ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๓ ภาษาบาลี อักษรไทย พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

                               ปญฺจมํ จนฺทนมาลิยตฺเถราปทานํ (๔๘๕)
     [๗๕]   |๗๕.๗๕| ปญฺจกามคุเณ หิตฺวา   ปิยรูเป มโนรเม
                       อสีติโกฏิโย หิตฺวา           ปพฺพชึ อนคาริยํ ฯ
         |๗๕.๗๖| ปพฺพชิตฺวาน กาเยน        ปาปกมฺมํ วิวชฺชยึ
                       วจีทุจฺจริตํ หิตฺวา             นทีกูเล วสามหํ ฯ
@เชิงอรรถ:  ม. ติยคฺคี ฯ ยุ. ติวคฺคี ฯ อิโต ปรํ อีทิสเมว ฯ  ม. ญาณมถวึ อหํ ฯ
         |๗๕.๗๗| เอเกกํ ๑- มํ วิหรนฺตํ       พุทฺธเสฏฺโฐ อุปาคมิ
                       นาหํ ชานามิ พุทฺโธติ      อกาสึ ปฏิสนฺถรํ ฯ
         |๗๕.๗๘| กริตฺวา ปฏิสนฺถารํ          นามโคตฺตํ อปุจฺฉหํ
                       เทวตา นุสิ คนฺธพฺโพ      อาทู ๒- สกฺโก ปุรินฺทโท ฯ
         |๗๕.๗๙| โก วา ตฺวํ กสฺส วา ปุตฺโต  มหาพฺรหฺมา อิธาคโต
                       วิโรจสิ ทิสา สพฺพา         อุทยํ สุริโย ยถา ฯ
         |๗๕.๘๐| สหสฺสารานิ จกฺกานิ       ปาเท ทิสฺสนฺติ มาริส
                       โก วา ตฺวํ กสฺส วา ปุตฺโต  กถํ ชาเนมุ ตํ มยํ ฯ
         |๗๕.๘๑| นามโคตฺตํ ปเวเทหิ         สํสยํ อปเนหิ เม
                       นมฺหิ เทโว น คนฺธพฺโพ   นมฺหิ สกฺโก ปุรินฺทโท ฯ
         |๗๕.๘๒| พฺรหฺมภาโว จ เม นตฺถิ    เอเตสํ อุตฺตโม อหํ
                       อตีโต วิสยํ เตสํ              ทาลยึ กามพนฺธนํ ฯ
         |๗๕.๘๓| สพฺเพ กิเลเส ฌาเปตฺวา  ปตฺโต สมฺโพธิมุตฺตมํ
                       ตสฺส วาจํ สุณิตฺวาหํ        อิทํ วจนมพฺรวึ ฯ
         |๗๕.๘๔| ยทิ พุทฺโธสิ สพฺพญฺญู     นิสีท ตฺวํ มหามุนิ
                       ตมหํ ปูชยิสฺสามิ            ทุกฺขสฺสนฺตกโร ตุวํ ฯ
         |๗๕.๘๕| ปตฺถริตฺวา ชินจมฺมํ         อทาสิ สตฺถุโน อหํ
                       นิสีทิ ตตฺถ ภควา            สีโหว คิริคพฺภเร ฯ
         |๗๕.๘๖| ขิปฺปํ ปพฺพตมารุยฺห        อมฺพสฺส ผลมคฺคหึ
                       สาลกลฺยาณิกํ ปุปฺผํ        จนฺทนญฺจ มหารหํ ฯ
@เชิงอรรถ:  ม. เอกกํ ฯ ยุ. เอกกมฺมํ ฯ  ยุ. อุท ฯ
         |๗๕.๘๗| ขิปฺปํ ปคฺคยฺห ตํ สพฺพํ     อุเปตฺวา ๑- โลกนายกํ
                       ผลํ พุทฺธสฺส ทตฺวาน       สาลปุปฺผํ อปูชยึ ฯ
         |๗๕.๘๘| จนฺทนํ อนุลิมฺปิตฺวา        อวนฺทึ สตฺถุโน อหํ
                       ปสนฺนจิตฺโต สุมโน         วิปุลาย จ ปีติยา ฯ
         |๗๕.๘๙| อชินมฺหิ นิสีทิตฺวา           สุเมโธ โลกนายโก
                       มม กมฺมํ ปกิตฺเตสิ          หาสยนฺโต มมํ ตทา ฯ
         |๗๕.๙๐| อิมินา ผลทาเนน            คนฺธมาเลหิ จูภยํ
                       ปญฺจวีเส กปฺปสเต          เทวโลเก รมิสฺสติ ฯ
         |๗๕.๙๑| อนูนมนสงฺกปฺโป            วสวตฺติ ภวิสฺสติ
                       ฉพฺพีสติกปฺปสเต            มนุสฺสตฺตํ คมิสฺสติ ฯ
         |๗๕.๙๒| ภวิสฺสติ จกฺกวตฺติ           จาตุรนฺโต มหิทฺธิโก
