บาลีพระไตรปิฎกเล่มที่ ๓๒ - พระสุตตันตปิฎกเล่มที่ ๒๔

                                 ทุติยํ โสณโกฏิยเวสฺสตฺเถราปทานํ (๔๒)
     [๔๔]   |๔๔.๒๕| อโนมทสฺสิสฺส มุนิโน   โลกเชฏฺฐสฺส ตาทิโน
                      สุธาย เลปนํ กตฺวา          จงฺกมํ การยึ อหํ ฯ
        |๔๔.๒๖| นานาวณฺเณหิ ปุปฺเผหิ     จงฺกมํ สนฺถรึ อหํ
                      อากาเส วิตานํ กตฺวา       โภชยึ พุทฺธมุตฺตมํ ฯ
        |๔๔.๒๗| อญฺชลึ ปคฺคเหตฺวาน       อภิวาเทตฺวาน สุพฺพตํ
                      ทีฆสาลํ ภควโต              นิยฺยาเทสิมหนฺตทา ฯ
        |๔๔.๒๘| มม สงฺกปฺปมญฺญาย       สตฺถา โลเก อนุตฺตโร
                      ปฏิคฺคเหสิ ภควา            อนุกมฺปาย จกฺขุมา ฯ
        |๔๔.๒๙| ปฏิคฺคเหตฺวาน สมฺพุทฺโธ  ทกฺขิเณยฺโย สเทวเก
                      ภิกฺขุสงฺเฆ นิสีทิตฺวา        อิมา คาถา อภาสถ ฯ
        |๔๔.๓๐| โย โส หฏฺเฐน จิตฺเตน      ทีฆสาลํ อทาสิ เม
                      ตมหํ กิตฺตยิสฺสามิ           สุณาถ มม ภาสโต ฯ
        |๔๔.๓๑| อิมสฺส มจฺจุกาลมฺหิ         ปุญฺญกมฺมสมงฺคิโน
                      สหสฺสยุตฺตสฺสรโถ           อุปฏฺฐิสฺสติ ตาวเท ฯ
        |๔๔.๓๒| เตน ยาเนนยํ โปโส         เทวโลกํ คมิสฺสติ
                      อนุโมทิสฺสเร เทวา          สมฺปตฺเต กุสเล ภเว ฯ
        |๔๔.๓๓| มหารหํ พฺยมฺหํ เสฏฺฐํ      รตนมตฺติกเลปนํ
                      กูฏาคารวรูเปตํ               พฺยมฺหํ อชฺฌาวสิสฺสติ ฯ
        |๔๔.๓๔| ตึสกปฺปสหสฺสานิ           เทวโลเก รมิสฺสติ
                      ปญฺจวีสติกปฺปานิ           เทวราชา ภวิสฺสติ ฯ
        |๔๔.๓๕| สตฺตสตฺตติกฺขตฺตุญฺจ       จกฺกวตฺติ ภวิสฺสติ
                      ยโสธรสนามา เต            สพฺเพปิ เอกนามกา ฯ
        |๔๔.๓๖| เทฺว สมฺปตฺตี อนุโภตฺวา   จินิตฺวา ^๑- ปุญฺญสญฺจยํ
                      อฏฺฐวีสติกปฺปมฺหิ            จกฺกวตฺติ ภวิสฺสติ ฯ
@เชิงอรรถ: ^๑ ม. วฑฺเฒตฺวา ฯ ยุ. วิทิตฺวา ฯ
        |๔๔.๓๗| ตตฺถาปิ พฺยมฺหํ ปวรํ        วิสุกมฺเมน มาปิตํ
                      ทสสทฺทาวิวิตฺตนฺตํ          ปุรํ อชฺฌาวสิสฺสติ ฯ
        |๔๔.๓๘| อปริเมยฺเย อิโต กปฺเป     ภูมิปาโล มหิทฺธิโก
                      โอกฺกาโก นาม นาเมน    ราชา รฏฺเฐ ภวิสฺสติ ฯ
        |๔๔.๓๙| โสฬสิตฺถิสหสฺสานํ          สพฺพาสํ ปวราวยา ^๑-
                      อภิชาตา ขตฺติยานี          นว ปุตฺเต ชนิสฺสติ ฯ
        |๔๔.๔๐| นว ปุตฺเต ชนิตฺวาน         ขตฺติยานี มริสฺสติ
                      ตรุณี จ ปิยา กญฺญา       มเหสิตฺตํ กริสฺสติ ฯ
        |๔๔.๔๑|  โอกฺกากํ โตสยิตฺวาน      วรํ กญฺญา ลภิสฺสติ
                      วรํ ลทฺธา จ สา กญฺญา    ปุตฺเต ปพฺพาชยิสฺสติ ฯ
        |๔๔.๔๒| ปพฺพาชิตา ^๒- จ เต สพฺเพ   คมิสฺสนฺติ นคุตฺตมํ
                      ชาติเภทภยา สพฺเพ        ภคินีหิ วสิสฺสเร ^๓- ฯ
