บาลีพระไตรปิฎกเล่มที่ ๓๓ - พระสุตตันตปิฎกเล่มที่ ๒๕

อฏฺฐมํ โพธิสมฺมชฺชกตฺเถราปทานํ (๕๒๘) [๑๑๘] |๑๑๘.๔๘| อหํ ปุเร โพธิปตฺตํ อุชฺฌิตํ เจติยงฺคเณ ตํ คเหตฺวาน ฉฑฺเฑสึ อลภึ วีสตึ คุเณ ฯ |๑๑๘.๔๙| ตสฺส กมฺมสฺส เตเชน สํสรนฺโต ภวาภเว ทุเว ภเว สํสรามิ เทวตฺเต จาปิ มานุเส ฯ |๑๑๘.๕๐| เทวโลกา จวิตฺวาน อาคนฺตฺวา มานุสํ ภวํ ทุเว กุเล ปชายามิ ขตฺติเย จาปิ พฺราหฺมเณ ฯ |๑๑๘.๕๑| องฺคปจฺจงฺคสมฺปนฺโน อาโรหปริณาหวา อภิรูโป สุจิ โหมิ สมฺปุณฺณโก ^๑- อนูนโก ฯ @เชิงอรรถ: ^๑ ม. ยุ. สมฺปุณฺณงฺโค ฯ

--------------------------------------------------------------------------------------------- หน้าที่ ๑๗๐.

|๑๑๘.๕๒| เทวโลเก มนุสฺเส วา ชาโต วา ยตฺถ กตฺถจิ ภเว สุวณฺณวณฺโณ จ อุตฺตตฺตกนกูปโม ฯ |๑๑๘.๕๓| มุทุ ^๑- มทฺทวา สินิทฺธา สุขุมา สุกุมาริกา ฉวิ เม สพฺพทา โหติ โพธิปตฺเต สุฉฑฺฑิเต ฯ |๑๑๘.๕๔| ยโต กุโตจิ คตีสุ สรีเร สมุทาคเต น ลิมฺปติ รโชชลฺลํ วิปาโก ปตฺตฉฑฺฑิเต ฯ |๑๑๘.๕๕| อุเณฺห วาตาตเป ตสฺส อคฺคิตาเปน วา ปน ^๒- คตฺเต เสทา น มุญฺจนฺติ วิปาโก ปตฺตฉฑฺฑิเต ฯ |๑๑๘.๕๖| กุฏฺฐํ คณฺโฑ กิลาโส จ ติลกา ปิฬกา ตถา น โหนฺติ กาเย ททฺทุ จ วิปาโก ปตฺตฉฑฺฑิเต ฯ |๑๑๘.๕๗| อปรมฺปิ คุณนฺตสฺส นิพฺพตฺตติ ภวาภเว โรคา น โหนฺติ กายสฺมึ วิปาโก ปตฺตฉฑฺฑิเต ฯ |๑๑๘.๕๘| อปรมฺปิ คุณนฺตสฺส นิพฺพตฺตติ ภวาภเว น โหนฺติ จิตฺตชา ปีฬา วิปาโก ปตฺตฉฑฺฑิเต ฯ |๑๑๘.๕๙| อปรมฺปิ คุณนฺตสฺส นิพฺพตฺตติ ภวาภเว อมิตฺตา น ภวนฺตสฺส วิปาโก ปตฺตฉฑฺฑิเต ฯ |๑๑๘.๖๐| อปรมฺปิ คุณนฺตสฺส นิพฺพตฺตติ ภวาภเว อนูนโภโค ภวติ วิปาโก ปตฺตฉฑฺฑิเต ฯ |๑๑๘.๖๑| อปรมฺปิ คุณนฺตสฺส นิพฺพตฺตติ ภวาภเว อคฺคิราชูหิ โจเรหิ น โหติ อุทกา ^๓- ภยํ ฯ @เชิงอรรถ: ^๑ ม. ยุ. มุทุกา ... ฯ ^๒ ยุ. ปุน ฯ ^๓ ม. ยุ. อุทเก ฯ

--------------------------------------------------------------------------------------------- หน้าที่ ๑๗๑.

|๑๑๘.๖๒| อปรมฺปิ คุณนฺตสฺส นิพฺพตฺตติ ภวาภเว ทาสี ทาสา อนุจรา โหนฺติ จิตฺตานุวตฺตกา ฯ |๑๑๘.๖๓| ยมฺหิ อายุปฺปมาณมฺหิ ชายเต มานุเส ภเว ตโต น หายเต อายุ ติฏฺฐเต ยาวตายุกํ ฯ |๑๑๘.๖๔| อพฺภนฺตรา จ ^๑- พาหิรา เนคมา จ สรฏฺฐกา อนุยุตฺตา โหนฺติ สพฺเพปิ วุทฺธิกามา สุขิจฺฉกา ฯ |๑๑๘.๖๕| โภควา ยสวา โหมิ สิริมา ญาติปกฺขวา อเวโร ^๒- คตสนฺตาโส ภเวหิ ^๓- สพฺพทา ภเว ฯ |๑๑๘.๖๖| เทวา มนุสฺสา อสุรา คนฺธพฺพา ยกฺขรกฺขสา สพฺเพ เต ปริรกฺขนฺติ ภเว สํสรโต สทา ฯ |๑๑๘.๖๗| เทวโลเก มนุสฺเส วา ^๔- อนุโภตฺวา อุโภ ยเส อวสาเน จ นิพฺพานํ สิวํ ปตฺโต อนุตฺตรํ ฯ |๑๑๘.๖๘| สมฺพุทฺธมุทฺทิสิตฺวาน โพธึ วา ตสฺส สตฺถุโน โย ปุญฺญํ ปสเว โปโส ตสฺส กึ นาม ทุลฺลภํ ฯ |๑๑๘.๖๙| มคฺเค ผเล จ อาคเม ฌานาภิญฺญาคุเณสุ จ อญฺเญสํ อธิโก หุตฺวา นิพฺพายติ ^๕- อนาสโว ฯ |๑๑๘.๗๐| ปุเรหํ โพธิยา ปตฺตํ ฉฑฺเฑตฺวา หฏฺฐมานโส อิเมหิ วีสตงฺเคหิ สมงฺคี โหมิ สพฺพทา ฯ |๑๑๘.๗๑| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ @เชิงอรรถ: ^๑ ยุ. พหิจรา ฯ ^๒ ม. ยุ. อเปตภยสนฺตาโส ฯ ^๓ ยุ. ภเวสํ สพฺพโต ฯ @^๔ ม. จ ฯ ^๕ ม. ยุ. นิพฺพายามิ ฯ

--------------------------------------------------------------------------------------------- หน้าที่ ๑๗๒.

|๑๑๘.๗๒| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๑๘.๗๓| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา โพธิสมฺมชฺชโก เถโร อิมา คาถาโย อภาสิตฺถาติ ฯ โพธิสมฺมชฺชกตฺเถรสฺส อปทานํ สมตฺตํ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๑๖๙-๑๗๒. https://84000.org/tipitaka/read/pali_read.php?B=33&A=3324&w=&modeTY=2&pagebreak=1 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=3324&modeTY=2&pagebreak=1 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.1&item=118&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=118 ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=118 สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33