                       เวกรํ ๒- นาม นครํ         วิสุกมฺเมน มาปิตํ ฯ
         |๗๕.๙๓| เหสฺสติ สพฺพโสวณฺณํ      นานารตนภูสิตํ
                       เอเตเนว อุปาเยน           สํสริสฺสติ โยนิโย ๓- ฯ
         |๗๕.๙๔| สพฺพตฺถ สุขิโต ๔- หุตฺวา เทวตฺเต อถ มานุเส
                       ปจฺฉิเม ภวสมฺปตฺเต        พฺรหฺมพนฺธุ ภวิสฺสติ ฯ
         |๗๕.๙๕| อคารา อภินิกฺขมฺม         อนคาริ ภวิสฺสติ
                       อวิญฺญตฺติปจฺจโย ๕- หุตฺวา    นิพฺพายิสฺสตินาสโว ฯ
         |๗๕.๙๖| อิทํ วตฺวาน สมฺพุทฺโธ      สุเมโธ โลกนายโก
                       มม นิชฺฌายมานสฺส       ปกฺกามิ อนิลญฺชเส ฯ
@เชิงอรรถ:  ยุ. อุเปสึ ฯ  ม. ยุ. เวภารํ ฯ  ม. โส ภเว ฯ ยุ. โยนิโส ฯ
@ ม. ปูชิโต ฯ  ม. อภิญฺญาปารคู ฯ
         |๗๕.๙๗| เตน กมฺเมน สุกเตน       เจตนาปณิธีหิ จ
                       ชหิตฺวา มานุสํ เทหํ         ตุสิตํ ๑- อุปปชฺชหํ ฯ
         |๗๕.๙๘| ตุสิตโต จวิตฺวาน            นิพฺพตฺตึ มาตุกุจฺฉิยา
                       โภเค เม อูนตา นตฺถิ       ยมฺหิ คพฺเภ วสามหํ ฯ
         |๗๕.๙๙| มาตุกุจฺฉิคเต มยิ            อนฺนปานญฺจ โภชนํ
                       มาตุยา มม ฉนฺเทน        นิพฺพตฺตติ ยถิจฺฉกํ ฯ
         |๗๕.๑๐๐| ชาติยา ปญฺจวสฺเสน     ปพฺพชึ อนคาริยํ
                       โอโรปิตมฺหิ เกสมฺหิ         อรหตฺตํ อปาปุณึ ฯ
         |๗๕.๑๐๑| ปุพฺพกมฺมํ คเวสนฺโต     โอเรน นทฺทสํ อหํ
                          ตึสกปฺปสหสฺสมฺหิ        มม กมฺมํ อนุสฺสรึ ฯ
         |๗๕.๑๐๒| นโม เต ปุริสาชญฺญ      นโม เต ปุริสุตฺตม
                          ตว สาสนมาคมฺม        ปตฺโตมฺหิ อจลํ ปทํ ฯ
         |๗๕.๑๐๓| ตึสกปฺปสหสฺสมฺหิ         สมฺพุทฺธมภิปูชยึ
                          ทุคฺคตึ นาภิชานามิ      พุทฺธปูชายิทํ ผลํ ฯ
         |๗๕.๑๐๔| กิเลสา ฌาปิตา มยฺหํ    ภวา สพฺเพ สมูหตา
                          นาโคว พนฺธนํ เฉตฺวา   วิหรามิ อนาสโว ฯ
         |๗๕.๑๐๕| สฺวาคตํ วต เม อาสิ       มม พุทฺธสฺส สนฺติเก
                         ติสฺโส วิชฺชา อนุปฺปตฺตา  กตํ พุทฺธสฺส สาสนํ ฯ
         |๗๕.๑๐๖| ปฏิสมฺภิทา จตสฺโส      วิโมกฺขาปิจ อฏฺฐิเม
                          ฉฬภิญฺญา สจฺฉิกตา    กตํ พุทฺธสฺส สาสนนฺติ ฯ
@เชิงอรรถ:  ม. ตาวตึสมคจฺฉหํ ฯ
             อิตฺถํ สุทํ อายสฺมา จนฺทนมาลิโย เถโร อิมา คาถาโย อภาสิตฺถาติ ฯ
                                จนฺทนมาลิยตฺเถรสฺส อปทานํ สมตฺตํ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๑๐๗-๑๑๑. https://84000.org/tipitaka/read/pali_read.php?B=33&A=2105&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=2105&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.1&item=75&items=1              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=75              ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=75              สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]