บาลีพระไตรปิฎกเล่มที่ ๓๓ - พระสุตตันตปิฎกเล่มที่ ๒๕

                                  ปญฺจมํ นนฺทกตฺเถราปทานํ (๕๔๕)
     [๑๓๕]   |๑๓๕.๑๔๓| ปทุมุตฺตโร นาม ชิโน  สพฺพธมฺเมสุ จกฺขุมา
                          อิโต สตสหสฺสมฺหิ          กปฺเป อุปฺปชฺชิ นายโก ฯ
      |๑๓๕.๑๔๔| หิตาย สพฺพสตฺตานํ        สุขาย วทตํ วโร
                          อตฺถาย ปุริสาชญฺโญ      ปฏิปนฺโน สเทวเก ฯ
      |๑๓๕.๑๔๕| ยสคฺคปตฺโต สิริมา          กิตฺติวณฺณภโฏ ชิโน
                          ปูชิโต สพฺพโลกสฺส         ทิสา สพฺพา สุวิสฺสุโต ฯ
      |๑๓๕.๑๔๖| อุตฺติณฺณวิจิกิจฺโฉ โส       วีติวตฺตกถํกโถ
                          ปริปุณฺณมนสงฺกปฺโป     ปตฺโต สมฺโพธิมุตฺตมํ ฯ
      |๑๓๕.๑๔๗| อนุปฺปนฺนสฺส มคฺคสฺส     อุปฺปาเทตา นรุตฺตโม
                          อนกฺขาตญฺจ อกฺขาสิ      อสญฺชาตญฺจ สญฺชนี ฯ
      |๑๓๕.๑๔๘| มคฺคญฺญู มคฺควิทู จ        มคฺคกฺขายี นราสโภ
                          มคฺคสฺส กุสโล สตฺถา      สารถีนํ นรุตฺตโม ฯ
      |๑๓๕.๑๔๙| ตทา มหาการุณิโก          ธมฺมํ เทเสสิ นายโก
                          นิมุคฺเค โมหปงฺกมฺหิ ^๑-  สมุทฺธรติ ปาณิโน ฯ
      |๑๓๕.๑๕๐| ภิกฺขุนีนํ โอวทเน             สาวกํ เชฏฺฐสมฺมตํ ^๒-
                          วณฺณยํ เอตทคฺคมฺหิ       ปญฺญาเปสิ มหามุนิ ฯ
      |๑๓๕.๑๕๑| ตํ สุตฺวาหํ ปมุทิโต           นิมนฺเตตฺวา ตถาคตํ
                          โภชยิตฺวา สสงฺฆนฺตํ       ปตฺถยึ ฐานมุตฺตมํ ฯ
      |๑๓๕.๑๕๒| ตทา ปมุทิโต นาโถ         มํ อโวจ มหาอิสิ
                          สุขี ภวสฺสุ ทีฆายุ ^๓-       ลจฺฉเสตํ มโนรถํ ฯ
      |๑๓๕.๑๕๓| สตสหสฺเส อิโต กปฺเป      โอกฺกากกุลสมฺภโว
                          โคตโม นาม นาเมน       สตฺถา โลเก ภวิสฺสติ ฯ
      |๑๓๕.๑๕๔| ตสฺส ธมฺเมสุ ทายาโท      โอรโส ธมฺมนิมฺมิโต
                          นนฺทโก นาม นาเมน      เหสฺสติ สตฺถุสาวโก ฯ
      |๑๓๕.๑๕๕| เตน กมฺเมน สุกเตน        เจตนาปณิธีหิ จ
                          ชหิตฺวา มานุสํ เทหํ         ตาวตึสํ ^๔- อคญฺฉหํ ฯ
      |๑๓๕.๑๕๖| ปจฺฉิเม จ ภเว ทานิ          ชาโต เสฏฺฐิกุเล อหํ
                          สาวตฺถิยํ ปุรวเร              อิทฺเธ ผีเต มหทฺธเน ฯ
      |๑๓๕.๑๕๗| ปุรปฺปเวเส สุคตํ              ทิสฺวา วิมฺหิตมานโส
                          เชตารามปฏิคฺคาเห        ปพฺพชึ อนคาริยํ ฯ
@เชิงอรรถ: ^๑ ม. กามปงฺกมฺหิ ฯ ^๒ ม. ยุ. เสฏฺฐสมฺมตํ ฯ ^๓ ม. ทีฆาวุ ฯ ^๔ ม. ยุ.
@ตาวตึสูปโค อหํ ฯ
      |๑๓๕.๑๕๘| น จิเรเนว กาเลน            อรหตฺตํ อปาปุณึ
                          ตโตหํ ติณฺณสํสาโร        สาสิโต สพฺพทสฺสินา ฯ
      |๑๓๕.๑๕๙| ภิกฺขุนีนํ ธมฺมกถํ            ปริปุจฺฉา กรึ อหํ
                          สาสิตา ตา มยา สพฺพา   อภวึสุ อนาสวา ฯ
      |๑๓๕.๑๖๐| สตานิ ปญฺจนูนานิ          ตทา ตุฏฺโฐ มหาหิโต
                          ภิกฺขุนีนํ โอวทตํ             อคฺคฏฺฐาเน ฐเปสิ มํ ฯ
      |๑๓๕.๑๖๑| สตสหสฺเส กตํ กมฺมํ        ผลํ ทสฺเสสิ เม อิธ
                          สุมุตฺโต สรเวโคว            กิเลสา ฌาปิตา มม ฯ
      |๑๓๕.๑๖๒| กิเลสา ฌาปิตา มยฺหํ      ภวา สพฺเพ สมูหตา
                          นาโคว พนฺธนํ เฉตฺวา     วิหรามิ อนาสโว ฯ
      |๑๓๕.๑๖๓| สฺวาคตํ วต เม อาสิ         มม พุทฺธสฺส สนฺติเก
                          ติสฺโส วิชฺชา อนุปฺปตฺตา  กตํ พุทฺธสฺส สาสนํ ฯ
      |๑๓๕.๑๖๔| ปฏิสมฺภิทา จตสฺโส         วิโมกฺขาปิจ อฏฺฐิเม
                          ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
           อิตฺถํ สุทํ อายสฺมา นนฺทโก เถโร อิมา คาถาโย อภาสิตฺถาติ ฯ
                                   นนฺทกตฺเถรสฺส อปทานํ สมตฺตํ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๒๓๔-๒๓๖. https://84000.org/tipitaka/read/pali_read.php?B=33&A=4694&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=4694&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.1&item=135&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=135 ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=135 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=50&A=6786 The Pali Atthakatha in Roman :- https://84000.org/tipitaka/atthapali/read_rm.php?B=50&A=6786 สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33