บาลีพระไตรปิฎกเล่มที่ ๓๒ - พระสุตตันตปิฎกเล่มที่ ๒๔

                                  สตฺตมํ นฬมาลิยตฺเถราปทานํ (๑๐๗)
     [๑๐๙]   |๑๐๙.๓๖| ปทุมุตฺตรพุทฺธสฺส      โลกเชฏฺฐสฺส ตาทิโน
                        ติณตฺถเร นิสินฺนสฺส           อุปสนฺตสฺส ตาทิโน ฯ
       |๑๐๙.๓๗| นฬมาลํ คเหตฺวาน            พนฺธิตฺวา วีชนึ อหํ
                        พุทฺธสฺส อุปนาเมสึ           ทิปทินฺทสฺส ตาทิโน ฯ
       |๑๐๙.๓๘| ปฏคฺคเหตฺวาน สพฺพญฺญู   วีชนึ โลกนายโก
                        มม สงฺกปฺปมญฺญาย         อิมํ คาถํ อภาสถ ฯ
       |๑๐๙.๓๙| ยถา เม กาโย นิพฺพายิ       ปริฬาโห น วิชฺชติ
                        ตเถว ติวิธคฺคีหิ                 จิตฺตํ ตว วิมุจฺจตุ ฯ
       |๑๐๙.๔๐| สพฺเพ เทวา สมาคญฺฉุํ       เยเกจิ ทุมนิสฺสิตา
                        สุสฺสาม พุทฺธวจนํ             หาสยนฺตญฺจ ทายกํ ฯ
       |๑๐๙.๔๑| นิสินฺโน ภควา ตตฺถ          เทวสงฺฆปุรกฺขโต
                        ทายกํ สมฺปหํเสนฺโต          อิมา คาถา อภาสถ ฯ
       |๑๐๙.๔๒| อิมินา วีชนิทาเนน            จิตฺตสฺส ปณิธีหิ จ
                        สุพฺพโต นาม นาเมน        จกฺกวตฺติ ภวิสฺสติ ฯ
       |๑๐๙.๔๓| เตน กมฺมาวเสเสน            สุกฺกมูเลน โจทิโต
                        มาลุโต นาม นาเมน         จกฺกวตฺติ ภวิสฺสติ ฯ
       |๑๐๙.๔๔| อิมินา วีชนิทาเนน            สมฺมานวิปุเลน จ
                        กปฺปสตสหสฺสมฺหิ            ทุคฺคตึ นูปปชฺชติ ฯ
       |๑๐๙.๔๕| ตึสกปฺปสหสฺสมฺหิ             สุพฺพตา อฏฺฐตึส เต
                        เอกูนตึสสหสฺเส                อฏฺฐ มาลุตนามกา ฯ
       |๑๐๙.๔๖| ปฏิสมฺภิทา จตสฺโส           วิโมกฺขาปิจ อฏฺฐิเม
                        ฉฬภิญฺญา สจฺฉิกตา         กตํ พุทฺธสฺส สาสนนฺติ ฯ
         อิตฺถํ สุทํ อายสฺมา นฬมาลิโย เถโร อิมา คาถาโย
อภาสิตฺถาติ ฯ
                                  นฬมาลิยตฺเถรสฺส อปทานํ สมตฺตํ ฯ
                                            สตฺตมํ ภาณวารํ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๒ หน้าที่ ๒๐๕-๒๐๖. https://84000.org/tipitaka/read/pali_read.php?B=32&A=4181&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=32&A=4181&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=32&item=109&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=32&siri=109 ศึกษาอรรถกถานี้ได้ที่ :- https://84000.org/tipitaka/attha/attha.php?b=32&i=109 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=50&A=3273 The Pali Atthakatha in Roman :- https://84000.org/tipitaka/atthapali/read_rm.php?B=50&A=3273 สารบัญพระไตรปิฎกเล่มที่ ๓๒ https://84000.org/tipitaka/read/?index_32 https://84000.org/tipitaka/english/?index_32