บาลีพระไตรปิฎกเล่มที่ ๓๒ - พระสุตตันตปิฎกเล่มที่ ๒๔

ฉฏฺฐํ ปภงฺกรตฺเถราปทานํ (๓๓๖) [๓๓๘] |๓๓๘.๕๔| ปทุมุตฺตรภควโต โลกเชฏฺฐสฺส ตาทิโน ปวเน ^๓- เจติยํ อาสิ วาฬมิคสมากุเล ฯ @เชิงอรรถ: ^๑ ม. กายา ฯ ^๒ ม. สรีรโต ฯ ยุ. สารีริโก ฯ ^๓ ม. สพฺพตฺถ วิปิเน ฯ

--------------------------------------------------------------------------------------------- หน้าที่ ๔๑๘.

|๓๓๘.๕๕| น โกจิ วิสหิ คนฺตุํ เจติยํ อภิวนฺทิตุํ ติณกฏฺฐลโตนทฺธํ ปลุคฺคํ อาสิ เจติยํ ฯ |๓๓๘.๕๖| วนกมฺมิโก ตทา อาสึ ปิตาเปตามเหนหํ ^๑- อทฺทสํ ปวเน ถูปํ ลุคฺคํ ติณลตากุลํ ฯ |๓๓๘.๕๗| ทิสฺวานาหํ พุทฺธถูปํ ครุจิตฺตํ อุปฏฺฐหึ พุทฺธเสฏฺฐสฺส ถูโปยํ ปลุคฺโค อจฺฉติ วเน ฯ |๓๓๘.๕๘| นจฺฉนฺนํ นปฺปฏิรูปํ ชานนฺตสฺส คุณาคุณํ พุทฺธถูปํ อโสเธตฺวา อญฺญํ กมฺมํ ปโยชเย ฯ |๓๓๘.๕๙| ติณกฏฺฐญฺจ วลฺลิญฺจ โสธยิตฺวาน เจติเย วนฺทิตฺวา อฏฺฐ วารานิ ปฏิกุฏิโก อคจฺฉหํ ฯ |๓๓๘.๖๐| เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตาวตึสํ อคญฺฉหํ ฯ |๓๓๘.๖๑| ตตฺถ เม สุกตํ พฺยมฺหํ โสวณฺณํ สปฺปภสฺสรํ สฏฺฐิโยชนมุพฺพิทฺธํ ตึสโยชนวิตฺถตํ ฯ |๓๓๘.๖๒| ติสตานิ จ วารานิ เทวรชฺชมการยึ ปญฺจวีสติกฺขตฺตุญฺจ จกฺกวตฺติ อโหสหํ ฯ |๓๓๘.๖๓| ภวาภเว สํสรนฺโต มหาโภคํ ลภามหํ โภเค เม อูนตา นตฺถิ โสธนาย อิทํ ผลํ ฯ |๓๓๘.๖๔| สิวิยา ^๒- หตฺถิขนฺเธน ปวเน คจฺฉโต มม ^๓- ยํ ยํ ทิสาหํ คจฺฉามิ สรณํ สมฺปชฺชเต ^๔- วนํ ฯ @เชิงอรรถ: ^๑ ม. ปิตุมาตุมเตนหํ ฯ ยุ. ปิตุเปตามเหนหํ ฯ ^๒ ม. สิวิกา ฯ ^๓ ยุ. มมํ ฯ @^๔ ม. สมฺปเต ฯ

--------------------------------------------------------------------------------------------- หน้าที่ ๔๑๙.

|๓๓๘.๖๕| ขาณุํ วา กณฺฏกํ วาปิ นาหํ ปสฺสามิ จกฺขุนา ปุญฺญกมฺเมน สํยุตฺโต สยเมวาปนียเร ฯ |๓๓๘.๖๖| กุฏฺฐํ คณฺโฑ กิลาโส จ อปมาโร วิตจฺฉิกา ททฺทุ กณฺฑุ จ เม นตฺถิ โสธนาย อิทํ ผลํ ฯ |๓๓๘.๖๗| อญฺญํปิ เม อจฺฉริยํ พุทฺธถูปมฺหิ ^๑- โสธิเต นาภิชานามิ เม กาเย ชาตํ ปิฬกพินฺทุกํ ฯ |๓๓๘.๖๘| อญฺญํปิ เม อจฺฉริยํ พุทฺธถูปมฺหิ โสธิเต ทุเว ภเว สํสรามิ เทวตฺเต อถ มานุเส ฯ |๓๓๘.๖๙| อญฺญํปิ เม อจฺฉริยํ พุทฺธถูปมฺหิ โสธิเต สุวณฺณวณฺโณ สพฺพตฺถ สปฺปภาโส ภวามหํ ฯ |๓๓๘.๗๐| อญฺญํปิ เม อจฺฉริยํ พุทฺธถูปมฺหิ โสธิเต อมนาปํ วิวชฺเชติ มนาปํ อุปติฏฺฐติ ฯ |๓๓๘.๗๑| อญฺญํปิ เม อจฺฉริยํ พุทฺธถูปมฺหิ โสธิเต วิสุทฺธํ โหติ เม จิตฺตํ เอกคฺคํ สุสมาหิตํ ฯ |๓๓๘.๗๒| อญฺญํปิ เม อจฺฉริยํ พุทฺธถูปมฺหิ โสธิเต เอกาสเน นิสีทิตฺวา อรหตฺตํ อปาปุณึ ฯ |๓๓๘.๗๓| สตสหสฺเส อิโต กปฺเป ยํ กมฺมมกรึ ตทา ทุคฺคตึ นาภิชานามิ โสธนาย อิทํ ผลํ ฯ |๓๓๘.๗๔| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ @เชิงอรรถ: ^๑ ม. ยุ. พุทฺธถูปสฺส โสธเน ฯ

--------------------------------------------------------------------------------------------- หน้าที่ ๔๒๐.

อิตฺถํ สุทํ อายสฺมา ปภงฺกโร เถโร อิมา คาถาโย อภาสิตฺถาติ ฯ ปภงฺกรตฺเถรสฺส อปทานํ สมตฺตํ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๒ หน้าที่ ๔๑๗-๔๒๐. https://84000.org/tipitaka/read/pali_read.php?B=32&A=8187&w=&modeTY=2&pagebreak=1 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=32&A=8187&modeTY=2&pagebreak=1 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=32&item=338&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=32&siri=338 ศึกษาอรรถกถานี้ได้ที่ :- https://84000.org/tipitaka/attha/attha.php?b=32&i=338 สารบัญพระไตรปิฎกเล่มที่ ๓๒ https://84000.org/tipitaka/read/?index_32 https://84000.org/tipitaka/english/?index_32