
                       สมนฺตา อนุปริยายติ     นารีคณปุรกฺขิโต ฯ
                       |๕๗๓.๒|   วิตฺตี หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อยํ นุ มจฺโจ กิมกาสิ สาธุํ
                       โย โมทติ สคฺคปฺปตฺโต วิมาเน ฯ
     [๕๗๔]        |๕๗๔.๑|   ตสฺส ปุฏฺโฐ วิยากาสิ   มาตลิ เทวสารถิ
                       วิปากํ ปุญฺญกมฺมานํ     ชานํ อกฺขาสิชานโต ฯ
                       |๕๗๔.๒|   โสณทินฺโน คหปติ         เอส ทานปตี อหุ
                       เอส ปพฺพชิตุทฺทิสฺส       วิหาเร สตฺต การยิ ฯ
                       |๕๗๔.๓|   สกฺกจฺจนฺเต อุปฏฺฐาสิ    ภิกฺขโว ตตฺถ วาสิเก
                       อจฺฉาทนญฺจ ภตฺตญฺจ   เสนาสนํ ปทีปยํ
@เชิงอรรถ:  วรุณีติปิ ฯ    ม. ปตฺตกาเล ฯ     ม. อาเภนฺติ ฯ
                       อทาสิ อุชุภูเตสุ            วิปฺปสนฺเนน เจตสา ฯ
                       |๕๗๔.๔|   จาตุทฺทสึ ปญฺจทสึ      ยา จ ปกฺขสฺส อฏฺฐมี
                       ปาฏิหาริยปกฺขญฺจ     อฏฺฐงฺคสุสมาหิตํ
                       อุโปสถํ อุปวสิ           สทา สีเลสุ สํวุโต
                       สญฺญโม สํวิภาโค จ    โส วิมานสฺมิ โมทติ ฯ
     [๕๗๕]        |๕๗๕.๑|   ปภาสติมิทํ พฺยมฺหํ      ผลิกาสุ สุนิมฺมิตํ
                       นารีวรคณากิณฺณํ        กูฏาคารวิโรจิตํ
                       อุเปตํ อนฺนปาเนหิ       นจฺจคีเตหิ จูภยํ ฯ
                       |๕๗๕.๒|   วิตฺตี หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิมา นุ นารี ๑- กิมกํสุ สาธุํ
                       ยา ๒- โมทเร สคฺคปฺปตฺตา วิมาเน ฯ
     [๕๗๖]        |๕๗๖.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปุญฺญกมฺมานํ      ชานํ อกฺขาสิชานโต ฯ
                       |๕๗๖.๒|   ยากาจิ นารี อิธ ชีวโลเก
                       สีลวนฺติโย อุปาสิกา
                       ทาเน รตา นิจฺจปสนฺนจิตฺตา
                       สจฺเจ ฐิตา อุโปสเถ อปฺปมตฺตา
                       สญฺญมา สํวิภาคา จ      ตา วิมานสฺมิ โมทเร ฯ
     [๕๗๗]        |๕๗๗.๑|   ปภาสติมิทํ พฺยมฺหํ     เวฬุริยาสุ นิมฺมิตํ
@เชิงอรรถ:  ม. อิเม นุ มจฺจา ฯ     ม. เย ฯ
                       อุเปตํ ภูมิภาเคหิ           วิภตฺตํ ภาคโส มิตํ ฯ
                       |๕๗๗.๒|   อาลมฺพรา มุทิงฺคา จ       นจฺจคีตา สุวาทิตา
                       ทิพฺพา สทฺทา นิจฺฉรนฺติ สวนียา มโนรมา ฯ
                       |๕๗๗.๓|   นาหํ เอวํ คตํ ชาตุ          เอวํ สุรุจิรํ ปุเร
                       สทฺทํ สมภิชานามิ          ทิฏฺฐํ วา ยทิยา สุตํ ฯ
                       |๕๗๗.๔|  วิตฺตี หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ สาธุํ
