บาลีพระไตรปิฎกเล่มที่ ๓๓ - พระสุตตันตปิฎกเล่มที่ ๒๕

                                             อฏฺฐมํ สิวิราชจริยํ
     [๘]   |๘.๕๒| อริฏฺฐสวฺหเย นคเร             สิวิ นามาสิ ขตฺติโย
                   นิสชฺช ปาสาทวเร                 เอวํ จินฺเตสหํ ตทา ฯ
       |๘.๕๓| ยงฺกิญฺจิ มานุสํ ทานํ             อทินฺนํ เม น วิชฺชติ
                   โยปิ ยาเจยฺย มํ จกฺขุํ            ทเทยฺยํ อวิกมฺปิโต ฯ
       |๘.๕๔| มม สงฺกปฺปมญฺญาย            สกฺโก เทวานมิสฺสโร
                   นิสินฺโน เทวปริสาย              อิทํ วจนมพฺรวิ ฯ
@เชิงอรรถ: ^๑ ม. ยญฺญวาฏโต ฯ ยุ. ยญฺญวาฏโก ฯ ^๒ ยุ. ทกฺขิเณยฺยํ ฯ ^๓ ยุ. ยตฺถาหรติ
@ภณฺฑกํ ฯ ^๓ ม. ยุ. สกภุตฺตาปิ ฯ
       |๘.๕๕| นิสชฺช ปาสาทวเร                สิวิ ราชา มหิทฺธิโก
                   จินฺเตนฺโต วิวิธํ ทานํ             อเทยฺยํ โส น ปสฺสติ ฯ
       |๘.๕๖| ตถนฺนุ วิตถนฺเนตํ                 หนฺท วีมํสยามิ ตํ
                   มุหุตฺตํ อาคเมยฺยาถ             ยาว ชานามิ ตํ มนํ ฯ
       |๘.๕๗| ปเวธมาโน ปลิตสิโร             วลิคตฺโต ชราตุโร
                   อนฺธวณฺโณ จ หุตฺวาน          ราชานํ อุปสงฺกมิ ฯ
       |๘.๕๘| โส ตทา ปคฺคเหตฺวาน          วามํ ทกฺขิณพาหุญฺจ
                   สิรสฺมึ อญฺชลึ กตฺวา             อิทํ วจนมพฺรวิ
       |๘.๕๙| ยาจามิ ตํ มหาราช               ธมฺมิก รฏฺฐวฑฺฒน ^๑-
                   ตว ทานรตา กิตฺติ                อุคฺคตา เทวมานุเส ฯ
       |๘.๖๐| อุโภปิ เนตฺตา นยนา             อนฺธอุปหตา ^๒- มม
                   เอกํ เม นยนํ เทหิ                ตฺวํปิ เอเกน ยาปย ฯ
       |๘.๖๑| ตสฺสาหํ วจนํ สุตฺวา              หฏฺโฐ สํวิคฺคมานโส
                   กตญฺชลี เวทชาโต               อิทํ วจนมพฺรวึ ฯ
       |๘.๖๒| อิทานาหํ จินฺตยิตฺวาน          ปาสาทโต อิธาคโต
                   ตฺวํ มม จิตฺตมญฺญาย           เนตฺตํ ยาจิตุมาคโต ฯ
       |๘.๖๓| อโหเม มานสํ สิทฺธํ               สงฺกปฺโป เม ^๓- ปริปูริโต
                   อทินฺนปุพฺพํ ทานวรํ             อชฺช ทสฺสามิ ยาจเก ฯ
       |๘.๖๔| เอหิ สิวก อุฏฺเฐหิ                  มา ทนฺธยิ มา ปเวธยิ
                   อุโภปิ นยนํ เทหิ                  อุปฺปาเฏตฺวา วณิพฺพเก ^๔- ฯ
@เชิงอรรถ: ^๑ ยุ. รฏฺฐวฑฺฒนํ ฯ ^๒ ม. ยุ. อนฺธา อุปหตา มม ฯ ^๓ ม. ยุ. เมสทฺโทนตฺถิ ฯ
@^๓ ยุ. นยเน ฯ ^๔ ยุ. ติพฺพก ฯ
       |๘.๖๕| ตโต โส โจทิโต มยฺหํ            สิวโก วจนงฺกโร
                   อุทฺธริตฺวาน ปาทาสิ            ตาลมิญฺชํว ยาจเก ฯ
       |๘.๖๖| ททมานสฺส เทนฺตสฺส            ทินฺนทานสฺส เม สโต
                   จิตฺตสฺส อญฺญถา นตฺถิ        โพธิยาเยว การณา ฯ
       |๘.๖๗| น เม เทสฺสา อุโภ จกฺขุ         อตฺตาปิ ^๑- เม น เทสฺสิโย
                   สพฺพญฺญุตํ ปิยํ มยฺหํ          ตสฺมา จกฺขุํ อทาสหนฺติ ฯ
                                             สิวิราชจริยํ อฏฺฐมํ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๕๕๗-๕๕๙. https://84000.org/tipitaka/read/pali_read.php?B=33&A=11468&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=11468&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.3&item=8&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=227 ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=216 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=52&A=1684 The Pali Atthakatha in Roman :- https://84000.org/tipitaka/atthapali/read_rm.php?B=52&A=1684 สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33