บาลีพระไตรปิฎกเล่มที่ ๓๓ - พระสุตตันตปิฎกเล่มที่ ๒๕

                                               ตติยํ อโยฆรจริยํ
     [๒๓]   |๒๓.๒๔| ปุนาปรํ ยทา โหมิ     กาสิราชสฺส อตฺรโช
                      อโยฆรมฺหิ สํวฑฺโฒ        นาเมนาสึ อโยฆโร ฯ
       |๒๓.๒๕| ทุกฺเขน ชีวิโต ลทฺโธ         สมฺปีเฬ ปติโปสิโต
                      อชฺเชว ปุตฺต ปฏิปชฺช      เกวลํ วสุนฺธรํ ^๑- อิมํ ฯ
       |๒๓.๒๖| สรฏฺฐกํ สนิคมํ               สชนํ วนฺทิตฺวา ขตฺติยํ
                      อญฺชลึ ปคฺคเหตฺวาน      อิทํ วจนมพฺรวึ ฯ
       |๒๓.๒๗| เย เกจิ มหิยา สตฺตา       หีนอุกฺกฏฺฐมชฺฌิมา
                      นิรารกฺขา สเก เคเห       วฑฺฒนฺติ สกญาติหิ ^๒- ฯ
       |๒๓.๒๘| อิทํ โลเก อุตฺตริยํ            สมฺปีเฬ มม โปสนํ
                      อโยฆรมฺหิ สํวฑฺโฒ       อปฺปเภ จนฺทสุริเย ฯ
       |๒๓.๒๙| ปูติกุณปสมฺปุณฺณา        มุญฺจิตฺวา มาตุ กุจฺฉิโต
                      ตโต โฆรตเร ทุกฺเข         ปุน ปกฺขิตฺตโยฆเร ฯ
       |๒๓.๓๐| ยทิหํ ตาทิสํ ปตฺวา          ทุกฺขํ ปรมทารุณํ
                      รชฺเชสุ ยทิ รญฺชามิ ^๓-   ปาปานํ อุตฺตโม สิยํ ฯ
       |๒๓.๓๑| อุกฺกณฺฐิโตมฺหิ กาเยน     รชฺเชนมฺหิ อนตฺถิโก
                      นิพฺพุตึ ปริเยสิสฺสํ           ยตฺถ มํ มจฺจุ น มทฺทิเย ฯ
       |๒๓.๓๒| เอวาหํ จินฺตยิตฺวาน         วิวรนฺเต ^๔- มหาชเน
                      นาโคว พนฺธนํ เฉตฺวา     ปาวิสึ ^๕- กานนํ วนํ ฯ
@เชิงอรรถ: ^๑ ม. ยุ. วสุธํ ฯ ^๒ ยุ. สห ญาติภิ ฯ ^๓ ม. ยุ. รชฺชายิ ฯ ^๔ ยุ. วิวรนฺตํ
@มหาชนํ ฯ ^๕ ยุ. ปาวิสิ ฯ
       |๒๓.๓๓| มาตา ปิตา น เม เทสฺสา    นปิ เม เทสฺสา ^๑- มหายสา
                      สพฺพญฺญุตํ ปิยํ มยฺหํ        ตสฺมา รชฺชํ ปริจฺจชินฺติ ฯ
                                             อโยฆรจริยํ ตติยํ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๕๘๒-๕๘๓. https://84000.org/tipitaka/read/pali_read.php?B=33&A=11978&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=11978&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.3&item=23&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=242 ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=231 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=52&A=5011 The Pali Atthakatha in Roman :- https://84000.org/tipitaka/atthapali/read_rm.php?B=52&A=5011 สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33