                       เย โมทเร สคฺคปฺปตฺตา วิมาเน ฯ
     [๕๗๘]        |๕๗๘.๑|   ตสฺส ปุฏฺโฐ วิยากาสิ   มาตลิ เทวสารถิ
                       วิปากํ ปุญฺญกมฺมานํ     ชานํ อกฺขาสิชานโต ฯ
                       |๕๗๘.๒|   เยเกจิ มจฺจา อิธ ชีวโลเก   สีลวนฺตา ๑- อุปาสกา
                       อาราเม อุทปาเน จ       ปปา สงฺกมนานิ จ
                       อรหนฺเต สีติภูเต            สกฺกจฺจํ ปฏิปาทยุํ
                       |๕๗๘.๓|   จีวรํ ปิณฺฑปาตญฺจ         ปจฺจยํ สยนาสนํ
                       อทํสุ อุชุภูเตสุ               วิปฺปสนฺเนน เจตสา ฯ
                       |๕๗๘.๔|   จาตุทฺทสึ ปญฺจทสึ        ยา จ ปกฺขสฺส อฏฺฐมี
                       ปาฏิหาริยปกฺขญฺจ       อฏฺฐงฺคสุสมาหิตํ
                       |๕๗๘.๕|   อุโปสถํ อุปวสุํ              สทา สีเลสุ สํวุตา
                       สญฺญมา สํวิภาคา จ    เต วิมานสฺมิ โมทเร ฯ
@เชิงอรรถ:  สี. ยุ. สีลวนฺโต ฯ
     [๕๗๙]        |๕๗๙.๑|   ปภาสติมิทํ พฺยมฺหํ      ผลิกาสุ สุนิมฺมิตํ
                       นารีวรคณากิณฺณํ       กูฏาคารวิโรจิตํ
                       |๕๗๙.๒|   อุเปตํ อนฺนปาเนหิ        นจฺจคีเตหิ จูภยํ
                       นชฺโช อนุปริยายติ ๑-    นานาปุปฺผทุมายุตา ฯ
                       |๕๗๙.๓|   วิตฺตี หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อยํ นุ มจฺโจ กิมกาสิ สาธุํ
                       โย โมทติ สคฺคปฺปตฺโต วิมาเน ฯ
     [๕๘๐]        |๕๘๐.๑|   ตสฺส ปุฏฺโฐ วิยากาสิ   มาตลิ เทวสารถิ
                       วิปากํ ปุญฺญกมฺมานํ     ชานํ อกฺขาสิชานโต ฯ
                       |๕๘๐.๒|   มิถิลายํ คหปติ             เอส ทานปตี อหุ
                       อาราเม อุทปาเน จ       ปปา สงฺกมนานิ จ
                       อรหนฺเต สีติภูเต           สกฺกจฺจํ ปฏิปาทยิ
                       |๕๘๐.๓|   จีวรํ ปิณฺฑปาตญฺจ      ปจฺจยํ สยนาสนํ
                       อทาสิ อุชุภูเตสุ           วิปฺปสนฺเนน เจตสา ฯ
                       |๕๘๐.๔|   จาตุทฺทสึ ปญฺจทสึ       ยา จ ปกฺขสฺส อฏฺฐมี
                       ปาฏิหาริยปกฺขญฺจ       อฏฺฐงฺคสุสมาหิตํ
                       |๕๘๐.๕|   อุโปสถํ อุปวสิ            สทา สีเลสุ สํวุโต
                       สญฺญโม สํวิภาโค จ    โส วิมานสฺมิ โมทติ ฯ
     [๕๘๑]        |๕๘๑.๑|   ปภาสติมิทํ พฺยมฺหํ      ผลิกาสุ สุนิมฺมิตํ ๒-
@เชิงอรรถ:  ม. จานุปริยาติ ฯ     ยุ. เวฬุริยาสุ นิมฺมิตํ ฯ
                       นารีวรคณากิณฺณํ       กูฏาคารวิโรจิตํ
                       |๕๘๑.๒|   อุเปตํ อนฺนปาเนหิ              นจฺจคีเตหิ จูภยํ
                       นชฺโช อนุปริยายติ ๑-         นานาปุปฺผทุมายุตา