        |๔๔.๔๓| เอกา จ กญฺญา พฺยาธีหิ  ภวิสฺสติ ปุรกฺขตา ^๔-
                      มา โน ชาติ ปภิชฺชติ         นิขณิสฺสนฺติ ขตฺติยา ฯ
        |๔๔.๔๔| ขตฺติโย นีหริตฺวาน           ตาย สทฺธึ วสิสฺสติ
                      ภวิสฺสติ ตทา เภโท          โอกฺกากกุลสมฺภโว ฯ
        |๔๔.๔๕| เตสํ ปชา ภวิสฺสนฺติ          โกลิยา นาม ชาติยา
                      ตตฺถ มานุสกํ โภคํ           อนุโภสฺสนฺตินปฺปกํ ฯ
        |๔๔.๔๖| ตมฺหา กายา จวิตฺวาน      เทวโลกํ คมิสฺสติ
                      ตตฺราปิ ปวรํ พฺยมฺหํ         ลภิสฺสติ มโนรมํ ฯ
@เชิงอรรถ: ^๑ ม. ปวรา จ สา ฯ ยุ. ปวรา มยา ฯ ^๒ ยุ. ปพฺพชิตฺวา ฯ ^๓ ยุ. สํวสิสฺสเร ฯ
@^๔ ม. ปริกฺขตา ฯ
        |๔๔.๔๗| เทวโลกา จวิตฺวาน          สุกฺกมูเลน โจทิโต
                      อาคนฺตฺวาน มนุสฺสตฺตํ     โสโณ นาม ภวิสฺสติ ฯ
        |๔๔.๔๘| อารทฺธวิริโย ปหิตตฺโต     ปทหํ สตฺถุ สาสเน
                      สพฺพาสเว ปริญฺญาย       นิพฺพายิสฺสตฺยนาสโว ฯ
        |๔๔.๔๙| อนนฺตทสฺสี ภควา           โคตโม สกฺยปุงฺคโว
                      วิเสสญฺญู มหาวีโร           อคฺคฏฺฐาเน ฐเปสฺสติ ฯ
        |๔๔.๕๐| วุฏฺฐมฺหิ เทเว จตุรงฺคุลมฺหิ
                      ติเณ อนิเลริตองฺคุลมฺหิ ^๑-
                      ฐเปตฺวาน โยคสฺส ปยุตฺตตาทิโน
                      ตโตตฺตริ ปารมตา น วิชฺชติ ฯ
        |๔๔.๕๑|  อุตฺตเม ทมเถ ทนฺโต       จิตฺตํ เม สุปฺปณีหิตํ
                      ภาโร เม โอหิโต สพฺโพ     นิพฺพุโตมฺหิ อนาสโว ฯ
        |๔๔.๕๒| องฺคีรโส มหานาโค          อภิชาโตว เกสรี
                      ภิกฺขุสงฺเฆ นิสีทิตฺวา          เอตทคฺเค ฐเปสิ มํ ฯ
        |๔๔.๕๓| ปฏิสมฺภิทา จตสฺโส          วิโมกฺขาปิจ อฏฺฐิเม
                      ฉฬภิญฺญา สจฺฉิกตา        กตํ พุทฺธสฺส สาสนนฺติ ฯ
         อิตฺถํ สุทํ อายสฺมา โสโณ โกฏิยเวสฺโส ^๒- เถโร อิมา คาถาโย
อภาสิตฺถาติ ฯ
                              โสณโกฏิยเวสฺสตฺเถรสฺส อปทานํ สมตฺตํ ฯ
@เชิงอรรถ: ^๑ ม. ... องฺคณมฺหิ ฯ ^๒ ม. โกฬิวิโส ฯ ยุ. โกฬิยเวสฺโส ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๒ หน้าที่ ๑๓๓-๑๓๖. https://84000.org/tipitaka/read/pali_read.php?B=32&A=2761&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=32&A=2761&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=32&item=44&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=32&siri=44 ศึกษาอรรถกถานี้ได้ที่ :- https://84000.org/tipitaka/attha/attha.php?b=32&i=44 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=50&A=1782 The Pali Atthakatha in Roman :- https://84000.org/tipitaka/atthapali/read_rm.php?B=50&A=1782 สารบัญพระไตรปิฎกเล่มที่ ๓๒ https://84000.org/tipitaka/read/?index_32 https://84000.org/tipitaka/english/?index_32