บาลีพระไตรปิฎกเล่มที่ ๓๓ - พระสุตตันตปิฎกเล่มที่ ๒๕

หน้าที่ ๒๕๔.

เถรีอปทานํ ปฐโม สุเมธาวคฺโค ปฐมํ สุเมธาเถริยาปทานํ (๑) อถ เถริกาปทานานิ สุณาถ [๑๔๑] |๑๔๑.๑| ภควติ โกนาคมเน สงฺฆารามมฺหิ นิเวสมฺหิ ^๑- สขิโย ติสฺโส ชนิโย วิหารทานํ อทมฺหเส ^๒- ฯ |๑๔๑.๒| ทสกฺขตฺตุํ สตกฺขตฺตุํ ^[๓]- สตานํ จ สตกฺขตฺตุํ เทเวสุ อุปปชฺชิมฺห โก วาโท มานุเส ภเว ฯ |๑๔๑.๓| เทเวสุ มหิทฺธิกา หุตฺวา ^๔- มานุสกมฺหิ โก วาโท สตฺตรตนสฺส มเหสี อิตฺถีรตนํ อหํ ภวึ ฯ |๑๔๑.๔| ตตฺถ ^๕- สญฺจิตํ กุสลํ สุสมิทฺธกุลปฺปชา ธนญฺชานี จ เขมา จ อหํปิจ ตโย ชนา ฯ |๑๔๑.๕| อารามํ สุกตํ กตฺวา สพฺพาวยวมณฺฑิตํ พุทฺธปฺปมุขสงฺฆสฺส นิยฺยาเทตฺวา ปโมทิตา ฯ |๑๔๑.๖| ยตฺถ ยตฺถูปปชฺชามิ ตสฺส กมฺมสฺส วาหสา เทเวสุ อคฺคตํ ปตฺตา มนุสฺเสสุ ตเถว จ ฯ |๑๔๑.๗| อิมสฺมึเยว กปฺปสฺมึ พฺรหฺมพนฺธุ มหายโส กสฺสโป นาม นาเมน อุปฺปชฺชิ วทตํ วโร ฯ @เชิงอรรถ: ^๑ ม. ยุ. นวนิเวสมฺหิ ฯ ^๒ ม. ยุ. อทาสิมฺห ฯ ^๓ ม. ทสสตกฺขตฺตุํ ฯ @^๔ ม. ยุ. อหุมฺหา ฯ ^๕ ม. อิธ สญฺจิตกุสลา ฯ ยุ. อิธ สญฺจิตา กุสลํ ฯ

--------------------------------------------------------------------------------------------- หน้าที่ ๒๕๕.

|๑๔๑.๘| อุปฏฺฐาโก มเหสิสฺส ตทา อาสิ นริสฺสโร กาสิราชา กิกี นาม พาราณสีปุรุตฺตเม ฯ |๑๔๑.๙| ตสฺสาสุํ สตฺต ธีตโร ราชกญฺญา สุเข ฐิตา พุทฺธุปฏฺฐานนิรตา พฺรหฺมจริยํ จรึสุ ตา ฯ |๑๔๑.๑๐| ตาสํ สหายิกา หุตฺวา สีเลสุ สุสมาหิตา ทตฺวา ทานานิ สกฺกจฺจํ อคาเรว วตฺตํ จรึ ฯ |๑๔๑.๑๑| เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตาวตึสูปคา อหํ ฯ |๑๔๑.๑๒| ตโต จุตา ยามาสคฺคํ ^๑- ตโตหํ ตุสิตํ คตา ตโต จ นิมฺมานรตึ วสวตฺติปุรํ คตา ^๒- ฯ |๑๔๑.๑๓| ยตฺถ ยตฺถูปปชฺชามิ ปุญฺญกมฺมสมาหิตา ตตฺถ ตตฺเถว ราชูนํ มเหสิตฺตมการยึ ฯ |๑๔๑.๑๔| ตโต จุตา มนุสฺสตฺเต ราชูนํ จกฺกวตฺตินํ มณฺฑลีนญฺจ ราชูนํ มเหสิตฺตมการยึ ฯ |๑๔๑.๑๕| สมฺปตฺตึ อนุโภตฺวาน เทเวสุ มานุเสสุ จ สพฺพตฺถ สุขิตา หุตฺวา เนกชาตีสุ สํสรึ ฯ |๑๔๑.๑๖| โส เหตุ จ โส ปภโว ตํ ^๓- มูลํ สาสเน ขมํ ตํ ปฐมํ สโมธานํ ตํ ธมฺมรตาย นิพฺพุตํ ^๔- ฯ |๑๔๑.๑๗| กิเลสา ฌาปิตา มยฺหํ ภวา สพฺเพ สมูหตา นาคีว พนฺธนํ เฉตฺวา วิหรามิ อนาสวา ฯ @เชิงอรรถ: ^๑ ม. ยุ. ยามมคํ ฯ ^๒ ม. ยุ. ตโต ฯ ^๓ ยุ. ตํ มูลํ สา จ สาสเน ขนฺติ ฯ @^๔ ม. ยุ. นิพฺพานํ ฯ

--------------------------------------------------------------------------------------------- หน้าที่ ๒๕๖.

|๑๔๑.๑๘| สฺวาคตํ วต เม อาสิ พุทฺธเสฏฺฐสฺส ^๑- สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๔๑.๑๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ สุเมธา ภิกฺขุนี อิมา คาถาโย อภาสิตฺถาติ ฯ สุเมธาเถริยา อปทานํ สมตฺตํ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๒๕๔-๒๕๖. https://84000.org/tipitaka/read/pali_read.php?B=33&A=5093&w=&modeTY=2&pagebreak=1 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=5093&modeTY=2&pagebreak=1 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.1&item=141&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=152 ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=141 สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33