                       |๕๘๑.๓|   ราชายตนา กปิฏฺฐา จ          อมฺพา สาลา จ ชมฺพุโย
                       ติณฺฑุกา จ ปิยาลา จ           ทุมา นิจฺจผลา พหู ฯ
                       |๕๘๑.๔|   วิตฺตี หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อยํ นุ มจฺโจ กิมกาสิ สาธุํ
                       โย โมทติ สคฺคปฺปตฺโต วิมาเน ฯ
     [๕๘๒]        |๕๘๒.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปุญฺญกมฺมานํ      ชานํ อกฺขาสิชานโต ฯ
                       |๕๘๒.๒|   มิถิลายํ คหปติ                เอส ทานปตี อหุ
                       อาราเม อุทปาเน จ          ปปา สงฺกมนานิ จ
                       อรหนฺเต สีติภูเต              สกฺกจฺจํ ปฏิปาทยิ
                       |๕๘๒.๓|   จีวรํ ปิณฺฑปาตญฺจ          ปจฺจยํ สยนาสนํ
                       อทาสิ อุชุภูเตสุ               วิปฺปสนฺเนน เจตสา ฯ
                       |๕๘๒.๔|   จาตุทฺทสึ ปญฺจทสึ          ยา จ ปกฺขสฺส อฏฺฐมี
                       ปาฏิหาริยปกฺขญฺจ         อฏฺฐงฺคสุสมาหิตํ
                       |๕๘๒.๕|   อุโปสถํ อุปวสิ                 สทา สีเลสุ สํวุโต
                       สญฺญโม สํวิภาโค จ        โส วิมานสฺมิ โมทติ ฯ
@เชิงอรรถ:  ม. จานุปริยาติ ฯ
     [๕๘๓]        |๕๘๓.๑|   ปภาสติมิทํ พฺยมฺหํ        เวฬุริยาสุ นิมฺมิตํ
                       อุเปตํ ภูมิภาเคหิ            วิภตฺตํ ภาคโส มิตํ
                       |๕๘๓.๒|   อาลมฺพรา มุทิงฺคา จ       นจฺจคีตา สุวาทิตา
                       ทิพฺพา สทฺทา นิจฺฉรนฺติ  สวนียา มโนรมา
                       |๕๘๓.๓|   นาหํ เอวํ คตํ ชาตุ          เอวํ สุรุจิรํ ปุเร
                       สทฺทํ สมภิชานามิ        ทิฏฺฐํ วา ยทิวา สุตํ ฯ
                       |๕๘๓.๔|   วิตฺตี หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อยํ นุ มจฺโจ กิมกาสิ สาธุํ
                       โย โมทติ สคฺคปฺปตฺโต วิมาเน ฯ
     [๕๘๔]        |๕๘๔.๑|   ตสฺส ปุฏฺโฐ วิยากาสิ   มาตลิ เทวสารถิ
                       วิปากํ ปุญฺญกมฺมานํ     ชานํ อกฺขาสิชานโต ฯ
                       |๕๘๔.๒|   พาราณสิยํ คหปติ        เอส ทานปตี อหุ
                       อาราเม อุทปาเน จ       ปปา สงฺกมนานิ จ
                       อรหนฺเต สีติภูเต           สกฺกจฺจํ ปฏิปาทยิ
                       |๕๘๔.๓|   จีวรํ ปิณฺฑปาตญฺจ        ปจฺจยํ สยนาสนํ
                       อทาสิ อุชุภูเตสุ            วิปฺปสนฺเนน เจตสา ฯ
                       |๕๘๔.๔|   จาตุทฺทสึ ปญฺจทสึ        ยา จ ปกฺขสฺส อฏฺฐมี
                       ปาฏิหาริยปกฺขญฺจ      อฏฺฐงฺคสุสมาหิตํ
                       |๕๘๔.๕|   อุโปสถํ อุปวสิ               สทา สีเลสุ สํวุโต
