บาลีพระไตรปิฎกเล่มที่ ๓๒ - พระสุตตันตปิฎกเล่มที่ ๒๔

หน้าที่ ๑๖๗.

สตฺตมํ วตฺถทายกตฺเถราปทานํ (๖๗) [๖๙] |๖๙.๔๕| ปกฺขิชาโต ตทา อาสึ สุปณฺโณ ครุฬาธิโป อทฺทสํ วิรชํ พุทฺธํ คจฺฉนฺตํ คนฺธมาทนํ ฯ |๖๙.๔๖| ชหิตฺวา ครุฬวณฺณํ มาณวตฺตํ อราธยึ ^๑- เอกวตฺถํ มยา ทินฺนํ ทิปทินฺทสฺส ตาทิโน ฯ |๖๙.๔๗| ตญฺจ ทุสฺสํ ปฏิคฺคยฺห พุทฺโธ โลกคฺคนายโก อนฺตลิกฺเข ฐิโต สตฺถา อิมา คาถา อภาสถ ฯ |๖๙.๔๘| อิมินา วตฺถทาเนน จิตฺตสฺส ปณิธีหิ จ ปหาย ครุฬโยนึ เทวโลเก รมิสฺสติ ฯ |๖๙.๔๙| อตฺถทสฺสี ตุ ภควา โลกเชฏฺโฐ นราสโภ วตฺถทานํ ปสํสิตฺวา ปกฺกามิ อุตฺตรามุโข ฯ |๖๙.๕๐| ภเว นิพฺพตฺตมานมฺหิ โหนฺติ เม วตฺถสมฺปทา อากาเส ฉทนํ โหติ วตฺถทานสฺสิทํ ผลํ ฯ |๖๙.๕๑| อรุณสา ^๒- สตฺต ชนา จกฺกวตฺตี มหพฺพลา ฉตฺตึสติมฺหิ อาสึสุ กปฺปมฺหิ มนุชาธิปา ฯ |๖๙.๕๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา วตฺถทายโก เถโร อิมา คาถาโย อภาสิตฺถาติ ฯ วตฺถทายกตฺเถรสฺส อปทานํ สมตฺตํ ฯ @เชิงอรรถ: ^๑ โป. ยุ. มาณวตฺตํ อธารยึ ฯ ม. มาณวกํ อธารยึ ฯ ^๒ ม. อรุณวา ฯ ยุ. อรุณกา ฯ