บาลีพระไตรปิฎกเล่มที่ ๓๒ - พระสุตตันตปิฎกเล่มที่ ๒๔

                                 ปญฺจมํ นฬาคาริกตฺเถราปทานํ (๓๔๕)
     [๓๔๗]   |๓๔๗.๓๑| หิมวนฺตสฺสวิทูเร       หาริโก นาม ปพฺพโต
                         สยมฺภู ^๑- นาม นาเมน   รุกฺขมูเล วสี ตทา ฯ
       |๓๔๗.๓๒| นฬาคารํ กริตฺวาน           ติเณน ฉาทยึ อหํ
                         จงฺกมํ โสธยิตฺวาน          สยมฺภุสฺส อทาสหํ ฯ
       |๓๔๗.๓๓| จตุทฺทเสสุ กปฺเปสุ          เทวโลเก รมึ อหํ
                         จตุสตฺตติกฺขตฺตุญฺจ        เทวรชฺชมการยึ ฯ
       |๓๔๗.๓๔| สตฺตสตฺตติกฺขตฺตุญฺจ       จกฺกวตฺติ อโหสหํ
                         ปเทสรชฺชํ วิปุลํ              คณนาโต อสงฺขยํ ฯ
       |๓๔๗.๓๕| อุพฺพิทฺธํ ภวนํ มยฺหํ         อินฺทลฏฺฐีว อุคฺคตํ
                         สหสฺสถมฺภํ อตุลํ           วิมานํ สปฺปภสฺสรํ ฯ
       |๓๔๗.๓๖| เทฺวสมฺปตฺตึ อนุโภตฺวาน  สุกฺกมูเลน โจทิโต
                         โคตมสฺส ภควโต           สาสเน ปพฺพชึ อหํ ฯ
@เชิงอรรถ: ^๑ ม. ยุ. สยมฺภู นารโท นาม ฯ
       |๓๔๗.๓๗| ปธานํ ปหิตตฺโตมฺหิ         อุปสนฺโต นิรูปธิ
                         นาโคว พนฺธนํ เฉตฺวา     วิหรามิ อนาสโว ฯ
       |๓๔๗.๓๘| ปฏิสมฺภิทา จตสฺโส         วิโมกฺขาปิจ อฏฺฐิเม
                         ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
         อิตฺถํ สุทํ อายสฺมา นฬาคาริโก เถโร อิมา คาถาโย
อภาสิตฺถาติ ฯ
                             นฬาคาริกตฺเถรสฺส อปทานํ สมตฺตํ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๒ หน้าที่ ๔๓๓-๔๓๔. https://84000.org/tipitaka/read/pali_read.php?B=32&A=8489&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=32&A=8489&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=32&item=347&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=32&siri=347 ศึกษาอรรถกถานี้ได้ที่ :- https://84000.org/tipitaka/attha/attha.php?b=32&i=347 สารบัญพระไตรปิฎกเล่มที่ ๓๒ https://84000.org/tipitaka/read/?index_32 https://84000.org/tipitaka/english/?index_32