                       สญฺญโม สํวิภาโค จ   โส วิมานสฺมิ โมทติ ฯ
     [๕๘๕]        |๕๘๕.๑|   ยถา อุทยมาทิจฺโจ      โหติ โลหิตโก มหา
                       ตถูปมํ อิทํ พฺยมฺหํ         ชาตรูปสฺส นิมฺมิตํ ฯ
                       |๕๘๕.๒|   วิตฺตี หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อยํ นุ มจฺโจ กิมกาสิ สาธุํ
                       โย โมทติ สคฺคปฺปตฺโต วิมาเน ฯ
     [๕๘๖]        |๕๘๖.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปุญฺญกมฺมานํ     ชานํ อกฺขาสิชานโต ฯ
                       |๕๘๖.๒|   สาวตฺถิยํ คหปติ            เอส ทานปตี อหุ
                       อาราเม อุทปาเน จ         ปปา สงฺกมนานิ จ
                       อรหนฺเต สีติภูเต             สกฺกจฺจํ ปฏิปาทยิ
                       |๕๘๖.๓|   จีวรํ ปิณฺฑปาตญฺจ        ปจฺจยํ สยนาสนํ
                       อทาสิ อุชุภูเตสุ             วิปฺปสนฺเนน เจตสา ฯ
                       |๕๘๖.๔|   จาตุทฺทสึ ปญฺจทสึ        ยา จ ปกฺขสฺส อฏฺฐมี
                       ปาฏิหาริยปกฺขญฺจ        อฏฺฐงฺคสุสมาหิตํ
                       |๕๘๖.๕|   อุโปสถํ อุปวสิ              สทา สีเลสุ สํวุโต
                       สญฺญโม สํวิภาโค จ      โส วิมานสฺมิ โมทติ ฯ
     [๕๘๗]        |๕๘๗.๑|   เวหายสาเม พหุกา      ชาตรูปสฺส นิมฺมิตา
                       ททฺทลฺลมานา อาภนฺติ  วิชฺชุวพฺภฆนนฺตเร
                       ตตฺถ ๑- ยกฺขา มหิทฺธิกา  สพฺพาภรณภูสิตา
                       สมนฺตา อนุปริยายนฺติ     นารีคณปริวุตา ๑- ฯ
                       |๕๘๗.๒|   วิตฺตี หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิเม นุ มจฺจา กิมกํสุ สาธุํ
                       เย โมทเร สคฺคปฺปตฺตา วิมาเน ฯ
     [๕๘๘]        |๕๘๘.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปุญฺญกมฺมานํ    ชานํ อกฺขาสิชานโต ฯ
                       |๕๘๘.๒|   สทฺธาย สุนิวิฏฺฐาย        สทฺธมฺเม สุปฺปเวทิเต
                       อกํสุ สตฺถุ วจนํ             สมฺมาสมฺพุทฺธสาวกา ๒-
                       เตสํ เอตานิ ฐานานิ       ยานิ ตฺวํ ราช ปสฺสสิ ฯ
     [๕๘๙]        วิทิตานิ เต มหาราช                  อาวาสํ ปาปกมฺมินํ
                       อโถ กลฺยาณกมฺมานํ                 ฐานานิ วิทิตานิ เต
                       อุยฺยาหิทานิ ราชิสิ                    เทวราชสฺส สนฺติเก ฯ
     [๕๙๐]        สหสฺสยุตฺตํ หยวาหึ                   ทิพฺพยานมธิฏฺฐิโต
                       ยายมาโน มหาราชา                   อทฺทา สีทนฺตเร นเค
                       ทิสฺวานามนฺตยิ สูตํ                     อิเม เก นาม ปพฺพตา ฯ
                       [๓]-
