บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |
| |
พระไตรปิฎกเล่มที่ ๓๓ ภาษาบาลี อักษรไทย พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ
นวมํ สพฺพผลทายกตฺเถราปทานํ (๕๑๙) [๑๐๙] |๑๐๙.๕๑| วรุโณ นาม นาเมน พฺราหฺมโณ มนฺตปารคู ฉฑฺเฑตฺวา ทส ปุตฺตานิ วนมชฺโฌคหึ ตทา ฯ |๑๐๙.๕๒| อสฺสมํ สุกตํ กตฺวา สุวิภตฺตํ มโนรมํ ปณฺณสาลํ กริตฺวาน วสามิ ปวเน อหํ ฯ |๑๐๙.๕๓| ปทุมุตฺตโร โลกวิทู อาหุตีนํ ปฏิคฺคโห มมุทฺธริตุกาโม โส อาคญฺฉิ มม อสฺสมํ ฯ |๑๐๙.๕๔| ยาวตา วนสณฺฑมฺหิ โอภาโส วิปุโล อหุ พุทฺธสฺส อานุภาเวน ปชฺชลิ ปวนํ ตทา ฯ |๑๐๙.๕๕| ทิสฺวาน ปาฏิหิริยํ ๑- พุทฺธเสฏฺฐสฺส ตาทิโน ปตฺตปุฏํ คเหตฺวาน ผเลน ปูรยึ อหํ ฯ |๑๐๙.๕๖| อุปคนฺตฺวาน สมฺพุทฺธํ สห ๒- ขาริมทาสหํ อนุกมฺปาย เม พุทฺโธ อิทํ วจนมพฺรวิ ฯ |๑๐๙.๕๗| ขาริภารํ คเหตฺวาน ปจฺฉโต เอหิ เม ตุวํ ปริภุตฺเตว ๓- สงฺฆมฺหิ ปุญฺญํ ๔- ตว ภวิสฺสติ ฯ |๑๐๙.๕๘| ปุฏกนฺตํ คเหตฺวาน ภิกฺขุสงฺฆสฺสทาสหํ ตตฺถ จิตฺตํ ปสาเทตฺวา ตุสิตํ อุปปชฺชหํ ฯ |๑๐๙.๕๙| ตตฺถ ทิพฺเพหิ นจฺเจหิ คีเตหิ วาทิเตหิ จ ปุญฺญกมฺเมน สํยุตฺโต ๕- อนุโภมิ ยสํ ๖- อหํ ฯ @เชิงอรรถ: ๑ ม. ...ตํ ปาฏิหีรํ ฯ ยุ. ทิสฺวานหํ ปาฏิหีรํ ฯ ๒ ยุ. สาขาริกํ อทาสหํ ฯ @๓ ม. ยุ. ... จ ฯ ๔ ยุ. ปุญฺญํ ตํว ฯ ๕ ม. สํยุตฺตํ ฯ ๖ ม. สทา สุขํ ฯ |๑๐๙.๖๐| ยํ ยํ โยนูปปชฺชามิ เทวตฺตํ อถ มานุสํ โภเค เม อูนตา นตฺถิ ผลทานสฺสิทํ ผลํ ฯ |๑๐๙.๖๑| ยาวตา จตุโร ทีปา สสมุทฺทา สปพฺพตา ผลํ พุทฺธสฺส ทตฺวาน อิสฺสรํ การยึ ๑- อหํ ฯ |๑๐๙.๖๒| ยาวตา เย ปกฺขิคณา อากาเส อุปตนฺติ เจ ๒- เตปิ มํ วสมเนฺวนฺติ ผลทานสฺสิทํ ผลํ ฯ |๑๐๙.๖๓| ยาวตา วนสณฺฑมฺหิ ยกฺขา ภูตา จ รกฺขสา กุมฺภณฺฑา ครุฬา จาปิ ปาจริยํ ๓- อุเปนฺติ เม ฯ |๑๐๙.๖๔| กุมฺมา ๔- โสณา มธุกรา ฑํสา จ มกสา อุโภ เตปิ มํ วสมเนฺวนฺติ ผลทานสฺสิทํ ผลํ ฯ |๑๐๙.๖๕| สุปณฺณา นาม สกุณา ปกฺขิชาตา มหพฺพลา เตปิ มํ สรณํ ยนฺติ ผลทานสฺสิทํ ผลํ ฯ |๑๐๙.๖๖| เยปิ ทีฆายุกา นาคา อิทฺธิมนฺโต มหายสา เตปิ มํ วสมเนฺวนฺติ ผลทานสฺสิทํ ผลํ ฯ |๑๐๙.๖๗| สีหา พฺยคฺฆา จ ทีปิ จ อจฺฉโกกตรจฺฉกา เตปิ มํ วสมเนฺวนฺติ ผลทานสฺสิทํ ผลํ ฯ |๑๐๙.๖๘| โอสธิติณวาสี จ เย จ อากาสวาสิโน สพฺเพ มํ สรณํ ยนฺติ ผลทานสฺสิทํ ผลํ ฯ |๑๐๙.๖๙| สุทุทฺทสํ สุนิปุณํ คมฺภีรํ สุปกาสิตํ ผุสฺสยิตฺวา ๕- วิหรามิ ผลทานสฺสิทํ ผลํ ฯ @เชิงอรรถ: ๑ ม. ยุ. การยามหํ ฯ ๒ ยุ. เต ฯ ๓ ม. ยุ. ปาริจริยํ ฯ ๔ ยุ. กุมฺภโสณา ฯ @๕ โป. ม. ผสฺสยิตฺวา ฯ ยุ. ปสฺสิตฺวาน ฯ |๑๐๙.๗๐| วิโมกฺเข อฏฺฐ ผุสฺสิตฺวา วิหรามิ อนาสโว อาตาปี นิปโก จาปิ ๑- ผลทานสฺสิทํ ผลํ ฯ |๑๐๙.๗๑| เย ผลฏฺฐา พุทฺธปุตฺตา ขีณโทสา มหายสา อหํ อญฺญตโร เตสํ ผลทานสฺสิทํ ผลํ ฯ |๑๐๙.๗๒| อภิญฺญาปารมึ คนฺตฺวา สุกฺกมูเลน โจทิโต สพฺพาสเว ปริญฺญาย วิหรามิ อนาสโว ฯ |๑๐๙.๗๓| เตวิชฺชา อิทฺธิปตฺตา จ พุทฺธปุตฺตา มหายสา ทิพฺพโสตสมาปนฺนา เตสํ อญฺญตโร อหํ ฯ |๑๐๙.๗๔| สตสหสฺเส อิโต กปฺเป ยํ ผลํ อททึ ตทา ทุคฺคตึ นาภิชานามิ ผลทานสฺสิทํ ผลํ ฯ |๑๐๙.๗๕| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๑๐๙.๗๖| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๐๙.๗๗| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สพฺพผลทายโก เถโร อิมา คาถาโย อภาสิตฺถาติ ฯ สพฺพผลทายกตฺเถรสฺส อปทานํ สมตฺตํ ฯ @เชิงอรรถ: ๑ ม. ยุ. จาหํ ฯ
เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๑๕๙-๑๖๑. https://84000.org/tipitaka/read/pali_read.php?B=33&A=3115&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=3115&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.1&item=109&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=109 ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=109 สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33
|
บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]