บาลีพระไตรปิฎกเล่มที่ ๓๒ - พระสุตตันตปิฎกเล่มที่ ๒๔

                                     จตุตฺถํ โธตกตฺเถราปทานํ (๔๐๔)
     [๔๐๖]   |๔๐๖.๗๒| คงฺคา ภาคีรสี ^๑- นาม     หิมวนฺตา ปภาวิตา
                        หํสวติยา ทฺวาเรน            อนุสนฺทติ ตาวเท ฯ
       |๔๐๖.๗๓| โสภิโต นาม อาราโม        คงฺคากูเล สุมาปิโต
                        ตตฺถ ปทุมุตฺตโร พุทฺโธ     วสเต โลกนายโก ฯ
       |๔๐๖.๗๔| ติทเสหิ ยถา อินฺโท           มนุเชหิ ปุรกฺขโต
                        นิสีทิ ตตฺถ ภควา             อสมฺภีโตว เกสรี ฯ
       |๔๐๖.๗๕| นคเร หํสวติยา                อโหสึ ^๒- พฺราหฺมโณ อหํ
                        ฉฬงฺโค นาม นาเมน        เอวํ นาโม มหามุนิ ฯ
       |๔๐๖.๗๖| อฏฺฐารส สิสฺสสตา           ปริวาเรนฺติ มํ ตทา
                        เตหิ สิสฺเสหิ สมิโต           คงฺคาตีรํ อุปาคมึ ฯ
       |๔๐๖.๗๗| ตตฺถทฺทสาสึ สมเณ          นิกฺกุเห โธตปาปเก
                        ภาคีรสินฺตรนฺโตหํ ^๓-       เอวํ จินฺเตสิ ตาวเท ฯ
       |๔๐๖.๗๘| สายํ ปาตํ ตรนฺตาเม         พุทฺธปุตฺตา มหายสา
                        วิเหสยนฺติ อตฺตานํ           เตสํ อตฺตา วิหญฺญติ ฯ
       |๔๐๖.๗๙| สเทวกสฺส โลกสฺส            พุทฺโธ อคฺโค ปวุจฺจติ
                        นตฺถิ เม ทกฺขิเณ การํ       คติมคฺควิโสธนํ ฯ
       |๔๐๖.๘๐| ยนฺนูน พุทฺธเสฏฺฐสฺส       เสตุํ คงฺคาย การเย
                        การาเปตฺวา อิมํ เสตุํ ^๔-   สนฺตรามิ อิมํ ภวํ ฯ
@เชิงอรรถ: ^๑ ม. ภาคีรถี ฯ ^๒ ม. ยุ. วสามิ ฯ ^๓ ม. ภาคีรถึ ตรนฺเตหํ ฯ ^๔ ม. ยุ. กมฺมํ ฯ
       |๔๐๖.๘๑| สตํ สหสฺสํ ทตฺวาน           เสตุํ การาปยึ อหํ
                        สทฺทหนฺโต กตํ การํ         วิปุลํ เม ภวิสฺสติ ฯ
       |๔๐๖.๘๒| การาเปตฺวาน ตํ ^๑- เสตุํ   อุเปสึ โลกนายกํ
                        สิรสิ อญฺชลึ กตฺวา           อิมํ วจนมพฺรวึ ฯ
       |๔๐๖.๘๓| สตํ สหสฺสํ สวยํ ^๒-          ทตฺวา ^๓- การาปิโต มยา
                        ตวตฺถาย มหาเสตุํ           ปฏิคฺคณฺห มหามุเน ฯ
       |๔๐๖.๘๔| ปทุมุตฺตโร โลกวิทู           อาหุตีนํ ปฏิคฺคโห
                        ภิกฺขุสงฺเฆ นิสีทิตฺวา         อิมา คาถา อภาสถ ฯ
       |๔๐๖.๘๕| โย เม เสตุํ อกาเรสิ           ปสนฺโน เสหิ ปาณิภิ
                        ตมหํ กิตฺตยิสฺสามิ            สุณาถ มม ภาสโต ฯ
       |๔๐๖.๘๖| ทริโต ปพฺพตโต วา           รุกฺขโต ปติโตปิยํ
                        จุโตปิ ลจฺฉติฏฺฐานํ           เสตุทานสฺสิทํ ผลํ ฯ
       |๔๐๖.๘๗| วิรูฬฺหมูลสนฺตานํ              นิโคฺรธมิว มาลุโต
                        อมิตฺตา นปฺปสหนฺติ ^๔-    เสตุทานสฺสิทํ ผลํ ฯ
       |๔๐๖.๘๘| นาสฺส โจรา ปสหนฺติ ^๕-   นาติมญฺญนฺติ ขตฺติยา
                        สพฺเพ ตริสฺสตามิตฺเต ^๖-  เสตุทานสฺสิทํ ผลํ ฯ