     [๕๙๑]        |๕๙๑.๑|   สุทสฺสโน กรวีโก         อิสินฺธโร ๔- ยุคนฺธโร
                       เนมินฺธโร วินตโก           อสฺสกณฺโณ คิริพฺรหา
                       |๕๙๑.๒|   เอเต สีทนฺตเร นคา         อนุปุพฺพสมุคฺคตา
@เชิงอรรถ: ๑-๑ ม. อยํ คาถา นตฺถิ ฯ   สี. ยุ. สมฺมาสมฺพุทฺธสาสนํ ฯ
@ ม.    ตสฺส ปุฏฺโฐ วิยากาสิ        มาตลิ เทวสารถิ
@        วิปากํ ปุญฺญกมฺมานํ          ชานํ อกฺขาสิชานโต ฯ
@ ม. อีสธโร ฯ
                       มหาราชานมาวาสา        ยานิ ตฺวํ ราช ปสฺสสิ ฯ
     [๕๙๒]        |๕๙๒.๑|   อเนกรูปํ รุจิรํ               นานาจิตฺตํ ปกาสติ
                       อากิณฺณํ อินฺทสทิเสหิ  พฺยคฺเฆเหว สุรกฺขิตํ ฯ
                       |๕๙๒.๒|   วิตฺตี หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
                       อิมํ นุ ทฺวารํ กิมภญฺญมาหุ ๑-
                       มโนรมํ ทิสฺสติ ทูรโตว ฯ
     [๕๙๓]        |๕๙๓.๑|   ตสฺส ปุฏฺโฐ วิยากาสิ    มาตลิ เทวสารถิ
                       วิปากํ ปุญฺญกมฺมานํ     ชานํ อกฺขาสิชานโต ฯ
                       |๕๙๓.๒|   จิตฺตกูโฏติ ยํ อาหุ         เทวราชปฺปเวสนํ
                       สุทสฺสนสฺส คิริโน          ทฺวารํ เหตํ ปกาสติ
                       |๕๙๓.๓|   อเนกรูปํ รุจิรํ                 นานาจิตฺตํ ปกาสติ
                       อากิณฺณํ อินฺทสทิเสหิ    พฺยคฺเฆเหว สุรกฺขิตํ
                       ปวิเสเตน ราชิสิ            อรุชํ ภูมิ ปกฺกม ฯ
     [๕๙๔]        |๕๙๔.๑|   สหสฺสยุตฺตํ หยวาหึ     ทิพฺพยานมธิฏฺฐิโต
                       ยายมาโน มหาราชา       อทฺทา เทวสภํ อิทํ ฯ
                       |๕๙๔.๒|   ยถา สรเท อากาโส ๒-     นีโลภาโส ปทิสฺสติ
                       ตถูปมํ อิทํ พฺยมฺหํ           เวฬุริยาสุ นิมฺมิตํ ฯ
                       |๕๙๔.๓|   วิตฺตี หิ มํ วินฺทติ สูต ทิสฺวา
                       ปุจฺฉามิ ตํ มาตลิ เทวสารถิ
@เชิงอรรถ:  สี. ยุ. กิมภิญฺญมาหุ ฯ   ม. อากาเส ฯ
                       อิมํ นุ พฺยมฺหํ กิมภญฺญมาหุ ๑- ฯ
     [๕๙๕]        |๕๙๕.๑|   ตสฺส ปุฏฺโฐ วิยากาสิ   มาตลิ เทวสารถิ
                       วิปากํ ปุญฺญกมฺมานํ    ชานํ อกฺขาสิชานโต
                       |๕๙๕.๒|   สุธมฺมาอิติ ยํ อาหุ        เอเสสา ๒- ทิสฺสเต สภา
                       เวฬุริยารุจิรา จิตฺรา      ธารยนฺติ สุนิมฺมิตา
                       |๕๙๕.๓|   อฏฺฐํสา สุกตา ถมฺภา    สพฺเพ เวฬุริยามยา
                       ยตฺถ เทวา ตาวตึสา       สพฺเพ อินฺทปุโรหิตา
                       |๕๙๕.๔|   อตฺถํ เทวมนุสฺสานํ      จินฺตยนฺตา สมจฺฉเร
                       ปวิเสเตน ราชิสิ           เทวานํ อนุโมทนํ ฯ
