บาลีพระไตรปิฎกเล่มที่ ๓๓ - พระสุตตันตปิฎกเล่มที่ ๒๕

เตปญฺญาโส ติณทายกวคฺโค ปฐมํ ติณมุฏฺฐิทายกตฺเถราปทานํ (๕๒๑) [๑๑๑] |๑๑๑.๑| หิมวนฺตสฺส อวิทูเร ลมฺพโก นาม ปพฺพโต ตตฺเถว ^๑- ติสฺโส สมฺพุทฺโธ อพฺโพกาสมฺหิ จงฺกมิ ฯ |๑๑๑.๒| มิคลุทฺโธ ปุเร ^๒- อาสึ อรญฺเญ กานเน อหํ ทิสฺวานาหํ เทวเทวํ ติณมุฏฺฐิมทาสหํ ฯ |๑๑๑.๓| นิสีทนตฺถํ พุทฺธสฺส ทตฺวา จิตฺตํ ปสาทยึ สมฺพุทฺธํ อภิวาทิตฺวา ปกฺกามึ อุตฺตรามุโข ฯ |๑๑๑.๔| อจิรํ คตมตฺตํ ^๓- มํ มิคราชา อเหฐยิ ^๔- สีเหน ฆาฏิโต ^๕- สนฺโต ตตฺถ กาลํ กโต อหํ ฯ |๑๑๑.๕| อาสนฺเน เม กตํ กมฺมํ พุทฺธเสฏฺเฐ อนาสเว สุมุตฺโต สรเวโคว ^๖- เทวโลกํ อคญฺฉหํ ฯ |๑๑๑.๖| ยูโป ตตฺถ สุโภ อาสิ ปุญฺญกมฺมาภินิมฺมิโต สหสฺสกณฺโฑ สตฺตเคณฺฑุ ธชาลุ หริตามโย ฯ @เชิงอรรถ: ^๑ ยุ. ตตฺโถปติสฺโส ฯ ^๒ ยุ. ตทา ฯ ^๓ ม. ยุ. คตมตฺตสฺส ฯ ^๔ ม. อโปฐยิ ฯ @^๕ ม. โปฐิโต ฯ ยุ. ปติโต ฯ ^๖ โป. ยุ. ... จ ฯ

--------------------------------------------------------------------------------------------- หน้าที่ ๑๖๔.

|๑๑๑.๗| ปภา นิทฺธาวเต ตสฺส สตรํสีว อุคฺคโต อากิณฺโณ เทวกญฺญาหิ อาโมทึ กามกามิหํ ฯ |๑๑๑.๘| เทวโลกา จวิตฺวาน สุกฺกมูเลน โจทิโต อาคนฺตฺวาน มนุสฺสตฺตํ ปตฺโตมฺหิ อาสวกฺขยํ ฯ |๑๑๑.๙| จตุนวุเต อิโต กปฺเป นิสีทนมกาสหํ ทุคฺคตึ นาภิชานามิ ติณมุฏฺเฐ อิทํ ผลํ ฯ |๑๑๑.๑๐| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๑๑๑.๑๑| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๑๑.๑๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ติณมุฏฺฐิทายโก เถโร อิมา คาถาโย อภาสิตฺถาติ ฯ ติณมุฏฺฐิทายกตฺเถรสฺส อปทานํ สมตฺตํ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๑๖๓-๑๖๔. https://84000.org/tipitaka/read/pali_read.php?B=33&A=3200&w=&modeTY=2&pagebreak=1 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=3200&modeTY=2&pagebreak=1 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.1&item=111&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=111 ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=111 สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33