       |๔๐๖.๘๙| อพฺโภกาสคตํ สนฺตํ          กฐินาตปตาปิตํ
                        ปุญฺญกมฺเมน สํยุตฺตํ        น ภวิสฺสติ เวทนา ฯ
       |๔๐๖.๙๐| เทวโลเก มนุสฺเส วา         หตฺถิยานํ สุนิมฺมิตํ
                        ตสฺส สงฺกปฺปมญฺญาย     นิพฺพตฺติสฺสติ ตาวเท ฯ
@เชิงอรรถ: ^๑ ยุ. หํ ฯ ^๒ ม. ยุ. สตสหสฺสสฺส วยํ ฯ ^๓ ยุ. กตฺวา ฯ ^๔ ยุ. น สหิสฺสนฺติ ฯ
@^๕ ยุ. สหิสฺสนฺติ ฯ ^๖ ยุ. อติกฺกมฺมามิตฺเต ฯ
       |๔๐๖.๙๑| สหสฺสสฺสา วาตชวา          สินฺธวา สีฆพาหนา
                        สยํ ปาตํ อุเปสฺสนฺติ          เสตุทานสฺสิทํ ผลํ ฯ
       |๔๐๖.๙๒| อาคนฺตฺวาน มนุสฺสตฺตํ      สุขิโตยํ ภวิสฺสติ
                        อิหาปิ ^๑- มนุชสฺเสว         หตฺถิยานํ ภวิสฺสติ ฯ
       |๔๐๖.๙๓| กปฺปสตสหสฺสมฺหิ             โอกฺกากกุลสมฺภโว
                        โคตโม นาม นาเมน         สตฺถา โลเก ภวิสฺสติ ฯ
       |๔๐๖.๙๔| ตสฺส ธมฺเมสุ ทายาโท       โอรโส ธมฺมนิมฺมิโต
                        สพฺพาสเว ปริญฺญาย       นิพฺพายิสฺสตินาสโว ฯ
       |๔๐๖.๙๕| อโห เม สุกตํ กมฺมํ           ชลชุตฺตมนามเก
                        ตตฺถ การํ กริตฺวาน           ปตฺโตหํ อาสวกฺขยํ ฯ
       |๔๐๖.๙๖| ปธานํ ปหิตตฺโตมฺหิ          อุปสนฺโต นิรูปธิ
                        นาโคว พนฺธนํ เฉตฺวา       วิหรามิ อนาสโว ฯ
       |๔๐๖.๙๗| กิเลสา ฌาปิตา มยฺหํ       ภวา สพฺเพ สมูหตา
                        นาโคว พนฺธนํ เฉตฺวา      วิหรามิ อนาสโว ฯ
       |๔๐๖.๙๘| สฺวาคตํ วต เม อาสิ          มม พุทฺธสฺส สนฺติเก
                        ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
       |๔๐๖.๙๙| ปฏิสมฺภิทา จตสฺโส          วิโมกฺขาปิจ อฏฺฐิเม
                        ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
         อิตฺถํ สุทํ อายสฺมา โธตโก เถโร อิมา คาถาโย
อภาสิตฺถาติ ฯ
                                   โธตกตฺเถรสฺส อปทานํ สมตฺตํ  ฯ
@เชิงอรรถ: ^๑ ม. เวหาสํ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๒ หน้าที่ ๕๔๑-๕๔๓. https://84000.org/tipitaka/read/pali_read.php?B=32&A=10681&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=32&A=10681&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=32&item=406&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=32&siri=406 ศึกษาอรรถกถานี้ได้ที่ :- https://84000.org/tipitaka/attha/attha.php?b=32&i=406 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=50&A=5421 The Pali Atthakatha in Roman :- https://84000.org/tipitaka/atthapali/read_rm.php?B=50&A=5421 สารบัญพระไตรปิฎกเล่มที่ ๓๒ https://84000.org/tipitaka/read/?index_32 https://84000.org/tipitaka/english/?index_32