     [๕๙๖]        |๕๙๖.๑|   ตํ เทวา ปฏินนฺทึสุ       ทิสฺวา ราชานมาคตํ
                       สฺวาคตนฺเต มหาราช      อโถ เต อทุราคตํ
                       นิสีททานิ ราชิสิ            เทวราชสฺส สนฺติเก ฯ
                       |๕๙๖.๒|   สกฺโก ตํ ๓- ปฏินนฺทิตฺถ  เวเทหํ มิถิลคฺคหํ
                       นิมนฺตยิตฺถ ๔- กาเมหิ    อาสเนน จ วาสโว ฯ
                       |๕๙๖.๓|   สาธุ โขสิ อนุปฺปตฺโต       อาวาสํ วสวตฺตินํ
                       วส เทเวสุ ราชิสิ             สพฺพกามสมิทฺธิสุ
                       ตาวตึเสสุ เทเวสุ            ภุญฺช กาเม อมานุเส ฯ
     [๕๙๗]        |๕๙๗.๑|   ยถา ยาจิตกํ ยานํ       ยถา ยาจิตกํ ธนํ
                       เอวํ สมฺปทเมเวตํ             ยํ ปรโต ทานปจฺจยา ฯ
                       |๕๙๗.๒|   น จาหเมตมิจฺฉามิ            ยํ ปรโต ทานปจฺจยา
@เชิงอรรถ:  สี.ยุ. กิมภิญฺญมาหุ ฯ   ม. ปสฺเสสา ฯ   ม. สกฺโกปิ ฯ   สี.ยุ. นิมนฺตยี จ ฯ
                       สยํ กตานิ ปุญฺญานิ          ตํ เม อาเวนิยํ ๑- ธนํ ฯ
                       |๕๙๗.๓|   โสหํ คนฺตฺวา มนุสฺเสสุ          กาหามิ กุสลํ พหุํ
                       ทาเนน สมจริยาย                สญฺญเมน ทเมน จ
                       ยํ กตฺวา สุขิโต โหติ              น จ ปจฺฉานุตปฺปติ ฯ
     [๕๙๘]        พหูปกาโร โน ภวํ                      มาตลิ เทวสารถิ
                       โย เม กลฺยาณกมฺมานํ                 ปาปานํ ปฏิทสฺสยิ ๒- ฯ
     [๕๙๙]        อิทํ วตฺวา นิมิราชา                    เวเทโห มิถิลคฺคโห
                       ปุถุยญฺญํ ยชิตฺวาน                      สญฺญมํ อชฺฌุปาคมีติ ฯ
                                        เนมิราชชาตกํ จตุตฺถํ ฯ
                                                ---------


             เนื้อความพระไตรปิฎกฉบับภาษาบาลี อักษรไทย เล่มที่ ๒๘ หน้าที่ ๑๙๘-๒๒๓. https://84000.org/tipitaka/read/pali_read.php?B=28&A=4107&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=28&A=4107&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=28&item=525&items=75              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=28&siri=16              ศึกษาอรรถกถาชาดกนี้ได้ที่ :- https://84000.org/tipitaka/attha/attha.php?b=28&i=525              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=43&A=3284              The Pali Atthakatha in Roman :- https://84000.org/tipitaka/atthapali/read_rm.php?B=43&A=3284              สารบัญพระไตรปิฎกเล่มที่ ๒๘ https://84000.org/tipitaka/read/?index_28 https://84000.org/tipitaka/english/?index_28

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]